| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
8. සඞ්‌ඛධමසුත්‌තවණ්‌ණනා
8. Saṅkhadhamasuttavaṇṇanā
360. අට්‌ඨමෙ යංබහුලං යංබහුලන්‌ති ඉමිනා නිගණ්‌ඨො අත්‌තනාව අත්‌තනො වාදං භින්‌දති. තස්‌මා භගවා එවං සන්‌තෙ න කොචි ආපායිකොතිආදිමාහ. පුරිමානි පන චත්‌තාරි පදානි දිට්‌ඨියා පච්‌චයා හොන්‌ති. තස්‌මා තෙසුපි ආදීනවං දස්‌සෙන්‌තො ඉධ, ගාමණි, එකච්‌චො සත්‌ථා එවංවාදී හොතීතිආදිමාහ. තත්‌ථ අහම්‌පම්‌හීති අහම්‌පි අම්‌හි.
360. Aṭṭhame yaṃbahulaṃ yaṃbahulanti iminā nigaṇṭho attanāva attano vādaṃ bhindati. Tasmā bhagavā evaṃ sante na koci āpāyikotiādimāha. Purimāni pana cattāri padāni diṭṭhiyā paccayā honti. Tasmā tesupi ādīnavaṃ dassento idha, gāmaṇi, ekacco satthā evaṃvādī hotītiādimāha. Tattha ahampamhīti ahampi amhi.
මෙත්‌තාසහගතෙනාතිආදීසු යං වත්‌තබ්‌බං, තං සබ්‌බං සද්‌ධිං භාවනානයෙන විසුද්‌ධිමග්‌ගෙ වුත්‌තමෙව. සෙය්‍යථාපි, ගාමණි, බලවා සඞ්‌ඛධමොතිආදි පන ඉධ අපුබ්‌බං. තත්‌ථ බලවාති බලසම්‌පන්‌නො. සඞ්‌ඛධමොති සඞ්‌ඛධමකො. අප්‌පකසිරෙනාති අකිච්‌ඡෙන අදුක්‌ඛෙන. දුබ්‌බලො හි සඞ්‌ඛධමො සඞ්‌ඛං ධමන්‌තොපි න සක්‌කොති චතස්‌සො දිසා සරෙන විඤ්‌ඤාපෙතුං, නාස්‌ස සඞ්‌ඛසද්‌දො සබ්‌බතො ඵරති, බලවතො පන විප්‌ඵාරිකො හොති, තස්‌මා ‘‘බලවා’’ති ආහ.
Mettāsahagatenātiādīsu yaṃ vattabbaṃ, taṃ sabbaṃ saddhiṃ bhāvanānayena visuddhimagge vuttameva. Seyyathāpi, gāmaṇi, balavā saṅkhadhamotiādi pana idha apubbaṃ. Tattha balavāti balasampanno. Saṅkhadhamoti saṅkhadhamako. Appakasirenāti akicchena adukkhena. Dubbalo hi saṅkhadhamo saṅkhaṃ dhamantopi na sakkoti catasso disā sarena viññāpetuṃ, nāssa saṅkhasaddo sabbato pharati, balavato pana vipphāriko hoti, tasmā ‘‘balavā’’ti āha.
මෙත්‌තාය චෙතොවිමුත්‌තියාති එත්‌ථ ‘‘මෙත්‌තා’’ති වුත්‌තෙ උපචාරොපි අප්‌පනාපි වට්‌ටති, ‘‘චෙතොවිමුත්‌තී’’ති වුත්‌තෙ පන අප්‌පනාව වට්‌ටති. යං පමාණකතං කම්‌මන්‌ති පමාණකතං කම්‌මං නාම කාමාවචරං වුච්‌චති, අප්‌පමාණකතං කම්‌මං නාම රූපාවචරං. තඤ්‌හි පමාණං අතික්‌කමිත්‌වා ඔධිසකඅනොධිසකදිසාඵරණවසෙන වඩ්‌ඪෙත්‌වා කතත්‌තා අප්‌පමාණකතන්‌ති වුච්‌චති.
Mettāya cetovimuttiyāti ettha ‘‘mettā’’ti vutte upacāropi appanāpi vaṭṭati, ‘‘cetovimuttī’’ti vutte pana appanāva vaṭṭati. Yaṃ pamāṇakataṃ kammanti pamāṇakataṃ kammaṃ nāma kāmāvacaraṃ vuccati, appamāṇakataṃ kammaṃ nāma rūpāvacaraṃ. Tañhi pamāṇaṃ atikkamitvā odhisakaanodhisakadisāpharaṇavasena vaḍḍhetvā katattā appamāṇakatanti vuccati.
න තං තත්‍රාවසිස්‌සති, න තං තත්‍රාවතිට්‌ඨතීති තං කාමාවචරකම්‌මං තස්‌මිං රූපාරූපාවචරකම්‌මෙ න ඔහීයති න තිට්‌ඨති. කිං වුත්‌තං හොති? තං කාමාවචරකම්‌මං තස්‌ස රූපාරූපාවචරකම්‌මස්‌ස අන්‌තරා ලග්‌ගිතුං වා ඨාතුං වා රූපාරූපාවචරකම්‌මං ඵරිත්‌වා පරියාදියිත්‌වා අත්‌තනො ඔකාසං ගහෙත්‌වා පතිට්‌ඨාතුං වා න සක්‌කොති. අථ ඛො රූපාරූපාවචරකම්‌මමෙව කාමාවචරං මහොඝො විය පරිත්‌තං උදකං ඵරිත්‌වා පරියාදියිත්‌වා අත්‌තනො ඔකාසං කත්‌වා තිට්‌ඨති, තස්‌ස විපාකං පටිබාහිත්‌වා සයමෙව බ්‍රහ්‌මසහබ්‍යතං උපනෙතීති. ඉති ඉදං සුත්‌තං ආදිම්‌හි කිලෙසවසෙන වුට්‌ඨාය අවසානෙ බ්‍රහ්‌මවිහාරවසෙන ගහිතත්‌තා යථානුසන්‌ධිනාව ගතං.
Na taṃ tatrāvasissati, na taṃ tatrāvatiṭṭhatīti taṃ kāmāvacarakammaṃ tasmiṃ rūpārūpāvacarakamme na ohīyati na tiṭṭhati. Kiṃ vuttaṃ hoti? Taṃ kāmāvacarakammaṃ tassa rūpārūpāvacarakammassa antarā laggituṃ vā ṭhātuṃ vā rūpārūpāvacarakammaṃ pharitvā pariyādiyitvā attano okāsaṃ gahetvā patiṭṭhātuṃ vā na sakkoti. Atha kho rūpārūpāvacarakammameva kāmāvacaraṃ mahogho viya parittaṃ udakaṃ pharitvā pariyādiyitvā attano okāsaṃ katvā tiṭṭhati, tassa vipākaṃ paṭibāhitvā sayameva brahmasahabyataṃ upanetīti. Iti idaṃ suttaṃ ādimhi kilesavasena vuṭṭhāya avasāne brahmavihāravasena gahitattā yathānusandhināva gataṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 8. සඞ්‌ඛධමසුත්‌තං • 8. Saṅkhadhamasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 8. සඞ්‌ඛධමසුත්‌තවණ්‌ණනා • 8. Saṅkhadhamasuttavaṇṇanā
