| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
5. උපඤ්‌ඤාතසුත්‌තවණ්‌ණනා
5. Upaññātasuttavaṇṇanā
5. පඤ්‌චමෙ ඉමඤ්‌හි ධම්‌මද්‌වයන්‌ති කුසලෙසු ධම්‌මෙසු අසන්‌තුට්‌ඨිතා, පධානස්‌මිං අනොසක්‌කනසඞ්‌ඛාතං ධම්‌මද්‌වයං. ඉමිනාති ‘‘අසන්‌තුට්‌ඨිතා කුසලෙසු ධම්‌මෙසූ’’ති වචනෙන. ඉමං දීපෙතීති ‘‘යාව සො උප්‌පජ්‌ජති, න තාවාහං සන්‌තුට්‌ඨො අහොසි’’න්‌ති එතං පරියන්‌තං කත්‌වා වක්‌ඛමානත්‌ථං දීපෙති. පධානස්‌මින්‌ති වීරියාරම්‌භෙ. ඉමමත්‌ථන්‌ති ‘‘පධානස්‌මිඤ්‌චා’’තිආදිනා වුත්‌තමත්‌ථං. වීරියප්‌පවාහෙ වත්‌තමානෙ අන්‌තරා එව පටිගමනං නිවත්‌තනං පටිවානං, තදස්‌ස අත්‌ථීති පටිවානී, න පටිවානී අප්‌පටිවානී, තස්‌ස භාවො අප්‌පටිවානිතා, අනොසක්‌කනාති ආහ ‘‘අප්‌පටිවානිතාති අප්‌පටික්‌කමනා අනොසක්‌කනා’’ති. තත්‌ථ අනොසක්‌කනාති අප්‌පටිනිවත්‌ති.
5. Pañcame imañhi dhammadvayanti kusalesu dhammesu asantuṭṭhitā, padhānasmiṃ anosakkanasaṅkhātaṃ dhammadvayaṃ. Imināti ‘‘asantuṭṭhitā kusalesu dhammesū’’ti vacanena. Imaṃ dīpetīti ‘‘yāva so uppajjati, na tāvāhaṃ santuṭṭho ahosi’’nti etaṃ pariyantaṃ katvā vakkhamānatthaṃ dīpeti. Padhānasminti vīriyārambhe. Imamatthanti ‘‘padhānasmiñcā’’tiādinā vuttamatthaṃ. Vīriyappavāhe vattamāne antarā eva paṭigamanaṃ nivattanaṃ paṭivānaṃ, tadassa atthīti paṭivānī, na paṭivānī appaṭivānī, tassa bhāvo appaṭivānitā, anosakkanāti āha ‘‘appaṭivānitāti appaṭikkamanā anosakkanā’’ti. Tattha anosakkanāti appaṭinivatti.
ආගමනීයපටිපදාති සමථවිපස්‌සනාසඞ්‌ඛාතා පුබ්‌බභාගපටිපත්‌ති. සා හි ආගච්‌ඡන්‌ති විසෙසමධිගච්‌ඡන්‌ති එතාය, ආගච්‌ඡති වා විසෙසාධිගමො එතායාති ආගමනීයා, සා එව පටිපජ්‌ජිතබ්‌බතො පටිපදාති ආගමනීයපටිපදා. අප්‌පටිවානපධානන්‌ති ඔසක්‌කනාරහිතප්‌පධානං, අන්‌තරා අනොසක්‌කිත්‌වා කතවීරියන්‌ති අත්‌ථො.
Āgamanīyapaṭipadāti samathavipassanāsaṅkhātā pubbabhāgapaṭipatti. Sā hi āgacchanti visesamadhigacchanti etāya, āgacchati vā visesādhigamo etāyāti āgamanīyā, sā eva paṭipajjitabbato paṭipadāti āgamanīyapaṭipadā. Appaṭivānapadhānanti osakkanārahitappadhānaṃ, antarā anosakkitvā katavīriyanti attho.
උපඤ්‌ඤාතසුත්‌තවණ්‌ණනා නිට්‌ඨිතා.
Upaññātasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 5. උපඤ්‌ඤාතසුත්‌තං • 5. Upaññātasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 5. උපඤ්‌ඤාතසුත්‌තවණ්‌ණනා • 5. Upaññātasuttavaṇṇanā
