| Library / Tipiṭaka / တိပိဋက • Tipiṭaka / မဇ္ဈိမနိကာယ (အဋ္ဌကထာ) • Majjhimanikāya (aṭṭhakathā) |
၂. ဆန္နောဝာဒသုတ္တဝဏ္ဏနာ
2. Channovādasuttavaṇṇanā
၃၈၉. ဧဝံ မေ သုတန္တိ ဆန္နောဝာဒသုတ္တံ။ တတ္ထ ဆန္နောတိ ဧဝံနာမကော ထေရော, န အဘိနိက္ခမနံ နိက္ခန္တတ္ထေရော။ ပဋိသလ္လာနာတိ ဖလသမာပတ္တိတော။ ဂိလာနပုစ္ဆကာတိ ဂိလာနုပဋ္ဌာနံ နာမ ဗုဒ္ဓဝဏ္ဏိတံ, တသ္မာ ဧဝမာဟ။ သတ္ထန္တိ ဇီဝိတဟာရကသတ္ထံ။ နာဝကင္ခာမီတိ ဣစ္ဆာမိ။
389.Evaṃme sutanti channovādasuttaṃ. Tattha channoti evaṃnāmako thero, na abhinikkhamanaṃ nikkhantatthero. Paṭisallānāti phalasamāpattito. Gilānapucchakāti gilānupaṭṭhānaṃ nāma buddhavaṇṇitaṃ, tasmā evamāha. Satthanti jīvitahārakasatthaṃ. Nāvakaṅkhāmīti icchāmi.
၃၉၀. အနုပဝဇ္ဇန္တိ အနုပ္ပတ္တိကံ အပ္ပဋိသန္ဓိကံ။
390.Anupavajjanti anuppattikaṃ appaṭisandhikaṃ.
၃၉၁. ဧတံ မမာတိအာဒီနိ တဏ္ဟာမာနဒိဋ္ဌိဂာဟဝသေန ဝုတ္တာနိ။ နိရောဓံ ဒိသ္ဝာတိ ခယဝယံ ဉတ္ဝာ။ နေတံ မမ နေသောဟမသ္မိ န မေသော အတ္တာတိ သမနုပသ္သာမီတိ အနိစ္စံ ဒုက္ခံ အနတ္တာတိ သမနုပသ္သာမိ။
391.Etaṃ mamātiādīni taṇhāmānadiṭṭhigāhavasena vuttāni. Nirodhaṃ disvāti khayavayaṃ ñatvā. Netaṃ mama nesohamasmi na meso attāti samanupassāmīti aniccaṃ dukkhaṃ anattāti samanupassāmi.
၃၉၃. တသ္မာတိ ယသ္မာ မာရဏန္တိကဝေဒနံ အဓိဝာသေတုံ အသက္ကောန္တော သတ္ထံ အာဟရာမီတိ ဝဒတိ, တသ္မာ။ ပုထုဇ္ဇနော အာယသ္မာ, တေန ဣဒမ္ပိ မနသိ ကရောဟီတိ ဒီပေတိ။ နိစ္စကပ္ပန္တိ နိစ္စကာလံ။ နိသ္သိတသ္သာတိ တဏ္ဟာဒိဋ္ဌီဟိ နိသ္သိတသ္သ။ စလိတန္တိ ဝိပ္ဖန္ဒိတံ ဟောတိ။ ပသ္သဒ္ဓီတိ ကာယစိတ္တပသ္သဒ္ဓိ, ကိလေသပသ္သဒ္ဓိ နာမ ဟောတီတိ အတ္ထော။ နတီတိ တဏ္ဟာနတိ။ နတိယာ အသတီတိ ဘဝတ္ထာယ အာလယနိကန္တိပရိယုဋ္ဌာနေသု အသတိ။ အာဂတိဂတိ န ဟောတီတိ ပဋိသန္ဓိဝသေန အာဂတိ နာမ န ဟောတိ, စုတိဝသေန ဂမနံ နာမ န ဟောတိ။ စုတူပပာတောတိ စဝနဝသေန စုတိ, ဥပပဇ္ဇနဝသေန ဥပပာတော။ နေဝိဓ န ဟုရံ န ဥဘယမန္တရေနာတိ နယိဓ လောကေ, န ပရလောကေ, န ဥဘယတ္ထ ဟောတိ။ ဧသေဝန္တော ဒုက္ခသ္သာတိ ဝဋ္ဋဒုက္ခကိလေသဒုက္ခသ္သ အယမေဝ အန္တော အယံ ပရိစ္ဆေဒော ပရိဝဋုမဘာဝော ဟောတိ။ အယမေဝ ဟိ ဧတ္ထ အတ္ထော။ ယေ ပန ‘‘န ဥဘယမန္တရေနာ’’တိ ဝစနံ ဂဟေတ္ဝာ အန္တရာဘဝံ ဣစ္ဆန္တိ, တေသံ ဥတ္တရံ ဟေဋ္ဌာ ဝုတ္တမေဝ။
393.Tasmāti yasmā māraṇantikavedanaṃ adhivāsetuṃ asakkonto satthaṃ āharāmīti vadati, tasmā. Puthujjano āyasmā, tena idampi manasi karohīti dīpeti. Niccakappanti niccakālaṃ. Nissitassāti taṇhādiṭṭhīhi nissitassa. Calitanti vipphanditaṃ hoti. Passaddhīti kāyacittapassaddhi, kilesapassaddhi nāma hotīti attho. Natīti taṇhānati. Natiyā asatīti bhavatthāya ālayanikantipariyuṭṭhānesu asati. Āgatigati na hotīti paṭisandhivasena āgati nāma na hoti, cutivasena gamanaṃ nāma na hoti. Cutūpapātoti cavanavasena cuti, upapajjanavasena upapāto. Nevidha na huraṃ na ubhayamantarenāti nayidha loke, na paraloke, na ubhayattha hoti. Esevanto dukkhassāti vaṭṭadukkhakilesadukkhassa ayameva anto ayaṃ paricchedo parivaṭumabhāvo hoti. Ayameva hi ettha attho. Ye pana ‘‘na ubhayamantarenā’’ti vacanaṃ gahetvā antarābhavaṃ icchanti, tesaṃ uttaraṃ heṭṭhā vuttameva.
၃၉၄. သတ္ထံ အာဟရေသီတိ ဇီဝိတဟာရကံ သတ္ထံ အာဟရိ, ကဏ္ဌနာဠိံ ဆိန္ဒိ။ အထသ္သ တသ္မိံ ခဏေ မရဏဘယံ ဩက္ကမိ, ဂတိနိမိတ္တံ ဥပဋ္ဌာသိ။ သော အတ္တနော ပုထုဇ္ဇနဘာဝံ ဉတ္ဝာ သံဝိဂ္ဂော ဝိပသ္သနံ ပဋ္ဌပေတ္ဝာ သင္ခာရေ ပရိဂ္ဂဏ္ဟန္တော အရဟတ္တံ ပတ္ဝာ သမသီသီ ဟုတ္ဝာ ပရိနိဗ္ဗာယိ။ သမ္မုခာယေဝ အနုပဝဇ္ဇတာ ဗ္ယာကတာတိ ကိဉ္စာပိ ဣဒံ ထေရသ္သ ပုထုဇ္ဇနကာလေ ဗ္ယာကရဏံ ဟောတိ, ဧတေန ပန ဗ္ယာကရဏေန အနန္တရာယမသ္သ ပရိနိဗ္ဗာနံ အဟောသိ။ တသ္မာ ဘဂဝာ တမေဝ ဗ္ယာကရဏံ ဂဟေတ္ဝာ ကထေသိ။ ဥပဝဇ္ဇကုလာနီတိ ဥပသင္ကမိတဗ္ဗကုလာနိ။ ဣမိနာ ထေရော, – ‘‘ဘန္တေ, ဧဝံ ဥပဋ္ဌာကေသု စ ဥပဋ္ဌာယိကာသု စ ဝိဇ္ဇမာနာသု သော ဘိက္ခု တုမ္ဟာကံ သာသနေ ပရိနိဗ္ဗာယိသ္သတီ’’တိ ပုစ္ဆတိ။ အထသ္သ ဘဂဝာ ကုလေသု သံသဂ္ဂာဘာဝံ ဒီပေန္တော ဟောန္တိ ဟေတေ သာရိပုတ္တာတိအာဒိမာဟ။ ဣမသ္မိံ ကိရ ဌာနေ ထေရသ္သ ကုလေသု အသံသဋ္ဌဘာဝော ပာကဋော အဟောသိ။ သေသံ သဗ္ဗတ္ထ ဥတ္တာနမေဝာတိ။
394.Satthaṃ āharesīti jīvitahārakaṃ satthaṃ āhari, kaṇṭhanāḷiṃ chindi. Athassa tasmiṃ khaṇe maraṇabhayaṃ okkami, gatinimittaṃ upaṭṭhāsi. So attano puthujjanabhāvaṃ ñatvā saṃviggo vipassanaṃ paṭṭhapetvā saṅkhāre pariggaṇhanto arahattaṃ patvā samasīsī hutvā parinibbāyi. Sammukhāyeva anupavajjatā byākatāti kiñcāpi idaṃ therassa puthujjanakāle byākaraṇaṃ hoti, etena pana byākaraṇena anantarāyamassa parinibbānaṃ ahosi. Tasmā bhagavā tameva byākaraṇaṃ gahetvā kathesi. Upavajjakulānīti upasaṅkamitabbakulāni. Iminā thero, – ‘‘bhante, evaṃ upaṭṭhākesu ca upaṭṭhāyikāsu ca vijjamānāsu so bhikkhu tumhākaṃ sāsane parinibbāyissatī’’ti pucchati. Athassa bhagavā kulesu saṃsaggābhāvaṃ dīpento honti hete sāriputtātiādimāha. Imasmiṃ kira ṭhāne therassa kulesu asaṃsaṭṭhabhāvo pākaṭo ahosi. Sesaṃ sabbattha uttānamevāti.
ပပဉ္စသူဒနိယာ မဇ္ဈိမနိကာယဋ္ဌကထာယ
Papañcasūdaniyā majjhimanikāyaṭṭhakathāya
ဆန္နောဝာဒသုတ္တဝဏ္ဏနာ နိဋ္ဌိတာ။
Channovādasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / မဇ္ဈိမနိကာယ • Majjhimanikāya / ၂. ဆန္နောဝာဒသုတ္တံ • 2. Channovādasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / မဇ္ဈိမနိကာယ (ဋီကာ) • Majjhimanikāya (ṭīkā) / ၂. ဆန္နောဝာဒသုတ္တဝဏ္ဏနာ • 2. Channovādasuttavaṇṇanā
