| Library / Tipiṭaka / တိပိဋက • Tipiṭaka / မဇ္ဈိမနိကာယ (အဋ္ဌကထာ) • Majjhimanikāya (aṭṭhakathā) |
၉. ကာယဂတာသတိသုတ္တဝဏ္ဏနာ
9. Kāyagatāsatisuttavaṇṇanā
၁၅၃-၄. ဧဝံ မေ သုတန္တိ ကာယဂတာသတိသုတ္တံ။ တတ္ထ ဂေဟသိတာတိ ပဉ္စကာမဂုဏနိသ္သိတာ။ သရသင္ကပ္ပာတိ ဓာဝနသင္ကပ္ပာ။ သရန္တီတိ ဟိ သရာ, ဓာဝန္တီတိ အတ္ထော။ အဇ္ဈတ္တမေဝာတိ ဂောစရဇ္ဈတ္တသ္မိံယေဝ။ ကာယဂတာသတိန္တိ ကာယပရိဂ္ဂာဟိကမ္ပိ ကာယာရမ္မဏမ္ပိ သတိံ။ ကာယပရိဂ္ဂာဟိကန္တိ ဝုတ္တေ သမထော ကထိတော ဟောတိ, ကာယာရမ္မဏန္တိ ဝုတ္တေ ဝိပသ္သနာ။ ဥဘယေန သမထဝိပသ္သနာ ကထိတာ ဟောန္တိ။
153-4.Evaṃme sutanti kāyagatāsatisuttaṃ. Tattha gehasitāti pañcakāmaguṇanissitā. Sarasaṅkappāti dhāvanasaṅkappā. Sarantīti hi sarā, dhāvantīti attho. Ajjhattamevāti gocarajjhattasmiṃyeva. Kāyagatāsatinti kāyapariggāhikampi kāyārammaṇampi satiṃ. Kāyapariggāhikanti vutte samatho kathito hoti, kāyārammaṇanti vutte vipassanā. Ubhayena samathavipassanā kathitā honti.
ပုန စပရံ။ပေ.။ ဧဝမ္ပိ, ဘိက္ခဝေ, ဘိက္ခု ကာယဂတာသတိံ ဘာဝေတီတိ သတိပဋ္ဌာနေ စုဒ္ဒသဝိဓေန ကာယာနုပသ္သနာ ကထိတာ။
Puna caparaṃ…pe… evampi, bhikkhave, bhikkhu kāyagatāsatiṃ bhāvetīti satipaṭṭhāne cuddasavidhena kāyānupassanā kathitā.
၁၅၆. အန္တောဂဓာဝာသ္သာတိ တသ္သ ဘိက္ခုနော ဘာဝနာယ အဗ္ဘန္တရဂတာဝ ဟောန္တိ။ ဝိဇ္ဇာဘာဂိယာတိ ဧတ္ထ သမ္ပယောဂဝသေန ဝိဇ္ဇံ ဘဇန္တီတိ ဝိဇ္ဇာဘာဂိယာ။ ဝိဇ္ဇာဘာဂေ ဝိဇ္ဇာကောဋ္ဌာသေ ဝတ္တန္တီတိပိ ဝိဇ္ဇာဘာဂိယာ။ တတ္ထ ဝိပသ္သနာဉာဏံ, မနောမယိဒ္ဓိ, ဆ အဘိညာတိ အဋ္ဌ ဝိဇ္ဇာ။ ပုရိမေန အတ္ထေန တာဟိ သမ္ပယုတ္တဓမ္မာပိ ဝိဇ္ဇာဘာဂိယာ။ ပစ္ဆိမေန အတ္ထေန တာသု ယာ ကာစိ ဧကာ ဝိဇ္ဇာ ဝိဇ္ဇာ, သေသာ ဝိဇ္ဇာဘာဂိယာတိ ဧဝံ ဝိဇ္ဇာပိ ဝိဇ္ဇာယ သမ္ပယုတ္တာ ဓမ္မာပိ ဝိဇ္ဇာဘာဂိယာတေဝ ဝေဒိတဗ္ဗာ။ စေတသာ ဖုဋောတိ ဧတ္ထ ဒုဝိဓံ ဖရဏံ အာပောဖရဏဉ္စ, ဒိဗ္ဗစက္ခုဖရဏဉ္စ, တတ္ထ အာပောကသိဏံ သမာပဇ္ဇိတ္ဝာ အာပေန ဖရဏံ အာပောဖရဏံ နာမ။ ဧဝံ ဖုဋေပိ မဟာသမုဒ္ဒေ သဗ္ဗာ သမုဒ္ဒင္ဂမာ ကုန္နဒိယော အန္တောဂဓာဝ ဟောန္တိ, အာလောကံ ပန ဝဍ္ဎေတ္ဝာ ဒိဗ္ဗစက္ခုနာ သကလသမုဒ္ဒသ္သ ဒသ္သနံ ဒိဗ္ဗစက္ခုဖရဏံ နာမ။ ဧဝံ ဖရဏေပိ မဟာသမုဒ္ဒေ သဗ္ဗာ သမုဒ္ဒင္ဂမာ ကုန္နဒိယော အန္တောဂဓာဝ ဟောန္တိ။
156.Antogadhāvāssāti tassa bhikkhuno bhāvanāya abbhantaragatāva honti. Vijjābhāgiyāti ettha sampayogavasena vijjaṃ bhajantīti vijjābhāgiyā. Vijjābhāge vijjākoṭṭhāse vattantītipi vijjābhāgiyā. Tattha vipassanāñāṇaṃ, manomayiddhi, cha abhiññāti aṭṭha vijjā. Purimena atthena tāhi sampayuttadhammāpi vijjābhāgiyā. Pacchimena atthena tāsu yā kāci ekā vijjā vijjā, sesā vijjābhāgiyāti evaṃ vijjāpi vijjāya sampayuttā dhammāpi vijjābhāgiyāteva veditabbā. Cetasā phuṭoti ettha duvidhaṃ pharaṇaṃ āpopharaṇañca, dibbacakkhupharaṇañca, tattha āpokasiṇaṃ samāpajjitvā āpena pharaṇaṃ āpopharaṇaṃ nāma. Evaṃ phuṭepi mahāsamudde sabbā samuddaṅgamā kunnadiyo antogadhāva honti, ālokaṃ pana vaḍḍhetvā dibbacakkhunā sakalasamuddassa dassanaṃ dibbacakkhupharaṇaṃ nāma. Evaṃ pharaṇepi mahāsamudde sabbā samuddaṅgamā kunnadiyo antogadhāva honti.
ဩတာရန္တိ ဝိဝရံ ဆိဒ္ဒံ။ အာရမ္မဏန္တိ ကိလေသုပ္ပတ္တိပစ္စယံ။ လဘေထ ဩတာရန္တိ လဘေယ္ယ ပဝေသနံ, ဝိနိဝိဇ္ဈိတ္ဝာ ယာဝ ပရိယောသာနာ ဂစ္ဆေယ္ယာတိ အတ္ထော။ နိက္ခေပနန္တိ နိက္ခိပနဋ္ဌာနံ။
Otāranti vivaraṃ chiddaṃ. Ārammaṇanti kilesuppattipaccayaṃ. Labhetha otāranti labheyya pavesanaṃ, vinivijjhitvā yāva pariyosānā gaccheyyāti attho. Nikkhepananti nikkhipanaṭṭhānaṃ.
၁၅၇. ဧဝံ အဘာဝိတကာယဂတာသတိံ ပုဂ္ဂလံ အလ္လမတ္တိကပုဉ္ဇာဒီဟိ ဥပမေတ္ဝာ ဣဒာနိ ဘာဝိတကာယဂတာသတိံ သာရဖလကာဒီဟိ ဥပမေတုံ သေယ္ယထာပီတိအာဒိမာဟ။ တတ္ထ အဂ္ဂဠဖလကန္တိ ကဝာဋံ။
157. Evaṃ abhāvitakāyagatāsatiṃ puggalaṃ allamattikapuñjādīhi upametvā idāni bhāvitakāyagatāsatiṃ sāraphalakādīhi upametuṃ seyyathāpītiādimāha. Tattha aggaḷaphalakanti kavāṭaṃ.
၁၅၈. ကာကပေယ္ယောတိ မုခဝဋ္ဋိယံ နိသီဒိတ္ဝာ ကာကေန ဂီဝံ အနာမေတ္ဝာဝ ပာတဗ္ဗော။ အဘိညာသစ္ဆိကရဏီယသ္သာတိ အဘိညာယ သစ္ဆိကာတဗ္ဗသ္သ။ သက္ခိဘဗ္ဗတံ ပာပုဏာတီတိ ပစ္စက္ခဘာဝံ ပာပုဏာတိ။ သတိ သတိ အာယတနေတိ သတိသတိ ကာရဏေ။ ကိံ ပနေတ္ထ ကာရဏန္တိ? အဘိညာဝ ကာရဏံ။ အာဠိဗန္ဓာတိ မရိယာဒဗဒ္ဓာ။
158.Kākapeyyoti mukhavaṭṭiyaṃ nisīditvā kākena gīvaṃ anāmetvāva pātabbo. Abhiññāsacchikaraṇīyassāti abhiññāya sacchikātabbassa. Sakkhibhabbataṃpāpuṇātīti paccakkhabhāvaṃ pāpuṇāti. Sati sati āyataneti satisati kāraṇe. Kiṃ panettha kāraṇanti? Abhiññāva kāraṇaṃ. Āḷibandhāti mariyādabaddhā.
ယာနီကတာယာတိ ယုတ္တယာနံ ဝိယ ကတာယ။ ဝတ္ထုကတာယာတိ ပတိဋ္ဌာကတာယ။ အနုဋ္ဌိတာယာတိ အနုပ္ပဝတ္တိတာယ။ ပရိစိတာယာတိ ပရိစယကတာယ။ သုသမာရဒ္ဓာယာတိ သုဋ္ဌု သမာရဒ္ဓာယ သုသမ္ပဂ္ဂဟိတာယ။ သေသံ သဗ္ဗတ္ထ ဥတ္တာနမေဝာတိ။
Yānīkatāyāti yuttayānaṃ viya katāya. Vatthukatāyāti patiṭṭhākatāya. Anuṭṭhitāyāti anuppavattitāya. Paricitāyāti paricayakatāya. Susamāraddhāyāti suṭṭhu samāraddhāya susampaggahitāya. Sesaṃ sabbattha uttānamevāti.
ပပဉ္စသူဒနိယာ မဇ္ဈိမနိကာယဋ္ဌကထာယ
Papañcasūdaniyā majjhimanikāyaṭṭhakathāya
ကာယဂတာသတိသုတ္တဝဏ္ဏနာ နိဋ္ဌိတာ။
Kāyagatāsatisuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / မဇ္ဈိမနိကာယ • Majjhimanikāya / ၉. ကာယဂတာသတိသုတ္တံ • 9. Kāyagatāsatisuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / မဇ္ဈိမနိကာယ (ဋီကာ) • Majjhimanikāya (ṭīkā) / ၉. ကာယဂတာသတိသုတ္တဝဏ္ဏနာ • 9. Kāyagatāsatisuttavaṇṇanā
