Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၆. စာလာသုတ္တံ
6. Cālāsuttaṃ
၁၆၇. သာဝတ္ထိနိဒာနံ။ အထ ခော စာလာ ဘိက္ခုနီ ပုဗ္ဗဏ္ဟသမယံ နိဝာသေတ္ဝာ။ပေ.။ အညတရသ္မိံ ရုက္ခမူလေ ဒိဝာဝိဟာရံ နိသီဒိ။ အထ ခော မာရော ပာပိမာ ယေန စာလာ ဘိက္ခုနီ တေနုပသင္ကမိ; ဥပသင္ကမိတ္ဝာ စာလံ ဘိက္ခုနိံ ဧတဒဝောစ – ‘‘ကိံ နု တ္ဝံ, ဘိက္ခုနိ, န ရောစေသီ’’တိ? ‘‘ဇာတိံ ခ္ဝာဟံ, အာဝုသော, န ရောစေမီ’’တိ။
167. Sāvatthinidānaṃ. Atha kho cālā bhikkhunī pubbaṇhasamayaṃ nivāsetvā…pe… aññatarasmiṃ rukkhamūle divāvihāraṃ nisīdi. Atha kho māro pāpimā yena cālā bhikkhunī tenupasaṅkami; upasaṅkamitvā cālaṃ bhikkhuniṃ etadavoca – ‘‘kiṃ nu tvaṃ, bhikkhuni, na rocesī’’ti? ‘‘Jātiṃ khvāhaṃ, āvuso, na rocemī’’ti.
‘‘ကိံ နု ဇာတိံ န ရောစေသိ၊ ဇာတော ကာမာနိ ဘုဉ္ဇတိ။
‘‘Kiṃ nu jātiṃ na rocesi, jāto kāmāni bhuñjati;
ကော နု တံ ဣဒမာဒပယိ၊ ဇာတိံ မာ ရောစ 1 ဘိက္ခုနီ’’တိ။
Ko nu taṃ idamādapayi, jātiṃ mā roca 2 bhikkhunī’’ti.
ဗန္ဓံ ဝဓံ ပရိက္လေသံ၊ တသ္မာ ဇာတိံ န ရောစယေ။
Bandhaṃ vadhaṃ pariklesaṃ, tasmā jātiṃ na rocaye.
‘‘ဗုဒ္ဓော ဓမ္မမဒေသေသိ၊ ဇာတိယာ သမတိက္ကမံ။
‘‘Buddho dhammamadesesi, jātiyā samatikkamaṃ;
သဗ္ဗဒုက္ခပ္ပဟာနာယ၊ သော မံ သစ္စေ နိဝေသယိ။
Sabbadukkhappahānāya, so maṃ sacce nivesayi.
‘‘ယေ စ ရူပူပဂာ သတ္တာ၊ ယေ စ အရူပဋ္ဌာယိနော။
‘‘Ye ca rūpūpagā sattā, ye ca arūpaṭṭhāyino;
နိရောဓံ အပ္ပဇာနန္တာ၊ အာဂန္တာရော ပုနဗ္ဘဝ’’န္တိ။
Nirodhaṃ appajānantā, āgantāro punabbhava’’nti.
အထ ခော မာရော ပာပိမာ ‘‘ဇာနာတိ မံ စာလာ ဘိက္ခုနီ’’တိ ဒုက္ခီ ဒုမ္မနော တတ္ထေဝန္တရဓာယီတိ။
Atha kho māro pāpimā ‘‘jānāti maṃ cālā bhikkhunī’’ti dukkhī dummano tatthevantaradhāyīti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၆. စာလာသုတ္တဝဏ္ဏနာ • 6. Cālāsuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၆. စာလာသုတ္တဝဏ္ဏနာ • 6. Cālāsuttavaṇṇanā