Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၁၆. ဒုက္ကရပဉ္ဟာသုတ္တံ
16. Dukkarapañhāsuttaṃ
၃၂၉. ‘‘ကိံ နု ခော, အာဝုသော သာရိပုတ္တ, ဣမသ္မိံ ဓမ္မဝိနယေ ဒုက္ကရ’’န္တိ? ‘‘ပဗ္ဗဇ္ဇာ ခော, အာဝုသော, ဣမသ္မိံ ဓမ္မဝိနယေ ဒုက္ကရာ’’တိ။ ‘‘ပဗ္ဗဇိတေန ပနာဝုသော, ကိံ ဒုက္ကရ’’န္တိ? ‘‘ပဗ္ဗဇိတေန ခော, အာဝုသော, အဘိရတိ ဒုက္ကရာ’’တိ။ ‘‘အဘိရတေန ပနာဝုသော, ကိံ ဒုက္ကရ’’န္တိ? ‘‘အဘိရတေန ခော, အာဝုသော, ဓမ္မာနုဓမ္မပ္ပဋိပတ္တိ ဒုက္ကရာ’’တိ။ ‘‘ကီဝစိရံ ပနာဝုသော, ဓမ္မာနုဓမ္မပ္ပဋိပန္နော ဘိက္ခု အရဟံ အသ္သာ’’တိ? ‘‘နစိရံ, အာဝုသော’’တိ။ သောဠသမံ။
329. ‘‘Kiṃ nu kho, āvuso sāriputta, imasmiṃ dhammavinaye dukkara’’nti? ‘‘Pabbajjā kho, āvuso, imasmiṃ dhammavinaye dukkarā’’ti. ‘‘Pabbajitena panāvuso, kiṃ dukkara’’nti? ‘‘Pabbajitena kho, āvuso, abhirati dukkarā’’ti. ‘‘Abhiratena panāvuso, kiṃ dukkara’’nti? ‘‘Abhiratena kho, āvuso, dhammānudhammappaṭipatti dukkarā’’ti. ‘‘Kīvaciraṃ panāvuso, dhammānudhammappaṭipanno bhikkhu arahaṃ assā’’ti? ‘‘Naciraṃ, āvuso’’ti. Soḷasamaṃ.
ဇမ္ဗုခာဒကသံယုတ္တံ သမတ္တံ။
Jambukhādakasaṃyuttaṃ samattaṃ.
တသ္သုဒ္ဒာနံ –
Tassuddānaṃ –
နိဗ္ဗာနံ အရဟတ္တဉ္စ၊ ဓမ္မဝာဒီ ကိမတ္ထိယံ။
Nibbānaṃ arahattañca, dhammavādī kimatthiyaṃ;
အသ္သာသော ပရမသ္သာသော၊ ဝေဒနာ အာသဝာဝိဇ္ဇာ။
Assāso paramassāso, vedanā āsavāvijjā;
တဏ္ဟာ ဩဃာ ဥပာဒာနံ၊ ဘဝော ဒုက္ခဉ္စ သက္ကာယော။
Taṇhā oghā upādānaṃ, bhavo dukkhañca sakkāyo.
ဣမသ္မိံ ဓမ္မဝိနယေ ဒုက္ကရန္တိ။
Imasmiṃ dhammavinaye dukkaranti.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁၆. ဒုက္ကရပဉ္ဟာသုတ္တဝဏ္ဏနာ • 16. Dukkarapañhāsuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၆. ဒုက္ကရပဉ္ဟသုတ္တဝဏ္ဏနာ • 16. Dukkarapañhasuttavaṇṇanā