| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၂. ဟတ္ထိရာဇဝဏ္ဏသုတ္တံ
2. Hatthirājavaṇṇasuttaṃ
၁၃၈. ဧဝံ မေ သုတံ – ဧကံ သမယံ ဘဂဝာ ဥရုဝေလာယံ ဝိဟရတိ နဇ္ဇာ နေရဉ္ဇရာယ တီရေ အဇပာလနိဂ္ရောဓမူလေ ပဌမာဘိသမ္ဗုဒ္ဓော ။ တေန ခော ပန သမယေန ဘဂဝာ ရတ္တန္ဓကာရတိမိသာယံ အဗ္ဘောကာသေ နိသိန္နော ဟောတိ, ဒေဝော စ ဧကမေကံ ဖုသာယတိ။ အထ ခော မာရော ပာပိမာ ဘဂဝတော ဘယံ ဆမ္ဘိတတ္တံ လောမဟံသံ ဥပ္ပာဒေတုကာမော မဟန္တံ ဟတ္ထိရာဇဝဏ္ဏံ အဘိနိမ္မိနိတ္ဝာ ယေန ဘဂဝာ တေနုပသင္ကမိ။ သေယ္ယထာပိ နာမ မဟာအရိဋ္ဌကော မဏိ, ဧဝမသ္သ သီသံ ဟောတိ။ သေယ္ယထာပိ နာမ သုဒ္ဓံ ရူပိယံ, ဧဝမသ္သ ဒန္တာ ဟောန္တိ။ သေယ္ယထာပိ နာမ မဟတီ နင္ဂလီသာ 1, ဧဝမသ္သ သောဏ္ဍော ဟောတိ။ အထ ခော ဘဂဝာ ‘‘မာရော အယံ ပာပိမာ’’ ဣတိ ဝိဒိတ္ဝာ မာရံ ပာပိမန္တံ ဂာထာယ အဇ္ဈဘာသိ –
138. Evaṃ me sutaṃ – ekaṃ samayaṃ bhagavā uruvelāyaṃ viharati najjā nerañjarāya tīre ajapālanigrodhamūle paṭhamābhisambuddho . Tena kho pana samayena bhagavā rattandhakāratimisāyaṃ abbhokāse nisinno hoti, devo ca ekamekaṃ phusāyati. Atha kho māro pāpimā bhagavato bhayaṃ chambhitattaṃ lomahaṃsaṃ uppādetukāmo mahantaṃ hatthirājavaṇṇaṃ abhinimminitvā yena bhagavā tenupasaṅkami. Seyyathāpi nāma mahāariṭṭhako maṇi, evamassa sīsaṃ hoti. Seyyathāpi nāma suddhaṃ rūpiyaṃ, evamassa dantā honti. Seyyathāpi nāma mahatī naṅgalīsā 2, evamassa soṇḍo hoti. Atha kho bhagavā ‘‘māro ayaṃ pāpimā’’ iti viditvā māraṃ pāpimantaṃ gāthāya ajjhabhāsi –
‘‘သံသရံ ဒီဃမဒ္ဓာနံ၊ ဝဏ္ဏံ ကတ္ဝာ သုဘာသုဘံ။
‘‘Saṃsaraṃ dīghamaddhānaṃ, vaṇṇaṃ katvā subhāsubhaṃ;
အလံ တေ တေန ပာပိမ၊ နိဟတော တ္ဝမသိ အန္တကာ’’တိ။
Alaṃ te tena pāpima, nihato tvamasi antakā’’ti.
အထ ခော မာရော ပာပိမာ ‘‘ဇာနာတိ မံ ဘဂဝာ, ဇာနာတိ မံ သုဂတော’’တိ ဒုက္ခီ ဒုမ္မနော တတ္ထေဝန္တရဓာယီတိ။
Atha kho māro pāpimā ‘‘jānāti maṃ bhagavā, jānāti maṃ sugato’’ti dukkhī dummano tatthevantaradhāyīti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၂. ဟတ္ထိရာဇဝဏ္ဏသုတ္တဝဏ္ဏနာ • 2. Hatthirājavaṇṇasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂. ဟတ္ထိရာဇဝဏ္ဏသုတ္တဝဏ္ဏနာ • 2. Hatthirājavaṇṇasuttavaṇṇanā
