| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၁၅. သက္ကာယပဉ္ဟာသုတ္တံ
15. Sakkāyapañhāsuttaṃ
၃၂၈. ‘‘‘သက္ကာယော , သက္ကာယော’တိ, အာဝုသော သာရိပုတ္တ, ဝုစ္စတိ။ ကတမော နု ခော, အာဝုသော, သက္ကာယော’’တိ? ‘‘ပဉ္စိမေ, အာဝုသော, ဥပာဒာနက္ခန္ဓာ သက္ကာယော ဝုတ္တော ဘဂဝတာ, သေယ္ယထိဒံ – ရူပုပာဒာနက္ခန္ဓော, ဝေဒနုပာဒာနက္ခန္ဓော, သညုပာဒာနက္ခန္ဓော, သင္ခာရုပာဒာနက္ခန္ဓော, ဝိညာဏုပာဒာနက္ခန္ဓော ။ ဣမေ ခော, အာဝုသော, ပဉ္စုပာဒာနက္ခန္ဓာ သက္ကာယော ဝုတ္တော ဘဂဝတာ’’တိ။ ‘‘အတ္ထိ ပနာဝုသော, မဂ္ဂော အတ္ထိ ပဋိပဒာ, ဧတသ္သ သက္ကာယသ္သ ပရိညာယာ’’တိ? ‘‘အတ္ထိ ခော, အာဝုသော, မဂ္ဂော အတ္ထိ ပဋိပဒာ, ဧတသ္သ သက္ကာယသ္သ ပရိညာယာ’’တိ။ ‘‘ကတမော ပနာဝုသော, မဂ္ဂော ကတမာ ပဋိပဒာ, ဧတသ္သ သက္ကာယသ္သ ပရိညာယာ’’တိ? ‘‘အယမေဝ ခော, အာဝုသော, အရိယော အဋ္ဌင္ဂိကော မဂ္ဂော, ဧတသ္သ သက္ကာယသ္သ ပရိညာယ , သေယ္ယထိဒံ – သမ္မာဒိဋ္ဌိ သမ္မာသင္ကပ္ပော သမ္မာဝာစာ သမ္မာကမ္မန္တော သမ္မာအာဇီဝော သမ္မာဝာယာမော သမ္မာသတိ သမ္မာသမာဓိ။ အယံ ခော, အာဝုသော, မဂ္ဂော အယံ ပဋိပဒာ, ဧတသ္သ သက္ကာယသ္သ ပရိညာယာ’’တိ။ ‘‘ဘဒ္ဒကော, အာဝုသော, မဂ္ဂော ဘဒ္ဒိကာ ပဋိပဒာ, ဧတသ္သ သက္ကာယသ္သ ပရိညာယ။ အလဉ္စ ပနာဝုသော သာရိပုတ္တ, အပ္ပမာဒာယာ’’တိ။ ပန္နရသမံ။
328. ‘‘‘Sakkāyo , sakkāyo’ti, āvuso sāriputta, vuccati. Katamo nu kho, āvuso, sakkāyo’’ti? ‘‘Pañcime, āvuso, upādānakkhandhā sakkāyo vutto bhagavatā, seyyathidaṃ – rūpupādānakkhandho, vedanupādānakkhandho, saññupādānakkhandho, saṅkhārupādānakkhandho, viññāṇupādānakkhandho . Ime kho, āvuso, pañcupādānakkhandhā sakkāyo vutto bhagavatā’’ti. ‘‘Atthi panāvuso, maggo atthi paṭipadā, etassa sakkāyassa pariññāyā’’ti? ‘‘Atthi kho, āvuso, maggo atthi paṭipadā, etassa sakkāyassa pariññāyā’’ti. ‘‘Katamo panāvuso, maggo katamā paṭipadā, etassa sakkāyassa pariññāyā’’ti? ‘‘Ayameva kho, āvuso, ariyo aṭṭhaṅgiko maggo, etassa sakkāyassa pariññāya , seyyathidaṃ – sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi. Ayaṃ kho, āvuso, maggo ayaṃ paṭipadā, etassa sakkāyassa pariññāyā’’ti. ‘‘Bhaddako, āvuso, maggo bhaddikā paṭipadā, etassa sakkāyassa pariññāya. Alañca panāvuso sāriputta, appamādāyā’’ti. Pannarasamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၃-၁၅. ဓမ္မဝာဒီပဉ္ဟာသုတ္တာဒိဝဏ္ဏနာ • 3-15. Dhammavādīpañhāsuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၃-၁၅. ဓမ္မဝာဒီပဉ္ဟသုတ္တာဒိဝဏ္ဏနာ • 3-15. Dhammavādīpañhasuttādivaṇṇanā
