| Library / Tipiṭaka / තිපිටක • Tipiṭaka / උදානපාළි • Udānapāḷi |
6. තණ්‌හාසඞ්‌ඛයසුත්‌තං
6. Taṇhāsaṅkhayasuttaṃ
66. එවං මෙ සුතං – එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ආයස්‌මා අඤ්‌ඤාසිකොණ්‌ඩඤ්‌ඤො 1 භගවතො අවිදූරෙ නිසින්‌නො හොති පල්‌ලඞ්‌කං ආභුජිත්‌වා උජුං කායං පණිධාය තණ්‌හාසඞ්‌ඛයවිමුත්‌තිං පච්‌චවෙක්‌ඛමානො.
66. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā aññāsikoṇḍañño 2 bhagavato avidūre nisinno hoti pallaṅkaṃ ābhujitvā ujuṃ kāyaṃ paṇidhāya taṇhāsaṅkhayavimuttiṃ paccavekkhamāno.
අද්‌දසා ඛො භගවා ආයස්‌මන්‌තං අඤ්‌ඤාසිකොණ්‌ඩඤ්‌ඤං අවිදූරෙ නිසින්‌නං පල්‌ලඞ්‌කං ආභුජිත්‌වා උජුං කායං පණිධාය තණ්‌හාසඞ්‌ඛයවිමුත්‌තිං පච්‌චවෙක්‌ඛමානං.
Addasā kho bhagavā āyasmantaṃ aññāsikoṇḍaññaṃ avidūre nisinnaṃ pallaṅkaṃ ābhujitvā ujuṃ kāyaṃ paṇidhāya taṇhāsaṅkhayavimuttiṃ paccavekkhamānaṃ.
අථ ඛො භගවා එතමත්‌ථං විදිත්‌වා තායං වෙලායං ඉමං උදානං උදානෙසි –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘යස්‌ස මූලං ඡමා නත්‌ථි, පණ්‌ණා නත්‌ථි කුතො ලතා;
‘‘Yassa mūlaṃ chamā natthi, paṇṇā natthi kuto latā;
තං ධීරං බන්‌ධනා මුත්‌තං, කො තං නින්‌දිතුමරහති;
Taṃ dhīraṃ bandhanā muttaṃ, ko taṃ ninditumarahati;
දෙවාපි නං පසංසන්‌ති, බ්‍රහ්‌මුනාපි පසංසිතො’’ති. ඡට්‌ඨං;
Devāpi naṃ pasaṃsanti, brahmunāpi pasaṃsito’’ti. chaṭṭhaṃ;
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / උදාන-අට්‌ඨකථා • Udāna-aṭṭhakathā / 6. තණ්‌හාසඞ්‌ඛයසුත්‌තවණ්‌ණනා • 6. Taṇhāsaṅkhayasuttavaṇṇanā
