Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၇. သုဒ္ဓိကသုတ္တံ
7. Suddhikasuttaṃ
၁၉၃. သာဝတ္ထိနိဒာနံ ။ အထ ခော သုဒ္ဓိကဘာရဒ္ဝာဇော ဗ္ရာဟ္မဏော ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝတာ သဒ္ဓိံ သမ္မောဒိ။ သမ္မောဒနီယံ ကထံ သာရဏီယံ ဝီတိသာရေတ္ဝာ ဧကမန္တံ နိသီဒိ။ ဧကမန္တံ နိသိန္နော ခော သုဒ္ဓိကဘာရဒ္ဝာဇော ဗ္ရာဟ္မဏော ဘဂဝတော သန္တိကေ ဣမံ ဂာထံ အဇ္ဈဘာသိ –
193. Sāvatthinidānaṃ . Atha kho suddhikabhāradvājo brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho suddhikabhāradvājo brāhmaṇo bhagavato santike imaṃ gāthaṃ ajjhabhāsi –
‘‘န ဗ္ရာဟ္မဏော 1 သုဇ္ဈတိ ကောစိ၊ လောကေ သီလဝာပိ တပောကရံ။
‘‘Na brāhmaṇo 2 sujjhati koci, loke sīlavāpi tapokaraṃ;
ဝိဇ္ဇာစရဏသမ္ပန္နော၊ သော သုဇ္ဈတိ န အညာ ဣတရာ ပဇာ’’တိ။
Vijjācaraṇasampanno, so sujjhati na aññā itarā pajā’’ti.
‘‘ဗဟုမ္ပိ ပလပံ ဇပ္ပံ၊ န ဇစ္စာ ဟောတိ ဗ္ရာဟ္မဏော။
‘‘Bahumpi palapaṃ jappaṃ, na jaccā hoti brāhmaṇo;
အန္တောကသမ္ဗု သင္ကိလိဋ္ဌော၊ ကုဟနံ ဥပနိသ္သိတော။
Antokasambu saṅkiliṭṭho, kuhanaṃ upanissito.
‘‘ခတ္တိယော ဗ္ရာဟ္မဏော ဝေသ္သော၊ သုဒ္ဒော စဏ္ဍာလပုက္ကုသော။
‘‘Khattiyo brāhmaṇo vesso, suddo caṇḍālapukkuso;
အာရဒ္ဓဝီရိယော ပဟိတတ္တော၊ နိစ္စံ ဒဠ္ဟပရက္ကမော။
Āraddhavīriyo pahitatto, niccaṃ daḷhaparakkamo;
ပပ္ပောတိ ပရမံ သုဒ္ဓိံ၊ ဧဝံ ဇာနာဟိ ဗ္ရာဟ္မဏာ’’တိ။
Pappoti paramaṃ suddhiṃ, evaṃ jānāhi brāhmaṇā’’ti.
ဧဝံ ဝုတ္တေ, သုဒ္ဓိကဘာရဒ္ဝာဇော ဗ္ရာဟ္မဏော ဘဂဝန္တံ ဧတဒဝောစ – ‘‘အဘိက္ကန္တံ, ဘော ဂောတမ။ပေ.။ အညတရော စ ပနာယသ္မာ ဘာရဒ္ဝာဇော အရဟတံ အဟောသီ’’တိ။
Evaṃ vutte, suddhikabhāradvājo brāhmaṇo bhagavantaṃ etadavoca – ‘‘abhikkantaṃ, bho gotama…pe… aññataro ca panāyasmā bhāradvājo arahataṃ ahosī’’ti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၇. သုဒ္ဓိကသုတ္တဝဏ္ဏနာ • 7. Suddhikasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၇. သုဒ္ဓိကသုတ္တဝဏ္ဏနာ • 7. Suddhikasuttavaṇṇanā