| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၇. ဒုတိယဩဝာဒသုတ္တံ
7. Dutiyaovādasuttaṃ
၁၅၀. ရာဇဂဟေ ဝိဟရတိ ဝေဠုဝနေ 1။ အထ ခော အာယသ္မာ မဟာကသ္သပော ယေန ဘဂဝာ တေနုပသင္ကမိ။ပေ.။ ဧကမန္တံ နိသိန္နံ ခော အာယသ္မန္တံ မဟာကသ္သပံ ဘဂဝာ ဧတဒဝောစ – ‘‘ဩဝဒ, ကသ္သပ, ဘိက္ခူ; ကရောဟိ, ကသ္သပ, ဘိက္ခူနံ ဓမ္မိံ ကထံ။ အဟံ ဝာ, ကသ္သပ , ဘိက္ခူ ဩဝဒေယ္ယံ တ္ဝံ ဝာ; အဟံ ဝာ ဘိက္ခူနံ ဓမ္မိံ ကထံ ကရေယ္ယံ တ္ဝံ ဝာ’’တိ။
150. Rājagahe viharati veḷuvane 2. Atha kho āyasmā mahākassapo yena bhagavā tenupasaṅkami…pe… ekamantaṃ nisinnaṃ kho āyasmantaṃ mahākassapaṃ bhagavā etadavoca – ‘‘ovada, kassapa, bhikkhū; karohi, kassapa, bhikkhūnaṃ dhammiṃ kathaṃ. Ahaṃ vā, kassapa , bhikkhū ovadeyyaṃ tvaṃ vā; ahaṃ vā bhikkhūnaṃ dhammiṃ kathaṃ kareyyaṃ tvaṃ vā’’ti.
‘‘ဒုဗ္ဗစာ ခော, ဘန္တေ, ဧတရဟိ ဘိက္ခူ, ဒောဝစသ္သကရဏေဟိ ဓမ္မေဟိ သမန္နာဂတာ အက္ခမာ အပ္ပဒက္ခိဏဂ္ဂာဟိနော အနုသာသနိံ။ ယသ္သ ကသ္သစိ, ဘန္တေ, သဒ္ဓာ နတ္ထိ ကုသလေသု ဓမ္မေသု, ဟိရီ 3 နတ္ထိ ကုသလေသု ဓမ္မေသု, ဩတ္တပ္ပံ နတ္ထိ ကုသလေသု ဓမ္မေသု, ဝီရိယံ နတ္ထိ ကုသလေသု ဓမ္မေသု, ပညာ နတ္ထိ ကုသလေသု ဓမ္မေသု, တသ္သ ယာ ရတ္တိ ဝာ ဒိဝသော ဝာ အာဂစ္ဆတိ 4, ဟာနိယေဝ ပာဋိကင္ခာ ကုသလေသု ဓမ္မေသု, နော ဝုဒ္ဓိ။
‘‘Dubbacā kho, bhante, etarahi bhikkhū, dovacassakaraṇehi dhammehi samannāgatā akkhamā appadakkhiṇaggāhino anusāsaniṃ. Yassa kassaci, bhante, saddhā natthi kusalesu dhammesu, hirī 5 natthi kusalesu dhammesu, ottappaṃ natthi kusalesu dhammesu, vīriyaṃ natthi kusalesu dhammesu, paññā natthi kusalesu dhammesu, tassa yā ratti vā divaso vā āgacchati 6, hāniyeva pāṭikaṅkhā kusalesu dhammesu, no vuddhi.
‘‘သေယ္ယထာပိ, ဘန္တေ, ကာဠပက္ခေ စန္ဒသ္သ ယာ ရတ္တိ ဝာ ဒိဝသော ဝာ အာဂစ္ဆတိ, ဟာယတေဝ ဝဏ္ဏေန, ဟာယတိ မဏ္ဍလေန, ဟာယတိ အာဘာယ, ဟာယတိ အာရောဟပရိဏာဟေန။ ဧဝမေဝ ခော, ဘန္တေ, ယသ္သ ကသ္သစိ သဒ္ဓာ နတ္ထိ ကုသလေသု ဓမ္မေသု။ပေ.။ ဟိရီ နတ္ထိ။ ဩတ္တပ္ပံ နတ္ထိ ။ ဝီရိယံ နတ္ထိ။ ပညာ နတ္ထိ။ ကုသလေသု ဓမ္မေသု တသ္သ ယာ ရတ္တိ ဝာ ဒိဝသော ဝာ အာဂစ္ဆတိ, ဟာနိယေဝ ပာဋိကင္ခာ ကုသလေသု ဓမ္မေသု, နော ဝုဒ္ဓိ။
‘‘Seyyathāpi, bhante, kāḷapakkhe candassa yā ratti vā divaso vā āgacchati, hāyateva vaṇṇena, hāyati maṇḍalena, hāyati ābhāya, hāyati ārohapariṇāhena. Evameva kho, bhante, yassa kassaci saddhā natthi kusalesu dhammesu…pe… hirī natthi… ottappaṃ natthi … vīriyaṃ natthi… paññā natthi… kusalesu dhammesu tassa yā ratti vā divaso vā āgacchati, hāniyeva pāṭikaṅkhā kusalesu dhammesu, no vuddhi.
‘‘‘အသ္သဒ္ဓော ပုရိသပုဂ္ဂလော’တိ, ဘန္တေ, ပရိဟာနမေတံ; ‘အဟိရိကော ပုရိသပုဂ္ဂလော’တိ, ဘန္တေ, ပရိဟာနမေတံ; ‘အနောတ္တပ္ပီ ပုရိသပုဂ္ဂလော’တိ, ဘန္တေ, ပရိဟာနမေတံ; ‘ကုသီတော ပုရိသပုဂ္ဂလော’တိ, ဘန္တေ, ပရိဟာနမေတံ; ‘ဒုပ္ပညော ပုရိသပုဂ္ဂလော’တိ, ဘန္တေ, ပရိဟာနမေတံ; ‘ကောဓနော ပုရိသပုဂ္ဂလော’တိ, ဘန္တေ, ပရိဟာနမေတံ; ‘ဥပနာဟီ ပုရိသပုဂ္ဂလော’တိ, ဘန္တေ, ပရိဟာနမေတံ; ‘န သန္တိ ဘိက္ခူ ဩဝာဒကာ’တိ, ဘန္တေ, ပရိဟာနမေတံ။
‘‘‘Assaddho purisapuggalo’ti, bhante, parihānametaṃ; ‘ahiriko purisapuggalo’ti, bhante, parihānametaṃ; ‘anottappī purisapuggalo’ti, bhante, parihānametaṃ; ‘kusīto purisapuggalo’ti, bhante, parihānametaṃ; ‘duppañño purisapuggalo’ti, bhante, parihānametaṃ; ‘kodhano purisapuggalo’ti, bhante, parihānametaṃ; ‘upanāhī purisapuggalo’ti, bhante, parihānametaṃ; ‘na santi bhikkhū ovādakā’ti, bhante, parihānametaṃ.
‘‘ယသ္သ ကသ္သစိ, ဘန္တေ, သဒ္ဓာ အတ္ထိ ကုသလေသု ဓမ္မေသု, ဟိရီ အတ္ထိ ကုသလေသု ဓမ္မေသု, ဩတ္တပ္ပံ အတ္ထိ ကုသလေသု ဓမ္မေသု, ဝီရိယံ အတ္ထိ ကုသလေသု ဓမ္မေသု, ပညာ အတ္ထိ ကုသလေသု ဓမ္မေသု, တသ္သ ယာ ရတ္တိ ဝာ ဒိဝသော ဝာ အာဂစ္ဆတိ, ဝုဒ္ဓိယေဝ ပာဋိကင္ခာ ကုသလေသု ဓမ္မေသု, နော ပရိဟာနိ။
‘‘Yassa kassaci, bhante, saddhā atthi kusalesu dhammesu, hirī atthi kusalesu dhammesu, ottappaṃ atthi kusalesu dhammesu, vīriyaṃ atthi kusalesu dhammesu, paññā atthi kusalesu dhammesu, tassa yā ratti vā divaso vā āgacchati, vuddhiyeva pāṭikaṅkhā kusalesu dhammesu, no parihāni.
‘‘သေယ္ယထာပိ, ဘန္တေ, ဇုဏ္ဟပက္ခေ စန္ဒသ္သ ယာ ရတ္တိ ဝာ ဒိဝသော ဝာ အာဂစ္ဆတိ, ဝဍ္ဎတေဝ ဝဏ္ဏေန, ဝဍ္ဎတိ မဏ္ဍလေန , ဝဍ္ဎတိ အာဘာယ, ဝဍ္ဎတိ အာရောဟပရိဏာဟေန။ ဧဝမေဝ ခော, ဘန္တေ, ယသ္သ ကသ္သစိ သဒ္ဓာ အတ္ထိ ကုသလေသု ဓမ္မေသု။ ဟိရီ အတ္ထိ။ပေ.။ ဩတ္တပ္ပံ အတ္ထိ။ ဝီရိယံ အတ္ထိ။ ပညာ အတ္ထိ ကုသလေသု ဓမ္မေသု တသ္သ ယာ ရတ္တိ ဝာ ဒိဝသော ဝာ အာဂစ္ဆတိ, ဝုဒ္ဓိယေဝ ပာဋိကင္ခာ ကုသလေသု ဓမ္မေသု, နော ပရိဟာနိ။
‘‘Seyyathāpi, bhante, juṇhapakkhe candassa yā ratti vā divaso vā āgacchati, vaḍḍhateva vaṇṇena, vaḍḍhati maṇḍalena , vaḍḍhati ābhāya, vaḍḍhati ārohapariṇāhena. Evameva kho, bhante, yassa kassaci saddhā atthi kusalesu dhammesu… hirī atthi…pe… ottappaṃ atthi… vīriyaṃ atthi… paññā atthi kusalesu dhammesu tassa yā ratti vā divaso vā āgacchati, vuddhiyeva pāṭikaṅkhā kusalesu dhammesu, no parihāni.
‘‘‘သဒ္ဓော ပုရိသပုဂ္ဂလော’တိ, ဘန္တေ, အပရိဟာနမေတံ; ‘ဟိရိမာ ပုရိသပုဂ္ဂလော’တိ, ဘန္တေ, အပရိဟာနမေတံ; ‘ဩတ္တပ္ပီ ပုရိသပုဂ္ဂလော’တိ, ဘန္တေ, အပရိဟာနမေတံ; ‘အာရဒ္ဓဝီရိယော ပုရိသပုဂ္ဂလော’တိ, ဘန္တေ, အပရိဟာနမေတံ; ‘ပညဝာ ပုရိသပုဂ္ဂလော’တိ, ဘန္တေ, အပရိဟာနမေတံ; ‘အက္ကောဓနော ပုရိသပုဂ္ဂလော’တိ, ဘန္တေ, အပရိဟာနမေတံ; ‘အနုပနာဟီ ပုရိသပုဂ္ဂလော’တိ, ဘန္တေ, အပရိဟာနမေတံ; ‘သန္တိ ဘိက္ခူ ဩဝာဒကာ’တိ, ဘန္တေ, အပရိဟာနမေတ’’န္တိ။
‘‘‘Saddho purisapuggalo’ti, bhante, aparihānametaṃ; ‘hirimā purisapuggalo’ti, bhante, aparihānametaṃ; ‘ottappī purisapuggalo’ti, bhante, aparihānametaṃ; ‘āraddhavīriyo purisapuggalo’ti, bhante, aparihānametaṃ; ‘paññavā purisapuggalo’ti, bhante, aparihānametaṃ; ‘akkodhano purisapuggalo’ti, bhante, aparihānametaṃ; ‘anupanāhī purisapuggalo’ti, bhante, aparihānametaṃ; ‘santi bhikkhū ovādakā’ti, bhante, aparihānameta’’nti.
‘‘သာဓု သာဓု, ကသ္သပ။ ယသ္သ ကသ္သစိ, ကသ္သပ, သဒ္ဓာ နတ္ထိ ကုသလေသု ဓမ္မေသု။ပေ.။ ဟိရီ နတ္ထိ။ ဩတ္တပ္ပံ နတ္ထိ။ ဝီရိယံ နတ္ထိ။ ပညာ နတ္ထိ ကုသလေသု ဓမ္မေသု တသ္သ ယာ ရတ္တိ ဝာ ဒိဝသော ဝာ အာဂစ္ဆတိ, ဟာနိယေဝ ပာဋိကင္ခာ ကုသလေသု ဓမ္မေသု, နော ဝုဒ္ဓိ။
‘‘Sādhu sādhu, kassapa. Yassa kassaci, kassapa, saddhā natthi kusalesu dhammesu…pe… hirī natthi… ottappaṃ natthi… vīriyaṃ natthi… paññā natthi kusalesu dhammesu tassa yā ratti vā divaso vā āgacchati, hāniyeva pāṭikaṅkhā kusalesu dhammesu, no vuddhi.
‘‘သေယ္ယထာပိ, ကသ္သပ, ကာဠပက္ခေ စန္ဒသ္သ ယာ ရတ္တိ ဝာ ဒိဝသော ဝာ အာဂစ္ဆတိ, ဟာယတေဝ ဝဏ္ဏေန။ပေ.။ ဟာယတိ အာရောဟပရိဏာဟေန။ ဧဝမေဝ ခော, ကသ္သပ, ယသ္သ ကသ္သစိ သဒ္ဓာ နတ္ထိ ကုသလေသု ဓမ္မေသု။ပေ.။ ဟိရီ နတ္ထိ။ ဩတ္တပ္ပံ နတ္ထိ။ ဝီရိယံ နတ္ထိ။ ပညာ နတ္ထိ ကုသလေသု ဓမ္မေသု တသ္သ ယာ ရတ္တိ ဝာ ဒိဝသော ဝာ အာဂစ္ဆတိ, ဟာနိယေဝ ပာဋိကင္ခာ ကုသလေသု ဓမ္မေသု, နော ဝုဒ္ဓိ။ ‘အသ္သဒ္ဓော ပုရိသပုဂ္ဂလော’တိ, ကသ္သပ, ပရိဟာနမေတံ ; အဟိရိကော။ပေ.။ အနောတ္တပ္ပီ။ ကုသီတော။ ဒုပ္ပညော။ ကောဓနော။ ‘ဥပနာဟီ ပုရိသပုဂ္ဂလော’တိ, ကသ္သပ, ပရိဟာနမေတံ; ‘န သန္တိ ဘိက္ခူ ဩဝာဒကာ’တိ, ကသ္သပ, ပရိဟာနမေတံ။
‘‘Seyyathāpi, kassapa, kāḷapakkhe candassa yā ratti vā divaso vā āgacchati, hāyateva vaṇṇena…pe… hāyati ārohapariṇāhena. Evameva kho, kassapa, yassa kassaci saddhā natthi kusalesu dhammesu…pe… hirī natthi… ottappaṃ natthi… vīriyaṃ natthi… paññā natthi kusalesu dhammesu tassa yā ratti vā divaso vā āgacchati, hāniyeva pāṭikaṅkhā kusalesu dhammesu, no vuddhi. ‘Assaddho purisapuggalo’ti, kassapa, parihānametaṃ ; ahiriko…pe… anottappī… kusīto… duppañño… kodhano… ‘upanāhī purisapuggalo’ti, kassapa, parihānametaṃ; ‘na santi bhikkhū ovādakā’ti, kassapa, parihānametaṃ.
‘‘ယသ္သ ကသ္သစိ, ကသ္သပ, သဒ္ဓာ အတ္ထိ ကုသလေသု ဓမ္မေသု။ပေ.။ ဟိရီ အတ္ထိ။ ဩတ္တပ္ပံ အတ္ထိ။ ဝီရိယံ အတ္ထိ။ ပညာ အတ္ထိ ကုသလေသု ဓမ္မေသု တသ္သ ယာ ရတ္တိ ဝာ ဒိဝသော ဝာ အာဂစ္ဆတိ, ဝုဒ္ဓိယေဝ ပာဋိကင္ခာ ကုသလေသု ဓမ္မေသု, နော ပရိဟာနိ။
‘‘Yassa kassaci, kassapa, saddhā atthi kusalesu dhammesu…pe… hirī atthi… ottappaṃ atthi… vīriyaṃ atthi… paññā atthi kusalesu dhammesu tassa yā ratti vā divaso vā āgacchati, vuddhiyeva pāṭikaṅkhā kusalesu dhammesu, no parihāni.
‘‘သေယ္ယထာပိ, ကသ္သပ, ဇုဏ္ဟပက္ခေ စန္ဒသ္သ ယာ ရတ္တိ ဝာ ဒိဝသော ဝာ အာဂစ္ဆတိ, ဝဍ္ဎတေဝ ဝဏ္ဏေန, ဝဍ္ဎတိ မဏ္ဍလေန, ဝဍ္ဎတိ အာဘာယ, ဝဍ္ဎတိ အာရောဟပရိဏာဟေန။ ဧဝမေဝ ခော, ကသ္သပ, ယသ္သ ကသ္သစိ သဒ္ဓာ အတ္ထိ ကုသလေသု ဓမ္မေသု ဟိရီ အတ္ထိ။ ဩတ္တပ္ပံ အတ္ထိ။ ဝီရိယံ အတ္ထိ။ ပညာ အတ္ထိ ကုသလေသု ဓမ္မေသု တသ္သ ယာ ရတ္တိ ဝာ ဒိဝသော ဝာ အာဂစ္ဆတိ, ဝုဒ္ဓိယေဝ ပာဋိကင္ခာ ကုသလေသု ဓမ္မေသု, နော ပရိဟာနိ။
‘‘Seyyathāpi, kassapa, juṇhapakkhe candassa yā ratti vā divaso vā āgacchati, vaḍḍhateva vaṇṇena, vaḍḍhati maṇḍalena, vaḍḍhati ābhāya, vaḍḍhati ārohapariṇāhena. Evameva kho, kassapa, yassa kassaci saddhā atthi kusalesu dhammesu hirī atthi… ottappaṃ atthi… vīriyaṃ atthi… paññā atthi kusalesu dhammesu tassa yā ratti vā divaso vā āgacchati, vuddhiyeva pāṭikaṅkhā kusalesu dhammesu, no parihāni.
‘‘‘သဒ္ဓော ပုရိသပုဂ္ဂလော’တိ, ကသ္သပ, အပရိဟာနမေတံ; ဟိရိမာ။ပေ.။ ဩတ္တပ္ပီ။ အာရဒ္ဓဝီရိယော။ ပညဝာ။ အက္ကောဓနော။ ‘အနုပနာဟီ ပုရိသပုဂ္ဂလော’တိ, ကသ္သပ, အပရိဟာနမေတံ; ‘သန္တိ ဘိက္ခူ ဩဝာဒကာ’တိ, ကသ္သပ, အပရိဟာနမေတ’’န္တိ။ သတ္တမံ။
‘‘‘Saddho purisapuggalo’ti, kassapa, aparihānametaṃ; hirimā…pe… ottappī… āraddhavīriyo… paññavā… akkodhano… ‘anupanāhī purisapuggalo’ti, kassapa, aparihānametaṃ; ‘santi bhikkhū ovādakā’ti, kassapa, aparihānameta’’nti. Sattamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၇. ဒုတိယဩဝာဒသုတ္တဝဏ္ဏနာ • 7. Dutiyaovādasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၇. ဒုတိယဩဝာဒသုတ္တဝဏ္ဏနာ • 7. Dutiyaovādasuttavaṇṇanā
