Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၉. အရညာယတနဣသိသုတ္တံ
9. Araññāyatanaisisuttaṃ
၂၅၅. သာဝတ္ထိယံ ။ ‘‘ဘူတပုဗ္ဗံ, ဘိက္ခဝေ, သမ္ဗဟုလာ ဣသယော သီလဝန္တော ကလ္ယာဏဓမ္မာ အရညာယတနေ ပဏ္ဏကုဋီသု သမ္မန္တိ။ အထ ခော, ဘိက္ခဝေ, သက္ကော စ ဒေဝာနမိန္ဒော ဝေပစိတ္တိ စ အသုရိန္ဒော ယေန တေ ဣသယော သီလဝန္တော ကလ္ယာဏဓမ္မာ တေနုပသင္ကမိံသု။ အထ ခော, ဘိက္ခဝေ, ဝေပစိတ္တိ အသုရိန္ဒော ပဋလိယော 1 ဥပာဟနာ အာရောဟိတ္ဝာ ခဂ္ဂံ ဩလဂ္ဂေတ္ဝာ ဆတ္တေန ဓာရိယမာနေန အဂ္ဂဒ္ဝာရေန အသ္သမံ ပဝိသိတ္ဝာ တေ ဣသယော သီလဝန္တေ ကလ္ယာဏဓမ္မေ အပဗ္ယာမတော ကရိတ္ဝာ အတိက္ကမိ။ အထ ခော, ဘိက္ခဝေ, သက္ကော ဒေဝာနမိန္ဒော ပဋလိယော ဥပာဟနာ ဩရောဟိတ္ဝာ ခဂ္ဂံ အညေသံ ဒတ္ဝာ ဆတ္တံ အပနာမေတ္ဝာ ဒ္ဝာရေနေဝ အသ္သမံ ပဝိသိတ္ဝာ တေ ဣသယော သီလဝန္တေ ကလ္ယာဏဓမ္မေ အနုဝာတံ ပဉ္ဇလိကော နမသ္သမာနော အဋ္ဌာသိ’’။ အထ ခော, ဘိက္ခဝေ, တေ ဣသယော သီလဝန္တော ကလ္ယာဏဓမ္မာ သက္ကံ ဒေဝာနမိန္ဒံ ဂာထာယ အဇ္ဈဘာသိံသု –
255. Sāvatthiyaṃ . ‘‘Bhūtapubbaṃ, bhikkhave, sambahulā isayo sīlavanto kalyāṇadhammā araññāyatane paṇṇakuṭīsu sammanti. Atha kho, bhikkhave, sakko ca devānamindo vepacitti ca asurindo yena te isayo sīlavanto kalyāṇadhammā tenupasaṅkamiṃsu. Atha kho, bhikkhave, vepacitti asurindo paṭaliyo 2 upāhanā ārohitvā khaggaṃ olaggetvā chattena dhāriyamānena aggadvārena assamaṃ pavisitvā te isayo sīlavante kalyāṇadhamme apabyāmato karitvā atikkami. Atha kho, bhikkhave, sakko devānamindo paṭaliyo upāhanā orohitvā khaggaṃ aññesaṃ datvā chattaṃ apanāmetvā dvāreneva assamaṃ pavisitvā te isayo sīlavante kalyāṇadhamme anuvātaṃ pañjaliko namassamāno aṭṭhāsi’’. Atha kho, bhikkhave, te isayo sīlavanto kalyāṇadhammā sakkaṃ devānamindaṃ gāthāya ajjhabhāsiṃsu –
‘‘ဂန္ဓော ဣသီနံ စိရဒိက္ခိတာနံ၊
‘‘Gandho isīnaṃ ciradikkhitānaṃ,
ကာယာ စုတော ဂစ္ဆတိ မာလုတေန။
Kāyā cuto gacchati mālutena;
ဣတော ပဋိက္ကမ္မ သဟသ္သနေတ္တ၊
Ito paṭikkamma sahassanetta,
ဂန္ဓော ဣသီနံ အသုစိ ဒေဝရာဇာ’’တိ။
Gandho isīnaṃ asuci devarājā’’ti.
‘‘ဂန္ဓော ဣသီနံ စိရဒိက္ခိတာနံ၊
‘‘Gandho isīnaṃ ciradikkhitānaṃ,
သုစိတ္ရပုပ္ဖံ သိရသ္မိံဝ မာလံ။
Sucitrapupphaṃ sirasmiṃva mālaṃ;
ဂန္ဓံ ဧတံ ပဋိကင္ခာမ ဘန္တေ၊
Gandhaṃ etaṃ paṭikaṅkhāma bhante,
န ဟေတ္ထ ဒေဝာ ပဋိကူလသညိနော’’တိ။
Na hettha devā paṭikūlasaññino’’ti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၉. အရညာယတနဣသိသုတ္တဝဏ္ဏနာ • 9. Araññāyatanaisisuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၉. အရညာယတနဣသိသုတ္တဝဏ္ဏနာ • 9. Araññāyatanaisisuttavaṇṇanā