| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
11. සම්‌පක්‌ඛන්‌දනලක්‌ඛණසද්‌ධාපඤ්‌හො
11. Sampakkhandanalakkhaṇasaddhāpañho
11. ‘‘කථං , භන්‌තෙ, සම්‌පක්‌ඛන්‌දනලක්‌ඛණා සද්‌ධා’’ති,? ‘‘යථා, මහාරාජ, යොගාවචරො අඤ්‌ඤෙසං චිත්‌තං විමුත්‌තං පස්‌සිත්‌වා සොතාපත්‌තිඵලෙ වා සකදාගාමිඵලෙ වා අනාගාමිඵලෙ වා අරහත්‌තෙ වා සම්‌පක්‌ඛන්‌දති යොගං කරොති අප්‌පත්‌තස්‌ස පත්‌තියා අනධිගතස්‌ස අධිගමාය අසච්‌ඡිකතස්‌ස සච්‌ඡිකිරියාය. එවං ඛො, මහාරාජ, සම්‌පක්‌ඛන්‌දනලක්‌ඛණා සද්‌ධා’’ති.
11. ‘‘Kathaṃ , bhante, sampakkhandanalakkhaṇā saddhā’’ti,? ‘‘Yathā, mahārāja, yogāvacaro aññesaṃ cittaṃ vimuttaṃ passitvā sotāpattiphale vā sakadāgāmiphale vā anāgāmiphale vā arahatte vā sampakkhandati yogaṃ karoti appattassa pattiyā anadhigatassa adhigamāya asacchikatassa sacchikiriyāya. Evaṃ kho, mahārāja, sampakkhandanalakkhaṇā saddhā’’ti.
‘‘ඔපම්‌මං කරොහී’’ති. ‘‘යථා, මහාරාජ, උපරිපබ්‌බතෙ මහාමෙඝො අභිප්‌පවස්‌සෙය්‍ය, තං උදකං යථානින්‌නං පවත්‌තමානං පබ්‌බතකන්‌දරපදරසාඛා පරිපූරෙත්‌වා නදිං පරිපූරෙය්‍ය, සා උභතො කූලානි සංවිස්‌සන්‌දන්‌තී ගච්‌ඡෙය්‍ය, අථ මහාජනකායො ආගන්‌ත්‌වා තස්‌සා නදියා උත්‌තානතං වා ගම්‌භීරතං වා අජානන්‌තො භීතො විත්‌ථතො තීරෙ තිට්‌ඨෙය්‍ය, අථඤ්‌ඤතරො පුරිසො ආගන්‌ත්‌වා අත්‌තනො ථාමඤ්‌ච බලඤ්‌ච සම්‌පස්‌සන්‌තො ගාළ්‌හං කච්‌ඡං බන්‌ධිත්‌වා පක්‌ඛන්‌දිත්‌වා තරෙය්‍ය, තං තිණ්‌ණං පස්‌සිත්‌වා මහාජනකායොපි තරෙය්‍ය. එවමෙව ඛො, මහාරාජ, යොගාවචරො අඤ්‌ඤෙසං චිත්‌තං විමුත්‌තං පස්‌සිත්‌වා සොතාපත්‌තිඵලෙ වා සකදාගාමිඵලෙ වා අනාගාමිඵලෙ වා අරහත්‌තෙ වා සම්‌පක්‌ඛන්‌දති යොගං කරොති අප්‌පත්‌තස්‌ස පත්‌තියා අනධිගතස්‌ස අධිගමාය අසච්‌ඡිකතස්‌ස සච්‌ඡිකිරියාය. එවං ඛො, මහාරාජ, සම්‌පක්‌ඛන්‌දනලක්‌ඛණා සද්‌ධාති. භාසිතම්‌පෙතං, මහාරාජ, භගවතා සංයුත්‌තනිකායවරෙ –
‘‘Opammaṃ karohī’’ti. ‘‘Yathā, mahārāja, uparipabbate mahāmegho abhippavasseyya, taṃ udakaṃ yathāninnaṃ pavattamānaṃ pabbatakandarapadarasākhā paripūretvā nadiṃ paripūreyya, sā ubhato kūlāni saṃvissandantī gaccheyya, atha mahājanakāyo āgantvā tassā nadiyā uttānataṃ vā gambhīrataṃ vā ajānanto bhīto vitthato tīre tiṭṭheyya, athaññataro puriso āgantvā attano thāmañca balañca sampassanto gāḷhaṃ kacchaṃ bandhitvā pakkhanditvā tareyya, taṃ tiṇṇaṃ passitvā mahājanakāyopi tareyya. Evameva kho, mahārāja, yogāvacaro aññesaṃ cittaṃ vimuttaṃ passitvā sotāpattiphale vā sakadāgāmiphale vā anāgāmiphale vā arahatte vā sampakkhandati yogaṃ karoti appattassa pattiyā anadhigatassa adhigamāya asacchikatassa sacchikiriyāya. Evaṃ kho, mahārāja, sampakkhandanalakkhaṇā saddhāti. Bhāsitampetaṃ, mahārāja, bhagavatā saṃyuttanikāyavare –
‘‘‘සද්‌ධාය තරතී ඔඝං, අප්‌පමාදෙන අණ්‌ණවං;
‘‘‘Saddhāya taratī oghaṃ, appamādena aṇṇavaṃ;
වීරියෙන දුක්‌ඛමච්‌චෙති, පඤ්‌ඤාය පරිසුජ්‌ඣතී’’’ති 1.
Vīriyena dukkhamacceti, paññāya parisujjhatī’’’ti 2.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
සම්‌පක්‌ඛන්‌දනලක්‌ඛණසද්‌ධාපඤ්‌හො එකාදසමො.
Sampakkhandanalakkhaṇasaddhāpañho ekādasamo.
Footnotes:
