| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၂. အသ္သဒ္ဓသုတ္တံ
2. Assaddhasuttaṃ
၂၀၂. ‘‘အသပ္ပုရိသဉ္စ ဝော, ဘိက္ခဝေ, ဒေသေသ္သာမိ, အသပ္ပုရိသေန အသပ္ပုရိသတရဉ္စ; သပ္ပုရိသဉ္စ, သပ္ပုရိသေန သပ္ပုရိသတရဉ္စ။ တံ သုဏာထ။ပေ.။။
202. ‘‘Asappurisañca vo, bhikkhave, desessāmi, asappurisena asappurisatarañca; sappurisañca, sappurisena sappurisatarañca. Taṃ suṇātha…pe….
‘‘ကတမော စ, ဘိက္ခဝေ, အသပ္ပုရိသော? ဣဓ, ဘိက္ခဝေ, ဧကစ္စော အသ္သဒ္ဓော ဟောတိ, အဟိရိကော ဟောတိ, အနောတ္တပ္ပီ ဟောတိ, အပ္ပသ္သုတော ဟောတိ, ကုသီတော ဟောတိ, မုဋ္ဌသ္သတိ ဟောတိ, ဒုပ္ပညော ဟောတိ။ အယံ ဝုစ္စတိ, ဘိက္ခဝေ, အသပ္ပုရိသော။
‘‘Katamo ca, bhikkhave, asappuriso? Idha, bhikkhave, ekacco assaddho hoti, ahiriko hoti, anottappī hoti, appassuto hoti, kusīto hoti, muṭṭhassati hoti, duppañño hoti. Ayaṃ vuccati, bhikkhave, asappuriso.
‘‘ကတမော စ, ဘိက္ခဝေ, အသပ္ပုရိသေန အသပ္ပုရိသတရော? ဣဓ, ဘိက္ခဝေ, ဧကစ္စော အတ္တနာ စ အသ္သဒ္ဓော ဟောတိ, ပရဉ္စ အသ္သဒ္ဓိယေ 1 သမာဒပေတိ; အတ္တနာ စ အဟိရိကော ဟောတိ, ပရဉ္စ အဟိရိကတာယ သမာဒပေတိ; အတ္တနာ စ အနောတ္တပ္ပီ ဟောတိ, ပရဉ္စ အနောတ္တပ္ပေ သမာဒပေတိ; အတ္တနာ စ အပ္ပသ္သုတော ဟောတိ, ပရဉ္စ အပ္ပသ္သုတေ သမာဒပေတိ; အတ္တနာ စ ကုသီတော ဟောတိ, ပရဉ္စ ကောသဇ္ဇေ သမာဒပေတိ; အတ္တနာ စ မုဋ္ဌသ္သတိ ဟောတိ, ပရဉ္စ မုဋ္ဌသ္သစ္စေ 2 သမာဒပေတိ; အတ္တနာ စ ဒုပ္ပညော ဟောတိ, ပရဉ္စ ဒုပ္ပညတာယ သမာဒပေတိ။ အယံ ဝုစ္စတိ, ဘိက္ခဝေ, အသပ္ပုရိသေန အသပ္ပုရိသတရော။
‘‘Katamo ca, bhikkhave, asappurisena asappurisataro? Idha, bhikkhave, ekacco attanā ca assaddho hoti, parañca assaddhiye 3 samādapeti; attanā ca ahiriko hoti, parañca ahirikatāya samādapeti; attanā ca anottappī hoti, parañca anottappe samādapeti; attanā ca appassuto hoti, parañca appassute samādapeti; attanā ca kusīto hoti, parañca kosajje samādapeti; attanā ca muṭṭhassati hoti, parañca muṭṭhassacce 4 samādapeti; attanā ca duppañño hoti, parañca duppaññatāya samādapeti. Ayaṃ vuccati, bhikkhave, asappurisena asappurisataro.
‘‘ကတမော စ, ဘိက္ခဝေ, သပ္ပုရိသော? ဣဓ, ဘိက္ခဝေ, ဧကစ္စော သဒ္ဓော ဟောတိ, ဟိရိမာ ဟောတိ, ဩတ္တပ္ပီ ဟောတိ, ဗဟုသ္သုတော ဟောတိ, အာရဒ္ဓဝီရိယော ဟောတိ, သတိမာ ဟောတိ, ပညဝာ ဟောတိ။ အယံ ဝုစ္စတိ, ဘိက္ခဝေ, သပ္ပုရိသော။
‘‘Katamo ca, bhikkhave, sappuriso? Idha, bhikkhave, ekacco saddho hoti, hirimā hoti, ottappī hoti, bahussuto hoti, āraddhavīriyo hoti, satimā hoti, paññavā hoti. Ayaṃ vuccati, bhikkhave, sappuriso.
‘‘ကတမော စ, ဘိက္ခဝေ, သပ္ပုရိသေန သပ္ပုရိသတရော? ဣဓ, ဘိက္ခဝေ, ဧကစ္စော အတ္တနာ စ သဒ္ဓာသမ္ပန္နော ဟောတိ, ပရဉ္စ သဒ္ဓာသမ္ပဒာယ သမာဒပေတိ ; အတ္တနာ စ ဟိရိမာ ဟောတိ, ပရဉ္စ ဟိရိမတာယ 5 သမာဒပေတိ; အတ္တနာ စ ဩတ္တပ္ပီ ဟောတိ, ပရဉ္စ ဩတ္တပ္ပေ သမာဒပေတိ; အတ္တနာ စ ဗဟုသ္သုတော ဟောတိ, ပရဉ္စ ဗာဟုသစ္စေ သမာဒပေတိ; အတ္တနာ စ အာရဒ္ဓဝီရိယော ဟောတိ, ပရဉ္စ ဝီရိယာရမ္ဘေ သမာဒပေတိ; အတ္တနာ စ ဥပဋ္ဌိတသ္သတိ ဟောတိ, ပရဉ္စ သတိဥပဋ္ဌာနေ 6 သမာဒပေတိ; အတ္တနာ စ ပညာသမ္ပန္နော ဟောတိ, ပရဉ္စ ပညာသမ္ပဒာယ သမာဒပေတိ။ အယံ ဝုစ္စတိ, ဘိက္ခဝေ, သပ္ပုရိသေန သပ္ပုရိသတရော’’တိ။ ဒုတိယံ။
‘‘Katamo ca, bhikkhave, sappurisena sappurisataro? Idha, bhikkhave, ekacco attanā ca saddhāsampanno hoti, parañca saddhāsampadāya samādapeti ; attanā ca hirimā hoti, parañca hirimatāya 7 samādapeti; attanā ca ottappī hoti, parañca ottappe samādapeti; attanā ca bahussuto hoti, parañca bāhusacce samādapeti; attanā ca āraddhavīriyo hoti, parañca vīriyārambhe samādapeti; attanā ca upaṭṭhitassati hoti, parañca satiupaṭṭhāne 8 samādapeti; attanā ca paññāsampanno hoti, parañca paññāsampadāya samādapeti. Ayaṃ vuccati, bhikkhave, sappurisena sappurisataro’’ti. Dutiyaṃ.
Footnotes:
Related texts:
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၁၀. သိက္ခာပဒသုတ္တာဒိဝဏ္ဏနာ • 1-10. Sikkhāpadasuttādivaṇṇanā
