| Library / Tipiṭaka / තිපිටක • Tipiṭaka / මහාවිභඞ්‌ග • Mahāvibhaṅga |
9. දුතියදුට්‌ඨදොසසික්‌ඛාපදං
9. Dutiyaduṭṭhadosasikkhāpadaṃ
391. තෙන සමයෙන බුද්‌ධො භගවා රාජගහෙ විහරති වෙළුවනෙ කලන්‌දකනිවාපෙ. තෙන ඛො පන සමයෙන මෙත්‌තියභූමජකා භික්‌ඛූ ගිජ්‌ඣකූටා පබ්‌බතා ඔරොහන්‌තා අද්‌දසංසු ඡගලකං 1 අජිකාය විප්‌පටිපජ්‌ජන්‌තං. දිස්‌වාන එවමාහංසු – ‘‘හන්‌ද මයං, ආවුසො, ඉමං ඡගලකං දබ්‌බං මල්‌ලපුත්‌තං නාම කරොම. ඉමං අජිකං මෙත්‌තියං නාම භික්‌ඛුනිං කරොම. එවං මයං වොහරිස්‌සාම. පුබ්‌බෙ මයං, ආවුසො, දබ්‌බං මල්‌ලපුත්‌තං සුතෙන අවොචුම්‌හා. ඉදානි පන අම්‌හෙහි සාමං දිට්‌ඨො මෙත්‌තියාය භික්‌ඛුනියා විප්‌පටිපජ්‌ජන්‌තො’’ති. තෙ තං ඡගලකං දබ්‌බං මල්‌ලපුත්‌තං නාම අකංසු. තං අජිකං මෙත්‌තියං නාම භික්‌ඛුනිං අකංසු. තෙ භික්‌ඛූනං ආරොචෙසුං – ‘‘පුබ්‌බෙ මයං, ආවුසො, දබ්‌බං මල්‌ලපුත්‌තං සුතෙන අවොචුම්‌හා. ඉදානි පන අම්‌හෙහි සාමං දිට්‌ඨො මෙත්‌තියාය භික්‌ඛුනියා විප්‌පටිපජ්‌ජන්‌තො’’ති. භික්‌ඛූ එවමාහංසු – ‘‘මාවුසො, එවං අවචුත්‌ථ. නායස්‌මා දබ්‌බො මල්‌ලපුත්‌තො එවං කරිස්‌සතී’’ති.
391. Tena samayena buddho bhagavā rājagahe viharati veḷuvane kalandakanivāpe. Tena kho pana samayena mettiyabhūmajakā bhikkhū gijjhakūṭā pabbatā orohantā addasaṃsu chagalakaṃ 2 ajikāya vippaṭipajjantaṃ. Disvāna evamāhaṃsu – ‘‘handa mayaṃ, āvuso, imaṃ chagalakaṃ dabbaṃ mallaputtaṃ nāma karoma. Imaṃ ajikaṃ mettiyaṃ nāma bhikkhuniṃ karoma. Evaṃ mayaṃ voharissāma. Pubbe mayaṃ, āvuso, dabbaṃ mallaputtaṃ sutena avocumhā. Idāni pana amhehi sāmaṃ diṭṭho mettiyāya bhikkhuniyā vippaṭipajjanto’’ti. Te taṃ chagalakaṃ dabbaṃ mallaputtaṃ nāma akaṃsu. Taṃ ajikaṃ mettiyaṃ nāma bhikkhuniṃ akaṃsu. Te bhikkhūnaṃ ārocesuṃ – ‘‘pubbe mayaṃ, āvuso, dabbaṃ mallaputtaṃ sutena avocumhā. Idāni pana amhehi sāmaṃ diṭṭho mettiyāya bhikkhuniyā vippaṭipajjanto’’ti. Bhikkhū evamāhaṃsu – ‘‘māvuso, evaṃ avacuttha. Nāyasmā dabbo mallaputto evaṃ karissatī’’ti.
අථ ඛො තෙ භික්‌ඛූ භගවතො එතමත්‌ථං ආරොචෙසුං. අථ ඛො භගවා එතස්‌මිං නිදානෙ එතස්‌මිං පකරණෙ භික්‌ඛුසඞ්‌ඝං සන්‌නිපාතාපෙත්‌වා ආයස්‌මන්‌තං දබ්‌බං මල්‌ලපුත්‌තං පටිපුච්‌ඡි – ‘‘සරසි ත්‌වං, දබ්‌බ, එවරූපං කත්‌තා යථයිමෙ භික්‌ඛූ ආහංසූ’’ති? ‘‘යථා මං, භන්‌තෙ, භගවා ජානාතී’’ති. දුතියම්‌පි ඛො භගවා…පෙ.… තතියම්‌පි ඛො භගවා ආයස්‌මන්‌තං දබ්‌බං මල්‌ලපුත්‌තං එතදවොච – ‘‘සරසි ත්‌වං, දබ්‌බ, එවරූපං කත්‌තා යථයිමෙ භික්‌ඛූ ආහංසූ’’ති? ‘‘යථා මං, භන්‌තෙ, භගවා ජානාතී’’ති. ‘‘න ඛො, දබ්‌බ, දබ්‌බා එවං නිබ්‌බෙඨෙන්‌ති. සචෙ තයා කතං කතන්‌ති වදෙහි, සචෙ තයා අකතං අකතන්‌ති වදෙහී’’ති. ‘‘යතො අහං, භන්‌තෙ, ජාතො නාභිජානාමි සුපිනන්‌තෙනපි මෙථුනධම්‌මං පටිසෙවිතා, පගෙව ජාගරො’’ති! අථ ඛො භගවා භික්‌ඛූ ආමන්‌තෙසි – ‘‘තෙන හි, භික්‌ඛුවෙ, ඉමෙ භික්‌ඛූ අනුයුඤ්‌ජථා’’ති. ඉදං වත්‌වා භගවා උට්‌ඨායාසනා විහාරං පාවිසි.
Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā āyasmantaṃ dabbaṃ mallaputtaṃ paṭipucchi – ‘‘sarasi tvaṃ, dabba, evarūpaṃ kattā yathayime bhikkhū āhaṃsū’’ti? ‘‘Yathā maṃ, bhante, bhagavā jānātī’’ti. Dutiyampi kho bhagavā…pe… tatiyampi kho bhagavā āyasmantaṃ dabbaṃ mallaputtaṃ etadavoca – ‘‘sarasi tvaṃ, dabba, evarūpaṃ kattā yathayime bhikkhū āhaṃsū’’ti? ‘‘Yathā maṃ, bhante, bhagavā jānātī’’ti. ‘‘Na kho, dabba, dabbā evaṃ nibbeṭhenti. Sace tayā kataṃ katanti vadehi, sace tayā akataṃ akatanti vadehī’’ti. ‘‘Yato ahaṃ, bhante, jāto nābhijānāmi supinantenapi methunadhammaṃ paṭisevitā, pageva jāgaro’’ti! Atha kho bhagavā bhikkhū āmantesi – ‘‘tena hi, bhikkhuve, ime bhikkhū anuyuñjathā’’ti. Idaṃ vatvā bhagavā uṭṭhāyāsanā vihāraṃ pāvisi.
අථ ඛො තෙ භික්‌ඛූ මෙත්‌තියභූමජකෙ භික්‌ඛූ අනුයුඤ්‌ජිංසු. තෙ භික්‌ඛූහි අනුයුඤ්‌ජීයමානා භික්‌ඛූනං එතමත්‌ථං ආරොචෙසුං – ‘‘කිං පන තුම්‌හෙ, ආවුසො, ආයස්‌මන්‌තං දබ්‌බං මල්‌ලපුත්‌තං අඤ්‌ඤභාගියස්‌ස අධිකරණස්‌ස කිඤ්‌චිදෙසං ලෙසමත්‌තං උපාදාය පාරාජිකෙන ධම්‌මෙන අනුද්‌ධංසෙථා’’ති? ‘‘එවමාවුසො’’ති. යෙ තෙ භික්‌ඛූ අප්‌පිච්‌ඡා…පෙ.… තෙ උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම මෙත්‌තියභූමජකා භික්‌ඛූ ආයස්‌මන්‌තං දබ්‌බං මල්‌ලපුත්‌තං අඤ්‌ඤභාගියස්‌ස අධිකරණස්‌ස කිඤ්‌චි දෙසං ලෙසමත්‌තං උපාදාය පාරාජිකෙන ධම්‌මෙන අනුද්‌ධංසෙස්‌සන්‌තී’’ති! අථ ඛො තෙ භික්‌ඛූ මෙත්‌තියභූමජකෙ භික්‌ඛූ අනෙකපරියායෙන විගරහිත්‌වා භගවතො එතමත්‌ථං ආරොචෙසුං…පෙ.… ‘‘සච්‌චං කිර තුම්‌හෙ, භික්‌ඛවෙ, දබ්‌බං මල්‌ලපුත්‌තං අඤ්‌ඤභාගියස්‌ස අධිකරණස්‌ස කිඤ්‌චි දෙසං ලෙසමත්‌තං උපාදාය පාරාජිකෙන ධම්‌මෙන අනුද්‌ධංසෙථා’’ති? ‘‘සච්‌චං, භගවා’’ති. විගරහි බුද්‌ධො භගවා…පෙ.… ‘‘කථඤ්‌හි නාම තුම්‌හෙ, මොඝපුරිසා, දබ්‌බං මල්‌ලපුත්‌තං අඤ්‌ඤභාගියස්‌ස අධිකරණස්‌ස කිඤ්‌චි දෙසං ලෙසමත්‌තං උපාදාය පාරාජිකෙන ධම්‌මෙන අනුද්‌ධංසෙස්‌සථ! නෙතං, මොඝපුරිසා, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, ඉමං සික්‌ඛාපදං උද්‌දිසෙය්‍යාථ –
Atha kho te bhikkhū mettiyabhūmajake bhikkhū anuyuñjiṃsu. Te bhikkhūhi anuyuñjīyamānā bhikkhūnaṃ etamatthaṃ ārocesuṃ – ‘‘kiṃ pana tumhe, āvuso, āyasmantaṃ dabbaṃ mallaputtaṃ aññabhāgiyassa adhikaraṇassa kiñcidesaṃ lesamattaṃ upādāya pārājikena dhammena anuddhaṃsethā’’ti? ‘‘Evamāvuso’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma mettiyabhūmajakā bhikkhū āyasmantaṃ dabbaṃ mallaputtaṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsessantī’’ti! Atha kho te bhikkhū mettiyabhūmajake bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, dabbaṃ mallaputtaṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsethā’’ti? ‘‘Saccaṃ, bhagavā’’ti. Vigarahi buddho bhagavā…pe… ‘‘kathañhi nāma tumhe, moghapurisā, dabbaṃ mallaputtaṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
392. ‘‘යො පන භික්‌ඛු භික්‌ඛුං දුට්‌ඨො දොසො අප්‌පතීතො අඤ්‌ඤභාගියස්‌ස අධිකරණස්‌ස කිඤ්‌චිදෙසං ලෙසමත්‌තං උපාදාය පාරාජිකෙන ධම්‌මෙන අනුද්‌ධංසෙය්‍ය – ‘අප්‌පෙව නාම නං ඉමම්‌හා බ්‍රහ්‌මචරියා චාවෙය්‍ය’න්‌ති. තතො අපරෙන සමයෙන සමනුග්‌ගාහීයමානො වා අසමනුග්‌ගාහීයමානො වා අඤ්‌ඤභාගියඤ්‌චෙව තං අධිකරණං හොති කොචිදෙසො ලෙසමත්‌තො උපාදින්‌නො, භික්‌ඛු ච දොසං පතිට්‌ඨාති, සඞ්‌ඝාදිසෙසො’’ති.
392.‘‘Yopana bhikkhu bhikkhuṃ duṭṭho doso appatīto aññabhāgiyassaadhikaraṇassa kiñcidesaṃ lesamattaṃ upādāya pārājikena dhammena anuddhaṃseyya – ‘appeva nāma naṃ imamhā brahmacariyā cāveyya’nti. Tato aparena samayena samanuggāhīyamāno vā asamanuggāhīyamāno vā aññabhāgiyañceva taṃ adhikaraṇaṃ hoti kocideso lesamatto upādinno, bhikkhu ca dosaṃ patiṭṭhāti, saṅghādiseso’’ti.
393. යො පනාති යො යාදිසො…පෙ.… භික්‌ඛූති…පෙ.… අයං ඉමස්‌මිං අත්‌ථෙ අධිප්‌පෙතො භික්‌ඛූති.
393.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
භික්‌ඛුන්‌ති අඤ්‌ඤං භික්‌ඛුං.
Bhikkhunti aññaṃ bhikkhuṃ.
දුට්‌ඨො දොසොති කුපිතො අනත්‌තමනො අනභිරද්‌ධො ආහතචිත්‌තො ඛිලජාතො.
Duṭṭho dosoti kupito anattamano anabhiraddho āhatacitto khilajāto.
අප්‌පතීතොති තෙන ච කොපෙන, තෙන ච දොසෙන, තාය ච අනත්‌තමනතාය, තාය ච අනභිරද්‌ධියා අප්‌පතීතො හොති.
Appatītoti tena ca kopena, tena ca dosena, tāya ca anattamanatāya, tāya ca anabhiraddhiyā appatīto hoti.
අඤ්‌ඤභාගියස්‌ස අධිකරණස්‌සාති ආපත්‌තඤ්‌ඤභාගියං වා හොති අධිකරණඤ්‌ඤභාගියං වා. කථං අධිකරණං අධිකරණස්‌ස අඤ්‌ඤභාගියං? විවාදාධිකරණං අනුවාදාධිකරණස්‌ස ආපත්‌තාධිකරණස්‌ස කිච්‌චාධිකරණස්‌ස අඤ්‌ඤභාගියං. අනුවාදාධිකරණං ආපත්‌තාධිකරණස්‌ස කිච්‌චාධිකරණස්‌ස විවාදාධිකරණස්‌ස අඤ්‌ඤභාගියං. ආපත්‌තාධිකරණං කිච්‌චාධිකරණස්‌ස විවාදාධිකරණස්‌ස අනුවාදාධිකරණස්‌ස අඤ්‌ඤභාගියං. කිච්‌චාධිකරණං විවාදාධිකරණස්‌ස අනුවාදාධිකරණස්‌ස ආපත්‌තාධිකරණස්‌ස අඤ්‌ඤභාගියං. එවං අධිකරණං අධිකරණස්‌ස අඤ්‌ඤභාගියං.
Aññabhāgiyassa adhikaraṇassāti āpattaññabhāgiyaṃ vā hoti adhikaraṇaññabhāgiyaṃ vā. Kathaṃ adhikaraṇaṃ adhikaraṇassa aññabhāgiyaṃ? Vivādādhikaraṇaṃ anuvādādhikaraṇassa āpattādhikaraṇassa kiccādhikaraṇassa aññabhāgiyaṃ. Anuvādādhikaraṇaṃ āpattādhikaraṇassa kiccādhikaraṇassa vivādādhikaraṇassa aññabhāgiyaṃ. Āpattādhikaraṇaṃ kiccādhikaraṇassa vivādādhikaraṇassa anuvādādhikaraṇassa aññabhāgiyaṃ. Kiccādhikaraṇaṃ vivādādhikaraṇassa anuvādādhikaraṇassa āpattādhikaraṇassa aññabhāgiyaṃ. Evaṃ adhikaraṇaṃ adhikaraṇassa aññabhāgiyaṃ.
කථං අධිකරණං අධිකරණස්‌ස තබ්‌භාගියං? විවාදාධිකරණං විවාදාධිකරණස්‌ස තබ්‌භාගියං. අනුවාදාධිකරණං අනුවාදාධිකරණස්‌ස තබ්‌භාගියං. ආපත්‌තාධිකරණං ආපත්‌තාධිකරණස්‌ස සියා තබ්‌භාගියං සියා අඤ්‌ඤභාගියං.
Kathaṃ adhikaraṇaṃ adhikaraṇassa tabbhāgiyaṃ? Vivādādhikaraṇaṃ vivādādhikaraṇassa tabbhāgiyaṃ. Anuvādādhikaraṇaṃ anuvādādhikaraṇassa tabbhāgiyaṃ. Āpattādhikaraṇaṃ āpattādhikaraṇassa siyā tabbhāgiyaṃ siyā aññabhāgiyaṃ.
කථං ආපත්‌තාධිකරණං ආපත්‌තාධිකරණස්‌ස අඤ්‌ඤභාගියං? මෙථුනධම්‌මපාරාජිකාපත්‌ති අදින්‌නාදානපාරාජිකාපත්‌තියා මනුස්‌සවිග්‌ගහපාරාජිකාපත්‌තියා උත්‌තරිමනුස්‌සධම්‌මපාරාජිකාපත්‌තියා අඤ්‌ඤභාගියා. අදින්‌නාදානපාරාජිකාපත්‌ති මනුස්‌සවිග්‌ගහපාරාජිකාපත්‌තියා උත්‌තරිමනුස්‌සධම්‌මපාරාජිකාපත්‌තියා මෙථුනධම්‌මපාරාජිකාපත්‌තියා අඤ්‌ඤභාගියා. මනුස්‌සවිග්‌ගහපාරාජිකාපත්‌ති උත්‌තරිමනුස්‌සධම්‌මපාරාජිකාපත්‌තියා මෙථුනධම්‌මපාරාජිකාපත්‌තියා අදින්‌නාදානපාරාජිකාපත්‌තියා අඤ්‌ඤභාගියා. උත්‌තරිමනුස්‌සධම්‌මපාරාජිකාපත්‌ති මෙථුනධම්‌මපාරාජිකාපත්‌තියා අදින්‌නාදානපාරාජිකාපත්‌තියා මනුස්‌සවිග්‌ගහපාරාජිකාපත්‌තියා අඤ්‌ඤභාගියා. එවං ආපත්‌තාධිකරණං ආපත්‌තාධිකරණස්‌ස අඤ්‌ඤභාගියං.
Kathaṃ āpattādhikaraṇaṃ āpattādhikaraṇassa aññabhāgiyaṃ? Methunadhammapārājikāpatti adinnādānapārājikāpattiyā manussaviggahapārājikāpattiyā uttarimanussadhammapārājikāpattiyā aññabhāgiyā. Adinnādānapārājikāpatti manussaviggahapārājikāpattiyā uttarimanussadhammapārājikāpattiyā methunadhammapārājikāpattiyā aññabhāgiyā. Manussaviggahapārājikāpatti uttarimanussadhammapārājikāpattiyā methunadhammapārājikāpattiyā adinnādānapārājikāpattiyā aññabhāgiyā. Uttarimanussadhammapārājikāpatti methunadhammapārājikāpattiyā adinnādānapārājikāpattiyā manussaviggahapārājikāpattiyā aññabhāgiyā. Evaṃ āpattādhikaraṇaṃ āpattādhikaraṇassa aññabhāgiyaṃ.
කථං ආපත්‌තාධිකරණං ආපත්‌තාධිකරණස්‌ස තබ්‌භාගියං? මෙථුනධම්‌මපාරාජිකාපත්‌ති මෙථුනධම්‌මපාරාජිකාපත්‌තියා තබ්‌භාගියා. අදින්‌නාදානපාරාජිකාපත්‌ති අදින්‌නාදානපාරාජිකාපත්‌තියා තබ්‌භාගියා. මනුස්‌සවිග්‌ගහපාරාජිකාපත්‌ති මනුස්‌සවිග්‌ගහපාරාජිකාපත්‌තියා තබ්‌භාගියා. උත්‌තරිමනුස්‌සධම්‌මපාරාජිකාපත්‌ති උත්‌තරිමනුස්‌සධම්‌මපාරාජිකාපත්‌තියා තබ්‌භාගියා. එවං ආපත්‌තාධිකරණං ආපත්‌තාධිකරණස්‌ස තබ්‌භාගියං.
Kathaṃ āpattādhikaraṇaṃ āpattādhikaraṇassa tabbhāgiyaṃ? Methunadhammapārājikāpatti methunadhammapārājikāpattiyā tabbhāgiyā. Adinnādānapārājikāpatti adinnādānapārājikāpattiyā tabbhāgiyā. Manussaviggahapārājikāpatti manussaviggahapārājikāpattiyā tabbhāgiyā. Uttarimanussadhammapārājikāpatti uttarimanussadhammapārājikāpattiyā tabbhāgiyā. Evaṃ āpattādhikaraṇaṃ āpattādhikaraṇassa tabbhāgiyaṃ.
කිච්‌චාධිකරණං කිච්‌චාධිකරණස්‌ස තබ්‌භාගියං. එවං අධිකරණං අධිකරණස්‌ස තබ්‌භාගියං.
Kiccādhikaraṇaṃ kiccādhikaraṇassa tabbhāgiyaṃ. Evaṃ adhikaraṇaṃ adhikaraṇassa tabbhāgiyaṃ.
394. කිඤ්‌චි දෙසං ලෙසමත්‌තං උපාදායාති ලෙසො නාම දස ලෙසා – ජාතිලෙසො , නාමලෙසො, ගොත්‌තලෙසො, ලිඞ්‌ගලෙසො, ආපත්‌තිලෙසො, පත්‌තලෙසො, චීවරලෙසො, උපජ්‌ඣායලෙසො, ආචරියලෙසො, සෙනාසනලෙසො.
394.Kiñci desaṃ lesamattaṃ upādāyāti leso nāma dasa lesā – jātileso , nāmaleso, gottaleso, liṅgaleso, āpattileso, pattaleso, cīvaraleso, upajjhāyaleso, ācariyaleso, senāsanaleso.
395. ජාතිලෙසො නාම ඛත්‌තියො දිට්‌ඨො හොති පාරාජිකං ධම්‌මං අජ්‌ඣාපජ්‌ජන්‌තො. අඤ්‌ඤං ඛත්‌තියං පස්‌සිත්‌වා චොදෙති – ‘‘ඛත්‌තියො මයා දිට්‌ඨො 3. පාරාජිකං ධම්‌මං අජ්‌ඣාපන්‌නොසි, අස්‌සමණොසි, අසක්‍යපුත්‌තියොසි, නත්‌ථි තයා සද්‌ධිං උපොසථො වා පවාරණා වා සඞ්‌ඝකම්‌මං වා’’ති, ආපත්‌ති වාචාය, වාචාය සඞ්‌ඝාදිසෙසස්‌ස.
395.Jātileso nāma khattiyo diṭṭho hoti pārājikaṃ dhammaṃ ajjhāpajjanto. Aññaṃ khattiyaṃ passitvā codeti – ‘‘khattiyo mayā diṭṭho 4. Pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.
බ්‍රාහ්‌මණො දිට්‌ඨො හොති…පෙ.… වෙස්‌සො දිට්‌ඨො හොති…පෙ.… සුද්‌දො දිට්‌ඨො හොති පාරාජිකං ධම්‌මං අජ්‌ඣාපජ්‌ජන්‌තො. අඤ්‌ඤං සුද්‌දං පස්‌සිත්‌වා චොදෙති – ‘‘සුද්‌දො මයා දිට්‌ඨො. පාරාජිකං ධම්‌මං අජ්‌ඣාපන්‌නොසි , අස්‌සමණොසි, අසක්‍යපුත්‌තියොසි’’…පෙ.… ආපත්‌ති වාචාය, වාචාය සඞ්‌ඝාදිසෙසස්‌ස.
Brāhmaṇo diṭṭho hoti…pe… vesso diṭṭho hoti…pe… suddo diṭṭho hoti pārājikaṃ dhammaṃ ajjhāpajjanto. Aññaṃ suddaṃ passitvā codeti – ‘‘suddo mayā diṭṭho. Pārājikaṃ dhammaṃ ajjhāpannosi , assamaṇosi, asakyaputtiyosi’’…pe… āpatti vācāya, vācāya saṅghādisesassa.
396. නාමලෙසො නාම බුද්‌ධරක්‌ඛිතො දිට්‌ඨො හොති…පෙ.… ධම්‌මරක්‌ඛිතො දිට්‌ඨො හොති…පෙ.… සඞ්‌ඝරක්‌ඛිතො දිට්‌ඨො හොති පාරාජිකං ධම්‌මං අජ්‌ඣාපජ්‌ජන්‌තො . අඤ්‌ඤං සඞ්‌ඝරක්‌ඛිතං පස්‌සිත්‌වා චොදෙති – ‘‘සඞ්‌ඝරක්‌ඛිතො මයා දිට්‌ඨො. පාරාජිකං ධම්‌මං අජ්‌ඣාපන්‌නොසි, අස්‌සමණොසි, අසක්‍යපුත්‌තියොසි’’…පෙ.… ආපත්‌ති වාචාය, වාචාය සඞ්‌ඝාදිසෙසස්‌ස.
396.Nāmaleso nāma buddharakkhito diṭṭho hoti…pe… dhammarakkhito diṭṭho hoti…pe… saṅgharakkhito diṭṭho hoti pārājikaṃ dhammaṃ ajjhāpajjanto . Aññaṃ saṅgharakkhitaṃ passitvā codeti – ‘‘saṅgharakkhito mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
397. ගොත්‌තලෙසො නාම ගොතමො දිට්‌ඨො හොති…පෙ.… මොග්‌ගල්‌ලානො දිට්‌ඨො හොති…පෙ.… කච්‌චායනො දිට්‌ඨො හොති…පෙ.… වාසිට්‌ඨො දිට්‌ඨො හොති පාරාජිකං ධම්‌මං අජ්‌ඣාපජ්‌ජන්‌තො. අඤ්‌ඤං වාසිට්‌ඨං පස්‌සිත්‌වා චොදෙති – ‘‘වාසිට්‌ඨො මයා දිට්‌ඨො. පාරාජිකං ධම්‌මං අජ්‌ඣාපන්‌නොසි, අස්‌සමණොසි, අසක්‍යපුත්‌තියොසි’’…පෙ.… ආපත්‌ති වාචාය, වාචාය සඞ්‌ඝාදිසෙසස්‌ස.
397.Gottaleso nāma gotamo diṭṭho hoti…pe… moggallāno diṭṭho hoti…pe… kaccāyano diṭṭho hoti…pe… vāsiṭṭho diṭṭho hoti pārājikaṃ dhammaṃ ajjhāpajjanto. Aññaṃ vāsiṭṭhaṃ passitvā codeti – ‘‘vāsiṭṭho mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
398. ලිඞ්‌ගලෙසො නාම දීඝො දිට්‌ඨො හොති…පෙ.… රස්‌සො දිට්‌ඨො හොති…පෙ.… කණ්‌හො දිට්‌ඨො හොති…පෙ.… ඔදාතො දිට්‌ඨො හොති පාරාජිකං ධම්‌මං අජ්‌ඣාපජ්‌ජන්‌තො. අඤ්‌ඤං ඔදාතං පස්‌සිත්‌වා චොදෙති – ‘‘ඔදාතො මයා දිට්‌ඨො. පාරාජිකං ධම්‌මං අජ්‌ඣාපන්‌නොසි, අස්‌සමණොසි, අසක්‍යපුත්‌තියොසි’’…පෙ.… ආපත්‌ති වාචාය, වාචාය සඞ්‌ඝාදිසෙසස්‌ස.
398.Liṅgaleso nāma dīgho diṭṭho hoti…pe… rasso diṭṭho hoti…pe… kaṇho diṭṭho hoti…pe… odāto diṭṭho hoti pārājikaṃ dhammaṃ ajjhāpajjanto. Aññaṃ odātaṃ passitvā codeti – ‘‘odāto mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
399. ආපත්‌තිලෙසො නාම ලහුකං ආපත්‌තිං ආපජ්‌ජන්‌තො දිට්‌ඨො හොති. තඤ්‌චෙ පාරාජිකෙන චොදෙති – ‘‘අස්‌සමණොසි, අසක්‍යපුත්‌තියොසි…පෙ.… ආපත්‌ති වාචාය, වාචාය සඞ්‌ඝාදිසෙසස්‌ස.
399.Āpattileso nāma lahukaṃ āpattiṃ āpajjanto diṭṭho hoti. Tañce pārājikena codeti – ‘‘assamaṇosi, asakyaputtiyosi…pe… āpatti vācāya, vācāya saṅghādisesassa.
400. පත්‌තලෙසො නාම ලොහපත්‌තධරො දිට්‌ඨො හොති…පෙ.… සාටකපත්‌තධරො දිට්‌ඨො හොති…පෙ.… සුම්‌භකපත්‌තධරො දිට්‌ඨො හොති පාරාජිකං ධම්‌මං අජ්‌ඣාපජ්‌ජන්‌තො. අඤ්‌ඤං සුම්‌භකපත්‌තධරං පස්‌සිත්‌වා චොදෙති – ‘‘සුම්‌භකපත්‌තධරො මයා දිට්‌ඨො. පාරාජිකං ධම්‌මං අජ්‌ඣාපන්‌නොසි, අස්‌සමණොසි, අසක්‍යපුත්‌තියොසි’’…පෙ.… ආපත්‌ති වාචාය, වාචාය සඞ්‌ඝාදිසෙසස්‌ස.
400.Pattaleso nāma lohapattadharo diṭṭho hoti…pe… sāṭakapattadharo diṭṭho hoti…pe… sumbhakapattadharo diṭṭho hoti pārājikaṃ dhammaṃ ajjhāpajjanto. Aññaṃ sumbhakapattadharaṃ passitvā codeti – ‘‘sumbhakapattadharo mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
401. චීවරලෙසො නාම පංසුකූලිකො දිට්‌ඨො හොති…පෙ.… ගහපතිචීවරධරො දිට්‌ඨො හොති පාරාජිකං ධම්‌මං අජ්‌ඣාපජ්‌ජන්‌තො. අඤ්‌ඤං ගහපතිචීවරධරං පස්‌සිත්‌වා චොදෙති – ‘‘ගහපතිචීවරධරො මයා දිට්‌ඨො. පාරාජිකං ධම්‌මං අජ්‌ඣාපන්‌නොසි, අස්‌සමණොසි, අසක්‍යපුත්‌තියොසි’’…පෙ.… ආපත්‌ති වාචාය, වාචාය සඞ්‌ඝාදිසෙසස්‌ස.
401.Cīvaraleso nāma paṃsukūliko diṭṭho hoti…pe… gahapaticīvaradharo diṭṭho hoti pārājikaṃ dhammaṃ ajjhāpajjanto. Aññaṃ gahapaticīvaradharaṃ passitvā codeti – ‘‘gahapaticīvaradharo mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
402. උපජ්‌ඣායලෙසො නාම ඉත්‌ථන්‌නාමස්‌ස සද්‌ධිවිහාරිකො දිට්‌ඨො හොති පාරාජිකං ධම්‌මං අජ්‌ඣාපජ්‌ජන්‌තො. අඤ්‌ඤං ඉත්‌ථන්‌නාමස්‌ස සද්‌ධිවිහාරිකං පස්‌සිත්‌වා චොදෙති – ‘‘ඉත්‌ථන්‌නාමස්‌ස සද්‌ධිවිහාරිකො මයා දිට්‌ඨො. පාරාජිකං ධම්‌මං අජ්‌ඣාපන්‌නොසි, අස්‌සමණොසි, අසක්‍යපුත්‌තියොසි’’…පෙ.… ආපත්‌ති වාචාය, වාචාය සඞ්‌ඝාදිසෙසස්‌ස.
402.Upajjhāyaleso nāma itthannāmassa saddhivihāriko diṭṭho hoti pārājikaṃ dhammaṃ ajjhāpajjanto. Aññaṃ itthannāmassa saddhivihārikaṃ passitvā codeti – ‘‘itthannāmassa saddhivihāriko mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
403. ආචරියලෙසො නාම ඉත්‌ථන්‌නාමස්‌ස අන්‌තෙවාසිකො දිට්‌ඨො හොති පාරාජිකං ධම්‌මං අජ්‌ඣාපජ්‌ජන්‌තො. අඤ්‌ඤං ඉත්‌ථන්‌නාමස්‌ස අන්‌තෙවාසිකං පස්‌සිත්‌වා චොදෙති – ‘‘ඉත්‌ථන්‌නාමස්‌ස අන්‌තෙවාසිකො මයා දිට්‌ඨො. පාරාජිකං ධම්‌මං අජ්‌ඣාපන්‌නොසි, අස්‌සමණොසි, අසක්‍යපුත්‌තියොසි’’…පෙ.… ආපත්‌ති වාචාය, වාචාය සඞ්‌ඝාදිසෙසස්‌ස.
403.Ācariyaleso nāma itthannāmassa antevāsiko diṭṭho hoti pārājikaṃ dhammaṃ ajjhāpajjanto. Aññaṃ itthannāmassa antevāsikaṃ passitvā codeti – ‘‘itthannāmassa antevāsiko mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
404. සෙනාසනලෙසො නාම ඉත්‌ථන්‌නාමසෙනාසනවාසිකො දිට්‌ඨො හොති පාරාජිකං ධම්‌මං අජ්‌ඣාපජ්‌ජන්‌තො. අඤ්‌ඤං ඉත්‌ථන්‌නාමසෙනාසනවාසිකං පස්‌සිත්‌වා චොදෙති – ‘‘ඉත්‌ථන්‌නාමසෙනාසනවාසිකො මයා දිට්‌ඨො. පාරාජිකං ධම්‌මං අජ්‌ඣාපන්‌නොසි, අස්‌සමණොසි, අසක්‍යපුත්‌තියොසි, නත්‌ථි තයා සද්‌ධිං උපොසථො වා පවාරණා වා සඞ්‌ඝකම්‌මං වා’’ති, ආපත්‌ති වාචාය, වාචාය සඞ්‌ඝාදිසෙසස්‌ස.
404.Senāsanaleso nāma itthannāmasenāsanavāsiko diṭṭho hoti pārājikaṃ dhammaṃ ajjhāpajjanto. Aññaṃ itthannāmasenāsanavāsikaṃ passitvā codeti – ‘‘itthannāmasenāsanavāsiko mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.
405. පාරාජිකෙන ධම්‌මෙනාති චතුන්‌නං අඤ්‌ඤතරෙන.
405.Pārājikena dhammenāti catunnaṃ aññatarena.
අනුද්‌ධංසෙය්‍යාති චොදෙති වා චොදාපෙති වා.
Anuddhaṃseyyāti codeti vā codāpeti vā.
අප්‌පෙව නාම නං ඉමම්‌හා බ්‍රහ්‌මචරියාචාවෙය්‍යන්‌ති භික්‌ඛුභාවා චාවෙය්‍යං, සමණධම්‌මා චාවෙය්‍යං, සීලක්‌ඛන්‌ධා චාවෙය්‍යං, තපොගුණා චාවෙය්‍යං.
Appeva nāma naṃ imamhā brahmacariyācāveyyanti bhikkhubhāvā cāveyyaṃ, samaṇadhammā cāveyyaṃ, sīlakkhandhā cāveyyaṃ, tapoguṇā cāveyyaṃ.
තතො අපරෙන සමයෙනාති යස්‌මිං ඛණෙ අනුද්‌ධංසිතො හොති, තං ඛණං තං ලයං තං මුහුත්‌තං වීතිවත්‌තෙ.
Tato aparena samayenāti yasmiṃ khaṇe anuddhaṃsito hoti, taṃ khaṇaṃ taṃ layaṃ taṃ muhuttaṃ vītivatte.
සමනුග්‌ගාහීයමානොති යෙන වත්‌ථුනා අනුද්‌ධංසිතො හොති තස්‌මිං වත්‌ථුස්‌මිං සමනුග්‌ගාහීයමානො.
Samanuggāhīyamānoti yena vatthunā anuddhaṃsito hoti tasmiṃ vatthusmiṃ samanuggāhīyamāno.
අසමනුග්‌ගාහීයමානොති න කෙනචි වුච්‌චමානො.
Asamanuggāhīyamānoti na kenaci vuccamāno.
අධිකරණං නාම චත්‌තාරි අධිකරණානි – විවාදාධිකරණං, අනුවාදාධිකරණං, ආපත්‌තාධිකරණං, කිච්‌චාධිකරණං.
Adhikaraṇaṃ nāma cattāri adhikaraṇāni – vivādādhikaraṇaṃ, anuvādādhikaraṇaṃ, āpattādhikaraṇaṃ, kiccādhikaraṇaṃ.
කොචි දෙසො ලෙසමත්‌තො උපාදින්‌නොති තෙසං දසන්‌නං ලෙසානං අඤ්‌ඤතරො ලෙසො උපාදින්‌නො හොති.
Kocideso lesamatto upādinnoti tesaṃ dasannaṃ lesānaṃ aññataro leso upādinno hoti.
භික්‌ඛු ච දොසං පතිට්‌ඨාතීති තුච්‌ඡකං මයා භණිතං, මුසා මයා භණිතං, අභූතං මයා භණිතං, අජානන්‌තෙන මයා භණිතං.
Bhikkhu ca dosaṃ patiṭṭhātīti tucchakaṃ mayā bhaṇitaṃ, musā mayā bhaṇitaṃ, abhūtaṃ mayā bhaṇitaṃ, ajānantena mayā bhaṇitaṃ.
සඞ්‌ඝාදිසෙසොති …පෙ.… තෙනපි වුච්‌චති සඞ්‌ඝාදිසෙසොති.
Saṅghādisesoti …pe… tenapi vuccati saṅghādisesoti.
406. භික්‌ඛු සඞ්‌ඝාදිසෙසං අජ්‌ඣාපජ්‌ජන්‌තො දිට්‌ඨො හොති, සඞ්‌ඝාදිසෙසෙ සඞ්‌ඝාදිසෙසදිට්‌ඨි හොති. තඤ්‌චෙ පාරාජිකෙන චොදෙති – ‘‘අස්‌සමණොසි, අසක්‍යපුත්‌තියොසි, නත්‌ථි තයා සද්‌ධිං උපොසථො වා පවාරණා වා සඞ්‌ඝකම්‌මං වා’’ති, එවම්‌පි ආපත්‌තඤ්‌ඤභාගියං හොති ලෙසො ච උපාදින්‌නො, ආපත්‌ති වාචාය, වාචාය සඞ්‌ඝාදිසෙසස්‌ස.
406. Bhikkhu saṅghādisesaṃ ajjhāpajjanto diṭṭho hoti, saṅghādisese saṅghādisesadiṭṭhi hoti. Tañce pārājikena codeti – ‘‘assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
භික්‌ඛු සඞ්‌ඝාදිසෙසං අජ්‌ඣාපජ්‌ජන්‌තො දිට්‌ඨො හොති, සඞ්‌ඝාදිසෙසෙ ථුල්‌ලච්‌චයදිට්‌ඨි හොති…පෙ.… පාචිත්‌තියදිට්‌ඨි හොති… පාටිදෙසනීයදිට්‌ඨි හොති… දුක්‌කටදිට්‌ඨි හොති… දුබ්‌භාසිතදිට්‌ඨි හොති. තඤ්‌චෙ පාරාජිකෙන චොදෙති – ‘‘අස්‌සමණොසි’’…පෙ.… එවම්‌පි ආපත්‌තඤ්‌ඤභාගියං හොති ලෙසො ච උපාදින්‌නො, ආපත්‌ති වාචාය, වාචාය සඞ්‌ඝාදිසෙසස්‌ස.
Bhikkhu saṅghādisesaṃ ajjhāpajjanto diṭṭho hoti, saṅghādisese thullaccayadiṭṭhi hoti…pe… pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti… dubbhāsitadiṭṭhi hoti. Tañce pārājikena codeti – ‘‘assamaṇosi’’…pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
භික්‌ඛු ථුල්‌ලච්‌චයං අජ්‌ඣාපජ්‌ජන්‌තො දිට්‌ඨො හොති ථුල්‌ලච්‌චයෙ ථුල්‌ලච්‌චයදිට්‌ඨි හොති…පෙ.… ථුල්‌ලච්‌චයෙ පාචිත්‌තියදිට්‌ඨි හොති… පාටිදෙසනීයදිට්‌ඨි හොති… දුක්‌කටදිට්‌ඨි හොති… දුබ්‌භාසිතදිට්‌ඨි හොති… සඞ්‌ඝාදිසෙසදිට්‌ඨි හොති. තඤ්‌චෙ පාරාජිකෙන චොදෙති – ‘‘අස්‌සමණොසි’’ …පෙ.… එවම්‌පි ආපත්‌තඤ්‌ඤභාගියං හොති ලෙසො ච උපාදින්‌නො, ආපත්‌ති වාචාය, වාචාය සඞ්‌ඝාදිසෙසස්‌ස.
Bhikkhu thullaccayaṃ ajjhāpajjanto diṭṭho hoti thullaccaye thullaccayadiṭṭhi hoti…pe… thullaccaye pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti… dubbhāsitadiṭṭhi hoti… saṅghādisesadiṭṭhi hoti. Tañce pārājikena codeti – ‘‘assamaṇosi’’ …pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
භික්‌ඛු පාචිත්‌තියං…පෙ.… පාටිදෙසනීයං… දුක්‌කටං… දුබ්‌භාසිතං අජ්‌ඣාපජ්‌ජන්‌තො දිට්‌ඨො හොති, දුබ්‌භාසිතෙ දුබ්‌භාසිතදිට්‌ඨි හොති…පෙ.… දුබ්‌භාසිතෙ සඞ්‌ඝාදිසෙසදිට්‌ඨි හොති… ථුල්‌ලච්‌චයදිට්‌ඨි හොති… පාචිත්‌තියදිට්‌ඨි හොති… පාටිදෙසනීයදිට්‌ඨි හොති… දුක්‌කටදිට්‌ඨි හොති. තඤ්‌චෙ පාරාජිකෙන චොදෙති – ‘‘අස්‌සමණොසි, අසක්‍යපුත්‌තියොසි, නත්‌ථි තයා සද්‌ධිං උපොසථො වා පවාරණා වා සඞ්‌ඝකම්‌මං වා’’ති, එවම්‌පි ආපත්‌තඤ්‌ඤභාගියං හොති ලෙසො ච උපාදින්‌නො, ආපත්‌ති වාචාය, වාචාය සඞ්‌ඝාදිසෙසස්‌ස.
Bhikkhu pācittiyaṃ…pe… pāṭidesanīyaṃ… dukkaṭaṃ… dubbhāsitaṃ ajjhāpajjanto diṭṭho hoti, dubbhāsite dubbhāsitadiṭṭhi hoti…pe… dubbhāsite saṅghādisesadiṭṭhi hoti… thullaccayadiṭṭhi hoti… pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti. Tañce pārājikena codeti – ‘‘assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
එකෙකං මූලං කාතුන චක්‌කං බන්‌ධිතබ්‌බං.
Ekekaṃ mūlaṃ kātuna cakkaṃ bandhitabbaṃ.
407. භික්‌ඛු සඞ්‌ඝාදිසෙසං අජ්‌ඣාපජ්‌ජන්‌තො දිට්‌ඨො හොති සඞ්‌ඝාදිසෙසෙ සඞ්‌ඝාදිසෙසදිට්‌ඨි හොති. තඤ්‌චෙ පාරාජිකෙන චොදාපෙති – ‘‘අස්‌සමණොසි’’…පෙ.… එවම්‌පි ආපත්‌තඤ්‌ඤභාගියං හොති ලෙසො ච උපාදින්‌නො, ආපත්‌ති වාචාය, වාචාය සඞ්‌ඝාදිසෙසස්‌ස.
407. Bhikkhu saṅghādisesaṃ ajjhāpajjanto diṭṭho hoti saṅghādisese saṅghādisesadiṭṭhi hoti. Tañce pārājikena codāpeti – ‘‘assamaṇosi’’…pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
භික්‌ඛු සඞ්‌ඝාදිසෙසං අජ්‌ඣාපජ්‌ජන්‌තො දිට්‌ඨො හොති, සඞ්‌ඝාදිසෙසෙ ථුල්‌ලච්‌චයදිට්‌ඨි හොති…පෙ.… පාචිත්‌තියදිට්‌ඨි හොති… පාටිදෙසනීයදිට්‌ඨි හොති… දුක්‌කටදිට්‌ඨි හොති… දුබ්‌භාසිතදිට්‌ඨි හොති. තඤ්‌චෙ පාරාජිකෙන චොදාපෙති – ‘‘අස්‌සමණොසි’’…පෙ.… එවම්‌පි ආපත්‌තඤ්‌ඤභාගියං හොති ලෙසො ච උපාදින්‌නො, ආපත්‌ති වාචාය, වාචාය සඞ්‌ඝාදිසෙසස්‌ස.
Bhikkhu saṅghādisesaṃ ajjhāpajjanto diṭṭho hoti, saṅghādisese thullaccayadiṭṭhi hoti…pe… pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti… dubbhāsitadiṭṭhi hoti. Tañce pārājikena codāpeti – ‘‘assamaṇosi’’…pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
භික්‌ඛු ථුල්‌ලච්‌චයං අජ්‌ඣාපජ්‌ජන්‌තො දිට්‌ඨො හොති ථුල්‌ලච්‌චයෙ ථුල්‌ලච්‌චයදිට්‌ඨි හොති…පෙ.… ථුල්‌ලච්‌චයෙ පාචිත්‌තියදිට්‌ඨි හොති… පාටිදෙසනීයදිට්‌ඨි හොති… දුක්‌කටදිට්‌ඨි හොති… දුබ්‌භාසිතදිට්‌ඨි හොති… සඞ්‌ඝාදිසෙසදිට්‌ඨි හොති. තඤ්‌චෙ පාරාජිකෙන චොදාපෙති – ‘‘අස්‌සමණොසි’’…පෙ.… එවම්‌පි ආපත්‌තඤ්‌ඤභාගියං හොති ලෙසො ච උපාදින්‌නො, ආපත්‌ති වාචාය, වාචාය සඞ්‌ඝාදිසෙසස්‌ස.
Bhikkhu thullaccayaṃ ajjhāpajjanto diṭṭho hoti thullaccaye thullaccayadiṭṭhi hoti…pe… thullaccaye pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti… dubbhāsitadiṭṭhi hoti… saṅghādisesadiṭṭhi hoti. Tañce pārājikena codāpeti – ‘‘assamaṇosi’’…pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
භික්‌ඛු පාචිත්‌තියං…පෙ.… පාටිදෙසනීයං… දුක්‌කටං… දුබ්‌භාසිතං අජ්‌ඣාපජ්‌ජන්‌තො දිට්‌ඨො හොති දුබ්‌භාසිතෙ දුබ්‌භාසිතදිට්‌ඨි හොති…පෙ.… දුබ්‌භාසිතෙ සඞ්‌ඝාදිසෙසදිට්‌ඨි හොති… ථුල්‌ලච්‌චයදිට්‌ඨි හොති… පාචිත්‌තියදිට්‌ඨි හොති… පාටිදෙසනීයදිට්‌ඨි හොති… දුක්‌කටදිට්‌ඨි හොති. තඤ්‌චෙ පාරාජිකෙන චොදාපෙති – ‘‘අස්‌සමණොසි , අසක්‍යපුත්‌තියොසි, නත්‌ථි තයා සද්‌ධිං උපොසථො වා පවාරණා වා සඞ්‌ඝකම්‌මං වා’’ති, එවම්‌පි ආපත්‌තඤ්‌ඤභාගියං හොති ලෙසො ච උපාදින්‌නො, ආපත්‌ති වාචාය, වාචාය සඞ්‌ඝාදිසෙසස්‌ස.
Bhikkhu pācittiyaṃ…pe… pāṭidesanīyaṃ… dukkaṭaṃ… dubbhāsitaṃ ajjhāpajjanto diṭṭho hoti dubbhāsite dubbhāsitadiṭṭhi hoti…pe… dubbhāsite saṅghādisesadiṭṭhi hoti… thullaccayadiṭṭhi hoti… pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti. Tañce pārājikena codāpeti – ‘‘assamaṇosi , asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
408. අනාපත්‌ති තථාසඤ්‌ඤී චොදෙති වා චොදාපෙති වා, උම්‌මත්‌තකස්‌ස, ආදිකම්‌මිකස්‌සාති.
408. Anāpatti tathāsaññī codeti vā codāpeti vā, ummattakassa, ādikammikassāti.
දුතියදුට්‌ඨදොසසික්‌ඛාපදං නිට්‌ඨිතං නවමං.
Dutiyaduṭṭhadosasikkhāpadaṃ niṭṭhitaṃ navamaṃ.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 9. දුතියදුට්‌ඨදොසසික්‌ඛාපදවණ්‌ණනා • 9. Dutiyaduṭṭhadosasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 9. දුතියදුට්‌ඨදොසසික්‌ඛාපදවණ්‌ණනා • 9. Dutiyaduṭṭhadosasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 9. දුතියදුට්‌ඨදොසසික්‌ඛාපදවණ්‌ණනා • 9. Dutiyaduṭṭhadosasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 9. දුතියදුට්‌ඨදොසසික්‌ඛාපදවණ්‌ණනා • 9. Dutiyaduṭṭhadosasikkhāpadavaṇṇanā
