Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၅. ဇရာဝဂ္ဂော
5. Jarāvaggo
၁. ဇရာဓမ္မသုတ္တံ
1. Jarādhammasuttaṃ
၅၁၁. ဧဝံ မေ သုတံ – ဧကံ သမယံ ဘဂဝာ သာဝတ္ထိယံ ဝိဟရတိ ပုဗ္ဗာရာမေ မိဂာရမာတုပာသာဒေ။ တေန ခော ပန သမယေန ဘဂဝာ သာယန္ဟသမယံ ပဋိသလ္လာနာ ဝုဋ္ဌိတော ပစ္ဆာတပေ နိသိန္နော ဟောတိ ပိဋ္ဌိံ ဩတာပယမာနော။
511. Evaṃ me sutaṃ – ekaṃ samayaṃ bhagavā sāvatthiyaṃ viharati pubbārāme migāramātupāsāde. Tena kho pana samayena bhagavā sāyanhasamayaṃ paṭisallānā vuṭṭhito pacchātape nisinno hoti piṭṭhiṃ otāpayamāno.
အထ ခော အာယသ္မာ အာနန္ဒော ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဘဂဝတော ဂတ္တာနိ ပာဏိနာ အနောမဇ္ဇန္တော ဘဂဝန္တံ ဧတဒဝောစ – ‘‘အစ္ဆရိယံ, ဘန္တေ , အဗ္ဘုတံ, ဘန္တေ! န စေဝံ ဒာနိ, ဘန္တေ, ဘဂဝတော တာဝ ပရိသုဒ္ဓော ဆဝိဝဏ္ဏော ပရိယောဒာတော, သိထိလာနိ စ ဂတ္တာနိ သဗ္ဗာနိ ဝလိယဇာတာနိ, ပုရတော ပဗ္ဘာရော စ ကာယော, ဒိသ္သတိ စ ဣန္ဒ္ရိယာနံ အညထတ္တံ – စက္ခုန္ဒ္ရိယသ္သ သောတိန္ဒ္ရိယသ္သ ဃာနိန္ဒ္ရိယသ္သ ဇိဝ္ဟိန္ဒ္ရိယသ္သ ကာယိန္ဒ္ရိယသ္သာ’’တိ။
Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā bhagavato gattāni pāṇinā anomajjanto bhagavantaṃ etadavoca – ‘‘acchariyaṃ, bhante , abbhutaṃ, bhante! Na cevaṃ dāni, bhante, bhagavato tāva parisuddho chavivaṇṇo pariyodāto, sithilāni ca gattāni sabbāni valiyajātāni, purato pabbhāro ca kāyo, dissati ca indriyānaṃ aññathattaṃ – cakkhundriyassa sotindriyassa ghānindriyassa jivhindriyassa kāyindriyassā’’ti.
‘‘ဧဝဉ္ဟေတံ , အာနန္ဒ, ဟောတိ – ဇရာဓမ္မော ယောဗ္ဗညေ, ဗ္ယာဓိဓမ္မော အာရောဂ္ယေ, မရဏဓမ္မော ဇီဝိတေ။ န စေဝ တာဝ ပရိသုဒ္ဓော ဟောတိ ဆဝိဝဏ္ဏော ပရိယောဒာတော, သိထိလာနိ စ ဟောန္တိ ဂတ္တာနိ သဗ္ဗာနိ ဝလိယဇာတာနိ, ပုရတော ပဗ္ဘာရော စ ကာယော, ဒိသ္သတိ စ ဣန္ဒ္ရိယာနံ အညထတ္တံ – စက္ခုန္ဒ္ရိယသ္သ သောတိန္ဒ္ရိယသ္သ ဃာနိန္ဒ္ရိယသ္သ ဇိဝ္ဟိန္ဒ္ရိယသ္သ ကာယိန္ဒ္ရိယသ္သာ’’တိ။
‘‘Evañhetaṃ , ānanda, hoti – jarādhammo yobbaññe, byādhidhammo ārogye, maraṇadhammo jīvite. Na ceva tāva parisuddho hoti chavivaṇṇo pariyodāto, sithilāni ca honti gattāni sabbāni valiyajātāni, purato pabbhāro ca kāyo, dissati ca indriyānaṃ aññathattaṃ – cakkhundriyassa sotindriyassa ghānindriyassa jivhindriyassa kāyindriyassā’’ti.
‘‘ဣဒမဝောစ ဘဂဝာ။ ဣဒံ ဝတ္ဝာ စ သုဂတော အထာပရံ ဧတဒဝောစ သတ္ထာ –
‘‘Idamavoca bhagavā. Idaṃ vatvā ca sugato athāparaṃ etadavoca satthā –
‘‘ဓီ တံ ဇမ္မိ ဇရေ အတ္ထု၊ ဒုဗ္ဗဏ္ဏကရဏီ ဇရေ။
‘‘Dhī taṃ jammi jare atthu, dubbaṇṇakaraṇī jare;
တာဝ မနောရမံ ဗိမ္ဗံ၊ ဇရာယ အဘိမဒ္ဒိတံ။
Tāva manoramaṃ bimbaṃ, jarāya abhimadditaṃ.
န ကိဉ္စိ ပရိဝဇ္ဇေတိ၊ သဗ္ဗမေဝာဘိမဒ္ဒတီ’’တိ။ ပဌမံ။
Na kiñci parivajjeti, sabbamevābhimaddatī’’ti. paṭhamaṃ;
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. ဇရာဓမ္မသုတ္တဝဏ္ဏနာ • 1. Jarādhammasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁. ဇရာဓမ္မသုတ္တဝဏ္ဏနာ • 1. Jarādhammasuttavaṇṇanā