Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၈. ကုလဃရဏီသုတ္တဝဏ္ဏနာ
8. Kulagharaṇīsuttavaṇṇanā
၂၂၈. ဩဂာဟပ္ပတ္တောတိ ဝိသ္သာသဝသေန အနုပ္ပဝေသံ ပတ္တော။ အညတရံ ကုလန္တိ တသ္မိံ ကုလေ ဇာယမ္ပတိံ သန္ဓာယ ဝဒတိ။ ‘‘ဗဟူပကာရံ မေ ဧတံ ကုလံ စိရံ သပ္ပာယာဟာရဒာနာဒိနာ; တသ္မာ ဣဓာဟံ အဂ္ဂဒက္ခိဏေယ္ယော ဇာတော; ဣမေသံယေဝ ဒေယ္ယဓမ္မပဋိဂ္ဂဏ္ဟနေန ပုညံ ဝဍ္ဎေသ္သာမီ’’တိ စိန္တေသိ။ တေနာဟ ‘‘အညတ္ထ ဂန္တ္ဝာ ကိံ ကရိသ္သာမီ’’တိအာဒိ။ သာတိ ဒေဝတာ။ ဥဘောပေတေတိ တံ ဘိက္ခုဉ္စ ဃရဏိဉ္စ သန္ဓာယ ဝဒတိ။ ပဋိဂာဓပ္ပတ္တာတိ ပဋိဂာဓံ ပတ္တာ အညမညသ္မိံ ပတိဋ္ဌိတဝိသ္သာသေန။
228.Ogāhappattoti vissāsavasena anuppavesaṃ patto. Aññataraṃ kulanti tasmiṃ kule jāyampatiṃ sandhāya vadati. ‘‘Bahūpakāraṃ me etaṃ kulaṃ ciraṃ sappāyāhāradānādinā; tasmā idhāhaṃ aggadakkhiṇeyyo jāto; imesaṃyeva deyyadhammapaṭiggaṇhanena puññaṃ vaḍḍhessāmī’’ti cintesi. Tenāha ‘‘aññattha gantvā kiṃ karissāmī’’tiādi. Sāti devatā. Ubhopeteti taṃ bhikkhuñca gharaṇiñca sandhāya vadati. Paṭigādhappattāti paṭigādhaṃ pattā aññamaññasmiṃ patiṭṭhitavissāsena.
ဝိသ္သမပ္ပတ္တိဝသေန သန္တိဋ္ဌန္တိ ဧတ္ထာတိ သဏ္ဌာနံ, ဝိသ္သမနဋ္ဌာနံ။ သမာဂန္တ္ဝာတိ သန္နိပတိတ္ဝာ။ ပဋိညူဒာဟရဏေဟိ မန္တယတီတိ မန္တနံ, ဉာပကံ ကာရဏံ။ ပဋိလောမသဒ္ဒာတိ ပဋိလောမဘာဝေန ပတိတတ္တာ အသစ္စဝိဘာဝနာ ပဋိကူလသဒ္ဒာ။ တေန ကာရဏေနာတိ တေန ကာရဏပဋိရူပကေန မိစ္ဆာဝစနေန။ န မင္ကုဟောတဗ္ဗံ အကာရကဘာဝတော။ သဒ္ဒေန ပရိတသ္သတီတိ ပရေဟိ အတ္တနိ ပယုတ္တမိစ္ဆာသဒ္ဒမတ္တေန ပရိတသ္သနသီလော။ ဝတံ န သမ္ပဇ္ဇတီတိ ယထာသမာဒိန္နဝတံ လဟုစိတ္တတာယ န ပာရိပူရိံ ဂစ္ဆတိ။ သမ္ပန္နဝတောတိ ပရိပုဏ္ဏသီလာဒိဝတဂုဏော
Vissamappattivasena santiṭṭhanti etthāti saṇṭhānaṃ, vissamanaṭṭhānaṃ. Samāgantvāti sannipatitvā. Paṭiññūdāharaṇehi mantayatīti mantanaṃ, ñāpakaṃ kāraṇaṃ. Paṭilomasaddāti paṭilomabhāvena patitattā asaccavibhāvanā paṭikūlasaddā. Tena kāraṇenāti tena kāraṇapaṭirūpakena micchāvacanena. Na maṅkuhotabbaṃ akārakabhāvato. Saddena paritassatīti parehi attani payuttamicchāsaddamattena paritassanasīlo. Vataṃ na sampajjatīti yathāsamādinnavataṃ lahucittatāya na pāripūriṃ gacchati. Sampannavatoti paripuṇṇasīlādivataguṇo
ကုလဃရဏီသုတ္တဝဏ္ဏနာ နိဋ္ဌိတာ။
Kulagharaṇīsuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၈. ကုလဃရဏီသုတ္တံ • 8. Kulagharaṇīsuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၈. ကုလဃရဏီသုတ္တဝဏ္ဏနာ • 8. Kulagharaṇīsuttavaṇṇanā