| Library / Tipiṭaka / तिपिटक • Tipiṭaka / कथावत्थुपाळि • Kathāvatthupāḷi |
१७. सत्तरसमवग्गो
17. Sattarasamavaggo
(१७१) ६. न वत्तब्बं सङ्घो दक्खिणं पटिग्गण्हातिकथा
(171) 6. Na vattabbaṃ saṅgho dakkhiṇaṃ paṭiggaṇhātikathā
७९१. न वत्तब्बं – ‘‘सङ्घो दक्खिणं पटिग्गण्हाती’’ति? आमन्ता। ननु सङ्घो आहुनेय्यो पाहुनेय्यो दक्खिणेय्यो अञ्जलिकरणीयो अनुत्तरं पुञ्ञक्खेत्तं लोकस्साति? आमन्ता। हञ्चि सङ्घो आहुनेय्यो पाहुनेय्यो दक्खिणेय्यो अञ्जलिकरणीयो अनुत्तरं पुञ्ञक्खेत्तं लोकस्स, तेन वत रे वत्तब्बे – ‘‘सङ्घो दक्खिणं पटिग्गण्हाती’’ति।
791. Na vattabbaṃ – ‘‘saṅgho dakkhiṇaṃ paṭiggaṇhātī’’ti? Āmantā. Nanu saṅgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassāti? Āmantā. Hañci saṅgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassa, tena vata re vattabbe – ‘‘saṅgho dakkhiṇaṃ paṭiggaṇhātī’’ti.
न वत्तब्बं – ‘‘सङ्घो दक्खिणं पटिग्गण्हाती’’ति? आमन्ता। ननु चत्तारो पुरिसयुगा अट्ठपुरिसपुग्गला दक्खिणेय्या वुत्ता भगवताति? आमन्ता। हञ्चि चत्तारो पुरिसयुगा अट्ठ पुरिसपुग्गला दक्खिणेय्या वुत्ता भगवता, तेन वत रे वत्तब्बे – ‘‘सङ्घो दक्खिणं पटिग्गण्हाती’’ति।
Na vattabbaṃ – ‘‘saṅgho dakkhiṇaṃ paṭiggaṇhātī’’ti? Āmantā. Nanu cattāro purisayugā aṭṭhapurisapuggalā dakkhiṇeyyā vuttā bhagavatāti? Āmantā. Hañci cattāro purisayugā aṭṭha purisapuggalā dakkhiṇeyyā vuttā bhagavatā, tena vata re vattabbe – ‘‘saṅgho dakkhiṇaṃ paṭiggaṇhātī’’ti.
न वत्तब्बं – ‘‘सङ्घो दक्खिणं पटिग्गण्हाती’’ति? आमन्ता। ननु अत्थि केचि सङ्घस्स दानं देन्तीति? आमन्ता। हञ्चि अत्थि केचि सङ्घस्स दानं देन्ति, तेन वत रे वत्तब्बे – ‘‘सङ्घो दक्खिणं पटिग्गण्हाती’’ति। ननु अत्थि केचि सङ्घस्स चीवरं देन्ति…पे॰… पिण्डपातं देन्ति… सेनासनं देन्ति… गिलानपच्चयभेसज्जपरिक्खारं देन्ति… खादनीयं देन्ति… भोजनीयं देन्ति…पे॰… पानीयं देन्तीति? आमन्ता। हञ्चि अत्थि केचि सङ्घस्स पानीयं देन्ति, तेन वत रे वत्तब्बे – ‘‘सङ्घो दक्खिणं पटिग्गण्हाती’’ति।
Na vattabbaṃ – ‘‘saṅgho dakkhiṇaṃ paṭiggaṇhātī’’ti? Āmantā. Nanu atthi keci saṅghassa dānaṃ dentīti? Āmantā. Hañci atthi keci saṅghassa dānaṃ denti, tena vata re vattabbe – ‘‘saṅgho dakkhiṇaṃ paṭiggaṇhātī’’ti. Nanu atthi keci saṅghassa cīvaraṃ denti…pe… piṇḍapātaṃ denti… senāsanaṃ denti… gilānapaccayabhesajjaparikkhāraṃ denti… khādanīyaṃ denti… bhojanīyaṃ denti…pe… pānīyaṃ dentīti? Āmantā. Hañci atthi keci saṅghassa pānīyaṃ denti, tena vata re vattabbe – ‘‘saṅgho dakkhiṇaṃ paṭiggaṇhātī’’ti.
न वत्तब्बं – ‘‘सङ्घो दक्खिणं पटिग्गण्हाती’’ति? आमन्ता। ननु वुत्तं भगवता –
Na vattabbaṃ – ‘‘saṅgho dakkhiṇaṃ paṭiggaṇhātī’’ti? Āmantā. Nanu vuttaṃ bhagavatā –
‘‘आहुतिं जातवेदोव, महामेघंव मेदनी।
‘‘Āhutiṃ jātavedova, mahāmeghaṃva medanī;
सङ्घो समाधिसम्पन्नो, पटिग्गण्हाति दक्खिण’’न्ति॥
Saṅgho samādhisampanno, paṭiggaṇhāti dakkhiṇa’’nti.
अत्थेव सुत्तन्तोति? आमन्ता। तेन हि सङ्घो दक्खिणं पटिग्गण्हातीति।
Attheva suttantoti? Āmantā. Tena hi saṅgho dakkhiṇaṃ paṭiggaṇhātīti.
७९२. सङ्घो दक्खिणं पटिग्गण्हातीति? आमन्ता। मग्गो पटिग्गण्हाति, फलं पटिग्गण्हातीति? न हेवं वत्तब्बे…पे॰…।
792. Saṅgho dakkhiṇaṃ paṭiggaṇhātīti? Āmantā. Maggo paṭiggaṇhāti, phalaṃ paṭiggaṇhātīti? Na hevaṃ vattabbe…pe….
न वत्तब्बं सङ्घो दक्खिणं पटिग्गण्हातीतिकथा निट्ठिता।
Na vattabbaṃ saṅgho dakkhiṇaṃ paṭiggaṇhātītikathā niṭṭhitā.
Related texts:
अट्ठकथा • Aṭṭhakathā / अभिधम्मपिटक (अट्ठकथा) • Abhidhammapiṭaka (aṭṭhakathā) / पञ्चपकरण-अट्ठकथा • Pañcapakaraṇa-aṭṭhakathā / ६. न वत्तब्बं सङ्घो दक्खिणं पटिग्गण्हातीतिकथावण्णना • 6. Na vattabbaṃ saṅgho dakkhiṇaṃ paṭiggaṇhātītikathāvaṇṇanā
