| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၂. မလ္လိကသုတ္တံ
2. Mallikasuttaṃ
၅၂၂. ဧဝံ မေ သုတံ – ဧကံ သမယံ ဘဂဝာ မလ္လေသု 1 ဝိဟရတိ ဥရုဝေလကပ္ပံ နာမ မလ္လာနံ နိဂမော။ တတ္ရ ခော ဘဂဝာ ဘိက္ခူ အာမန္တေသိ – ‘‘ယာဝကီဝဉ္စ, ဘိက္ခဝေ, အရိယသာဝကသ္သ အရိယဉာဏံ န ဥပ္ပန္နံ ဟောတိ နေဝ တာဝ စတုန္နံ ဣန္ဒ္ရိယာနံ သဏ္ဌိတိ ဟောတိ, နေဝ တာဝ စတုန္နံ ဣန္ဒ္ရိယာနံ အဝဋ္ဌိတိ ဟောတိ။ ယတော စ ခော, ဘိက္ခဝေ, အရိယသာဝကသ္သ အရိယဉာဏံ ဥပ္ပန္နံ ဟောတိ, အထ စတုန္နံ ဣန္ဒ္ရိယာနံ သဏ္ဌိတိ ဟောတိ, အထ စတုန္နံ ဣန္ဒ္ရိယာနံ အဝဋ္ဌိတိ ဟောတိ’’။
522. Evaṃ me sutaṃ – ekaṃ samayaṃ bhagavā mallesu 2 viharati uruvelakappaṃ nāma mallānaṃ nigamo. Tatra kho bhagavā bhikkhū āmantesi – ‘‘yāvakīvañca, bhikkhave, ariyasāvakassa ariyañāṇaṃ na uppannaṃ hoti neva tāva catunnaṃ indriyānaṃ saṇṭhiti hoti, neva tāva catunnaṃ indriyānaṃ avaṭṭhiti hoti. Yato ca kho, bhikkhave, ariyasāvakassa ariyañāṇaṃ uppannaṃ hoti, atha catunnaṃ indriyānaṃ saṇṭhiti hoti, atha catunnaṃ indriyānaṃ avaṭṭhiti hoti’’.
‘‘သေယ္ယထာပိ, ဘိက္ခဝေ, ယာဝကီဝဉ္စ ကူဋာဂာရသ္သ ကူဋံ န ဥသ္သိတံ ဟောတိ, နေဝ တာဝ ဂောပာနသီနံ သဏ္ဌိတိ ဟောတိ, နေဝ တာဝ ဂောပာနသီနံ အဝဋ္ဌိတိ ဟောတိ။ ယတော စ ခော, ဘိက္ခဝေ, ကူဋာဂာရသ္သ ကူဋံ ဥသ္သိတံ ဟောတိ, အထ ဂောပာနသီနံ သဏ္ဌိတိ ဟောတိ, အထ ဂောပာနသီနံ အဝဋ္ဌိတိ ဟောတိ။ ဧဝမေဝ ခော, ဘိက္ခဝေ, ယာဝကီဝဉ္စ အရိယသာဝကသ္သ အရိယဉာဏံ န ဥပ္ပန္နံ ဟောတိ, နေဝ တာဝ စတုန္နံ ဣန္ဒ္ရိယာနံ သဏ္ဌိတိ ဟောတိ, နေဝ တာဝ စတုန္နံ ဣန္ဒ္ရိယာနံ အဝဋ္ဌိတိ ဟောတိ။ ယတော စ ခော, ဘိက္ခဝေ, အရိယသာဝကသ္သ အရိယဉာဏံ ဥပ္ပန္နံ ဟောတိ, အထ စတုန္နံ ဣန္ဒ္ရိယာနံ။ပေ.။ အဝဋ္ဌိတိ ဟောတိ။
‘‘Seyyathāpi, bhikkhave, yāvakīvañca kūṭāgārassa kūṭaṃ na ussitaṃ hoti, neva tāva gopānasīnaṃ saṇṭhiti hoti, neva tāva gopānasīnaṃ avaṭṭhiti hoti. Yato ca kho, bhikkhave, kūṭāgārassa kūṭaṃ ussitaṃ hoti, atha gopānasīnaṃ saṇṭhiti hoti, atha gopānasīnaṃ avaṭṭhiti hoti. Evameva kho, bhikkhave, yāvakīvañca ariyasāvakassa ariyañāṇaṃ na uppannaṃ hoti, neva tāva catunnaṃ indriyānaṃ saṇṭhiti hoti, neva tāva catunnaṃ indriyānaṃ avaṭṭhiti hoti. Yato ca kho, bhikkhave, ariyasāvakassa ariyañāṇaṃ uppannaṃ hoti, atha catunnaṃ indriyānaṃ…pe… avaṭṭhiti hoti.
‘‘ကတမေသံ စတုန္နံ? သဒ္ဓိန္ဒ္ရိယသ္သ , ဝီရိယိန္ဒ္ရိယသ္သ, သတိန္ဒ္ရိယသ္သ, သမာဓိန္ဒ္ရိယသ္သ။ ပညဝတော, ဘိက္ခဝေ, အရိယသာဝကသ္သ တဒန္ဝယာ သဒ္ဓာ သဏ္ဌာတိ, တဒန္ဝယံ ဝီရိယံ သဏ္ဌာတိ, တဒန္ဝယာ သတိ သဏ္ဌာတိ, တဒန္ဝယော သမာဓိ သဏ္ဌာတီ’’တိ။ ဒုတိယံ။
‘‘Katamesaṃ catunnaṃ? Saddhindriyassa , vīriyindriyassa, satindriyassa, samādhindriyassa. Paññavato, bhikkhave, ariyasāvakassa tadanvayā saddhā saṇṭhāti, tadanvayaṃ vīriyaṃ saṇṭhāti, tadanvayā sati saṇṭhāti, tadanvayo samādhi saṇṭhātī’’ti. Dutiyaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၂. မလ္လိကသုတ္တဝဏ္ဏနာ • 2. Mallikasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂. မလ္လိကသုတ္တဝဏ္ဏနာ • 2. Mallikasuttavaṇṇanā
