| Library / Tipiṭaka / තිපිටක • Tipiṭaka / ඉතිවුත්‌තකපාළි • Itivuttakapāḷi |
6. පඨමසෙඛසුත්‌තං
6. Paṭhamasekhasuttaṃ
16. වුත්‌තඤ්‌හෙතං භගවතා, වුත්‌තමරහතාති මෙ සුතං –
16. Vuttañhetaṃ bhagavatā, vuttamarahatāti me sutaṃ –
‘‘සෙඛස්‌ස, භික්‌ඛවෙ, භික්‌ඛුනො අප්‌පත්‌තමානසස්‌ස අනුත්‌තරං යොගක්‌ඛෙමං පත්‌ථයමානස්‌ස විහරතො අජ්‌ඣත්‌තිකං අඞ්‌ගන්‌ති කරිත්‌වා නාඤ්‌ඤං එකඞ්‌ගම්‌පි සමනුපස්‌සාමි යං එවං බහූපකාරං යථයිදං, භික්‌ඛවෙ, යොනිසො මනසිකාරො. යොනිසො, භික්‌ඛවෙ, භික්‌ඛු මනසි කරොන්‌තො අකුසලං පජහති , කුසලං භාවෙතී’’ති . එතමත්‌ථං භගවා අවොච. තත්‌ථෙතං ඉති වුච්‌චති –
‘‘Sekhassa, bhikkhave, bhikkhuno appattamānasassa anuttaraṃ yogakkhemaṃ patthayamānassa viharato ajjhattikaṃ aṅganti karitvā nāññaṃ ekaṅgampi samanupassāmi yaṃ evaṃ bahūpakāraṃ yathayidaṃ, bhikkhave, yoniso manasikāro. Yoniso, bhikkhave, bhikkhu manasi karonto akusalaṃ pajahati , kusalaṃ bhāvetī’’ti . Etamatthaṃ bhagavā avoca. Tatthetaṃ iti vuccati –
‘‘යොනිසො මනසිකාරො, ධම්‌මො සෙඛස්‌ස භික්‌ඛුනො;
‘‘Yoniso manasikāro, dhammo sekhassa bhikkhuno;
නත්‌ථඤ්‌ඤො එවං බහුකාරො, උත්‌තමත්‌ථස්‌ස පත්‌තියා;
Natthañño evaṃ bahukāro, uttamatthassa pattiyā;
යොනිසො පදහං භික්‌ඛු, ඛයං දුක්‌ඛස්‌ස පාපුණෙ’’ති.
Yoniso padahaṃ bhikkhu, khayaṃ dukkhassa pāpuṇe’’ti.
අයම්‌පි අත්‌ථො වුත්‌තො භගවතා, ඉති මෙ සුතන්‌ති. ඡට්‌ඨං.
Ayampi attho vutto bhagavatā, iti me sutanti. Chaṭṭhaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ඉතිවුත්‌තක-අට්‌ඨකථා • Itivuttaka-aṭṭhakathā / 6. පඨමසෙඛසුත්‌තවණ්‌ණනා • 6. Paṭhamasekhasuttavaṇṇanā
