| Library / Tipiṭaka / තිපිටක • Tipiṭaka / ඉතිවුත්‌තකපාළි • Itivuttakapāḷi |
2. සුලභසුත්‌තං
2. Sulabhasuttaṃ
101. වුත්‌තඤ්‌හෙතං භගවතා, වුත්‌තමරහතාති මෙ සුතං –
101. Vuttañhetaṃ bhagavatā, vuttamarahatāti me sutaṃ –
‘‘චත්‌තාරිමානි, භික්‌ඛවෙ, අප්‌පානි චෙව සුලභානි ච, තානි ච අනවජ්‌ජානි. කතමානි චත්‌තාරි? පංසුකූලං, භික්‌ඛවෙ, චීවරානං අප්‌පඤ්‌ච සුලභඤ්‌ච, තඤ්‌ච අනවජ්‌ජං. පිණ්‌ඩියාලොපො , භික්‌ඛවෙ, භොජනානං අප්‌පඤ්‌ච සුලභඤ්‌ච, තඤ්‌ච අනවජ්‌ජං. රුක්‌ඛමූලං, භික්‌ඛවෙ , සෙනාසනානං අප්‌පඤ්‌ච සුලභඤ්‌ච, තඤ්‌ච අනවජ්‌ජං. පූතිමුත්‌තං, භික්‌ඛවෙ, භෙසජ්‌ජානං අප්‌පඤ්‌ච සුලභඤ්‌ච තඤ්‌ච අනවජ්‌ජං. ඉමානි ඛො, භික්‌ඛවෙ, චත්‌තාරි අප්‌පානි චෙව සුලභානි ච, තානි ච අනවජ්‌ජානි. යතො ඛො, භික්‌ඛවෙ, භික්‌ඛු අප්‌පෙන ච තුට්‌ඨො හොති සුලභෙන ච (අනවජ්‌ජෙන ච) 1, ඉමස්‌සාහං අඤ්‌ඤතරං සාමඤ්‌ඤඞ්‌ගන්‌ති වදාමී’’ති. එතමත්‌ථං භගවා අවොච. තත්‌ථෙතං ඉති වුච්‌චති –
‘‘Cattārimāni, bhikkhave, appāni ceva sulabhāni ca, tāni ca anavajjāni. Katamāni cattāri? Paṃsukūlaṃ, bhikkhave, cīvarānaṃ appañca sulabhañca, tañca anavajjaṃ. Piṇḍiyālopo , bhikkhave, bhojanānaṃ appañca sulabhañca, tañca anavajjaṃ. Rukkhamūlaṃ, bhikkhave , senāsanānaṃ appañca sulabhañca, tañca anavajjaṃ. Pūtimuttaṃ, bhikkhave, bhesajjānaṃ appañca sulabhañca tañca anavajjaṃ. Imāni kho, bhikkhave, cattāri appāni ceva sulabhāni ca, tāni ca anavajjāni. Yato kho, bhikkhave, bhikkhu appena ca tuṭṭho hoti sulabhena ca (anavajjena ca) 2, imassāhaṃ aññataraṃ sāmaññaṅganti vadāmī’’ti. Etamatthaṃ bhagavā avoca. Tatthetaṃ iti vuccati –
‘‘අනවජ්‌ජෙන තුට්‌ඨස්‌ස, අප්‌පෙන සුලභෙන ච;
‘‘Anavajjena tuṭṭhassa, appena sulabhena ca;
න සෙනාසනමාරබ්‌භ, චීවරං පානභොජනං;
Na senāsanamārabbha, cīvaraṃ pānabhojanaṃ;
විඝාතො හොති චිත්‌තස්‌ස, දිසා නප්‌පටිහඤ්‌ඤති.
Vighāto hoti cittassa, disā nappaṭihaññati.
‘‘යෙ චස්‌ස 3 ධම්‌මා අක්‌ඛාතා, සාමඤ්‌ඤස්‌සානුලොමිකා;
‘‘Ye cassa 4 dhammā akkhātā, sāmaññassānulomikā;
අධිග්‌ගහිතා තුට්‌ඨස්‌ස, අප්‌පමත්‌තස්‌ස භික්‌ඛුනො’’ති 5.
Adhiggahitā tuṭṭhassa, appamattassa bhikkhuno’’ti 6.
අයම්‌පි අත්‌ථො වුත්‌තො භගවතා, ඉති මෙ සුතන්‌ති. දුතියං.
Ayampi attho vutto bhagavatā, iti me sutanti. Dutiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ඉතිවුත්‌තක-අට්‌ඨකථා • Itivuttaka-aṭṭhakathā / 2. සුලභසුත්‌තවණ්‌ණනා • 2. Sulabhasuttavaṇṇanā
