| Library / Tipiṭaka / තිපිටක • Tipiṭaka / මහාවිභඞ්‌ග • Mahāvibhaṅga |
7. එළකලොමධොවාපනසික්‌ඛාපදං
7. Eḷakalomadhovāpanasikkhāpadaṃ
576. තෙන සමයෙන බුද්‌ධො භගවා සක්‌කෙසු විහරති කපිලවත්‌ථුස්‌මිං නිග්‍රොධාරාමෙ. තෙන ඛො පන සමයෙන ඡබ්‌බග්‌ගියා භික්‌ඛූ භික්‌ඛුනීහි එළකලොමානි ධොවාපෙන්‌තිපි රජාපෙන්‌තිපි විජටාපෙන්‌තිපි. භික්‌ඛුනියො එළකලොමානි ධොවන්‌තියො රජන්‌තියො විජටෙන්‌තියො රිඤ්‌චන්‌ති උද්‌දෙසං පරිපුච්‌ඡං අධිසීලං අධිචිත්‌තං අධිපඤ්‌ඤං. අථ ඛො මහාපජාපති ගොතමී යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං අට්‌ඨාසි. එකමන්‌තං ඨිතං ඛො මහාපජාපතිං ගොතමිං භගවා එතදවොච – ‘‘කච්‌චි, ගොතමි, භික්‌ඛුනියො අප්‌පමත්‌තා ආතාපිනියො පහිතත්‌තා විහරන්‌තී’’ති? ‘‘කුතො, භන්‌තෙ, භික්‌ඛුනීනං අප්‌පමාදො! අය්‍යා ඡබ්‌බග්‌ගියා භික්‌ඛුනීහි එළකලොමානි ධොවාපෙන්‌තිපි රජාපෙන්‌තිපි විජටාපෙන්‌තිපි. භික්‌ඛුනියො එළකලොමානි ධොවන්‌තියො රජන්‌තියො විජටෙන්‌තියො රිඤ්‌චන්‌ති උද්‌දෙසං පරිපුච්‌ඡං අධිසීලං අධිචිත්‌තං අධිපඤ්‌ඤ’’න්‌ති.
576. Tena samayena buddho bhagavā sakkesu viharati kapilavatthusmiṃ nigrodhārāme. Tena kho pana samayena chabbaggiyā bhikkhū bhikkhunīhi eḷakalomāni dhovāpentipi rajāpentipi vijaṭāpentipi. Bhikkhuniyo eḷakalomāni dhovantiyo rajantiyo vijaṭentiyo riñcanti uddesaṃ paripucchaṃ adhisīlaṃ adhicittaṃ adhipaññaṃ. Atha kho mahāpajāpati gotamī yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitaṃ kho mahāpajāpatiṃ gotamiṃ bhagavā etadavoca – ‘‘kacci, gotami, bhikkhuniyo appamattā ātāpiniyo pahitattā viharantī’’ti? ‘‘Kuto, bhante, bhikkhunīnaṃ appamādo! Ayyā chabbaggiyā bhikkhunīhi eḷakalomāni dhovāpentipi rajāpentipi vijaṭāpentipi. Bhikkhuniyo eḷakalomāni dhovantiyo rajantiyo vijaṭentiyo riñcanti uddesaṃ paripucchaṃ adhisīlaṃ adhicittaṃ adhipañña’’nti.
අථ ඛො භගවා මහාපජාපතිං ගොතමිං ධම්‌මියා කථාය සන්‌දස්‌සෙසි සමාදපෙසි සමුත්‌තෙජෙසි සම්‌පහංසෙසි. අථ ඛො මහාපජාපති ගොතමී භගවතා ධම්‌මියා කථාය සන්‌දස්‌සිතා සමාදපිතා සමුත්‌තෙජිතා සම්‌පහංසිතා භගවන්‌තං අභිවාදෙත්‌වා පදක්‌ඛිණං කත්‌වා පක්‌කාමි. අථ ඛො භගවා එතස්‌මිං නිදානෙ එතස්‌මිං පකරණෙ භික්‌ඛුසඞ්‌ඝං සන්‌නිපාතාපෙත්‌වා ඡබ්‌බග්‌ගියෙ භික්‌ඛූ පටිපුච්‌ඡි – ‘‘සච්‌චං කිර තුම්‌හෙ, භික්‌ඛවෙ, භික්‌ඛුනීහි එළකලොමානි ධොවාපෙථපි රජාපෙථපි විජටාපෙථපී’’ති ? ‘‘සච්‌චං, භගවා’’ති. ‘‘ඤාතිකායො තුම්‌හාකං, භික්‌ඛවෙ, අඤ්‌ඤාතිකායො’’ති? ‘‘අඤ්‌ඤාතිකායො, භගවා’’ති. ‘‘අඤ්‌ඤාතකා, මොඝපුරිසා, අඤ්‌ඤාතිකානං න ජානන්‌ති පතිරූපං වා අප්‌පතිරූපං වා පාසාදිකං වා අපාසාදිකං. තත්‌ථ නාම තුම්‌හෙ, මොඝපුරිසා, අඤ්‌ඤාතිකාහි භික්‌ඛුනීහි එළකලොමානි ධොවාපෙස්‌සථපි රජාපෙස්‌සථපි විජටාපෙස්‌සථපි! නෙතං, මොඝපුරිසා, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, ඉමං සික්‌ඛාපදං උද්‌දිසෙය්‍යාථ –
Atha kho bhagavā mahāpajāpatiṃ gotamiṃ dhammiyā kathāya sandassesi samādapesi samuttejesi sampahaṃsesi. Atha kho mahāpajāpati gotamī bhagavatā dhammiyā kathāya sandassitā samādapitā samuttejitā sampahaṃsitā bhagavantaṃ abhivādetvā padakkhiṇaṃ katvā pakkāmi. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā chabbaggiye bhikkhū paṭipucchi – ‘‘saccaṃ kira tumhe, bhikkhave, bhikkhunīhi eḷakalomāni dhovāpethapi rajāpethapi vijaṭāpethapī’’ti ? ‘‘Saccaṃ, bhagavā’’ti. ‘‘Ñātikāyo tumhākaṃ, bhikkhave, aññātikāyo’’ti? ‘‘Aññātikāyo, bhagavā’’ti. ‘‘Aññātakā, moghapurisā, aññātikānaṃ na jānanti patirūpaṃ vā appatirūpaṃ vā pāsādikaṃ vā apāsādikaṃ. Tattha nāma tumhe, moghapurisā, aññātikāhi bhikkhunīhi eḷakalomāni dhovāpessathapi rajāpessathapi vijaṭāpessathapi! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
577. ‘‘යො පන භික්‌ඛු අඤ්‌ඤාතිකාය භික්‌ඛුනියා එළකලොමානි ධොවාපෙය්‍ය වා රජාපෙය්‍ය වා විජටාපෙය්‍ය වා, නිස්‌සග්‌ගියං පාචිත්‌තිය’’න්‌ති.
577.‘‘Yo pana bhikkhu aññātikāya bhikkhuniyā eḷakalomāni dhovāpeyya vā rajāpeyya vā vijaṭāpeyya vā, nissaggiyaṃ pācittiya’’nti.
578. යො පනාති යො යාදිසො…පෙ.… භික්‌ඛූති…පෙ.… අයං ඉමස්‌මිං අත්‌ථෙ අධිප්‌පෙතො භික්‌ඛූති.
578.Yopanāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
අඤ්‌ඤාතිකා නාම මාතිතො වා පිතිතො වා යාව සත්‌තමා පිතාමහයුගා අසම්‌බද්‌ධා.
Aññātikā nāma mātito vā pitito vā yāva sattamā pitāmahayugā asambaddhā.
භික්‌ඛුනී නාම උභතොසඞ්‌ඝෙ උපසම්‌පන්‌නා.
Bhikkhunī nāma ubhatosaṅghe upasampannā.
ධොවාති ආණාපෙති, ආපත්‌ති දුක්‌කටස්‌ස. ධොතානි නිස්‌සග්‌ගියානි හොන්‌ති. රජාති ආණාපෙති, ආපත්‌ති දුක්‌කටස්‌ස. රත්‌තානි නිස්‌සග්‌ගියානි හොන්‌ති. විජටෙහීති ආණාපෙති, ආපත්‌ති දුක්‌කටස්‌ස. විජටිතානි නිස්‌සග්‌ගියානි හොන්‌ති. නිස්‌සජ්‌ජිතබ්‌බානි සඞ්‌ඝස්‌ස වා ගණස්‌ස වා පුග්‌ගලස්‌ස වා. එවඤ්‌ච පන, භික්‌ඛවෙ, නිස්‌සජ්‌ජිතබ්‌බානි…පෙ.… ඉමානි මෙ, භන්‌තෙ, එළකලොමානි අඤ්‌ඤාතිකාය භික්‌ඛුනියා ධොවාපිතානි නිස්‌සග්‌ගියානි. ඉමානාහං සඞ්‌ඝස්‌ස නිස්‌සජ්‌ජාමීති…පෙ.… දදෙය්‍යාති…පෙ.… දදෙය්‍යුන්‌ති…පෙ.… ආයස්‌මතො දම්‌මීති.
Dhovāti āṇāpeti, āpatti dukkaṭassa. Dhotāni nissaggiyāni honti. Rajāti āṇāpeti, āpatti dukkaṭassa. Rattāni nissaggiyāni honti. Vijaṭehīti āṇāpeti, āpatti dukkaṭassa. Vijaṭitāni nissaggiyāni honti. Nissajjitabbāni saṅghassa vā gaṇassa vā puggalassa vā. Evañca pana, bhikkhave, nissajjitabbāni…pe… imāni me, bhante, eḷakalomāni aññātikāya bhikkhuniyā dhovāpitāni nissaggiyāni. Imānāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
579. අඤ්‌ඤාතිකාය අඤ්‌ඤාතිකසඤ්‌ඤී එළකලොමානි ධොවාපෙති, නිස්‌සග්‌ගියං පාචිත්‌තියං. අඤ්‌ඤාතිකාය අඤ්‌ඤාතිකසඤ්‌ඤී එළකලොමානි ධොවාපෙති රජාපෙති, නිස්‌සග්‌ගියෙන ආපත්‌ති දුක්‌කටස්‌ස. අඤ්‌ඤාතිකාය අඤ්‌ඤාතිකසඤ්‌ඤී එළකලොමානි ධොවාපෙති විජටාපෙති, නිස්‌සග්‌ගියෙන ආපත්‌ති දුක්‌කටස්‌ස. අඤ්‌ඤාතිකාය අඤ්‌ඤාතිකසඤ්‌ඤී එළකලොමානි ධොවාපෙති රජාපෙති විජටාපෙති, නිස්‌සග්‌ගියෙන ආපත්‌ති ද්‌වින්‌නං දුක්‌කටානං.
579. Aññātikāya aññātikasaññī eḷakalomāni dhovāpeti, nissaggiyaṃ pācittiyaṃ. Aññātikāya aññātikasaññī eḷakalomāni dhovāpeti rajāpeti, nissaggiyena āpatti dukkaṭassa. Aññātikāya aññātikasaññī eḷakalomāni dhovāpeti vijaṭāpeti, nissaggiyena āpatti dukkaṭassa. Aññātikāya aññātikasaññī eḷakalomāni dhovāpeti rajāpeti vijaṭāpeti, nissaggiyena āpatti dvinnaṃ dukkaṭānaṃ.
අඤ්‌ඤාතිකාය අඤ්‌ඤාතිකසඤ්‌ඤී එළකලොමානි රජාපෙති, නිස්‌සග්‌ගියං පාචිත්‌තියං. අඤ්‌ඤාතිකාය අඤ්‌ඤාතිකසඤ්‌ඤී එළකලොමානි රජාපෙති විජටාපෙති, නිස්‌සග්‌ගියෙන ආපත්‌ති දුක්‌කටස්‌ස. අඤ්‌ඤාතිකාය අඤ්‌ඤාතිකසඤ්‌ඤී එළකලොමානි රජාපෙති ධොවාපෙති, නිස්‌සග්‌ගියෙන ආපත්‌ති දුක්‌කටස්‌ස. අඤ්‌ඤාතිකාය අඤ්‌ඤාතිකසඤ්‌ඤී එළකලොමානි රජාපෙති විජටාපෙති ධොවාපෙති, නිස්‌සග්‌ගියෙන ආපත්‌ති ද්‌වින්‌නං දුක්‌කටානං.
Aññātikāya aññātikasaññī eḷakalomāni rajāpeti, nissaggiyaṃ pācittiyaṃ. Aññātikāya aññātikasaññī eḷakalomāni rajāpeti vijaṭāpeti, nissaggiyena āpatti dukkaṭassa. Aññātikāya aññātikasaññī eḷakalomāni rajāpeti dhovāpeti, nissaggiyena āpatti dukkaṭassa. Aññātikāya aññātikasaññī eḷakalomāni rajāpeti vijaṭāpeti dhovāpeti, nissaggiyena āpatti dvinnaṃ dukkaṭānaṃ.
අඤ්‌ඤාතිකාය අඤ්‌ඤාතිකසඤ්‌ඤී එළකලොමානි විජටාපෙති, නිස්‌සග්‌ගියං පාචිත්‌තියං. අඤ්‌ඤාතිකාය අඤ්‌ඤාතිකසඤ්‌ඤී එළකලොමානි විජටාපෙති ධොවාපෙති, නිස්‌සග්‌ගියෙන ආපත්‌ති දුක්‌කටස්‌ස. අඤ්‌ඤාතිකාය අඤ්‌ඤාතිකසඤ්‌ඤී එළකලොමානි විජටාපෙති රජාපෙති, නිස්‌සග්‌ගියෙන ආපත්‌ති දුක්‌කටස්‌ස . අඤ්‌ඤාතිකාය අඤ්‌ඤාතිකසඤ්‌ඤී එළකලොමානි විජටාපෙති ධොවාපෙති රජාපෙති, නිස්‌සග්‌ගියෙන ආපත්‌ති ද්‌වින්‌නං දුක්‌කටානං.
Aññātikāya aññātikasaññī eḷakalomāni vijaṭāpeti, nissaggiyaṃ pācittiyaṃ. Aññātikāya aññātikasaññī eḷakalomāni vijaṭāpeti dhovāpeti, nissaggiyena āpatti dukkaṭassa. Aññātikāya aññātikasaññī eḷakalomāni vijaṭāpeti rajāpeti, nissaggiyena āpatti dukkaṭassa . Aññātikāya aññātikasaññī eḷakalomāni vijaṭāpeti dhovāpeti rajāpeti, nissaggiyena āpatti dvinnaṃ dukkaṭānaṃ.
580. අඤ්‌ඤාතිකාය වෙමතිකො…පෙ.… අඤ්‌ඤාතිකාය ඤාතිකසඤ්‌ඤී…පෙ.… අඤ්‌ඤස්‌ස එළකලොමානි ධොවාපෙති, ආපත්‌ති දුක්‌කටස්‌ස. එකතො උපසම්‌පන්‌නාය ධොවාපෙති, ආපත්‌ති දුක්‌කටස්‌ස. ඤාතිකාය අඤ්‌ඤාතිකසඤ්‌ඤී, ආපත්‌ති දුක්‌කටස්‌ස. ඤාතිකාය වෙමතිකො, ආපත්‌ති දුක්‌කටස්‌ස. ඤාතිකාය ඤාතිකසඤ්‌ඤී, අනාපත්‌ති.
580. Aññātikāya vematiko…pe… aññātikāya ñātikasaññī…pe… aññassa eḷakalomāni dhovāpeti, āpatti dukkaṭassa. Ekato upasampannāya dhovāpeti, āpatti dukkaṭassa. Ñātikāya aññātikasaññī, āpatti dukkaṭassa. Ñātikāya vematiko, āpatti dukkaṭassa. Ñātikāya ñātikasaññī, anāpatti.
581. අනාපත්‌ති ඤාතිකාය ධාවන්‌තියා අඤ්‌ඤාතිකා දුතියා හොති, අවුත්‌තා ධොවති, අපරිභුත්‌තං කතභණ්‌ඩං ධොවාපෙති, සික්‌ඛමානාය සාමණෙරියා උම්‌මත්‌තකස්‌ස ආදිකම්‌මිකස්‌සාති.
581. Anāpatti ñātikāya dhāvantiyā aññātikā dutiyā hoti, avuttā dhovati, aparibhuttaṃ katabhaṇḍaṃ dhovāpeti, sikkhamānāya sāmaṇeriyā ummattakassa ādikammikassāti.
එළකලොමධොවාපනසික්‌ඛාපදං නිට්‌ඨිතං සත්‌තමං.
Eḷakalomadhovāpanasikkhāpadaṃ niṭṭhitaṃ sattamaṃ.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 7. එළකලොමධොවාපනසික්‌ඛාපදවණ්‌ණනා • 7. Eḷakalomadhovāpanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 6. එළකලොමසික්‌ඛාපදවණ්‌ණනා • 6. Eḷakalomasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 7. එළකලොමධොවාපනසික්‌ඛාපදවණ්‌ණනා • 7. Eḷakalomadhovāpanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 7. එළකලොමධොවාපනසික්‌ඛාපදවණ්‌ණනා • 7. Eḷakalomadhovāpanasikkhāpadavaṇṇanā
