Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၃. အသုရိန္ဒကသုတ္တံ
3. Asurindakasuttaṃ
၁၈၉. ဧကံ သမယံ ဘဂဝာ ရာဇဂဟေ ဝိဟရတိ ဝေဠုဝနေ ကလန္ဒကနိဝာပေ။ အသ္သောသိ ခော အသုရိန္ဒကဘာရဒ္ဝာဇော ဗ္ရာဟ္မဏော – ‘‘ဘာရဒ္ဝာဇဂောတ္တော ဗ္ရာဟ္မဏော ကိရ သမဏသ္သ ဂောတမသ္သ သန္တိကေ အဂာရသ္မာ အနဂာရိယံ ပဗ္ဗဇိတော’’တိ ကုပိတော အနတ္တမနော ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အသဗ္ဘာဟိ ဖရုသာဟိ ဝာစာဟိ အက္ကောသတိ ပရိဘာသတိ။ ဧဝံ ဝုတ္တေ, ဘဂဝာ တုဏ္ဟီ အဟောသိ။ အထ ခော အသုရိန္ဒကဘာရဒ္ဝာဇော ဗ္ရာဟ္မဏော ဘဂဝန္တံ ဧတဒဝောစ – ‘‘ဇိတောသိ, သမဏ, ဇိတောသိ, သမဏာ’’တိ။
189. Ekaṃ samayaṃ bhagavā rājagahe viharati veḷuvane kalandakanivāpe. Assosi kho asurindakabhāradvājo brāhmaṇo – ‘‘bhāradvājagotto brāhmaṇo kira samaṇassa gotamassa santike agārasmā anagāriyaṃ pabbajito’’ti kupito anattamano yena bhagavā tenupasaṅkami; upasaṅkamitvā bhagavantaṃ asabbhāhi pharusāhi vācāhi akkosati paribhāsati. Evaṃ vutte, bhagavā tuṇhī ahosi. Atha kho asurindakabhāradvājo brāhmaṇo bhagavantaṃ etadavoca – ‘‘jitosi, samaṇa, jitosi, samaṇā’’ti.
‘‘ဇယံ ဝေ မညတိ ဗာလော၊ ဝာစာယ ဖရုသံ ဘဏံ။
‘‘Jayaṃ ve maññati bālo, vācāya pharusaṃ bhaṇaṃ;
ဇယဉ္စေဝသ္သ တံ ဟောတိ၊ ယာ တိတိက္ခာ ဝိဇာနတော။
Jayañcevassa taṃ hoti, yā titikkhā vijānato.
‘‘တသ္သေဝ တေန ပာပိယော၊ ယော ကုဒ္ဓံ ပဋိကုဇ္ဈတိ။
‘‘Tasseva tena pāpiyo, yo kuddhaṃ paṭikujjhati;
ကုဒ္ဓံ အပ္ပဋိကုဇ္ဈန္တော၊ သင္ဂာမံ ဇေတိ ဒုဇ္ဇယံ။
Kuddhaṃ appaṭikujjhanto, saṅgāmaṃ jeti dujjayaṃ.
‘‘ဥဘိန္နမတ္ထံ စရတိ၊ အတ္တနော စ ပရသ္သ စ။
‘‘Ubhinnamatthaṃ carati, attano ca parassa ca;
ပရံ သင္ကုပိတံ ဉတ္ဝာ၊ ယော သတော ဥပသမ္မတိ။
Paraṃ saṅkupitaṃ ñatvā, yo sato upasammati.
‘‘ဥဘိန္နံ တိကိစ္ဆန္တာနံ၊ အတ္တနော စ ပရသ္သ စ။
‘‘Ubhinnaṃ tikicchantānaṃ, attano ca parassa ca;
ဇနာ မညန္တိ ဗာလောတိ၊ ယေ ဓမ္မသ္သ အကောဝိဒာ’’တိ။
Janā maññanti bāloti, ye dhammassa akovidā’’ti.
ဧဝံ ဝုတ္တေ, အသုရိန္ဒကဘာရဒ္ဝာဇော ဗ္ရာဟ္မဏော ဘဂဝန္တံ ဧတဒဝောစ – ‘‘အဘိက္ကန္တံ, ဘော ဂောတမ။ပေ.။ အဗ္ဘညာသိ။ အညတရော စ ပနာယသ္မာ ဘာရဒ္ဝာဇော အရဟတံ အဟောသီ’’တိ။
Evaṃ vutte, asurindakabhāradvājo brāhmaṇo bhagavantaṃ etadavoca – ‘‘abhikkantaṃ, bho gotama…pe… abbhaññāsi. Aññataro ca panāyasmā bhāradvājo arahataṃ ahosī’’ti.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၃. အသုရိန္ဒကသုတ္တဝဏ္ဏနာ • 3. Asurindakasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၃. အသုရိန္ဒကသုတ္တဝဏ္ဏနာ • 3. Asurindakasuttavaṇṇanā