Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၈. ကောဋ္ဌိကဒုက္ခသုတ္တံ
8. Koṭṭhikadukkhasuttaṃ
၁၆၃. အထ ခော အာယသ္မာ မဟာကောဋ္ဌိကော။ပေ.။ ဘဂဝန္တံ ဧတဒဝောစ – ‘‘သာဓု မေ, ဘန္တေ။ပေ.။ ဝိဟရေယ္ယ’’န္တိ။ ‘‘ယံ ခော, ကောဋ္ဌိက, ဒုက္ခံ တတ္ရ တေ ဆန္ဒော ပဟာတဗ္ဗော။ ကိဉ္စ, ကောဋ္ဌိက, ဒုက္ခံ? စက္ခု ခော, ကောဋ္ဌိက, ဒုက္ခံ; တတ္ရ တေ ဆန္ဒော ပဟာတဗ္ဗော။ ရူပာ ဒုက္ခာ; တတ္ရ တေ ဆန္ဒော ပဟာတဗ္ဗော။ စက္ခုဝိညာဏံ ဒုက္ခံ; တတ္ရ တေ ဆန္ဒော ပဟာတဗ္ဗော။ စက္ခုသမ္ဖသ္သော ဒုက္ခော; တတ္ရ တေ ဆန္ဒော ပဟာတဗ္ဗော။ ယမ္ပိဒံ စက္ခုသမ္ဖသ္သပစ္စယာ ဥပ္ပဇ္ဇတိ ဝေဒယိတံ သုခံ ဝာ ဒုက္ခံ ဝာ အဒုက္ခမသုခံ ဝာ တမ္ပိ ဒုက္ခံ; တတ္ရ တေ ဆန္ဒော ပဟာတဗ္ဗော။ပေ.။ ဇိဝ္ဟာ ဒုက္ခာ; တတ္ရ တေ ဆန္ဒော ပဟာတဗ္ဗော။ပေ.။ မနော ဒုက္ခော; တတ္ရ တေ ဆန္ဒော ပဟာတဗ္ဗော။ ဓမ္မာ ဒုက္ခာ; တတ္ရ တေ ဆန္ဒော ပဟာတဗ္ဗော ။ မနောဝိညာဏံ ဒုက္ခံ ; တတ္ရ တေ ဆန္ဒော ပဟာတဗ္ဗော။ မနောသမ္ဖသ္သော ဒုက္ခော; တတ္ရ တေ ဆန္ဒော ပဟာတဗ္ဗော။ ယမ္ပိဒံ မနောသမ္ဖသ္သပစ္စယာ ဥပ္ပဇ္ဇတိ ဝေဒယိတံ သုခံ ဝာ ဒုက္ခံ ဝာ အဒုက္ခမသုခံ ဝာ တမ္ပိ ဒုက္ခံ; တတ္ရ တေ ဆန္ဒော ပဟာတဗ္ဗော။ ယံ ခော, ကောဋ္ဌိက, ဒုက္ခံ တတ္ရ တေ ဆန္ဒော ပဟာတဗ္ဗော’’တိ။ အဋ္ဌမံ။
163. Atha kho āyasmā mahākoṭṭhiko…pe… bhagavantaṃ etadavoca – ‘‘sādhu me, bhante…pe… vihareyya’’nti. ‘‘Yaṃ kho, koṭṭhika, dukkhaṃ tatra te chando pahātabbo. Kiñca, koṭṭhika, dukkhaṃ? Cakkhu kho, koṭṭhika, dukkhaṃ; tatra te chando pahātabbo. Rūpā dukkhā; tatra te chando pahātabbo. Cakkhuviññāṇaṃ dukkhaṃ; tatra te chando pahātabbo. Cakkhusamphasso dukkho; tatra te chando pahātabbo. Yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi dukkhaṃ; tatra te chando pahātabbo…pe… jivhā dukkhā; tatra te chando pahātabbo…pe… mano dukkho; tatra te chando pahātabbo. Dhammā dukkhā; tatra te chando pahātabbo . Manoviññāṇaṃ dukkhaṃ ; tatra te chando pahātabbo. Manosamphasso dukkho; tatra te chando pahātabbo. Yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi dukkhaṃ; tatra te chando pahātabbo. Yaṃ kho, koṭṭhika, dukkhaṃ tatra te chando pahātabbo’’ti. Aṭṭhamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၇-၉. ကောဋ္ဌိကအနိစ္စသုတ္တာဒိဝဏ္ဏနာ • 7-9. Koṭṭhikaaniccasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၇-၉. ကောဋ္ဌိကအနိစ္စသုတ္တာဒိဝဏ္ဏနာ • 7-9. Koṭṭhikaaniccasuttādivaṇṇanā