| Library / Tipiṭaka / तिपिटक • Tipiṭaka / कथावत्थुपाळि • Kathāvatthupāḷi |
२१. एकवीसतिमवग्गो
21. Ekavīsatimavaggo
(२०५) ६. सब्बदिसाकथा
(205) 6. Sabbadisākathā
८८६. सब्बा दिसा बुद्धा तिट्ठन्तीति? आमन्ता। पुरत्थिमाय दिसाय बुद्धो तिट्ठतीति? न हेवं वत्तब्बे…पे॰… पुरत्थिमाय दिसाय बुद्धो तिट्ठतीति? आमन्ता। किन्नामो सो भगवा, किंजच्चो, किंगोत्तो, किन्नामा तस्स भगवतो मातापितरो, किन्नामं तस्स भगवतो सावकयुगं, कोनामो तस्स भगवतो उपट्ठाको, कीदिसं चीवरं धारेति, कीदिसं पत्तं धारेति, कतरस्मिं गामे वा निगमे वा नगरे वा रट्ठे वा जनपदे वाति? न हेवं वत्तब्बे…पे॰…।
886. Sabbā disā buddhā tiṭṭhantīti? Āmantā. Puratthimāya disāya buddho tiṭṭhatīti? Na hevaṃ vattabbe…pe… puratthimāya disāya buddho tiṭṭhatīti? Āmantā. Kinnāmo so bhagavā, kiṃjacco, kiṃgotto, kinnāmā tassa bhagavato mātāpitaro, kinnāmaṃ tassa bhagavato sāvakayugaṃ, konāmo tassa bhagavato upaṭṭhāko, kīdisaṃ cīvaraṃ dhāreti, kīdisaṃ pattaṃ dhāreti, katarasmiṃ gāme vā nigame vā nagare vā raṭṭhe vā janapade vāti? Na hevaṃ vattabbe…pe….
दक्खिणाय दिसाय…पे॰… पच्छिमाय दिसाय…पे॰… उत्तराय दिसाय…पे॰… हेट्ठिमाय दिसाय बुद्धो तिट्ठतीति? न हेवं वत्तब्बे…पे॰… हेट्ठिमाय दिसाय बुद्धो तिट्ठतीति? आमन्ता। किन्नामो सो भगवा…पे॰… जनपदे वाति? न हेवं वत्तब्बे…पे॰…।
Dakkhiṇāya disāya…pe… pacchimāya disāya…pe… uttarāya disāya…pe… heṭṭhimāya disāya buddho tiṭṭhatīti? Na hevaṃ vattabbe…pe… heṭṭhimāya disāya buddho tiṭṭhatīti? Āmantā. Kinnāmo so bhagavā…pe… janapade vāti? Na hevaṃ vattabbe…pe….
उपरिमाय दिसाय बुद्धो तिट्ठतीति? न हेवं वत्तब्बे…पे॰…। उपरिमाय दिसाय बुद्धो तिट्ठतीति? आमन्ता। चातुमहाराजिके तिट्ठति…पे॰… तावतिंसे तिट्ठति…पे॰… यामे तिट्ठति…पे॰… तुसिते तिट्ठति…पे॰… निम्मानरतिया तिट्ठति…पे॰… परनिम्मितवसवत्तिया तिट्ठति…पे॰… ब्रह्मलोके तिट्ठतीति? न हेवं वत्तब्बे…पे॰…।
Uparimāya disāya buddho tiṭṭhatīti? Na hevaṃ vattabbe…pe…. Uparimāya disāya buddho tiṭṭhatīti? Āmantā. Cātumahārājike tiṭṭhati…pe… tāvatiṃse tiṭṭhati…pe… yāme tiṭṭhati…pe… tusite tiṭṭhati…pe… nimmānaratiyā tiṭṭhati…pe… paranimmitavasavattiyā tiṭṭhati…pe… brahmaloke tiṭṭhatīti? Na hevaṃ vattabbe…pe….
सब्बदिसाकथा निट्ठिता।
Sabbadisākathā niṭṭhitā.
Related texts:
अट्ठकथा • Aṭṭhakathā / अभिधम्मपिटक (अट्ठकथा) • Abhidhammapiṭaka (aṭṭhakathā) / पञ्चपकरण-अट्ठकथा • Pañcapakaraṇa-aṭṭhakathā / ६. सब्बदिसाकथावण्णना • 6. Sabbadisākathāvaṇṇanā
