| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၈. သံယောဂသုတ္တံ
8. Saṃyogasuttaṃ
၅၁. ‘‘သံယောဂဝိသံယောဂံ ဝော, ဘိက္ခဝေ, ဓမ္မပရိယာယံ ဒေသေသ္သာမိ။ တံ သုဏာထ။ပေ.။ ကတမော စ သော, ဘိက္ခဝေ, သံယောဂော ဝိသံယောဂော ဓမ္မပရိယာယော?
51. ‘‘Saṃyogavisaṃyogaṃ vo, bhikkhave, dhammapariyāyaṃ desessāmi. Taṃ suṇātha…pe… katamo ca so, bhikkhave, saṃyogo visaṃyogo dhammapariyāyo?
‘‘ဣတ္ထီ, ဘိက္ခဝေ, အဇ္ဈတ္တံ ဣတ္ထိန္ဒ္ရိယံ မနသိ ကရောတိ – ဣတ္ထိကုတ္တံ ဣတ္ထာကပ္ပံ ဣတ္ထိဝိဓံ ဣတ္ထိစ္ဆန္ဒံ ဣတ္ထိသ္သရံ ဣတ္ထာလင္ကာရံ။ သာ တတ္ထ ရဇ္ဇတိ တတ္ရာဘိရမတိ။ သာ တတ္ထ ရတ္တာ တတ္ရာဘိရတာ ဗဟိဒ္ဓာ ပုရိသိန္ဒ္ရိယံ မနသိ ကရောတိ – ပုရိသကုတ္တံ ပုရိသာကပ္ပံ ပုရိသဝိဓံ ပုရိသစ္ဆန္ဒံ ပုရိသသ္သရံ ပုရိသာလင္ကာရံ။ သာ တတ္ထ ရဇ္ဇတိ တတ္ရာဘိရမတိ။ သာ တတ္ထ ရတ္တာ တတ္ရာဘိရတာ ဗဟိဒ္ဓာ သံယောဂံ အာကင္ခတိ။ ယဉ္စသ္သာ သံယောဂပစ္စယာ ဥပ္ပဇ္ဇတိ သုခံ သောမနသ္သံ တဉ္စ အာကင္ခတိ။ ဣတ္ထတ္တေ, ဘိက္ခဝေ, အဘိရတာ သတ္တာ ပုရိသေသု သံယောဂံ ဂတာ။ ဧဝံ ခော, ဘိက္ခဝေ, ဣတ္ထီ ဣတ္ထတ္တံ နာတိဝတ္တတိ။
‘‘Itthī, bhikkhave, ajjhattaṃ itthindriyaṃ manasi karoti – itthikuttaṃ itthākappaṃ itthividhaṃ itthicchandaṃ itthissaraṃ itthālaṅkāraṃ. Sā tattha rajjati tatrābhiramati. Sā tattha rattā tatrābhiratā bahiddhā purisindriyaṃ manasi karoti – purisakuttaṃ purisākappaṃ purisavidhaṃ purisacchandaṃ purisassaraṃ purisālaṅkāraṃ. Sā tattha rajjati tatrābhiramati. Sā tattha rattā tatrābhiratā bahiddhā saṃyogaṃ ākaṅkhati. Yañcassā saṃyogapaccayā uppajjati sukhaṃ somanassaṃ tañca ākaṅkhati. Itthatte, bhikkhave, abhiratā sattā purisesu saṃyogaṃ gatā. Evaṃ kho, bhikkhave, itthī itthattaṃ nātivattati.
‘‘ပုရိသော, ဘိက္ခဝေ, အဇ္ဈတ္တံ ပုရိသိန္ဒ္ရိယံ မနသိ ကရောတိ – ပုရိသကုတ္တံ ပုရိသာကပ္ပံ ပုရိသဝိဓံ ပုရိသစ္ဆန္ဒံ ပုရိသသ္သရံ ပုရိသာလင္ကာရံ။ သော တတ္ထ ရဇ္ဇတိ တတ္ရာဘိရမတိ။ သော တတ္ထ ရတ္တော တတ္ရာဘိရတော ဗဟိဒ္ဓာ ဣတ္ထိန္ဒ္ရိယံ မနသိ ကရောတိ – ဣတ္ထိကုတ္တံ ဣတ္ထာကပ္ပံ ဣတ္ထိဝိဓံ ဣတ္ထိစ္ဆန္ဒံ ဣတ္ထိသ္သရံ ဣတ္ထာလင္ကာရံ။ သော တတ္ထ ရဇ္ဇတိ တတ္ရာဘိရမတိ။ သော တတ္ထ ရတ္တော တတ္ရာဘိရတော ဗဟိဒ္ဓာ သံယောဂံ အာကင္ခတိ။ ယဉ္စသ္သ သံယောဂပစ္စယာ ဥပ္ပဇ္ဇတိ သုခံ သောမနသ္သံ တဉ္စ အာကင္ခတိ။ ပုရိသတ္တေ, ဘိက္ခဝေ, အဘိရတာ သတ္တာ ဣတ္ထီသု သံယောဂံ ဂတာ။ ဧဝံ ခော, ဘိက္ခဝေ, ပုရိသော ပုရိသတ္တံ နာတိဝတ္တတိ။ ဧဝံ ခော, ဘိက္ခဝေ, သံယောဂော ဟောတိ။
‘‘Puriso, bhikkhave, ajjhattaṃ purisindriyaṃ manasi karoti – purisakuttaṃ purisākappaṃ purisavidhaṃ purisacchandaṃ purisassaraṃ purisālaṅkāraṃ. So tattha rajjati tatrābhiramati. So tattha ratto tatrābhirato bahiddhā itthindriyaṃ manasi karoti – itthikuttaṃ itthākappaṃ itthividhaṃ itthicchandaṃ itthissaraṃ itthālaṅkāraṃ. So tattha rajjati tatrābhiramati. So tattha ratto tatrābhirato bahiddhā saṃyogaṃ ākaṅkhati. Yañcassa saṃyogapaccayā uppajjati sukhaṃ somanassaṃ tañca ākaṅkhati. Purisatte, bhikkhave, abhiratā sattā itthīsu saṃyogaṃ gatā. Evaṃ kho, bhikkhave, puriso purisattaṃ nātivattati. Evaṃ kho, bhikkhave, saṃyogo hoti.
‘‘ကထဉ္စ, ဘိက္ခဝေ, ဝိသံယောဂော ဟောတိ? ဣတ္ထီ, ဘိက္ခဝေ, အဇ္ဈတ္တံ ဣတ္ထိန္ဒ္ရိယံ န မနသိ ကရောတိ – ဣတ္ထိကုတ္တံ ဣတ္ထာကပ္ပံ ဣတ္ထိဝိဓံ ဣတ္ထိစ္ဆန္ဒံ ဣတ္ထိသ္သရံ ဣတ္ထာလင္ကာရံ။ သာ တတ္ထ န ရဇ္ဇတိ, သာ တတ္ရ နာဘိရမတိ။ သာ တတ္ထ အရတ္တာ တတ္ရ အနဘိရတာ ဗဟိဒ္ဓာ ပုရိသိန္ဒ္ရိယံ န မနသိ ကရောတိ – ပုရိသကုတ္တံ ပုရိသာကပ္ပံ ပုရိသဝိဓံ ပုရိသစ္ဆန္ဒံ ပုရိသသ္သရံ ပုရိသာလင္ကာရံ။ သာ တတ္ထ န ရဇ္ဇတိ, တတ္ရ နာဘိရမတိ။ သာ တတ္ထ အရတ္တာ တတ္ရ အနဘိရတာ ဗဟိဒ္ဓာ သံယောဂံ နာကင္ခတိ။ ယဉ္စသ္သာ သံယောဂပစ္စယာ ဥပ္ပဇ္ဇတိ သုခံ သောမနသ္သံ တဉ္စ နာကင္ခတိ။ ဣတ္ထတ္တေ, ဘိက္ခဝေ , အနဘိရတာ သတ္တာ ပုရိသေသု ဝိသံယောဂံ ဂတာ။ ဧဝံ ခော, ဘိက္ခဝေ, ဣတ္ထီ ဣတ္ထတ္တံ အတိဝတ္တတိ။
‘‘Kathañca, bhikkhave, visaṃyogo hoti? Itthī, bhikkhave, ajjhattaṃ itthindriyaṃ na manasi karoti – itthikuttaṃ itthākappaṃ itthividhaṃ itthicchandaṃ itthissaraṃ itthālaṅkāraṃ. Sā tattha na rajjati, sā tatra nābhiramati. Sā tattha arattā tatra anabhiratā bahiddhā purisindriyaṃ na manasi karoti – purisakuttaṃ purisākappaṃ purisavidhaṃ purisacchandaṃ purisassaraṃ purisālaṅkāraṃ. Sā tattha na rajjati, tatra nābhiramati. Sā tattha arattā tatra anabhiratā bahiddhā saṃyogaṃ nākaṅkhati. Yañcassā saṃyogapaccayā uppajjati sukhaṃ somanassaṃ tañca nākaṅkhati. Itthatte, bhikkhave , anabhiratā sattā purisesu visaṃyogaṃ gatā. Evaṃ kho, bhikkhave, itthī itthattaṃ ativattati.
‘‘ပုရိသော, ဘိက္ခဝေ, အဇ္ဈတ္တံ ပုရိသိန္ဒ္ရိယံ န မနသိ ကရောတိ – ပုရိသကုတ္တံ ပုရိသာကပ္ပံ ပုရိသဝိဓံ ပုရိသစ္ဆန္ဒံ ပုရိသသ္သရံ ပုရိသာလင္ကာရံ။ သော တတ္ထ န ရဇ္ဇတိ, သော တတ္ရ နာဘိရမတိ။ သော တတ္ထ အရတ္တော တတ္ရ အနဘိရတော ဗဟိဒ္ဓာ ဣတ္ထိန္ဒ္ရိယံ န မနသိ ကရောတိ – ဣတ္ထိကုတ္တံ ဣတ္ထာကပ္ပံ ဣတ္ထိဝိဓံ ဣတ္ထိစ္ဆန္ဒံ ဣတ္ထိသ္သရံ ဣတ္ထာလင္ကာရံ။ သော တတ္ထ န ရဇ္ဇတိ, တတ္ရ နာဘိရမတိ။ သော တတ္ထ အရတ္တော တတ္ရ အနဘိရတော ဗဟိဒ္ဓာ သံယောဂံ နာကင္ခတိ။ ယဉ္စသ္သ သံယောဂပစ္စယာ ဥပ္ပဇ္ဇတိ သုခံ သောမနသ္သံ တဉ္စ နာကင္ခတိ။ ပုရိသတ္တေ, ဘိက္ခဝေ, အနဘိရတာ သတ္တာ ဣတ္ထီသု ဝိသံယောဂံ ဂတာ။ ဧဝံ ခော, ဘိက္ခဝေ, ပုရိသော ပုရိသတ္တံ အတိဝတ္တတိ။ ဧဝံ ခော, ဘိက္ခဝေ, ဝိသံယောဂော ဟောတိ။ အယံ ခော, ဘိက္ခဝေ, သံယောဂော ဝိသံယောဂော ဓမ္မပရိယာယော’’တိ။ အဋ္ဌမံ။
‘‘Puriso, bhikkhave, ajjhattaṃ purisindriyaṃ na manasi karoti – purisakuttaṃ purisākappaṃ purisavidhaṃ purisacchandaṃ purisassaraṃ purisālaṅkāraṃ. So tattha na rajjati, so tatra nābhiramati. So tattha aratto tatra anabhirato bahiddhā itthindriyaṃ na manasi karoti – itthikuttaṃ itthākappaṃ itthividhaṃ itthicchandaṃ itthissaraṃ itthālaṅkāraṃ. So tattha na rajjati, tatra nābhiramati. So tattha aratto tatra anabhirato bahiddhā saṃyogaṃ nākaṅkhati. Yañcassa saṃyogapaccayā uppajjati sukhaṃ somanassaṃ tañca nākaṅkhati. Purisatte, bhikkhave, anabhiratā sattā itthīsu visaṃyogaṃ gatā. Evaṃ kho, bhikkhave, puriso purisattaṃ ativattati. Evaṃ kho, bhikkhave, visaṃyogo hoti. Ayaṃ kho, bhikkhave, saṃyogo visaṃyogo dhammapariyāyo’’ti. Aṭṭhamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၈. သံယောဂသုတ္တဝဏ္ဏနာ • 8. Saṃyogasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၇-၈. မေထုနသုတ္တာဒိဝဏ္ဏနာ • 7-8. Methunasuttādivaṇṇanā
