| Library / Tipiṭaka / तिपिटक • Tipiṭaka / कथावत्थुपाळि • Kathāvatthupāḷi |
२०. वीसतिमवग्गो
20. Vīsatimavaggo
(१९८) ५. मग्गकथा
(198) 5. Maggakathā
८७२. पञ्चङ्गिको मग्गोति? आमन्ता। ननु अट्ठङ्गिको मग्गो वुत्तो भगवता, सेय्यथिदं – सम्मादिट्ठि…पे॰… सम्मासमाधीति? आमन्ता। हञ्चि अट्ठङ्गिको मग्गो वुत्तो भगवता , सेय्यथिदं – सम्मादिट्ठि …पे॰… सम्मासमाधि, नो च वत रे वत्तब्बे – ‘‘पञ्चङ्गिको मग्गो’’ति।
872. Pañcaṅgiko maggoti? Āmantā. Nanu aṭṭhaṅgiko maggo vutto bhagavatā, seyyathidaṃ – sammādiṭṭhi…pe… sammāsamādhīti? Āmantā. Hañci aṭṭhaṅgiko maggo vutto bhagavatā , seyyathidaṃ – sammādiṭṭhi …pe… sammāsamādhi, no ca vata re vattabbe – ‘‘pañcaṅgiko maggo’’ti.
पञ्चङ्गिको मग्गोति? आमन्ता। ननु वुत्तं भगवता –
Pañcaṅgiko maggoti? Āmantā. Nanu vuttaṃ bhagavatā –
‘‘मग्गानं अट्ठङ्गिको सेट्ठो, सच्चानं चतुरो पदा।
‘‘Maggānaṃ aṭṭhaṅgiko seṭṭho, saccānaṃ caturo padā;
विरागो सेट्ठो धम्मानं, द्विपदानञ्च चक्खुमा’’ति 1॥
Virāgo seṭṭho dhammānaṃ, dvipadānañca cakkhumā’’ti 2.
अत्थेव सुत्तन्तोति? आमन्ता। तेन हि अट्ठङ्गिको मग्गोति।
Attheva suttantoti? Āmantā. Tena hi aṭṭhaṅgiko maggoti.
८७३. सम्मावाचा मग्गङ्गं, सा च न मग्गोति? आमन्ता। सम्मादिट्ठि मग्गङ्गं, सा च न मग्गोति? न हेवं वत्तब्बे…पे॰… सम्मावाचा मग्गङ्गं, सा च न मग्गोति? आमन्ता। सम्मासङ्कप्पो…पे॰… सम्मावायामो…पे॰… सम्मासति…पे॰… सम्मासमाधि मग्गङ्गं, सो च न मग्गोति? न हेवं वत्तब्बे…पे॰…।
873. Sammāvācā maggaṅgaṃ, sā ca na maggoti? Āmantā. Sammādiṭṭhi maggaṅgaṃ, sā ca na maggoti? Na hevaṃ vattabbe…pe… sammāvācā maggaṅgaṃ, sā ca na maggoti? Āmantā. Sammāsaṅkappo…pe… sammāvāyāmo…pe… sammāsati…pe… sammāsamādhi maggaṅgaṃ, so ca na maggoti? Na hevaṃ vattabbe…pe….
सम्माकम्मन्तो…पे॰… सम्माआजीवो मग्गङ्गं, सो च न मग्गोति? आमन्ता। सम्मादिट्ठि…पे॰… सम्मासमाधि मग्गङ्गं, सो च न मग्गोति? न हेवं वत्तब्बे…पे॰…।
Sammākammanto…pe… sammāājīvo maggaṅgaṃ, so ca na maggoti? Āmantā. Sammādiṭṭhi…pe… sammāsamādhi maggaṅgaṃ, so ca na maggoti? Na hevaṃ vattabbe…pe….
सम्मादिट्ठि मग्गङ्गं, सा च मग्गोति? आमन्ता। सम्मावाचा मग्गङ्गं, सा च मग्गोति? न हेवं वत्तब्बे…पे॰… सम्मादिट्ठि मग्गङ्गं, सा च मग्गोति? आमन्ता। सम्माकम्मन्तो…पे॰… सम्माआजीवो मग्गङ्गं, सो च मग्गोति? न हेवं वत्तब्बे…पे॰…।
Sammādiṭṭhi maggaṅgaṃ, sā ca maggoti? Āmantā. Sammāvācā maggaṅgaṃ, sā ca maggoti? Na hevaṃ vattabbe…pe… sammādiṭṭhi maggaṅgaṃ, sā ca maggoti? Āmantā. Sammākammanto…pe… sammāājīvo maggaṅgaṃ, so ca maggoti? Na hevaṃ vattabbe…pe….
सम्मासङ्कप्पो…पे॰… सम्मावायामो…पे॰… सम्मासति…पे॰… सम्मासमाधि मग्गङ्गं, सो च मग्गोति? आमन्ता। सम्मावाचा…पे॰… सम्माकम्मन्तो…पे॰… सम्माआजीवो मग्गङ्गं, सो च मग्गोति? न हेवं वत्तब्बे…पे॰…।
Sammāsaṅkappo…pe… sammāvāyāmo…pe… sammāsati…pe… sammāsamādhi maggaṅgaṃ, so ca maggoti? Āmantā. Sammāvācā…pe… sammākammanto…pe… sammāājīvo maggaṅgaṃ, so ca maggoti? Na hevaṃ vattabbe…pe….
८७४. अरियो अट्ठङ्गिको मग्गोति? आमन्ता। ननु वुत्तं भगवता – ‘‘पुब्बेव खो पनस्स कायकम्मं वचीकम्मं आजीवो सुपरिसुद्धो होति; एवमस्सायं अरियो अट्ठङ्गिको मग्गो भावनापारिपूरिं गच्छती’’ति 3! अत्थेव सुत्तन्तोति? आमन्ता। तेन हि पञ्चङ्गिको मग्गोति।
874. Ariyo aṭṭhaṅgiko maggoti? Āmantā. Nanu vuttaṃ bhagavatā – ‘‘pubbeva kho panassa kāyakammaṃ vacīkammaṃ ājīvo suparisuddho hoti; evamassāyaṃ ariyo aṭṭhaṅgiko maggo bhāvanāpāripūriṃ gacchatī’’ti 4! Attheva suttantoti? Āmantā. Tena hi pañcaṅgiko maggoti.
८७५. पञ्चङ्गिको मग्गोति? आमन्ता। ननु वुत्तं भगवता – ‘‘यस्मिं खो, सुभद्द, धम्मविनये अरियो अट्ठङ्गिको मग्गो न उपलब्भति, समणोपि तत्थ न उपलब्भति, दुतियोपि तत्थ समणो न उपलब्भति, ततियोपि तत्थ समणो न उपलब्भति, चतुत्थोपि तत्थ समणो न उपलब्भति। यस्मिञ्च खो, सुभद्द, धम्मविनये अरियो अट्ठङ्गिको मग्गो उपलब्भति, समणोपि तत्थ उपलब्भति, दुतियोपि…पे॰… ततियोपि…पे॰… चतुत्थोपि तत्थ समणो उपलब्भति। इमस्मिं खो, सुभद्द, धम्मविनये अरियो अट्ठङ्गिको मग्गो उपलब्भति। इधेव, सुभद्द , समणो, इध दुतियो समणो, इध ततियो समणो, इध चतुत्थो समणो। सुञ्ञा परप्पवादा समणेभि अञ्ञेही’’ति 5! अत्थेव सुत्तन्तोति? आमन्ता। तेन हि अट्ठङ्गिको मग्गोति।
875. Pañcaṅgiko maggoti? Āmantā. Nanu vuttaṃ bhagavatā – ‘‘yasmiṃ kho, subhadda, dhammavinaye ariyo aṭṭhaṅgiko maggo na upalabbhati, samaṇopi tattha na upalabbhati, dutiyopi tattha samaṇo na upalabbhati, tatiyopi tattha samaṇo na upalabbhati, catutthopi tattha samaṇo na upalabbhati. Yasmiñca kho, subhadda, dhammavinaye ariyo aṭṭhaṅgiko maggo upalabbhati, samaṇopi tattha upalabbhati, dutiyopi…pe… tatiyopi…pe… catutthopi tattha samaṇo upalabbhati. Imasmiṃ kho, subhadda, dhammavinaye ariyo aṭṭhaṅgiko maggo upalabbhati. Idheva, subhadda , samaṇo, idha dutiyo samaṇo, idha tatiyo samaṇo, idha catuttho samaṇo. Suññā parappavādā samaṇebhi aññehī’’ti 6! Attheva suttantoti? Āmantā. Tena hi aṭṭhaṅgiko maggoti.
मग्गकथा निट्ठिता।
Maggakathā niṭṭhitā.
Footnotes:
Related texts:
अट्ठकथा • Aṭṭhakathā / अभिधम्मपिटक (अट्ठकथा) • Abhidhammapiṭaka (aṭṭhakathā) / पञ्चपकरण-अट्ठकथा • Pañcapakaraṇa-aṭṭhakathā / ५. मग्गकथावण्णना • 5. Maggakathāvaṇṇanā
