Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၂. ခေမသုတ္တံ
2. Khemasuttaṃ
၁၀၃. ဧကမန္တံ ဌိတော ခော ခေမော ဒေဝပုတ္တော ဘဂဝတော သန္တိကေ ဣမာ ဂာထာယော အဘာသိ –
103. Ekamantaṃ ṭhito kho khemo devaputto bhagavato santike imā gāthāyo abhāsi –
‘‘စရန္တိ ဗာလာ ဒုမ္မေဓာ၊ အမိတ္တေနေဝ အတ္တနာ။
‘‘Caranti bālā dummedhā, amitteneva attanā;
ကရောန္တာ ပာပကံ ကမ္မံ၊ ယံ ဟောတိ ကဋုကပ္ဖလံ။
Karontā pāpakaṃ kammaṃ, yaṃ hoti kaṭukapphalaṃ.
‘‘န တံ ကမ္မံ ကတံ သာဓု၊ ယံ ကတ္ဝာ အနုတပ္ပတိ။
‘‘Na taṃ kammaṃ kataṃ sādhu, yaṃ katvā anutappati;
ယသ္သ အသ္သုမုခော ရောဒံ၊ ဝိပာကံ ပဋိသေဝတိ။
Yassa assumukho rodaṃ, vipākaṃ paṭisevati.
‘‘တဉ္စ ကမ္မံ ကတံ သာဓု၊ ယံ ကတ္ဝာ နာနုတပ္ပတိ။
‘‘Tañca kammaṃ kataṃ sādhu, yaṃ katvā nānutappati;
ယသ္သ ပတီတော သုမနော၊ ဝိပာကံ ပဋိသေဝတိ။
Yassa patīto sumano, vipākaṃ paṭisevati.
န သာကဋိကစိန္တာယ၊ မန္တာ ဓီရော ပရက္ကမေ။
Na sākaṭikacintāya, mantā dhīro parakkame.
ဝိသမံ မဂ္ဂမာရုယ္ဟ၊ အက္ခစ္ဆိန္နောဝ ဈာယတိ။
Visamaṃ maggamāruyha, akkhacchinnova jhāyati.
‘‘ဧဝံ ဓမ္မာ အပက္ကမ္မ၊ အဓမ္မမနုဝတ္တိယ။
‘‘Evaṃ dhammā apakkamma, adhammamanuvattiya;
မန္ဒော မစ္စုမုခံ ပတ္တော၊ အက္ခစ္ဆိန္နောဝ ဈာယတီ’’တိ။
Mando maccumukhaṃ patto, akkhacchinnova jhāyatī’’ti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁-၂. သိဝသုတ္တာဒိဝဏ္ဏနာ • 1-2. Sivasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂. ခေမသုတ္တဝဏ္ဏနာ • 2. Khemasuttavaṇṇanā