| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
6. ජරසිඞ්‌ගාලඞ්‌ගපඤ්‌හො
6. Jarasiṅgālaṅgapañho
6. ‘‘භන්‌තෙ නාගසෙන, ‘ජරසිඞ්‌ගාලස්‌ස ද්‌වෙ අඞ්‌ගානි ගහෙතබ්‌බානී’ති යං වදෙසි, කතමානි තානි ද්‌වෙ අඞ්‌ගානි ගහෙතබ්‌බානී’’ති? ‘‘යථා, මහාරාජ, ජරසිඞ්‌ගාලො භොජනං පටිලභිත්‌වා අජිගුච්‌ඡමානො යාවදත්‌ථං ආහරයති, එවමෙව ඛො, මහාරාජ, යොගිනා යොගාවචරෙන භොජනං පටිලභිත්‌වා අජිගුච්‌ඡමානෙන සරීරයාපනමත්‌තමෙව පරිභුඤ්‌ජිතබ්‌බං. ඉදං, මහාරාජ, ජරසිඞ්‌ගාලස්‌ස පඨමං අඞ්‌ගං ගහෙතබ්‌බං. භාසිතම්‌පෙතං, මහාරාජ, ථෙරෙන මහාකස්‌සපෙන –
6. ‘‘Bhante nāgasena, ‘jarasiṅgālassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, jarasiṅgālo bhojanaṃ paṭilabhitvā ajigucchamāno yāvadatthaṃ āharayati, evameva kho, mahārāja, yoginā yogāvacarena bhojanaṃ paṭilabhitvā ajigucchamānena sarīrayāpanamattameva paribhuñjitabbaṃ. Idaṃ, mahārāja, jarasiṅgālassa paṭhamaṃ aṅgaṃ gahetabbaṃ. Bhāsitampetaṃ, mahārāja, therena mahākassapena –
‘‘‘සෙනාසනම්‌හා ඔරුය්‌හ, ගාමං පිණ්‌ඩාය පාවිසිං;
‘‘‘Senāsanamhā oruyha, gāmaṃ piṇḍāya pāvisiṃ;
භුඤ්‌ජන්‌තං පුරිසං කුට්‌ඨිං, සක්‌කච්‌ච නං උපට්‌ඨහිං.
Bhuñjantaṃ purisaṃ kuṭṭhiṃ, sakkacca naṃ upaṭṭhahiṃ.
‘‘‘සො මෙ පක්‌කෙන හත්‌ථෙන, ආලොපං උපනාමයි;
‘‘‘So me pakkena hatthena, ālopaṃ upanāmayi;
ආලොපං පක්‌ඛිපන්‌තස්‌ස, අඞ්‌ගුලිපෙත්‌ථ ඡිජ්‌ජථ.
Ālopaṃ pakkhipantassa, aṅgulipettha chijjatha.
‘‘‘කුට්‌ටමූලඤ්‌ච නිස්‌සාය, ආලොපං තං අභුඤ්‌ජිසං;
‘‘‘Kuṭṭamūlañca nissāya, ālopaṃ taṃ abhuñjisaṃ;
භුඤ්‌ජමානෙ වා භුත්‌තෙ වා, ජෙගුච්‌ඡං මෙ න විජ්‌ජතී’ති.
Bhuñjamāne vā bhutte vā, jegucchaṃ me na vijjatī’ti.
‘‘පුන චපරං, මහාරාජ, ජරසිඞ්‌ගාලො භොජනං පටිලභිත්‌වා න විචිනාති ලූඛං වා පණීතං වාති, එවමෙව ඛො, මහාරාජ, යොගිනා යොගාවචරෙන භොජනං පටිලභිත්‌වා න විචිනිතබ්‌බං ‘ලූඛං වා පණීතං වා සම්‌පන්‌නං වා අසම්‌පන්‌නං වා’ති, යථාලද්‌ධෙන සන්‌තුස්‌සිතබ්‌බං. ඉදං, මහාරාජ, ජරසිඞ්‌ගාලස්‌ස දුතියං අඞ්‌ගං ගහෙතබ්‌බං. භාසිතම්‌පෙතං, මහාරාජ, ථෙරෙන උපසෙනෙන වඞ්‌ගන්‌තපුත්‌තෙන –
‘‘Puna caparaṃ, mahārāja, jarasiṅgālo bhojanaṃ paṭilabhitvā na vicināti lūkhaṃ vā paṇītaṃ vāti, evameva kho, mahārāja, yoginā yogāvacarena bhojanaṃ paṭilabhitvā na vicinitabbaṃ ‘lūkhaṃ vā paṇītaṃ vā sampannaṃ vā asampannaṃ vā’ti, yathāladdhena santussitabbaṃ. Idaṃ, mahārāja, jarasiṅgālassa dutiyaṃ aṅgaṃ gahetabbaṃ. Bhāsitampetaṃ, mahārāja, therena upasenena vaṅgantaputtena –
‘‘‘ලූඛෙනපි ච සන්‌තුස්‌සෙ, නාඤ්‌ඤං පත්‌ථෙ රසං බහුං;
‘‘‘Lūkhenapi ca santusse, nāññaṃ patthe rasaṃ bahuṃ;
ජරසිඞ්‌ගාලඞ්‌ගපඤ්‌හො ඡට්‌ඨො.
Jarasiṅgālaṅgapañho chaṭṭho.
Footnotes:
