Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၆. ဩရိမတီရသုတ္တံ
6. Orimatīrasuttaṃ
၁၁၈. ‘‘ဩရိမဉ္စ, ဘိက္ခဝေ, တီရံ ဒေသေသ္သာမိ ပာရိမဉ္စ တီရံ။ တံ သုဏာထ, သာဓုကံ မနသိ ကရောထ; ဘာသိသ္သာမီ’’တိ။ ‘‘ဧဝံ, ဘန္တေ’’တိ ခော တေ ဘိက္ခူ ဘဂဝတော ပစ္စသ္သောသုံ။ ဘဂဝာ ဧတဒဝောစ –
118. ‘‘Orimañca, bhikkhave, tīraṃ desessāmi pārimañca tīraṃ. Taṃ suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –
‘‘ကတမဉ္စ, ဘိက္ခဝေ, ဩရိမံ တီရံ, ကတမဉ္စ ပာရိမံ တီရံ? မိစ္ဆာဒိဋ္ဌိ ဩရိမံ တီရံ , သမ္မာဒိဋ္ဌိ ပာရိမံ တီရံ။ပေ.။ မိစ္ဆာဝိမုတ္တိ ဩရိမံ တီရံ, သမ္မာဝိမုတ္တိ ပာရိမံ တီရံ။ ဣဒံ ခော, ဘိက္ခဝေ, ဩရိမံ တီရံ, ဣဒံ ပာရိမံ တီရန္တိ။
‘‘Katamañca, bhikkhave, orimaṃ tīraṃ, katamañca pārimaṃ tīraṃ? Micchādiṭṭhi orimaṃ tīraṃ , sammādiṭṭhi pārimaṃ tīraṃ…pe… micchāvimutti orimaṃ tīraṃ, sammāvimutti pārimaṃ tīraṃ. Idaṃ kho, bhikkhave, orimaṃ tīraṃ, idaṃ pārimaṃ tīranti.
‘‘အပ္ပကာ တေ မနုသ္သေသု၊ ယေ ဇနာ ပာရဂာမိနော။
‘‘Appakā te manussesu, ye janā pāragāmino;
အထာယံ ဣတရာ ပဇာ၊ တီရမေဝာနုဓာဝတိ။
Athāyaṃ itarā pajā, tīramevānudhāvati.
‘‘ယေ စ ခော သမ္မဒက္ခာတေ၊ ဓမ္မေ ဓမ္မာနုဝတ္တိနော။
‘‘Ye ca kho sammadakkhāte, dhamme dhammānuvattino;
တေ ဇနာ ပာရမေသ္သန္တိ၊ မစ္စုဓေယ္ယံ သုဒုတ္တရံ။
Te janā pāramessanti, maccudheyyaṃ suduttaraṃ.
‘‘ကဏ္ဟံ ဓမ္မံ ဝိပ္ပဟာယ၊ သုက္ကံ ဘာဝေထ ပဏ္ဍိတော။
‘‘Kaṇhaṃ dhammaṃ vippahāya, sukkaṃ bhāvetha paṇḍito;
ဩကာ အနောက မာဂမ္မ၊ ဝိဝေကေ ယတ္ထ ဒူရမံ။
Okā anoka māgamma, viveke yattha dūramaṃ.
‘‘တတ္ရာဘိရတိမိစ္ဆေယ္ယ၊ ဟိတ္ဝာ ကာမေ အကိဉ္စနော။
‘‘Tatrābhiratimiccheyya, hitvā kāme akiñcano;
ပရိယောဒပေယ္ယ အတ္တာနံ၊ စိတ္တက္လေသေဟိ ပဏ္ဍိတော။
Pariyodapeyya attānaṃ, cittaklesehi paṇḍito.
‘‘ယေသံ သမ္ဗောဓိယင္ဂေသု၊ သမ္မာ စိတ္တံ သုဘာဝိတံ။
‘‘Yesaṃ sambodhiyaṅgesu, sammā cittaṃ subhāvitaṃ;
အာဒာနပဋိနိသ္သဂ္ဂေ၊ အနုပာဒာယ ယေ ရတာ။
Ādānapaṭinissagge, anupādāya ye ratā;
ခီဏာသဝာ ဇုတိမန္တော၊ တေ လောကေ ပရိနိဗ္ဗုတာ’’တိ။ ဆဋ္ဌံ။
Khīṇāsavā jutimanto, te loke parinibbutā’’ti. chaṭṭhaṃ;
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၅-၆. သင္ဂာရဝသုတ္တာဒိဝဏ္ဏနာ • 5-6. Saṅgāravasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၅-၄၂. သင္ဂာရဝသုတ္တာဒိဝဏ္ဏနာ • 5-42. Saṅgāravasuttādivaṇṇanā