Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၁၀. ဥဒာယီသုတ္တံ
10. Udāyīsuttaṃ
၄၀. အထ ခော ဥဒာယီ 1 ဗ္ရာဟ္မဏော ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝတာ ။ပေ.။ ဧကမန္တံ နိသိန္နော ခော ဥဒာယီ ဗ္ရာဟ္မဏော ဘဂဝန္တံ ဧတဒဝောစ – ‘‘ဘဝမ္ပိ နော ဂောတမော ယညံ ဝဏ္ဏေတီ’’တိ? ‘‘န ခော အဟံ, ဗ္ရာဟ္မဏ, သဗ္ဗံ ယညံ ဝဏ္ဏေမိ; န ပနာဟံ, ဗ္ရာဟ္မဏ, သဗ္ဗံ ယညံ န ဝဏ္ဏေမိ။ ယထာရူပေ ခော, ဗ္ရာဟ္မဏ, ယညေ ဂာဝော ဟညန္တိ, အဇေဠကာ ဟညန္တိ, ကုက္ကုဋသူကရာ ဟညန္တိ, ဝိဝိဓာ ပာဏာ သင္ဃာတံ အာပဇ္ဇန္တိ; ဧဝရူပံ ခော အဟံ, ဗ္ရာဟ္မဏ, သာရမ္ဘံ ယညံ န ဝဏ္ဏေမိ။ တံ ကိသ္သ ဟေတု? ဧဝရူပဉ္ဟိ, ဗ္ရာဟ္မဏ, သာရမ္ဘံ ယညံ န ဥပသင္ကမန္တိ အရဟန္တော ဝာ အရဟတ္တမဂ္ဂံ ဝာ သမာပန္နာ။
40. Atha kho udāyī 2 brāhmaṇo yena bhagavā tenupasaṅkami; upasaṅkamitvā bhagavatā …pe… ekamantaṃ nisinno kho udāyī brāhmaṇo bhagavantaṃ etadavoca – ‘‘bhavampi no gotamo yaññaṃ vaṇṇetī’’ti? ‘‘Na kho ahaṃ, brāhmaṇa, sabbaṃ yaññaṃ vaṇṇemi; na panāhaṃ, brāhmaṇa, sabbaṃ yaññaṃ na vaṇṇemi. Yathārūpe kho, brāhmaṇa, yaññe gāvo haññanti, ajeḷakā haññanti, kukkuṭasūkarā haññanti, vividhā pāṇā saṅghātaṃ āpajjanti; evarūpaṃ kho ahaṃ, brāhmaṇa, sārambhaṃ yaññaṃ na vaṇṇemi. Taṃ kissa hetu? Evarūpañhi, brāhmaṇa, sārambhaṃ yaññaṃ na upasaṅkamanti arahanto vā arahattamaggaṃ vā samāpannā.
‘‘ယထာရူပေ စ ခော, ဗ္ရာဟ္မဏ, ယညေ နေဝ ဂာဝော ဟညန္တိ, န အဇေဠကာ ဟညန္တိ, န ကုက္ကုဋသူကရာ ဟညန္တိ, န ဝိဝိဓာ ပာဏာ သင္ဃာတံ အာပဇ္ဇန္တိ; ဧဝရူပံ ခော အဟံ, ဗ္ရာဟ္မဏ, နိရာရမ္ဘံ ယညံ ဝဏ္ဏေမိ , ယဒိဒံ နိစ္စဒာနံ အနုကုလယညံ။ တံ ကိသ္သ ဟေတု? ဧဝရူပဉ္ဟိ, ဗ္ရာဟ္မဏ, နိရာရမ္ဘံ ယညံ ဥပသင္ကမန္တိ အရဟန္တော ဝာ အရဟတ္တမဂ္ဂံ ဝာ သမာပန္နာ’’တိ။
‘‘Yathārūpe ca kho, brāhmaṇa, yaññe neva gāvo haññanti, na ajeḷakā haññanti, na kukkuṭasūkarā haññanti, na vividhā pāṇā saṅghātaṃ āpajjanti; evarūpaṃ kho ahaṃ, brāhmaṇa, nirārambhaṃ yaññaṃ vaṇṇemi , yadidaṃ niccadānaṃ anukulayaññaṃ. Taṃ kissa hetu? Evarūpañhi, brāhmaṇa, nirārambhaṃ yaññaṃ upasaṅkamanti arahanto vā arahattamaggaṃ vā samāpannā’’ti.
‘‘အဘိသင္ခတံ နိရာရမ္ဘံ၊ ယညံ ကာလေန ကပ္ပိယံ။
‘‘Abhisaṅkhataṃ nirārambhaṃ, yaññaṃ kālena kappiyaṃ;
တာဒိသံ ဥပသံယန္တိ၊ သညတာ ဗ္ရဟ္မစာရယော။
Tādisaṃ upasaṃyanti, saññatā brahmacārayo.
‘‘သုဟုတံ သုယိဋ္ဌံ သုပ္ပတ္တံ 11၊ ဒက္ခိဏေယ္ယေသု ယံ ကတံ။
‘‘Suhutaṃ suyiṭṭhaṃ suppattaṃ 12, dakkhiṇeyyesu yaṃ kataṃ;
ယညော စ ဝိပုလော ဟောတိ၊ ပသီဒန္တိ စ ဒေဝတာ။
Yañño ca vipulo hoti, pasīdanti ca devatā.
အဗ္ယာဗဇ္ဈံ သုခံ လောကံ၊ ပဏ္ဍိတော ဥပပဇ္ဇတီ’’တိ။ ဒသမံ။
Abyābajjhaṃ sukhaṃ lokaṃ, paṇḍito upapajjatī’’ti. dasamaṃ;
စက္ကဝဂ္ဂော စတုတ္ထော။
Cakkavaggo catuttho.
တသ္သုဒ္ဒာနံ –
Tassuddānaṃ –
စက္ကော သင္ဂဟော သီဟော၊ ပသာဒော ဝသ္သကာရေန ပဉ္စမံ။
Cakko saṅgaho sīho, pasādo vassakārena pañcamaṃ;
ဒောဏော အပရိဟာနိယော ပတိလီနော၊ ဥဇ္ဇယော ဥဒာယိနာ တေ ဒသာတိ။
Doṇo aparihāniyo patilīno, ujjayo udāyinā te dasāti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁၀. ဥဒာယိသုတ္တဝဏ္ဏနာ • 10. Udāyisuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁၀. ဥဒာယိသုတ္တဝဏ္ဏနာ • 10. Udāyisuttavaṇṇanā