| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၃. ကုမ္မသုတ္တံ
3. Kummasuttaṃ
၁၅၉. သာဝတ္ထိယံ ဝိဟရတိ။ပေ.။ ‘‘ဒာရုဏော , ဘိက္ခဝေ, လာဘသက္ကာရသိလောကော။ပေ.။ အဓိဂမာယ။ ဘူတပုဗ္ဗံ, ဘိက္ခဝေ, အညတရသ္မိံ ဥဒကရဟဒေ မဟာကုမ္မကုလံ စိရနိဝာသိ အဟောသိ။ အထ ခော, ဘိက္ခဝေ, အညတရော ကုမ္မော အညတရံ ကုမ္မံ ဧတဒဝောစ – ‘မာ ခော တ္ဝံ, တာတ ကုမ္မ, ဧတံ ပဒေသံ အဂမာသီ’တိ။ အဂမာသိ ခော, ဘိက္ခဝေ, သော ကုမ္မော တံ ပဒေသံ။ တမေနံ လုဒ္ဒော ပပတာယ ဝိဇ္ဈိ။ အထ ခော, ဘိက္ခဝေ, သော ကုမ္မော ယေန သော ကုမ္မော တေနုပသင္ကမိ။ အဒ္ဒသာ ခော, ဘိက္ခဝေ, သော ကုမ္မော တံ ကုမ္မံ ဒူရတောဝ အာဂစ္ဆန္တံ။ ဒိသ္ဝာန တံ ကုမ္မံ ဧတဒဝောစ – ‘ကစ္စိ တ္ဝံ, တာတ ကုမ္မ, န တံ ပဒေသံ အဂမာသီ’တိ? ‘အဂမာသိံ ခ္ဝာဟံ, တာတ ကုမ္မ, တံ ပဒေသ’န္တိ။ ‘ကစ္စိ ပနာသိ, တာတ ကုမ္မ, အက္ခတော အနုပဟတော’တိ? ‘အက္ခတော ခောမ္ဟိ, တာတ ကုမ္မ, အနုပဟတော, အတ္ထိ စ မေ ဣဒံ သုတ္တကံ ပိဋ္ဌိတော ပိဋ္ဌိတော အနုဗန္ဓ’န္တိ။ ‘တဂ္ဃသိ, တာတ ကုမ္မ, ခတော, တဂ္ဃ ဥပဟတော။ ဧတေန ဟိ တေ, တာတ ကုမ္မ, သုတ္တကေန ပိတရော စ ပိတာမဟာ စ အနယံ အာပန္နာ ဗ္ယသနံ အာပန္နာ။ ဂစ္ဆ ဒာနိ တ္ဝံ, တာတ ကုမ္မ, န ဒာနိ တ္ဝံ အမ္ဟာက’’’န္တိ။
159. Sāvatthiyaṃ viharati…pe… ‘‘dāruṇo , bhikkhave, lābhasakkārasiloko…pe… adhigamāya. Bhūtapubbaṃ, bhikkhave, aññatarasmiṃ udakarahade mahākummakulaṃ ciranivāsi ahosi. Atha kho, bhikkhave, aññataro kummo aññataraṃ kummaṃ etadavoca – ‘mā kho tvaṃ, tāta kumma, etaṃ padesaṃ agamāsī’ti. Agamāsi kho, bhikkhave, so kummo taṃ padesaṃ. Tamenaṃ luddo papatāya vijjhi. Atha kho, bhikkhave, so kummo yena so kummo tenupasaṅkami. Addasā kho, bhikkhave, so kummo taṃ kummaṃ dūratova āgacchantaṃ. Disvāna taṃ kummaṃ etadavoca – ‘kacci tvaṃ, tāta kumma, na taṃ padesaṃ agamāsī’ti? ‘Agamāsiṃ khvāhaṃ, tāta kumma, taṃ padesa’nti. ‘Kacci panāsi, tāta kumma, akkhato anupahato’ti? ‘Akkhato khomhi, tāta kumma, anupahato, atthi ca me idaṃ suttakaṃ piṭṭhito piṭṭhito anubandha’nti. ‘Tagghasi, tāta kumma, khato, taggha upahato. Etena hi te, tāta kumma, suttakena pitaro ca pitāmahā ca anayaṃ āpannā byasanaṃ āpannā. Gaccha dāni tvaṃ, tāta kumma, na dāni tvaṃ amhāka’’’nti.
‘‘လုဒ္ဒောတိ ခော, ဘိက္ခဝေ, မာရသ္သေတံ ပာပိမတော အဓိဝစနံ။ ပပတာတိ ခော, ဘိက္ခဝေ, လာဘသက္ကာရသိလောကသ္သေတံ အဓိဝစနံ။ သုတ္တကန္တိ ခော, ဘိက္ခဝေ, နန္ဒိရာဂသ္သေတံ အဓိဝစနံ။ ယော ဟိ ကောစိ, ဘိက္ခဝေ, ဘိက္ခု ဥပ္ပန္နံ လာဘသက္ကာရသိလောကံ အသ္သာဒေတိ နိကာမေတိ – အယံ ဝုစ္စတိ, ဘိက္ခဝေ, ဘိက္ခု ဂိဒ္ဓော ပပတာယ 1 အနယံ အာပန္နော ဗ္ယသနံ အာပန္နော ယထာကာမကရဏီယော ပာပိမတော။ ဧဝံ ဒာရုဏော ခော, ဘိက္ခဝေ, လာဘသက္ကာရသိလောကော။ပေ.။ ဧဝဉ္ဟိ ဝော, ဘိက္ခဝေ, သိက္ခိတဗ္ဗ’’န္တိ။ တတိယံ။
‘‘Luddoti kho, bhikkhave, mārassetaṃ pāpimato adhivacanaṃ. Papatāti kho, bhikkhave, lābhasakkārasilokassetaṃ adhivacanaṃ. Suttakanti kho, bhikkhave, nandirāgassetaṃ adhivacanaṃ. Yo hi koci, bhikkhave, bhikkhu uppannaṃ lābhasakkārasilokaṃ assādeti nikāmeti – ayaṃ vuccati, bhikkhave, bhikkhu giddho papatāya 2 anayaṃ āpanno byasanaṃ āpanno yathākāmakaraṇīyo pāpimato. Evaṃ dāruṇo kho, bhikkhave, lābhasakkārasiloko…pe… evañhi vo, bhikkhave, sikkhitabba’’nti. Tatiyaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၃-၄. ကုမ္မသုတ္တာဒိဝဏ္ဏနာ • 3-4. Kummasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၃-၄. ကုမ္မသုတ္တာဒိဝဏ္ဏနာ • 3-4. Kummasuttādivaṇṇanā
