Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၃၃. ပရာယနသုတ္တံ
33. Parāyanasuttaṃ
၄၀၉. ‘‘ပရာယနဉ္စ 1 ဝော, ဘိက္ခဝေ, ဒေသေသ္သာမိ ပရာယနဂာမိဉ္စ မဂ္ဂံ။ တံ သုဏာထ။ ကတမဉ္စ, ဘိက္ခဝေ, ပရာယနံ? ယော, ဘိက္ခဝေ, ရာဂက္ခယော ဒောသက္ခယော မောဟက္ခယော – ဣဒံ ဝုစ္စတိ, ဘိက္ခဝေ, ပရာယနံ။ ကတမော စ, ဘိက္ခဝေ, ပရာယနဂာမီ မဂ္ဂော? ကာယဂတာသတိ။ အယံ ဝုစ္စတိ, ဘိက္ခဝေ, ပရာယနဂာမိမဂ္ဂော။ ဣတိ ခော, ဘိက္ခဝေ, ဒေသိတံ ဝော မယာ ပရာယနံ, ဒေသိတော ပရာယနဂာမိမဂ္ဂော။ ယံ, ဘိက္ခဝေ, သတ္ထာရာ ကရဏီယံ သာဝကာနံ ဟိတေသိနာ အနုကမ္ပကေန အနုကမ္ပံ ဥပာဒာယ, ကတံ ဝော တံ မယာ။ ဧတာနိ, ဘိက္ခဝေ, ရုက္ခမူလာနိ, ဧတာနိ သုညာဂာရာနိ။ ဈာယထ, ဘိက္ခဝေ, မာ ပမာဒတ္ထ; မာ ပစ္ဆာ ဝိပ္ပဋိသာရိနော အဟုဝတ္ထ။ အယံ ဝော အမ္ဟာကံ အနုသာသနီ’’တိ။ (ယထာ အသင္ခတံ တထာ ဝိတ္ထာရေတဗ္ဗံ)။ တေတ္တိံသတိမံ။
409. ‘‘Parāyanañca 2 vo, bhikkhave, desessāmi parāyanagāmiñca maggaṃ. Taṃ suṇātha. Katamañca, bhikkhave, parāyanaṃ? Yo, bhikkhave, rāgakkhayo dosakkhayo mohakkhayo – idaṃ vuccati, bhikkhave, parāyanaṃ. Katamo ca, bhikkhave, parāyanagāmī maggo? Kāyagatāsati. Ayaṃ vuccati, bhikkhave, parāyanagāmimaggo. Iti kho, bhikkhave, desitaṃ vo mayā parāyanaṃ, desito parāyanagāmimaggo. Yaṃ, bhikkhave, satthārā karaṇīyaṃ sāvakānaṃ hitesinā anukampakena anukampaṃ upādāya, kataṃ vo taṃ mayā. Etāni, bhikkhave, rukkhamūlāni, etāni suññāgārāni. Jhāyatha, bhikkhave, mā pamādattha; mā pacchā vippaṭisārino ahuvattha. Ayaṃ vo amhākaṃ anusāsanī’’ti. (Yathā asaṅkhataṃ tathā vitthāretabbaṃ). Tettiṃsatimaṃ.
ဒုတိယော ဝဂ္ဂော။
Dutiyo vaggo.
တသ္သုဒ္ဒာနံ –
Tassuddānaṃ –
အသင္ခတံ အနတံ အနာသဝံ၊ သစ္စဉ္စ ပာရံ နိပုဏံ သုဒုဒ္ဒသံ။
Asaṅkhataṃ anataṃ anāsavaṃ, saccañca pāraṃ nipuṇaṃ sududdasaṃ;
အဇဇ္ဇရံ ဓုဝံ အပလောကိတံ၊ အနိဒသ္သနံ နိပ္ပပဉ္စ သန္တံ။
Ajajjaraṃ dhuvaṃ apalokitaṃ, anidassanaṃ nippapañca santaṃ.
အမတံ ပဏီတဉ္စ သိဝဉ္စ ခေမံ၊ တဏ္ဟာက္ခယော အစ္ဆရိယဉ္စ အဗ္ဘုတံ။
Amataṃ paṇītañca sivañca khemaṃ, taṇhākkhayo acchariyañca abbhutaṃ;
အနီတိကံ အနီတိကဓမ္မံ၊ နိဗ္ဗာနမေတံ သုဂတေန ဒေသိတံ။
Anītikaṃ anītikadhammaṃ, nibbānametaṃ sugatena desitaṃ.
အဗ္ယာပဇ္ဈော ဝိရာဂော စ၊ သုဒ္ဓိ မုတ္တိ အနာလယော။
Abyāpajjho virāgo ca, suddhi mutti anālayo;
ဒီပော လေဏဉ္စ တာဏဉ္စ၊ သရဏဉ္စ ပရာယနန္တိ။
Dīpo leṇañca tāṇañca, saraṇañca parāyananti.
အသင္ခတသံယုတ္တံ သမတ္တံ။
Asaṅkhatasaṃyuttaṃ samattaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁-၃၃. အသင္ခတသုတ္တာဒိဝဏ္ဏနာ • 1-33. Asaṅkhatasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂၃-၃၃. အသင္ခတသုတ္တာဒိဝဏ္ဏနာ • 23-33. Asaṅkhatasuttādivaṇṇanā