| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
10. ඝටීකාරසුත්‌තවණ්‌ණනා
10. Ghaṭīkārasuttavaṇṇanā
50. ‘‘උපපන්‌නාසෙ’’ති සෙ-කාරාගමං කත්‌වා නිද්‌දෙසො, ‘‘උපපන්‌නා’’ඉච්‌චෙව අත්‌ථොති ආහ ‘‘නිබ්‌බත්‌තිවසෙන උපගතා’’ති. අත්‌තනො සම්‌පත්‌තිතො අවිහානතො අවිහා, තෙසං බ්‍රහ්‌මලොකො අවිහාබ්‍රහ්‌මලොකො, තස්‌මිං. උපපත්‌තිසමනන්‌තරමෙවාති පඨමකොට්‌ඨාසෙ එව. අරහත්‌තඵලවිමුත්‌තියාති අසෙක්‌ඛවිමුත්‌තියා. සෙක්‌ඛවිමුත්‌තියා පන අවිහූපපත්‌තිතො පගෙව විමුත්‌තා. මානුසං දෙහං සමතික්‌කමන්‌ති චිත්‌තුපක්‌කිලෙසපහානවසෙනාති ඵලෙන හෙතුදස්‌සනමිදන්‌ති ආහ ‘‘මානුසං දෙහන්‌ති ඉධ…පෙ.… වුත්‌තානී’’ති. දිවි භවං දිබ්‌බං, බ්‍රහ්‌මත්‌තභාවසඤ්‌ඤිතං ඛන්‌ධපඤ්‌චකං. තත්‌ථ සංයොජනකොති වුත්‌තං ‘‘දිබ්‌බං යොගන්‌ති පඤ්‌ච උද්‌ධම්‌භාගියසංයොජනානී’’ති. ඉමස්‌සාති දෙවපුත්‌තස්‌ස. ‘‘හිත්‌වා මානුසං දෙහං, දිබ්‌බයොගං උපච්‌චගු’’න්‌ති තෙසං ත්‌වං කුසලං සබ්‌බාවජ්‌ජප්‌පහානෙන අනවජ්‌ජතං භාසතීති කුසලී වදෙසි. අත්‌ථෙන සද්‌දස්‌ස අභෙදොපචාරං කත්‌වා ගම්‌භීරවචනං වුත්‌තන්‌ති ආහ ‘‘ගම්‌භීරත්‌ථ’’න්‌ති අත්‌ථස්‌සෙව ගම්‌භීරතො, න සද්‌දස්‌ස. සමුච්‌ඡින්‌නකාමරාගතාය සබ්‌බසො කාමවිසයප්‌පහානෙන නිරාමිසබ්‍රහ්‌මචාරී නාම අනාගාමී. නිවාසනට්‌ඨානභූතො සමානො එකො ගාමො එතස්‌සාති ආහ ‘‘එකගාමවාසී’’ති.
50. ‘‘Upapannāse’’ti se-kārāgamaṃ katvā niddeso, ‘‘upapannā’’icceva atthoti āha ‘‘nibbattivasena upagatā’’ti. Attano sampattito avihānato avihā, tesaṃ brahmaloko avihābrahmaloko, tasmiṃ. Upapattisamanantaramevāti paṭhamakoṭṭhāse eva. Arahattaphalavimuttiyāti asekkhavimuttiyā. Sekkhavimuttiyā pana avihūpapattito pageva vimuttā. Mānusaṃ dehaṃ samatikkamanti cittupakkilesapahānavasenāti phalena hetudassanamidanti āha ‘‘mānusaṃ dehanti idha…pe… vuttānī’’ti. Divi bhavaṃ dibbaṃ, brahmattabhāvasaññitaṃ khandhapañcakaṃ. Tattha saṃyojanakoti vuttaṃ ‘‘dibbaṃ yoganti pañca uddhambhāgiyasaṃyojanānī’’ti. Imassāti devaputtassa. ‘‘Hitvā mānusaṃ dehaṃ, dibbayogaṃ upaccagu’’nti tesaṃ tvaṃ kusalaṃ sabbāvajjappahānena anavajjataṃ bhāsatīti kusalī vadesi. Atthena saddassa abhedopacāraṃ katvā gambhīravacanaṃ vuttanti āha ‘‘gambhīrattha’’nti atthasseva gambhīrato, na saddassa. Samucchinnakāmarāgatāya sabbaso kāmavisayappahānena nirāmisabrahmacārī nāma anāgāmī. Nivāsanaṭṭhānabhūto samāno eko gāmo etassāti āha ‘‘ekagāmavāsī’’ti.
ඝටීකාරසුත්‌තවණ්‌ණනා නිට්‌ඨිතා.
Ghaṭīkārasuttavaṇṇanā niṭṭhitā.
ආදිත්‌තවග්‌ගවණ්‌ණනා නිට්‌ඨිතා.
Ādittavaggavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 10. ඝටීකාරසුත්‌තං • 10. Ghaṭīkārasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 10. ඝටීකාරසුත්‌තවණ්‌ණනා • 10. Ghaṭīkārasuttavaṇṇanā
