| Library / Tipiṭaka / තිපිටක • Tipiṭaka / ථෙරීගාථාපාළි • Therīgāthāpāḷi |
10. එකාදසනිපාතො
10. Ekādasanipāto
1. කිසාගොතමීථෙරීගාථා
1. Kisāgotamītherīgāthā
213.
213.
‘‘කල්‍යාණමිත්‌තතා මුනිනා, ලොකං ආදිස්‌ස වණ්‌ණිතා;
‘‘Kalyāṇamittatā muninā, lokaṃ ādissa vaṇṇitā;
කල්‍යාණමිත්‌තෙ භජමානො, අපි බාලො පණ්‌ඩිතො අස්‌ස.
Kalyāṇamitte bhajamāno, api bālo paṇḍito assa.
214.
214.
‘‘භජිතබ්‌බා සප්‌පුරිසා, පඤ්‌ඤා තථා වඩ්‌ඪති භජන්‌තානං;
‘‘Bhajitabbā sappurisā, paññā tathā vaḍḍhati bhajantānaṃ;
භජමානො සප්‌පුරිසෙ, සබ්‌බෙහිපි දුක්‌ඛෙහි පමුච්‌චෙය්‍ය.
Bhajamāno sappurise, sabbehipi dukkhehi pamucceyya.
215.
215.
‘‘දුක්‌ඛඤ්‌ච විජානෙය්‍ය, දුක්‌ඛස්‌ස ච සමුදයං නිරොධං;
‘‘Dukkhañca vijāneyya, dukkhassa ca samudayaṃ nirodhaṃ;
අට්‌ඨඞ්‌ගිකඤ්‌ච මග්‌ගං, චත්‌තාරිපි අරියසච්‌චානි.
Aṭṭhaṅgikañca maggaṃ, cattāripi ariyasaccāni.
216.
216.
‘‘දුක්‌ඛො ඉත්‌ථිභාවො, අක්‌ඛාතො පුරිසදම්‌මසාරථිනා;
‘‘Dukkho itthibhāvo, akkhāto purisadammasārathinā;
සපත්‌තිකම්‌පි හි දුක්‌ඛං, අප්‌පෙකච්‌චා සකිං විජාතායො.
Sapattikampi hi dukkhaṃ, appekaccā sakiṃ vijātāyo.
217.
217.
‘‘ගලකෙ අපි කන්‌තන්‌ති, සුඛුමාලිනියො විසානි ඛාදන්‌ති;
‘‘Galake api kantanti, sukhumāliniyo visāni khādanti;
ජනමාරකමජ්‌ඣගතා, උභොපි බ්‍යසනානි අනුභොන්‌ති.
Janamārakamajjhagatā, ubhopi byasanāni anubhonti.
218.
218.
‘‘උපවිජඤ්‌ඤා ගච්‌ඡන්‌තී, අද්‌දසාහං පතිං මතං;
‘‘Upavijaññā gacchantī, addasāhaṃ patiṃ mataṃ;
පන්‌ථම්‌හි විජායිත්‌වාන, අප්‌පත්‌තාව සකං ඝරං.
Panthamhi vijāyitvāna, appattāva sakaṃ gharaṃ.
219.
219.
‘‘ද්‌වෙ පුත්‌තා කාලකතා, පතී ච පන්‌ථෙ මතො කපණිකාය;
‘‘Dve puttā kālakatā, patī ca panthe mato kapaṇikāya;
මාතා පිතා ච භාතා, ඩය්‌හන්‌ති ච එකචිතකායං.
Mātā pitā ca bhātā, ḍayhanti ca ekacitakāyaṃ.
220.
220.
‘‘ඛීණකුලීනෙ කපණෙ, අනුභූතං තෙ දුඛං අපරිමාණං;
‘‘Khīṇakulīne kapaṇe, anubhūtaṃ te dukhaṃ aparimāṇaṃ;
අස්‌සූ ච තෙ පවත්‌තං, බහූනි ච ජාතිසහස්‌සානි.
Assū ca te pavattaṃ, bahūni ca jātisahassāni.
221.
221.
‘‘වසිතා සුසානමජ්‌ඣෙ, අථොපි ඛාදිතානි පුත්‌තමංසානි;
‘‘Vasitā susānamajjhe, athopi khāditāni puttamaṃsāni;
හතකුලිකා සබ්‌බගරහිතා, මතපතිකා අමතමධිගච්‌ඡිං.
Hatakulikā sabbagarahitā, matapatikā amatamadhigacchiṃ.
222.
222.
‘‘භාවිතො මෙ මග්‌ගො, අරියො අට්‌ඨඞ්‌ගිකො අමතගාමී;
‘‘Bhāvito me maggo, ariyo aṭṭhaṅgiko amatagāmī;
223.
223.
‘‘අහමම්‌හි කන්‌තසල්‌ලා, ඔහිතභාරා කතඤ්‌හි කරණීයං;
‘‘Ahamamhi kantasallā, ohitabhārā katañhi karaṇīyaṃ;
කිසා ගොතමී ථෙරී, විමුත්‌තචිත්‌තා ඉමං භණී’’ති.
Kisā gotamī therī, vimuttacittā imaṃ bhaṇī’’ti.
… කිසා ගොතමී ථෙරී….
… Kisā gotamī therī….
එකාදසනිපාතො නිට්‌ඨිතො.
Ekādasanipāto niṭṭhito.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ථෙරීගාථා-අට්‌ඨකථා • Therīgāthā-aṭṭhakathā / 1. කිසාගොතමීථෙරීගාථාවණ්‌ණනා • 1. Kisāgotamītherīgāthāvaṇṇanā
