| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၆. ဝိဝာဒမူလသုတ္တံ
6. Vivādamūlasuttaṃ
၃၆. 1 ‘‘ဆယိမာနိ, ဘိက္ခဝေ, ဝိဝာဒမူလာနိ။ ကတမာနိ ဆ? ဣဓ, ဘိက္ခဝေ, ဘိက္ခု ကောဓနော ဟောတိ ဥပနာဟီ။ ယော သော, ဘိက္ခဝေ, ဘိက္ခု ကောဓနော ဟောတိ ဥပနာဟီ သော သတ္ထရိပိ အဂာရဝော ဝိဟရတိ အပ္ပတိသ္သော, ဓမ္မေပိ အဂာရဝော ဝိဟရတိ အပ္ပတိသ္သော, သင္ဃေပိ အဂာရဝော ဝိဟရတိ အပ္ပတိသ္သော, သိက္ခာယပိ န ပရိပူရကာရီ ဟောတိ။ ယော သော, ဘိက္ခဝေ, ဘိက္ခု သတ္ထရိ အဂာရဝော ဝိဟရတိ အပ္ပတိသ္သော, ဓမ္မေ အဂာရဝော ဝိဟရတိ အပ္ပတိသ္သော, သင္ဃေ အဂာရဝော ဝိဟရတိ အပ္ပတိသ္သော, သိက္ခာယ န ပရိပူရကာရီ သော သင္ဃေ ဝိဝာဒံ ဇနေတိ, ယော ဟောတိ ဝိဝာဒော ဗဟုဇနာဟိတာယ ဗဟုဇနာသုခာယ ဗဟုနော ဇနသ္သ အနတ္ထာယ အဟိတာယ ဒုက္ခာယ ဒေဝမနုသ္သာနံ။ ဧဝရူပံ စေ တုမ္ဟေ, ဘိက္ခဝေ, ဝိဝာဒမူလံ အဇ္ဈတ္တံ ဝာ ဗဟိဒ္ဓာ ဝာ သမနုပသ္သေယ္ယာထ။ တတ္ရ တုမ္ဟေ, ဘိက္ခဝေ, တသ္သေဝ ပာပကသ္သ ဝိဝာဒမူလသ္သ ပဟာနာယ ဝာယမေယ္ယာထ။ ဧဝရူပံ စေ တုမ္ဟေ, ဘိက္ခဝေ, ဝိဝာဒမူလံ အဇ္ဈတ္တံ ဝာ ဗဟိဒ္ဓာ ဝာ န သမနုပသ္သေယ္ယာထ, တတ္ရ တုမ္ဟေ, ဘိက္ခဝေ, တသ္သေဝ ပာပကသ္သ ဝိဝာဒမူလသ္သ အာယတိံ အနဝသ္သဝာယ ပဋိပဇ္ဇေယ္ယာထ။ ဧဝမေတသ္သ ပာပကသ္သ ဝိဝာဒမူလသ္သ ပဟာနံ ဟောတိ။ ဧဝမေတသ္သ ပာပကသ္သ ဝိဝာဒမူလသ္သ အာယတိံ အနဝသ္သဝော ဟောတိ။
36.2 ‘‘Chayimāni, bhikkhave, vivādamūlāni. Katamāni cha? Idha, bhikkhave, bhikkhu kodhano hoti upanāhī. Yo so, bhikkhave, bhikkhu kodhano hoti upanāhī so sattharipi agāravo viharati appatisso, dhammepi agāravo viharati appatisso, saṅghepi agāravo viharati appatisso, sikkhāyapi na paripūrakārī hoti. Yo so, bhikkhave, bhikkhu satthari agāravo viharati appatisso, dhamme agāravo viharati appatisso, saṅghe agāravo viharati appatisso, sikkhāya na paripūrakārī so saṅghe vivādaṃ janeti, yo hoti vivādo bahujanāhitāya bahujanāsukhāya bahuno janassa anatthāya ahitāya dukkhāya devamanussānaṃ. Evarūpaṃ ce tumhe, bhikkhave, vivādamūlaṃ ajjhattaṃ vā bahiddhā vā samanupasseyyātha. Tatra tumhe, bhikkhave, tasseva pāpakassa vivādamūlassa pahānāya vāyameyyātha. Evarūpaṃ ce tumhe, bhikkhave, vivādamūlaṃ ajjhattaṃ vā bahiddhā vā na samanupasseyyātha, tatra tumhe, bhikkhave, tasseva pāpakassa vivādamūlassa āyatiṃ anavassavāya paṭipajjeyyātha. Evametassa pāpakassa vivādamūlassa pahānaṃ hoti. Evametassa pāpakassa vivādamūlassa āyatiṃ anavassavo hoti.
‘‘ပုန စပရံ, ဘိက္ခဝေ, ဘိက္ခု မက္ခီ ဟောတိ ပဠာသီ။ပေ.။ ဣသ္သုကီ ဟောတိ မစ္ဆရီ။ သဌော ဟောတိ မာယာဝီ။ ပာပိစ္ဆော ဟောတိ မိစ္ဆာဒိဋ္ဌိ။ သန္ဒိဋ္ဌိပရာမာသီ ဟောတိ အာဓာနဂ္ဂာဟီ ဒုပ္ပဋိနိသ္သဂ္ဂီ။ ယော သော, ဘိက္ခဝေ, ဘိက္ခု သန္ဒိဋ္ဌိပရာမာသီ ဟောတိ အာဓာနဂ္ဂာဟီ ဒုပ္ပဋိနိသ္သဂ္ဂီ, သော သတ္ထရိပိ အဂာရဝော ဝိဟရတိ အပ္ပတိသ္သော, ဓမ္မေပိ အဂာရဝော ဝိဟရတိ အပ္ပတိသ္သော, သင္ဃေပိ အဂာရဝော ဝိဟရတိ အပ္ပတိသ္သော, သိက္ခာယပိ န ပရိပူရကာရီ ဟောတိ။ ယော သော, ဘိက္ခဝေ, ဘိက္ခု သတ္ထရိ အဂာရဝော ဝိဟရတိ အပ္ပတိသ္သော, ဓမ္မေ။ပေ.။ သင္ဃေ အဂာရဝော ဝိဟရတိ အပ္ပတိသ္သော, သိက္ခာယ န ပရိပူရကာရီ, သော သင္ဃေ ဝိဝာဒံ ဇနေတိ, ယော ဟောတိ ဝိဝာဒော ဗဟုဇနာဟိတာယ ဗဟုဇနာသုခာယ ဗဟုနော ဇနသ္သ အနတ္ထာယ အဟိတာယ ဒုက္ခာယ ဒေဝမနုသ္သာနံ။ ဧဝရူပံ စေ တုမ္ဟေ, ဘိက္ခဝေ, ဝိဝာဒမူလံ အဇ္ဈတ္တံ ဝာ ဗဟိဒ္ဓာ ဝာ သမနုပသ္သေယ္ယာထ။ တတ္ရ တုမ္ဟေ, ဘိက္ခဝေ, တသ္သေဝ ပာပကသ္သ ဝိဝာဒမူလသ္သ ပဟာနာယ ဝာယမေယ္ယာထ။ ဧဝရူပံ စေ တုမ္ဟေ, ဘိက္ခဝေ, ဝိဝာဒမူလံ အဇ္ဈတ္တံ ဝာ ဗဟိဒ္ဓာ ဝာ န သမနုပသ္သေယ္ယာထ။ တတ္ရ တုမ္ဟေ, ဘိက္ခဝေ, တသ္သေဝ ပာပကသ္သ ဝိဝာဒမူလသ္သ အာယတိံ အနဝသ္သဝာယ ပဋိပဇ္ဇေယ္ယာထ။ ဧဝမေတသ္သ ပာပကသ္သ ဝိဝာဒမူလသ္သ ပဟာနံ ဟောတိ။ ဧဝမေတသ္သ ပာပကသ္သ ဝိဝာဒမူလသ္သ အာယတိံ အနဝသ္သဝော ဟောတိ။ ဣမာနိ ခော, ဘိက္ခဝေ, ဆ ဝိဝာဒမူလာနီ’’တိ။ ဆဋ္ဌံ။
‘‘Puna caparaṃ, bhikkhave, bhikkhu makkhī hoti paḷāsī…pe… issukī hoti maccharī… saṭho hoti māyāvī… pāpiccho hoti micchādiṭṭhi… sandiṭṭhiparāmāsī hoti ādhānaggāhī duppaṭinissaggī. Yo so, bhikkhave, bhikkhu sandiṭṭhiparāmāsī hoti ādhānaggāhī duppaṭinissaggī, so sattharipi agāravo viharati appatisso, dhammepi agāravo viharati appatisso, saṅghepi agāravo viharati appatisso, sikkhāyapi na paripūrakārī hoti. Yo so, bhikkhave, bhikkhu satthari agāravo viharati appatisso, dhamme…pe… saṅghe agāravo viharati appatisso, sikkhāya na paripūrakārī, so saṅghe vivādaṃ janeti, yo hoti vivādo bahujanāhitāya bahujanāsukhāya bahuno janassa anatthāya ahitāya dukkhāya devamanussānaṃ. Evarūpaṃ ce tumhe, bhikkhave, vivādamūlaṃ ajjhattaṃ vā bahiddhā vā samanupasseyyātha. Tatra tumhe, bhikkhave, tasseva pāpakassa vivādamūlassa pahānāya vāyameyyātha. Evarūpaṃ ce tumhe, bhikkhave, vivādamūlaṃ ajjhattaṃ vā bahiddhā vā na samanupasseyyātha. Tatra tumhe, bhikkhave, tasseva pāpakassa vivādamūlassa āyatiṃ anavassavāya paṭipajjeyyātha. Evametassa pāpakassa vivādamūlassa pahānaṃ hoti. Evametassa pāpakassa vivādamūlassa āyatiṃ anavassavo hoti. Imāni kho, bhikkhave, cha vivādamūlānī’’ti. Chaṭṭhaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၆. ဝိဝာဒမူလသုတ္တဝဏ္ဏနာ • 6. Vivādamūlasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၆. ဝိဝာဒမူလသုတ္တဝဏ္ဏနာ • 6. Vivādamūlasuttavaṇṇanā
