| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၈. ဒုတိယပာပဓမ္မသုတ္တံ
8. Dutiyapāpadhammasuttaṃ
၂၀၈. ‘‘ပာပဉ္စ ဝော, ဘိက္ခဝေ, ဒေသေသ္သာမိ, ပာပေန ပာပတရဉ္စ; ကလ္ယာဏဉ္စ, ကလ္ယာဏေန ကလ္ယာဏတရဉ္စ။ တံ သုဏာထ, သာဓုကံ မနသိကရောထ; ဘာသိသ္သာမီ’’တိ။ ဧဝံ။ပေ.။ ဧတဒဝောစ –
208. ‘‘Pāpañca vo, bhikkhave, desessāmi, pāpena pāpatarañca; kalyāṇañca, kalyāṇena kalyāṇatarañca. Taṃ suṇātha, sādhukaṃ manasikarotha; bhāsissāmī’’ti. Evaṃ…pe… etadavoca –
‘‘ကတမော စ, ဘိက္ခဝေ, ပာပော? ဣဓ, ဘိက္ခဝေ, ဧကစ္စော မိစ္ဆာဒိဋ္ဌိကော ဟောတိ။ပေ.။ မိစ္ဆာဉာဏီ ဟောတိ, မိစ္ဆာဝိမုတ္တိ ဟောတိ။ အယံ ဝုစ္စတိ, ဘိက္ခဝေ, ပာပော။
‘‘Katamo ca, bhikkhave, pāpo? Idha, bhikkhave, ekacco micchādiṭṭhiko hoti…pe… micchāñāṇī hoti, micchāvimutti hoti. Ayaṃ vuccati, bhikkhave, pāpo.
‘‘ကတမော စ, ဘိက္ခဝေ, ပာပေန ပာပတရော? ဣဓ, ဘိက္ခဝေ, ဧကစ္စော အတ္တနာ စ မိစ္ဆာဒိဋ္ဌိကော ဟောတိ, ပရဉ္စ မိစ္ဆာဒိဋ္ဌိယာ သမာဒပေတိ။ပေ.။ အတ္တနာ စ မိစ္ဆာဉာဏီ ဟောတိ, ပရဉ္စ မိစ္ဆာဉာဏေ သမာဒပေတိ; အတ္တနာ စ မိစ္ဆာဝိမုတ္တိ ဟောတိ, ပရဉ္စ မိစ္ဆာဝိမုတ္တိယာ သမာဒပေတိ။ အယံ ဝုစ္စတိ, ဘိက္ခဝေ, ပာပေန ပာပတရော။
‘‘Katamo ca, bhikkhave, pāpena pāpataro? Idha, bhikkhave, ekacco attanā ca micchādiṭṭhiko hoti, parañca micchādiṭṭhiyā samādapeti…pe… attanā ca micchāñāṇī hoti, parañca micchāñāṇe samādapeti; attanā ca micchāvimutti hoti, parañca micchāvimuttiyā samādapeti. Ayaṃ vuccati, bhikkhave, pāpena pāpataro.
‘‘ကတမော စ, ဘိက္ခဝေ, ကလ္ယာဏော? ဣဓ, ဘိက္ခဝေ, ဧကစ္စော သမ္မာဒိဋ္ဌိကော ဟောတိ ။ပေ.။ သမ္မာဉာဏီ ဟောတိ, သမ္မာဝိမုတ္တိ ဟောတိ။ အယံ ဝုစ္စတိ, ဘိက္ခဝေ, ကလ္ယာဏော။
‘‘Katamo ca, bhikkhave, kalyāṇo? Idha, bhikkhave, ekacco sammādiṭṭhiko hoti …pe… sammāñāṇī hoti, sammāvimutti hoti. Ayaṃ vuccati, bhikkhave, kalyāṇo.
‘‘ကတမော စ, ဘိက္ခဝေ, ကလ္ယာဏေန ကလ္ယာဏတရော? ဣဓ, ဘိက္ခဝေ, ဧကစ္စော အတ္တနာ စ သမ္မာဒိဋ္ဌိကော ဟောတိ, ပရဉ္စ သမ္မာဒိဋ္ဌိယာ သမာဒပေတိ။ပေ.။ အတ္တနာ စ သမ္မာဉာဏီ ဟောတိ , ပရဉ္စ သမ္မာဉာဏေ သမာဒပေတိ; အတ္တနာ စ သမ္မာဝိမုတ္တိ ဟောတိ, ပရဉ္စ သမ္မာဝိမုတ္တိယာ သမာဒပေတိ။ အယံ ဝုစ္စတိ, ဘိက္ခဝေ, ကလ္ယာဏေန ကလ္ယာဏတရော’’တိ။ အဋ္ဌမံ။
‘‘Katamo ca, bhikkhave, kalyāṇena kalyāṇataro? Idha, bhikkhave, ekacco attanā ca sammādiṭṭhiko hoti, parañca sammādiṭṭhiyā samādapeti…pe… attanā ca sammāñāṇī hoti , parañca sammāñāṇe samādapeti; attanā ca sammāvimutti hoti, parañca sammāvimuttiyā samādapeti. Ayaṃ vuccati, bhikkhave, kalyāṇena kalyāṇataro’’ti. Aṭṭhamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၇-၁၀. ပာပဓမ္မသုတ္တစတုက္ကဝဏ္ဏနာ • 7-10. Pāpadhammasuttacatukkavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၁၀. သိက္ခာပဒသုတ္တာဒိဝဏ္ဏနာ • 1-10. Sikkhāpadasuttādivaṇṇanā
