| Library / Tipiṭaka / तिपिटक • Tipiṭaka / कथावत्थुपाळि • Kathāvatthupāḷi |
१८. अट्ठारसमवग्गो
18. Aṭṭhārasamavaggo
(१८१) ५. एकमग्गकथा
(181) 5. Ekamaggakathā
८१०. एकेन अरियमग्गेन चत्तारि सामञ्ञफलानि सच्छिकरोतीति? आमन्ता। चतुन्नं फस्सानं…पे॰… चतुन्नं सञ्ञानं समोधानं होतीति? न हेवं वत्तब्बे…पे॰… एकेन अरियमग्गेन चत्तारि सामञ्ञफलानि सच्छिकरोतीति? आमन्ता। सोतापत्तिमग्गेनाति ? न हेवं वत्तब्बे…पे॰… सकदागामि…पे॰… अनागामिमग्गेनाति? न हेवं वत्तब्बे…पे॰…।
810. Ekena ariyamaggena cattāri sāmaññaphalāni sacchikarotīti? Āmantā. Catunnaṃ phassānaṃ…pe… catunnaṃ saññānaṃ samodhānaṃ hotīti? Na hevaṃ vattabbe…pe… ekena ariyamaggena cattāri sāmaññaphalāni sacchikarotīti? Āmantā. Sotāpattimaggenāti ? Na hevaṃ vattabbe…pe… sakadāgāmi…pe… anāgāmimaggenāti? Na hevaṃ vattabbe…pe….
कतमेन मग्गेनाति? अरहत्तमग्गेनाति। अरहत्तमग्गेन सक्कायदिट्ठिं विचिकिच्छं सीलब्बतपरामासं जहतीति? न हेवं वत्तब्बे…पे॰… अरहत्तमग्गेन सक्कायदिट्ठिं विचिकिच्छं सीलब्बतपरामासं जहतीति? आमन्ता। ननु तिण्णं संयोजनानं पहानं सोतापत्तिफलं वुत्तं भगवताति? आमन्ता। हञ्चि तिण्णं संयोजनानं पहानं सोतापत्तिफलं वुत्तं भगवता, नो च वत रे वत्तब्बे – ‘‘अरहत्तमग्गेन सक्कायदिट्ठिं विचिकिच्छं सीलब्बतपरामासं जहती’’ति।
Katamena maggenāti? Arahattamaggenāti. Arahattamaggena sakkāyadiṭṭhiṃ vicikicchaṃ sīlabbataparāmāsaṃ jahatīti? Na hevaṃ vattabbe…pe… arahattamaggena sakkāyadiṭṭhiṃ vicikicchaṃ sīlabbataparāmāsaṃ jahatīti? Āmantā. Nanu tiṇṇaṃ saṃyojanānaṃ pahānaṃ sotāpattiphalaṃ vuttaṃ bhagavatāti? Āmantā. Hañci tiṇṇaṃ saṃyojanānaṃ pahānaṃ sotāpattiphalaṃ vuttaṃ bhagavatā, no ca vata re vattabbe – ‘‘arahattamaggena sakkāyadiṭṭhiṃ vicikicchaṃ sīlabbataparāmāsaṃ jahatī’’ti.
अरहत्तमग्गेन ओळारिकं कामरागं ओळारिकं ब्यापादं जहतीति? न हेवं वत्तब्बे…पे॰… अरहत्तमग्गेन ओळारिकं कामरागं ओळारिकं ब्यापादं जहतीति? आमन्ता। ननु कामरागब्यापादानं तनुभावं सकदागामिफलं वुत्तं भगवताति? आमन्ता। हञ्चि कामरागब्यापादानं तनुभावं सकदागामिफलं वुत्तं भगवता, नो च वत रे वत्तब्बे – ‘‘अरहत्तमग्गेन ओळारिकं कामरागं ओळारिकं ब्यापादं जहती’’ति।
Arahattamaggena oḷārikaṃ kāmarāgaṃ oḷārikaṃ byāpādaṃ jahatīti? Na hevaṃ vattabbe…pe… arahattamaggena oḷārikaṃ kāmarāgaṃ oḷārikaṃ byāpādaṃ jahatīti? Āmantā. Nanu kāmarāgabyāpādānaṃ tanubhāvaṃ sakadāgāmiphalaṃ vuttaṃ bhagavatāti? Āmantā. Hañci kāmarāgabyāpādānaṃ tanubhāvaṃ sakadāgāmiphalaṃ vuttaṃ bhagavatā, no ca vata re vattabbe – ‘‘arahattamaggena oḷārikaṃ kāmarāgaṃ oḷārikaṃ byāpādaṃ jahatī’’ti.
अरहत्तमग्गेन अणुसहगतं कामरागं अणुसहगतं ब्यापादं जहतीति? न हेवं वत्तब्बे…पे॰… अरहत्तमग्गेन अणुसहगतं कामरागं अणुसहगतं ब्यापादं जहतीति? आमन्ता । ननु कामरागब्यापादानं अनवसेसप्पहानं अनागामिफलं वुत्तं भगवताति? आमन्ता। हञ्चि कामरागब्यापादानं अनवसेसप्पहानं अनागामिफलं वुत्तं भगवता, नो च वत रे वत्तब्बे – ‘‘अरहत्तमग्गेन अणुसहगतं कामरागं अणुसहगतं ब्यापादं जहती’’ति।
Arahattamaggena aṇusahagataṃ kāmarāgaṃ aṇusahagataṃ byāpādaṃ jahatīti? Na hevaṃ vattabbe…pe… arahattamaggena aṇusahagataṃ kāmarāgaṃ aṇusahagataṃ byāpādaṃ jahatīti? Āmantā . Nanu kāmarāgabyāpādānaṃ anavasesappahānaṃ anāgāmiphalaṃ vuttaṃ bhagavatāti? Āmantā. Hañci kāmarāgabyāpādānaṃ anavasesappahānaṃ anāgāmiphalaṃ vuttaṃ bhagavatā, no ca vata re vattabbe – ‘‘arahattamaggena aṇusahagataṃ kāmarāgaṃ aṇusahagataṃ byāpādaṃ jahatī’’ti.
८११. न वत्तब्बं – ‘‘एकेन अरियमग्गेन चत्तारि सामञ्ञफलानि सच्छिकरोती’’ति? आमन्ता। भगवता सोतापत्तिमग्गो भावितोति? आमन्ता । भगवा सोतापन्नोति? न हेवं वत्तब्बे…पे॰… भगवता सकदागामि…पे॰… अनागामिमग्गो भावितोति? आमन्ता। भगवा अनागामीति? न हेवं वत्तब्बे…पे॰…।
811. Na vattabbaṃ – ‘‘ekena ariyamaggena cattāri sāmaññaphalāni sacchikarotī’’ti? Āmantā. Bhagavatā sotāpattimaggo bhāvitoti? Āmantā . Bhagavā sotāpannoti? Na hevaṃ vattabbe…pe… bhagavatā sakadāgāmi…pe… anāgāmimaggo bhāvitoti? Āmantā. Bhagavā anāgāmīti? Na hevaṃ vattabbe…pe….
८१२. भगवा एकेन अरियमग्गेन चत्तारि सामञ्ञफलानि सच्छिकरोति, सावका चतूहि अरियमग्गेहि चत्तारि सामञ्ञफलानि सच्छिकरोन्तीति? आमन्ता। सावका बुद्धस्स भगवतो अदिट्ठं दक्खन्ति अनधिगतं अधिगच्छन्ति असच्छिकतं सच्छिकरोन्तीति? न हेवं वत्तब्बे…पे॰…।
812. Bhagavā ekena ariyamaggena cattāri sāmaññaphalāni sacchikaroti, sāvakā catūhi ariyamaggehi cattāri sāmaññaphalāni sacchikarontīti? Āmantā. Sāvakā buddhassa bhagavato adiṭṭhaṃ dakkhanti anadhigataṃ adhigacchanti asacchikataṃ sacchikarontīti? Na hevaṃ vattabbe…pe….
एकमग्गकथा निट्ठिता।
Ekamaggakathā niṭṭhitā.
Related texts:
अट्ठकथा • Aṭṭhakathā / अभिधम्मपिटक (अट्ठकथा) • Abhidhammapiṭaka (aṭṭhakathā) / पञ्चपकरण-अट्ठकथा • Pañcapakaraṇa-aṭṭhakathā / ५. एकमग्गकथावण्णना • 5. Ekamaggakathāvaṇṇanā
