| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
6. පජ්‌ජොතසුත්‌තවණ්‌ණනා
6. Pajjotasuttavaṇṇanā
26. දිවාරත්‌තින්‌ති න ආදිච්‌චො විය දිවා එව, න චන්‌දිමා විය රත්‌තිං එව, අථ ඛො දිවා ච රත්‌තිඤ්‌ච. තත්‌ථ තත්‌ථාති යත්‌ථ යත්‌ථ සම්‌පජ්‌ජලිතො, තත්‌ථ තත්‌ථෙව පදෙසෙ, න ආදිච්‌චො විය චන්‌දිමා විය සකලං මහාදිසං දිසන්‌තරාළඤ්‌ච. ඤාණානුභාවෙන උප්‌පන්‌නාලොකො ඤාණාලොකොති වදන්‌ති. ‘‘ඉදං දුක්‌ඛං අරියසච්‌චන්‌ති පුබ්‌බෙ මෙ, භික්‌ඛවෙ, අනනුස්‌සුතෙසු ධම්‌මෙසු චක්‌ඛුං උදපාදි ඤාණං උදපාදි පඤ්‌ඤා උදපාදි විජ්‌ජා උදපාදි ආලොකො උදපාදී’’ති (සං. නි. 5.1081; මහාව. 15; පටි. ම. 2.30) පන වචනතො මග්‌ගො ඤාණාලොකො. ‘‘තමො විහතො, ආලොකො උප්‌පන්‌නො’’ති (ම. නි. 1.386; පාරා. 12) වා වචනතො විජ්‌ජත්‌තයාලොකො ඤාණාලොකො. පඨමාභිසම්‌බොධියං විය සඤ්‌ජාතපීතිවිප්‌ඵාරො, විසෙසතො රතනඝරෙ සමන්‌තපට්‌ඨානවිචිනනෙ සඤ්‌ජාතපීතිවසෙන උප්‌පන්‌නසරීරොභාසො වා පීතිආලොකො. තත්‌ථෙව උප්‌පන්‌නපසාදවසෙන සඤ්‌ජාතආලොකොව පසාදාලොකො. ධම්‌මචක්‌කපවත්‌තනෙ ‘‘අඤ්‌ඤාසි වත, භො, කොණ්‌ඩඤ්‌ඤො’’ති උප්‌පන්‌නපසාදාලොකොති ච වදන්‌ති. සබ්‌බත්‌ථෙව සත්‌ථු ධම්‌මදෙසනා සත්‌තානං හදයතමං විධමන්‌තී ධම්‌මකථාආලොකො. සබ්‌බොපි බුද්‌ධානං පාතුභාවා උප්‌පන්‌නො ආලොකොති ඉමිනා සාවකානං දෙසනාය සඤ්‌ජාතධම්‌මාලොකොපි බුද්‌ධානුභාවොති දස්‌සෙති.
26.Divārattinti na ādicco viya divā eva, na candimā viya rattiṃ eva, atha kho divā ca rattiñca. Tattha tatthāti yattha yattha sampajjalito, tattha tattheva padese, na ādicco viya candimā viya sakalaṃ mahādisaṃ disantarāḷañca. Ñāṇānubhāvena uppannāloko ñāṇālokoti vadanti. ‘‘Idaṃ dukkhaṃ ariyasaccanti pubbe me, bhikkhave, ananussutesu dhammesu cakkhuṃ udapādi ñāṇaṃ udapādi paññā udapādi vijjā udapādi āloko udapādī’’ti (saṃ. ni. 5.1081; mahāva. 15; paṭi. ma. 2.30) pana vacanato maggo ñāṇāloko. ‘‘Tamo vihato, āloko uppanno’’ti (ma. ni. 1.386; pārā. 12) vā vacanato vijjattayāloko ñāṇāloko. Paṭhamābhisambodhiyaṃ viya sañjātapītivipphāro, visesato ratanaghare samantapaṭṭhānavicinane sañjātapītivasena uppannasarīrobhāso vā pītiāloko. Tattheva uppannapasādavasena sañjātaālokova pasādāloko. Dhammacakkapavattane ‘‘aññāsi vata, bho, koṇḍañño’’ti uppannapasādālokoti ca vadanti. Sabbattheva satthu dhammadesanā sattānaṃ hadayatamaṃ vidhamantī dhammakathāāloko. Sabbopi buddhānaṃ pātubhāvā uppanno ālokoti iminā sāvakānaṃ desanāya sañjātadhammālokopi buddhānubhāvoti dasseti.
පජ්‌ජොතසුත්‌තවණ්‌ණනා නිට්‌ඨිතා.
Pajjotasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 6. පජ්‌ජොතසුත්‌තං • 6. Pajjotasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 6. පජ්‌ජොතසුත්‌තවණ්‌ණනා • 6. Pajjotasuttavaṇṇanā
