| Library / Tipiṭaka / තිපිටක • Tipiṭaka / ඉතිවුත්‌තකපාළි • Itivuttakapāḷi |
6. අසුභානුපස්‌සීසුත්‌තං
6. Asubhānupassīsuttaṃ
85. වුත්‌තඤ්‌හෙතං භගවතා, වුත්‌තමරහතාති මෙ සුතං –
85. Vuttañhetaṃ bhagavatā, vuttamarahatāti me sutaṃ –
‘‘අසුභානුපස්‌සී, භික්‌ඛවෙ, කායස්‌මිං විහරථ; ආනාපානස්‌සති ච වො අජ්‌ඣත්‌තං පරිමුඛං සූපට්‌ඨිතා හොතු; සබ්‌බසඞ්‌ඛාරෙසු අනිච්‌චානුපස්‌සිනො විහරථ. අසුභානුපස්‌සීනං, භික්‌ඛවෙ, කායස්‌මිං විහරතං යො සුභාය ධාතුයා රාගානුසයො සො පහීයති 1. ආනාපානස්‌සතියා අජ්‌ඣත්‌තං පරිමුඛං සූපට්‌ඨිතිතාය යෙ බාහිරා විතක්‌කාසයා විඝාතපක්‌ඛිකා, තෙ න හොන්‌ති. සබ්‌බසඞ්‌ඛාරෙසු අනිච්‌චානුපස්‌සීනං විහරතං යා අවිජ්‌ජා සා පහීයති, යා විජ්‌ජා සා උප්‌පජ්‌ජතී’’ති. එතමත්‌ථං භගවා අවොච. තත්‌ථෙතං ඉති වුච්‌චති –
‘‘Asubhānupassī, bhikkhave, kāyasmiṃ viharatha; ānāpānassati ca vo ajjhattaṃ parimukhaṃ sūpaṭṭhitā hotu; sabbasaṅkhāresu aniccānupassino viharatha. Asubhānupassīnaṃ, bhikkhave, kāyasmiṃ viharataṃ yo subhāya dhātuyā rāgānusayo so pahīyati 2. Ānāpānassatiyā ajjhattaṃ parimukhaṃ sūpaṭṭhititāya ye bāhirā vitakkāsayā vighātapakkhikā, te na honti. Sabbasaṅkhāresu aniccānupassīnaṃ viharataṃ yā avijjā sā pahīyati, yā vijjā sā uppajjatī’’ti. Etamatthaṃ bhagavā avoca. Tatthetaṃ iti vuccati –
‘‘අසුභානුපස්‌සී කායස්‌මිං, ආනාපානෙ පටිස්‌සතො;
‘‘Asubhānupassī kāyasmiṃ, ānāpāne paṭissato;
සබ්‌බසඞ්‌ඛාරසමථං, පස්‌සං ආතාපි සබ්‌බදා.
Sabbasaṅkhārasamathaṃ, passaṃ ātāpi sabbadā.
‘‘ස වෙ සම්‌මද්‌දසො භික්‌ඛු, යතො තත්‌ථ විමුච්‌චති;
‘‘Sa ve sammaddaso bhikkhu, yato tattha vimuccati;
අභිඤ්‌ඤාවොසිතො සන්‌තො, ස වෙ යොගාතිගො මුනී’’ති.
Abhiññāvosito santo, sa ve yogātigo munī’’ti.
අයම්‌පි අත්‌ථො වුත්‌තො භගවතා, ඉති මෙ සුතන්‌ති. ඡට්‌ඨං.
Ayampi attho vutto bhagavatā, iti me sutanti. Chaṭṭhaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ඉතිවුත්‌තක-අට්‌ඨකථා • Itivuttaka-aṭṭhakathā / 6. අසුභානුපස්‌සීසුත්‌තවණ්‌ණනා • 6. Asubhānupassīsuttavaṇṇanā
