| Library / Tipiṭaka / තිපිටක • Tipiṭaka / ඉතිවුත්‌තකපාළි • Itivuttakapāḷi |
4. අතපනීයසුත්‌තං
4. Atapanīyasuttaṃ
31. වුත්‌තඤ්‌හෙතං භගවතා, වුත්‌තමරහතාති මෙ සුතං –
31. Vuttañhetaṃ bhagavatā, vuttamarahatāti me sutaṃ –
‘‘ද්‌වෙමෙ, භික්‌ඛවෙ, ධම්‌මා අතපනීයා. කතමෙ ද්‌වෙ? ඉධ, භික්‌ඛවෙ, එකච්‌චො කතකල්‍යාණො හොති, කතකුසලො, කතභීරුත්‌තාණො, අකතපාපො, අකතලුද්‌දො, අකතකිබ්‌බිසො. සො ‘කතං මෙ කල්‍යාණ’න්‌තිපි න තප්‌පති, ‘අකතං මෙ පාප’න්‌තිපි න තප්‌පති. ඉමෙ ඛො, භික්‌ඛවෙ, ද්‌වෙ ධම්‌මා අතපනීයා’’ති. එතමත්‌ථං භගවා අවොච. තත්‌ථෙතං ඉති වුච්‌චති –
‘‘Dveme, bhikkhave, dhammā atapanīyā. Katame dve? Idha, bhikkhave, ekacco katakalyāṇo hoti, katakusalo, katabhīruttāṇo, akatapāpo, akataluddo, akatakibbiso. So ‘kataṃ me kalyāṇa’ntipi na tappati, ‘akataṃ me pāpa’ntipi na tappati. Ime kho, bhikkhave, dve dhammā atapanīyā’’ti. Etamatthaṃ bhagavā avoca. Tatthetaṃ iti vuccati –
‘‘කායදුච්‌චරිතං හිත්‌වා, වචීදුච්‌චරිතානි ච;
‘‘Kāyaduccaritaṃ hitvā, vacīduccaritāni ca;
මනොදුච්‌චරිතං හිත්‌වා, යඤ්‌චඤ්‌ඤං දොසසඤ්‌හිතං.
Manoduccaritaṃ hitvā, yañcaññaṃ dosasañhitaṃ.
‘‘අකත්‌වාකුසලං කම්‌මං, කත්‌වාන කුසලං බහුං;
‘‘Akatvākusalaṃ kammaṃ, katvāna kusalaṃ bahuṃ;
කායස්‌ස භෙදා සප්‌පඤ්‌ඤො, සග්‌ගං සො උපපජ්‌ජතී’’ති.
Kāyassa bhedā sappañño, saggaṃ so upapajjatī’’ti.
අයම්‌පි අත්‌ථො වුත්‌තො භගවතා, ඉති මෙ සුතන්‌ති. චතුත්‌ථං.
Ayampi attho vutto bhagavatā, iti me sutanti. Catutthaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ඉතිවුත්‌තක-අට්‌ඨකථා • Itivuttaka-aṭṭhakathā / 4. අතපනීයසුත්‌තවණ්‌ණනා • 4. Atapanīyasuttavaṇṇanā
