| Library / Tipiṭaka / තිපිටක • Tipiṭaka / මජ්‌ඣිමනිකාය • Majjhimanikāya |
නමො තස්‌ස භගවතො අරහතො සම්‌මාසම්‌බුද්‌ධස්‌ස
Namo tassa bhagavato arahato sammāsambuddhassa
මජ්‌ඣිමනිකායො
Majjhimanikāyo
මූලපණ්‌ණාසපාළි
Mūlapaṇṇāsapāḷi
1. මූලපරියායවග්‌ගො
1. Mūlapariyāyavaggo
1. මූලපරියායසුත්‌තං
1. Mūlapariyāyasuttaṃ
1. එවං මෙ සුතං – එකං සමයං භගවා උක්‌කට්‌ඨායං විහරති සුභගවනෙ සාලරාජමූලෙ. තත්‍ර ඛො භගවා භික්‌ඛූ ආමන්‌තෙසි – ‘‘භික්‌ඛවො’’ති. ‘‘භදන්‌තෙ’’ති තෙ භික්‌ඛූ භගවතො පච්‌චස්‌සොසුං. භගවා එතදවොච – ‘‘සබ්‌බධම්‌මමූලපරියායං වො, භික්‌ඛවෙ, දෙසෙස්‌සාමි. තං සුණාථ, සාධුකං මනසි කරොථ, භාසිස්‌සාමී’’ති. ‘‘එවං, භන්‌තෙ’’ති ඛො තෙ භික්‌ඛූ භගවතො පච්‌චස්‌සොසුං. භගවා එතදවොච –
1. Evaṃ me sutaṃ – ekaṃ samayaṃ bhagavā ukkaṭṭhāyaṃ viharati subhagavane sālarājamūle. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca – ‘‘sabbadhammamūlapariyāyaṃ vo, bhikkhave, desessāmi. Taṃ suṇātha, sādhukaṃ manasi karotha, bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –
2. ‘‘ඉධ, භික්‌ඛවෙ, අස්‌සුතවා පුථුජ්‌ජනො අරියානං අදස්‌සාවී අරියධම්‌මස්‌ස අකොවිදො අරියධම්‌මෙ අවිනීතො, සප්‌පුරිසානං අදස්‌සාවී සප්‌පුරිසධම්‌මස්‌ස අකොවිදො සප්‌පුරිසධම්‌මෙ අවිනීතො – පථවිං 1 පථවිතො සඤ්‌ජානාති; පථවිං පථවිතො සඤ්‌ඤත්‌වා පථවිං මඤ්‌ඤති, පථවියා මඤ්‌ඤති, පථවිතො මඤ්‌ඤති, පථවිං මෙති මඤ්‌ඤති , පථවිං අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
2. ‘‘Idha, bhikkhave, assutavā puthujjano ariyānaṃ adassāvī ariyadhammassa akovido ariyadhamme avinīto, sappurisānaṃ adassāvī sappurisadhammassa akovido sappurisadhamme avinīto – pathaviṃ 2 pathavito sañjānāti; pathaviṃ pathavito saññatvā pathaviṃ maññati, pathaviyā maññati, pathavito maññati, pathaviṃ meti maññati , pathaviṃ abhinandati. Taṃ kissa hetu? ‘Apariññātaṃ tassā’ti vadāmi.
‘‘ආපං ආපතො සඤ්‌ජානාති; ආපං ආපතො සඤ්‌ඤත්‌වා ආපං මඤ්‌ඤති, ආපස්‌මිං මඤ්‌ඤති, ආපතො මඤ්‌ඤති, ආපං මෙති මඤ්‌ඤති, ආපං අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
‘‘Āpaṃ āpato sañjānāti; āpaṃ āpato saññatvā āpaṃ maññati, āpasmiṃ maññati, āpato maññati, āpaṃ meti maññati, āpaṃ abhinandati. Taṃ kissa hetu? ‘Apariññātaṃ tassā’ti vadāmi.
‘‘තෙජං තෙජතො සඤ්‌ජානාති; තෙජං තෙජතො සඤ්‌ඤත්‌වා තෙජං මඤ්‌ඤති, තෙජස්‌මිං මඤ්‌ඤති, තෙජතො මඤ්‌ඤති, තෙජං මෙති මඤ්‌ඤති, තෙජං අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
‘‘Tejaṃ tejato sañjānāti; tejaṃ tejato saññatvā tejaṃ maññati, tejasmiṃ maññati, tejato maññati, tejaṃ meti maññati, tejaṃ abhinandati. Taṃ kissa hetu? ‘Apariññātaṃ tassā’ti vadāmi.
‘‘වායං වායතො සඤ්‌ජානාති; වායං වායතො සඤ්‌ඤත්‌වා වායං මඤ්‌ඤති, වායස්‌මිං මඤ්‌ඤති, වායතො මඤ්‌ඤති, වායං මෙති මඤ්‌ඤති, වායං අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
‘‘Vāyaṃ vāyato sañjānāti; vāyaṃ vāyato saññatvā vāyaṃ maññati, vāyasmiṃ maññati, vāyato maññati, vāyaṃ meti maññati, vāyaṃ abhinandati. Taṃ kissa hetu? ‘Apariññātaṃ tassā’ti vadāmi.
3. ‘‘භූතෙ භූතතො සඤ්‌ජානාති; භූතෙ භූතතො සඤ්‌ඤත්‌වා භූතෙ මඤ්‌ඤති, භූතෙසු මඤ්‌ඤති, භූතතො මඤ්‌ඤති, භූතෙ මෙති මඤ්‌ඤති, භූතෙ අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
3. ‘‘Bhūte bhūtato sañjānāti; bhūte bhūtato saññatvā bhūte maññati, bhūtesu maññati, bhūtato maññati, bhūte meti maññati, bhūte abhinandati. Taṃ kissa hetu? ‘Apariññātaṃ tassā’ti vadāmi.
‘‘දෙවෙ දෙවතො සඤ්‌ජානාති; දෙවෙ දෙවතො සඤ්‌ඤත්‌වා දෙවෙ මඤ්‌ඤති, දෙවෙසු මඤ්‌ඤති, දෙවතො මඤ්‌ඤති, දෙවෙ මෙති මඤ්‌ඤති, දෙවෙ අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
‘‘Deve devato sañjānāti; deve devato saññatvā deve maññati, devesu maññati, devato maññati, deve meti maññati, deve abhinandati. Taṃ kissa hetu? ‘Apariññātaṃ tassā’ti vadāmi.
‘‘පජාපතිං පජාපතිතො සඤ්‌ජානාති; පජාපතිං පජාපතිතො සඤ්‌ඤත්‌වා පජාපතිං මඤ්‌ඤති, පජාපතිස්‌මිං මඤ්‌ඤති, පජාපතිතො මඤ්‌ඤති, පජාපතිං මෙති මඤ්‌ඤති, පජාපතිං අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
‘‘Pajāpatiṃ pajāpatito sañjānāti; pajāpatiṃ pajāpatito saññatvā pajāpatiṃ maññati, pajāpatismiṃ maññati, pajāpatito maññati, pajāpatiṃ meti maññati, pajāpatiṃ abhinandati. Taṃ kissa hetu? ‘Apariññātaṃ tassā’ti vadāmi.
‘‘බ්‍රහ්‌මං බ්‍රහ්‌මතො සඤ්‌ජානාති; බ්‍රහ්‌මං බ්‍රහ්‌මතො සඤ්‌ඤත්‌වා බ්‍රහ්‌මං මඤ්‌ඤති , බ්‍රහ්‌මස්‌මිං මඤ්‌ඤති, බ්‍රහ්‌මතො මඤ්‌ඤති, බ්‍රහ්‌මං මෙති මඤ්‌ඤති, බ්‍රහ්‌මං අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
‘‘Brahmaṃ brahmato sañjānāti; brahmaṃ brahmato saññatvā brahmaṃ maññati , brahmasmiṃ maññati, brahmato maññati, brahmaṃ meti maññati, brahmaṃ abhinandati. Taṃ kissa hetu? ‘Apariññātaṃ tassā’ti vadāmi.
‘‘ආභස්‌සරෙ ආභස්‌සරතො සඤ්‌ජානාති; ආභස්‌සරෙ ආභස්‌සරතො සඤ්‌ඤත්‌වා ආභස්‌සරෙ මඤ්‌ඤති, ආභස්‌සරෙසු මඤ්‌ඤති, ආභස්‌සරතො මඤ්‌ඤති, ආභස්‌සරෙ මෙති මඤ්‌ඤති, ආභස්‌සරෙ අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
‘‘Ābhassare ābhassarato sañjānāti; ābhassare ābhassarato saññatvā ābhassare maññati, ābhassaresu maññati, ābhassarato maññati, ābhassare meti maññati, ābhassare abhinandati. Taṃ kissa hetu? ‘Apariññātaṃ tassā’ti vadāmi.
‘‘සුභකිණ්‌හෙ සුභකිණ්‌හතො සඤ්‌ජානාති; සුභකිණ්‌හෙ සුභකිණ්‌හතො සඤ්‌ඤත්‌වා සුභකිණ්‌හෙ මඤ්‌ඤති, සුභකිණ්‌හෙසු මඤ්‌ඤති, සුභකිණ්‌හතො මඤ්‌ඤති, සුභකිණ්‌හෙ මෙති මඤ්‌ඤති, සුභකිණ්‌හෙ අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
‘‘Subhakiṇhe subhakiṇhato sañjānāti; subhakiṇhe subhakiṇhato saññatvā subhakiṇhe maññati, subhakiṇhesu maññati, subhakiṇhato maññati, subhakiṇhe meti maññati, subhakiṇhe abhinandati. Taṃ kissa hetu? ‘Apariññātaṃ tassā’ti vadāmi.
‘‘වෙහප්‌ඵලෙ වෙහප්‌ඵලතො සඤ්‌ජානාති; වෙහප්‌ඵලෙ වෙහප්‌ඵලතො සඤ්‌ඤත්‌වා වෙහප්‌ඵලෙ මඤ්‌ඤති, වෙහප්‌ඵලෙසු මඤ්‌ඤති, වෙහප්‌ඵලතො මඤ්‌ඤති, වෙහප්‌ඵලෙ මෙති මඤ්‌ඤති, වෙහප්‌ඵලෙ අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
‘‘Vehapphale vehapphalato sañjānāti; vehapphale vehapphalato saññatvā vehapphale maññati, vehapphalesu maññati, vehapphalato maññati, vehapphale meti maññati, vehapphale abhinandati. Taṃ kissa hetu? ‘Apariññātaṃ tassā’ti vadāmi.
‘‘අභිභුං අභිභූතො සඤ්‌ජානාති; අභිභුං අභිභූතො සඤ්‌ඤත්‌වා අභිභුං මඤ්‌ඤති, අභිභුස්‌මිං මඤ්‌ඤති, අභිභූතො මඤ්‌ඤති, අභිභුං මෙති මඤ්‌ඤති, අභිභුං අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
‘‘Abhibhuṃ abhibhūto sañjānāti; abhibhuṃ abhibhūto saññatvā abhibhuṃ maññati, abhibhusmiṃ maññati, abhibhūto maññati, abhibhuṃ meti maññati, abhibhuṃ abhinandati. Taṃ kissa hetu? ‘Apariññātaṃ tassā’ti vadāmi.
4. ‘‘ආකාසානඤ්‌චායතනං ආකාසානඤ්‌චායතනතො සඤ්‌ජානාති; ආකාසානඤ්‌චායතනං ආකාසානඤ්‌චායතනතො සඤ්‌ඤත්‌වා ආකාසානඤ්‌චායතනං මඤ්‌ඤති, ආකාසානඤ්‌චායතනස්‌මිං මඤ්‌ඤති, ආකාසානඤ්‌චායතනතො මඤ්‌ඤති, ආකාසානඤ්‌චායතනං මෙති මඤ්‌ඤති, ආකාසානඤ්‌චායතනං අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
4. ‘‘Ākāsānañcāyatanaṃ ākāsānañcāyatanato sañjānāti; ākāsānañcāyatanaṃ ākāsānañcāyatanato saññatvā ākāsānañcāyatanaṃ maññati, ākāsānañcāyatanasmiṃ maññati, ākāsānañcāyatanato maññati, ākāsānañcāyatanaṃ meti maññati, ākāsānañcāyatanaṃ abhinandati. Taṃ kissa hetu? ‘Apariññātaṃ tassā’ti vadāmi.
‘‘විඤ්‌ඤාණඤ්‌චායතනං විඤ්‌ඤාණඤ්‌චායතනතො සඤ්‌ජානාති; විඤ්‌ඤාණඤ්‌චායතනං විඤ්‌ඤාණඤ්‌චායතනතො සඤ්‌ඤත්‌වා විඤ්‌ඤාණඤ්‌චායතනං මඤ්‌ඤති, විඤ්‌ඤාණඤ්‌චායතනස්‌මිං මඤ්‌ඤති, විඤ්‌ඤාණඤ්‌චායතනතො මඤ්‌ඤති, විඤ්‌ඤාණඤ්‌චායතනං මෙති මඤ්‌ඤති, විඤ්‌ඤාණඤ්‌චායතනං අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
‘‘Viññāṇañcāyatanaṃ viññāṇañcāyatanato sañjānāti; viññāṇañcāyatanaṃ viññāṇañcāyatanato saññatvā viññāṇañcāyatanaṃ maññati, viññāṇañcāyatanasmiṃ maññati, viññāṇañcāyatanato maññati, viññāṇañcāyatanaṃ meti maññati, viññāṇañcāyatanaṃ abhinandati. Taṃ kissa hetu? ‘Apariññātaṃ tassā’ti vadāmi.
‘‘ආකිඤ්‌චඤ්‌ඤායතනං ආකිඤ්‌චඤ්‌ඤායතනතො සඤ්‌ජානාති; ආකිඤ්‌චඤ්‌ඤායතනං ආකිඤ්‌චඤ්‌ඤායතනතො සඤ්‌ඤත්‌වා ආකිඤ්‌චඤ්‌ඤායතනං මඤ්‌ඤති, ආකිඤ්‌චඤ්‌ඤායතනස්‌මිං මඤ්‌ඤති, ආකිඤ්‌චඤ්‌ඤායතනතො මඤ්‌ඤති, ආකිඤ්‌චඤ්‌ඤායතනං මෙති මඤ්‌ඤති, ආකිඤ්‌චඤ්‌ඤායතනං අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
‘‘Ākiñcaññāyatanaṃ ākiñcaññāyatanato sañjānāti; ākiñcaññāyatanaṃ ākiñcaññāyatanato saññatvā ākiñcaññāyatanaṃ maññati, ākiñcaññāyatanasmiṃ maññati, ākiñcaññāyatanato maññati, ākiñcaññāyatanaṃ meti maññati, ākiñcaññāyatanaṃ abhinandati. Taṃ kissa hetu? ‘Apariññātaṃ tassā’ti vadāmi.
‘‘නෙවසඤ්‌ඤානාසඤ්‌ඤායතනං නෙවසඤ්‌ඤානාසඤ්‌ඤායතනතො සඤ්‌ජානාති; නෙවසඤ්‌ඤානාසඤ්‌ඤායතනං නෙවසඤ්‌ඤානාසඤ්‌ඤායතනතො සඤ්‌ඤත්‌වා නෙවසඤ්‌ඤානාසඤ්‌ඤායතනං මඤ්‌ඤති, නෙවසඤ්‌ඤානාසඤ්‌ඤායතනස්‌මිං මඤ්‌ඤති, නෙවසඤ්‌ඤානාසඤ්‌ඤායතනතො මඤ්‌ඤති, නෙවසඤ්‌ඤානාසඤ්‌ඤායතනං මෙති මඤ්‌ඤති, නෙවසඤ්‌ඤානාසඤ්‌ඤායතනං අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
‘‘Nevasaññānāsaññāyatanaṃ nevasaññānāsaññāyatanato sañjānāti; nevasaññānāsaññāyatanaṃ nevasaññānāsaññāyatanato saññatvā nevasaññānāsaññāyatanaṃ maññati, nevasaññānāsaññāyatanasmiṃ maññati, nevasaññānāsaññāyatanato maññati, nevasaññānāsaññāyatanaṃ meti maññati, nevasaññānāsaññāyatanaṃ abhinandati. Taṃ kissa hetu? ‘Apariññātaṃ tassā’ti vadāmi.
5. ‘‘දිට්‌ඨං දිට්‌ඨතො සඤ්‌ජානාති; දිට්‌ඨං දිට්‌ඨතො සඤ්‌ඤත්‌වා දිට්‌ඨං මඤ්‌ඤති, දිට්‌ඨස්‌මිං මඤ්‌ඤති, දිට්‌ඨතො මඤ්‌ඤති, දිට්‌ඨං මෙති මඤ්‌ඤති, දිට්‌ඨං අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
5. ‘‘Diṭṭhaṃ diṭṭhato sañjānāti; diṭṭhaṃ diṭṭhato saññatvā diṭṭhaṃ maññati, diṭṭhasmiṃ maññati, diṭṭhato maññati, diṭṭhaṃ meti maññati, diṭṭhaṃ abhinandati. Taṃ kissa hetu? ‘Apariññātaṃ tassā’ti vadāmi.
‘‘සුතං සුතතො සඤ්‌ජානාති; සුතං සුතතො සඤ්‌ඤත්‌වා සුතං මඤ්‌ඤති, සුතස්‌මිං මඤ්‌ඤති, සුතතො මඤ්‌ඤති, සුතං මෙති මඤ්‌ඤති, සුතං අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
‘‘Sutaṃ sutato sañjānāti; sutaṃ sutato saññatvā sutaṃ maññati, sutasmiṃ maññati, sutato maññati, sutaṃ meti maññati, sutaṃ abhinandati. Taṃ kissa hetu? ‘Apariññātaṃ tassā’ti vadāmi.
‘‘මුතං මුතතො සඤ්‌ජානාති; මුතං මුතතො සඤ්‌ඤත්‌වා මුතං මඤ්‌ඤති, මුතස්‌මිං මඤ්‌ඤති, මුතතො මඤ්‌ඤති, මුතං මෙති මඤ්‌ඤති, මුතං අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
‘‘Mutaṃ mutato sañjānāti; mutaṃ mutato saññatvā mutaṃ maññati, mutasmiṃ maññati, mutato maññati, mutaṃ meti maññati, mutaṃ abhinandati. Taṃ kissa hetu? ‘Apariññātaṃ tassā’ti vadāmi.
‘‘විඤ්‌ඤාතං විඤ්‌ඤාතතො සඤ්‌ජානාති; විඤ්‌ඤාතං විඤ්‌ඤාතතො සඤ්‌ඤත්‌වා විඤ්‌ඤාතං මඤ්‌ඤති, විඤ්‌ඤාතස්‌මිං මඤ්‌ඤති, විඤ්‌ඤාතතො මඤ්‌ඤති, විඤ්‌ඤාතං මෙති මඤ්‌ඤති, විඤ්‌ඤාතං අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
‘‘Viññātaṃ viññātato sañjānāti; viññātaṃ viññātato saññatvā viññātaṃ maññati, viññātasmiṃ maññati, viññātato maññati, viññātaṃ meti maññati, viññātaṃ abhinandati. Taṃ kissa hetu? ‘Apariññātaṃ tassā’ti vadāmi.
6. ‘‘එකත්‌තං එකත්‌තතො සඤ්‌ජානාති; එකත්‌තං එකත්‌තතො සඤ්‌ඤත්‌වා එකත්‌තං මඤ්‌ඤති, එකත්‌තස්‌මිං මඤ්‌ඤති, එකත්‌තතො මඤ්‌ඤති, එකත්‌තං මෙති මඤ්‌ඤති, එකත්‌තං අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
6. ‘‘Ekattaṃ ekattato sañjānāti; ekattaṃ ekattato saññatvā ekattaṃ maññati, ekattasmiṃ maññati, ekattato maññati, ekattaṃ meti maññati, ekattaṃ abhinandati. Taṃ kissa hetu? ‘Apariññātaṃ tassā’ti vadāmi.
‘‘නානත්‌තං නානත්‌තතො සඤ්‌ජානාති; නානත්‌තං නානත්‌තතො සඤ්‌ඤත්‌වා නානත්‌තං මඤ්‌ඤති, නානත්‌තස්‌මිං මඤ්‌ඤති, නානත්‌තතො මඤ්‌ඤති, නානත්‌තං මෙති මඤ්‌ඤති, නානත්‌තං අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
‘‘Nānattaṃ nānattato sañjānāti; nānattaṃ nānattato saññatvā nānattaṃ maññati, nānattasmiṃ maññati, nānattato maññati, nānattaṃ meti maññati, nānattaṃ abhinandati. Taṃ kissa hetu? ‘Apariññātaṃ tassā’ti vadāmi.
‘‘සබ්‌බං සබ්‌බතො සඤ්‌ජානාති; සබ්‌බං සබ්‌බතො සඤ්‌ඤත්‌වා සබ්‌බං මඤ්‌ඤති, සබ්‌බස්‌මිං මඤ්‌ඤති, සබ්‌බතො මඤ්‌ඤති, සබ්‌බං මෙති මඤ්‌ඤති, සබ්‌බං අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
‘‘Sabbaṃ sabbato sañjānāti; sabbaṃ sabbato saññatvā sabbaṃ maññati, sabbasmiṃ maññati, sabbato maññati, sabbaṃ meti maññati, sabbaṃ abhinandati. Taṃ kissa hetu? ‘Apariññātaṃ tassā’ti vadāmi.
‘‘නිබ්‌බානං නිබ්‌බානතො සඤ්‌ජානාති; නිබ්‌බානං නිබ්‌බානතො සඤ්‌ඤත්‌වා නිබ්‌බානං මඤ්‌ඤති, නිබ්‌බානස්‌මිං මඤ්‌ඤති , නිබ්‌බානතො මඤ්‌ඤති, නිබ්‌බානං මෙති මඤ්‌ඤති, නිබ්‌බානං අභිනන්‌දති. තං කිස්‌ස හෙතු? ‘අපරිඤ්‌ඤාතං තස්‌සා’ති වදාමි.
‘‘Nibbānaṃ nibbānato sañjānāti; nibbānaṃ nibbānato saññatvā nibbānaṃ maññati, nibbānasmiṃ maññati , nibbānato maññati, nibbānaṃ meti maññati, nibbānaṃ abhinandati. Taṃ kissa hetu? ‘Apariññātaṃ tassā’ti vadāmi.
පුථුජ්‌ජනවසෙන පඨමනයභූමිපරිච්‌ඡෙදො නිට්‌ඨිතො.
Puthujjanavasena paṭhamanayabhūmiparicchedo niṭṭhito.
7. ‘‘යොපි සො, භික්‌ඛවෙ, භික්‌ඛු සෙක්‌ඛො 3 අප්‌පත්‌තමානසො අනුත්‌තරං යොගක්‌ඛෙමං පත්‌ථයමානො විහරති, සොපි පථවිං පථවිතො අභිජානාති; පථවිං පථවිතො අභිඤ්‌ඤාය 4 පථවිං මා මඤ්‌ඤි 5, පථවියා මා මඤ්‌ඤි, පථවිතො මා මඤ්‌ඤි, පථවිං මෙති මා මඤ්‌ඤි, පථවිං මාභිනන්‌දි 6. තං කිස්‌ස හෙතු? ‘පරිඤ්‌ඤෙය්‍යං තස්‌සා’ති වදාමි.
7. ‘‘Yopi so, bhikkhave, bhikkhu sekkho 7 appattamānaso anuttaraṃ yogakkhemaṃ patthayamāno viharati, sopi pathaviṃ pathavito abhijānāti; pathaviṃ pathavito abhiññāya 8 pathaviṃ mā maññi 9, pathaviyā mā maññi, pathavito mā maññi, pathaviṃ meti mā maññi, pathaviṃ mābhinandi 10. Taṃ kissa hetu? ‘Pariññeyyaṃ tassā’ti vadāmi.
‘‘ආපං…පෙ.… තෙජං… වායං… භූතෙ… දෙවෙ… පජාපතිං… බ්‍රහ්‌මං… ආභස්‌සරෙ… සුභකිණ්‌හෙ… වෙහප්‌ඵලෙ… අභිභුං… ආකාසානඤ්‌චායතනං… විඤ්‌ඤාණඤ්‌චායතනං… ආකිඤ්‌චඤ්‌ඤායතනං… නෙවසඤ්‌ඤානාසඤ්‌ඤායතනං… දිට්‌ඨං… සුතං… මුතං… විඤ්‌ඤාතං… එකත්‌තං… නානත්‌තං… සබ්‌බං… නිබ්‌බානං නිබ්‌බානතො අභිජානාති; නිබ්‌බානං නිබ්‌බානතො අභිඤ්‌ඤාය නිබ්‌බානං මා මඤ්‌ඤි, නිබ්‌බානස්‌මිං මා මඤ්‌ඤි, නිබ්‌බානතො මා මඤ්‌ඤි, නිබ්‌බානං මෙති මා මඤ්‌ඤි, නිබ්‌බානං මාභිනන්‌දි. තං කිස්‌ස හෙතු? ‘පරිඤ්‌ඤෙය්‍යං තස්‌සා’ති වදාමි.
‘‘Āpaṃ…pe… tejaṃ… vāyaṃ… bhūte… deve… pajāpatiṃ… brahmaṃ… ābhassare… subhakiṇhe… vehapphale… abhibhuṃ… ākāsānañcāyatanaṃ… viññāṇañcāyatanaṃ… ākiñcaññāyatanaṃ… nevasaññānāsaññāyatanaṃ… diṭṭhaṃ… sutaṃ… mutaṃ… viññātaṃ… ekattaṃ… nānattaṃ… sabbaṃ… nibbānaṃ nibbānato abhijānāti; nibbānaṃ nibbānato abhiññāya nibbānaṃ mā maññi, nibbānasmiṃ mā maññi, nibbānato mā maññi, nibbānaṃ meti mā maññi, nibbānaṃ mābhinandi. Taṃ kissa hetu? ‘Pariññeyyaṃ tassā’ti vadāmi.
8. ‘‘යොපි සො, භික්‌ඛවෙ, භික්‌ඛු අරහං ඛීණාසවො වුසිතවා කතකරණීයො ඔහිතභාරො අනුප්‌පත්‌තසදත්‌ථො පරික්‌ඛීණභවසංයොජනො සම්‌මදඤ්‌ඤා විමුත්‌තො, සොපි පථවිං පථවිතො අභිජානාති; පථවිං පථවිතො අභිඤ්‌ඤාය පථවිං න මඤ්‌ඤති, පථවියා න මඤ්‌ඤති, පථවිතො න මඤ්‌ඤති, පථවිං මෙති න මඤ්‌ඤති, පථවිං නාභිනන්‌දති. තං කිස්‌ස හෙතු? ‘පරිඤ්‌ඤාතං තස්‌සා’ති වදාමි.
8. ‘‘Yopi so, bhikkhave, bhikkhu arahaṃ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṃyojano sammadaññā vimutto, sopi pathaviṃ pathavito abhijānāti; pathaviṃ pathavito abhiññāya pathaviṃ na maññati, pathaviyā na maññati, pathavito na maññati, pathaviṃ meti na maññati, pathaviṃ nābhinandati. Taṃ kissa hetu? ‘Pariññātaṃ tassā’ti vadāmi.
‘‘ආපං…පෙ.… තෙජං… වායං… භූතෙ… දෙවෙ… පජාපතිං… බ්‍රහ්‌මං… ආභස්‌සරෙ… සුභකිණ්‌හෙ… වෙහප්‌ඵලෙ… අභිභුං… ආකාසානඤ්‌චායතනං… විඤ්‌ඤාණඤ්‌චායතනං… ආකිඤ්‌චඤ්‌ඤායතනං… නෙවසඤ්‌ඤානාසඤ්‌ඤායතනං… දිට්‌ඨං… සුතං… මුතං… විඤ්‌ඤාතං… එකත්‌තං… නානත්‌තං… සබ්‌බං… නිබ්‌බානං නිබ්‌බානතො අභිජානාති; නිබ්‌බානං නිබ්‌බානතො අභිඤ්‌ඤාය නිබ්‌බානං න මඤ්‌ඤති, නිබ්‌බානස්‌මිං න මඤ්‌ඤති, නිබ්‌බානතො න මඤ්‌ඤති, නිබ්‌බානං මෙති න මඤ්‌ඤති, නිබ්‌බානං නාභිනන්‌දති. තං කිස්‌ස හෙතු? ‘පරිඤ්‌ඤාතං තස්‌සා’ති වදාමි.
‘‘Āpaṃ…pe… tejaṃ… vāyaṃ… bhūte… deve… pajāpatiṃ… brahmaṃ… ābhassare… subhakiṇhe… vehapphale… abhibhuṃ… ākāsānañcāyatanaṃ… viññāṇañcāyatanaṃ… ākiñcaññāyatanaṃ… nevasaññānāsaññāyatanaṃ… diṭṭhaṃ… sutaṃ… mutaṃ… viññātaṃ… ekattaṃ… nānattaṃ… sabbaṃ… nibbānaṃ nibbānato abhijānāti; nibbānaṃ nibbānato abhiññāya nibbānaṃ na maññati, nibbānasmiṃ na maññati, nibbānato na maññati, nibbānaṃ meti na maññati, nibbānaṃ nābhinandati. Taṃ kissa hetu? ‘Pariññātaṃ tassā’ti vadāmi.
ඛීණාසවවසෙන තතියනයභූමිපරිච්‌ඡෙදො නිට්‌ඨිතො.
Khīṇāsavavasena tatiyanayabhūmiparicchedo niṭṭhito.
9. ‘‘යොපි සො, භික්‌ඛවෙ, භික්‌ඛු අරහං ඛීණාසවො වුසිතවා කතකරණීයො ඔහිතභාරො අනුප්‌පත්‌තසදත්‌ථො පරික්‌ඛීණභවසංයොජනො සම්‌මදඤ්‌ඤා විමුත්‌තො, සොපි පථවිං පථවිතො අභිජානාති; පථවිං පථවිතො අභිඤ්‌ඤාය පථවිං න මඤ්‌ඤති, පථවියා න මඤ්‌ඤති, පථවිතො න මඤ්‌ඤති, පථවිං මෙති න මඤ්‌ඤති, පථවිං නාභිනන්‌දති. තං කිස්‌ස හෙතු? ඛයා රාගස්‌ස, වීතරාගත්‌තා.
9. ‘‘Yopi so, bhikkhave, bhikkhu arahaṃ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṃyojano sammadaññā vimutto, sopi pathaviṃ pathavito abhijānāti; pathaviṃ pathavito abhiññāya pathaviṃ na maññati, pathaviyā na maññati, pathavito na maññati, pathaviṃ meti na maññati, pathaviṃ nābhinandati. Taṃ kissa hetu? Khayā rāgassa, vītarāgattā.
‘‘ආපං…පෙ.… තෙජං… වායං… භූතෙ… දෙවෙ… පජාපතිං… බ්‍රහ්‌මං… ආභස්‌සරෙ… සුභකිණ්‌හෙ… වෙහප්‌ඵලෙ… අභිභුං… ආකාසානඤ්‌චායතනං… විඤ්‌ඤාණඤ්‌චායතනං… ආකිඤ්‌චඤ්‌ඤායතනං … නෙවසඤ්‌ඤානාසඤ්‌ඤායතනං … දිට්‌ඨං… සුතං… මුතං… විඤ්‌ඤාතං… එකත්‌තං… නානත්‌තං… සබ්‌බං… නිබ්‌බානං නිබ්‌බානතො අභිජානාති; නිබ්‌බානං නිබ්‌බානතො අභිඤ්‌ඤාය නිබ්‌බානං න මඤ්‌ඤති, නිබ්‌බානස්‌මිං න මඤ්‌ඤති, නිබ්‌බානතො න මඤ්‌ඤති, නිබ්‌බානං මෙති න මඤ්‌ඤති, නිබ්‌බානං නාභිනන්‌දති. තං කිස්‌ස හෙතු? ඛයා රාගස්‌ස, වීතරාගත්‌තා.
‘‘Āpaṃ…pe… tejaṃ… vāyaṃ… bhūte… deve… pajāpatiṃ… brahmaṃ… ābhassare… subhakiṇhe… vehapphale… abhibhuṃ… ākāsānañcāyatanaṃ… viññāṇañcāyatanaṃ… ākiñcaññāyatanaṃ … nevasaññānāsaññāyatanaṃ … diṭṭhaṃ… sutaṃ… mutaṃ… viññātaṃ… ekattaṃ… nānattaṃ… sabbaṃ… nibbānaṃ nibbānato abhijānāti; nibbānaṃ nibbānato abhiññāya nibbānaṃ na maññati, nibbānasmiṃ na maññati, nibbānato na maññati, nibbānaṃ meti na maññati, nibbānaṃ nābhinandati. Taṃ kissa hetu? Khayā rāgassa, vītarāgattā.
ඛීණාසවවසෙන චතුත්‌ථනයභූමිපරිච්‌ඡෙදො නිට්‌ඨිතො.
Khīṇāsavavasena catutthanayabhūmiparicchedo niṭṭhito.
10. ‘‘යොපි සො, භික්‌ඛවෙ, භික්‌ඛු අරහං ඛීණාසවො වුසිතවා කතකරණීයො ඔහිතභාරො අනුප්‌පත්‌තසදත්‌ථො පරික්‌ඛීණභවසංයොජනො සම්‌මදඤ්‌ඤා විමුත්‌තො, සොපි පථවිං පථවිතො අභිජානාති; පථවිං පථවිතො අභිඤ්‌ඤාය පථවිං න මඤ්‌ඤති, පථවියා න මඤ්‌ඤති, පථවිතො න මඤ්‌ඤති, පථවිං මෙති න මඤ්‌ඤති, පථවිං නාභිනන්‌දති. තං කිස්‌ස හෙතු? ඛයා දොසස්‌ස, වීතදොසත්‌තා.
10. ‘‘Yopi so, bhikkhave, bhikkhu arahaṃ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṃyojano sammadaññā vimutto, sopi pathaviṃ pathavito abhijānāti; pathaviṃ pathavito abhiññāya pathaviṃ na maññati, pathaviyā na maññati, pathavito na maññati, pathaviṃ meti na maññati, pathaviṃ nābhinandati. Taṃ kissa hetu? Khayā dosassa, vītadosattā.
‘‘ආපං…පෙ.… තෙජං… වායං… භූතෙ… දෙවෙ… පජාපතිං… බ්‍රහ්‌මං… ආභස්‌සරෙ… සුභකිණ්‌හෙ… වෙහප්‌ඵලෙ… අභිභුං… ආකාසානඤ්‌චායතනං… විඤ්‌ඤාණඤ්‌චායතනං… ආකිඤ්‌චඤ්‌ඤායතනං… නෙවසඤ්‌ඤානාසඤ්‌ඤායතනං… දිට්‌ඨං… සුතං… මුතං… විඤ්‌ඤාතං… එකත්‌තං… නානත්‌තං… සබ්‌බං… නිබ්‌බානං නිබ්‌බානතො අභිජානාති; නිබ්‌බානං නිබ්‌බානතො අභිඤ්‌ඤාය නිබ්‌බානං න මඤ්‌ඤති, නිබ්‌බානස්‌මිං න මඤ්‌ඤති, නිබ්‌බානතො න මඤ්‌ඤති, නිබ්‌බානං මෙති න මඤ්‌ඤති, නිබ්‌බානං නාභිනන්‌දති. තං කිස්‌ස හෙතු? ඛයා දොසස්‌ස, වීතදොසත්‌තා.
‘‘Āpaṃ…pe… tejaṃ… vāyaṃ… bhūte… deve… pajāpatiṃ… brahmaṃ… ābhassare… subhakiṇhe… vehapphale… abhibhuṃ… ākāsānañcāyatanaṃ… viññāṇañcāyatanaṃ… ākiñcaññāyatanaṃ… nevasaññānāsaññāyatanaṃ… diṭṭhaṃ… sutaṃ… mutaṃ… viññātaṃ… ekattaṃ… nānattaṃ… sabbaṃ… nibbānaṃ nibbānato abhijānāti; nibbānaṃ nibbānato abhiññāya nibbānaṃ na maññati, nibbānasmiṃ na maññati, nibbānato na maññati, nibbānaṃ meti na maññati, nibbānaṃ nābhinandati. Taṃ kissa hetu? Khayā dosassa, vītadosattā.
ඛීණාසවවසෙන පඤ්‌චමනයභූමිපරිච්‌ඡෙදො නිට්‌ඨිතො.
Khīṇāsavavasena pañcamanayabhūmiparicchedo niṭṭhito.
11. ‘‘යොපි සො, භික්‌ඛවෙ, භික්‌ඛු අරහං ඛීණාසවො වුසිතවා කතකරණීයො ඔහිතභාරො අනුප්‌පත්‌තසදත්‌ථො පරික්‌ඛීණභවසංයොජනො සම්‌මදඤ්‌ඤා විමුත්‌තො, සොපි පථවිං පථවිතො අභිජානාති; පථවිං පථවිතො අභිඤ්‌ඤාය පථවිං න මඤ්‌ඤති, පථවියා න මඤ්‌ඤති, පථවිතො න මඤ්‌ඤති, පථවිං මෙති න මඤ්‌ඤති, පථවිං නාභිනන්‌දති. තං කිස්‌ස හෙතු? ඛයා මොහස්‌ස, වීතමොහත්‌තා.
11. ‘‘Yopi so, bhikkhave, bhikkhu arahaṃ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṃyojano sammadaññā vimutto, sopi pathaviṃ pathavito abhijānāti; pathaviṃ pathavito abhiññāya pathaviṃ na maññati, pathaviyā na maññati, pathavito na maññati, pathaviṃ meti na maññati, pathaviṃ nābhinandati. Taṃ kissa hetu? Khayā mohassa, vītamohattā.
‘‘ආපං…පෙ.… තෙජං… වායං… භූතෙ… දෙවෙ… පජාපතිං… බ්‍රහ්‌මං… ආභස්‌සරෙ… සුභකිණ්‌හෙ… වෙහප්‌ඵලෙ… අභිභුං… ආකාසානඤ්‌චායතනං… විඤ්‌ඤාණඤ්‌චායතනං… ආකිඤ්‌චඤ්‌ඤායතනං … නෙවසඤ්‌ඤානාසඤ්‌ඤායතනං… දිට්‌ඨං… සුතං… මුතං… විඤ්‌ඤාතං… එකත්‌තං… නානත්‌තං… සබ්‌බං… නිබ්‌බානං නිබ්‌බානතො අභිජානාති; නිබ්‌බානං නිබ්‌බානතො අභිඤ්‌ඤාය නිබ්‌බානං න මඤ්‌ඤති, නිබ්‌බානස්‌මිං න මඤ්‌ඤති, නිබ්‌බානතො න මඤ්‌ඤති, නිබ්‌බානං මෙති න මඤ්‌ඤති, නිබ්‌බානං නාභිනන්‌දති. තං කිස්‌ස හෙතු? ඛයා මොහස්‌ස, වීතමොහත්‌තා.
‘‘Āpaṃ…pe… tejaṃ… vāyaṃ… bhūte… deve… pajāpatiṃ… brahmaṃ… ābhassare… subhakiṇhe… vehapphale… abhibhuṃ… ākāsānañcāyatanaṃ… viññāṇañcāyatanaṃ… ākiñcaññāyatanaṃ … nevasaññānāsaññāyatanaṃ… diṭṭhaṃ… sutaṃ… mutaṃ… viññātaṃ… ekattaṃ… nānattaṃ… sabbaṃ… nibbānaṃ nibbānato abhijānāti; nibbānaṃ nibbānato abhiññāya nibbānaṃ na maññati, nibbānasmiṃ na maññati, nibbānato na maññati, nibbānaṃ meti na maññati, nibbānaṃ nābhinandati. Taṃ kissa hetu? Khayā mohassa, vītamohattā.
ඛීණාසවවසෙන ඡට්‌ඨනයභූමිපරිච්‌ඡෙදො නිට්‌ඨිතො.
Khīṇāsavavasena chaṭṭhanayabhūmiparicchedo niṭṭhito.
12. ‘‘තථාගතොපි, භික්‌ඛවෙ, අරහං සම්‌මාසම්‌බුද්‌ධො පථවිං පථවිතො අභිජානාති; පථවිං පථවිතො අභිඤ්‌ඤාය පථවිං න මඤ්‌ඤති, පථවියා න මඤ්‌ඤති, පථවිතො න මඤ්‌ඤති, පථවිං මෙති න මඤ්‌ඤති, පථවිං නාභිනන්‌දති . තං කිස්‌ස හෙතු? ‘පරිඤ්‌ඤාතන්‌තං තථාගතස්‌සා’ති වදාමි.
12. ‘‘Tathāgatopi, bhikkhave, arahaṃ sammāsambuddho pathaviṃ pathavito abhijānāti; pathaviṃ pathavito abhiññāya pathaviṃ na maññati, pathaviyā na maññati, pathavito na maññati, pathaviṃ meti na maññati, pathaviṃ nābhinandati . Taṃ kissa hetu? ‘Pariññātantaṃ tathāgatassā’ti vadāmi.
‘‘ආපං…පෙ.… තෙජං… වායං… භූතෙ… දෙවෙ… පජාපතිං… බ්‍රහ්‌මං… ආභස්‌සරෙ… සුභකිණ්‌හෙ… වෙහප්‌ඵලෙ… අභිභුං… ආකාසානඤ්‌චායතනං… විඤ්‌ඤාණඤ්‌චායතනං … ආකිඤ්‌චඤ්‌ඤායතනං… නෙවසඤ්‌ඤානාසඤ්‌ඤායතනං… දිට්‌ඨං… සුතං… මුතං… විඤ්‌ඤාතං… එකත්‌තං… නානත්‌තං… සබ්‌බං… නිබ්‌බානං නිබ්‌බානතො අභිජානාති; නිබ්‌බානං නිබ්‌බානතො අභිඤ්‌ඤාය නිබ්‌බානං න මඤ්‌ඤති, නිබ්‌බානස්‌මිං න මඤ්‌ඤති, නිබ්‌බානතො න මඤ්‌ඤති, නිබ්‌බානං මෙති න මඤ්‌ඤති, නිබ්‌බානං නාභිනන්‌දති. තං කිස්‌ස හෙතු? ‘පරිඤ්‌ඤාතන්‌තං තථාගතස්‌සා’ති වදාමි.
‘‘Āpaṃ…pe… tejaṃ… vāyaṃ… bhūte… deve… pajāpatiṃ… brahmaṃ… ābhassare… subhakiṇhe… vehapphale… abhibhuṃ… ākāsānañcāyatanaṃ… viññāṇañcāyatanaṃ … ākiñcaññāyatanaṃ… nevasaññānāsaññāyatanaṃ… diṭṭhaṃ… sutaṃ… mutaṃ… viññātaṃ… ekattaṃ… nānattaṃ… sabbaṃ… nibbānaṃ nibbānato abhijānāti; nibbānaṃ nibbānato abhiññāya nibbānaṃ na maññati, nibbānasmiṃ na maññati, nibbānato na maññati, nibbānaṃ meti na maññati, nibbānaṃ nābhinandati. Taṃ kissa hetu? ‘Pariññātantaṃ tathāgatassā’ti vadāmi.
තථාගතවසෙන සත්‌තමනයභූමිපරිච්‌ඡෙදො නිට්‌ඨිතො.
Tathāgatavasena sattamanayabhūmiparicchedo niṭṭhito.
13. ‘‘තථාගතොපි , භික්‌ඛවෙ, අරහං සම්‌මාසම්‌බුද්‌ධො පථවිං පථවිතො අභිජානාති; පථවිං පථවිතො අභිඤ්‌ඤාය පථවිං න මඤ්‌ඤති, පථවියා න මඤ්‌ඤති, පථවිතො න මඤ්‌ඤති, පථවිං මෙති න මඤ්‌ඤති, පථවිං නාභිනන්‌දති. තං කිස්‌ස හෙතු? ‘නන්‌දී 13 දුක්‌ඛස්‌ස මූල’න්‌ති – ඉති විදිත්‌වා ‘භවා ජාති භූතස්‌ස ජරාමරණ’න්‌ති. තස්‌මාතිහ, භික්‌ඛවෙ, ‘තථාගතො සබ්‌බසො තණ්‌හානං ඛයා විරාගා නිරොධා චාගා පටිනිස්‌සග්‌ගා අනුත්‌තරං සම්‌මාසම්‌බොධිං අභිසම්‌බුද්‌ධො’ති වදාමි.
13. ‘‘Tathāgatopi , bhikkhave, arahaṃ sammāsambuddho pathaviṃ pathavito abhijānāti; pathaviṃ pathavito abhiññāya pathaviṃ na maññati, pathaviyā na maññati, pathavito na maññati, pathaviṃ meti na maññati, pathaviṃ nābhinandati. Taṃ kissa hetu? ‘Nandī 14 dukkhassa mūla’nti – iti viditvā ‘bhavā jāti bhūtassa jarāmaraṇa’nti. Tasmātiha, bhikkhave, ‘tathāgato sabbaso taṇhānaṃ khayā virāgā nirodhā cāgā paṭinissaggā anuttaraṃ sammāsambodhiṃ abhisambuddho’ti vadāmi.
‘‘ආපං …පෙ.… තෙජං… වායං… භූතෙ… දෙවෙ… පජාපතිං… බ්‍රහ්‌මං… ආභස්‌සරෙ… සුභකිණ්‌හෙ… වෙහප්‌ඵලෙ… අභිභුං… ආකාසානඤ්‌චායතනං… විඤ්‌ඤාණඤ්‌චායතනං… ආකිඤ්‌චඤ්‌ඤායතනං… නෙවසඤ්‌ඤානාසඤ්‌ඤායතනං… දිට්‌ඨං… සුතං… මුතං… විඤ්‌ඤාතං… එකත්‌තං… නානත්‌තං… සබ්‌බං… නිබ්‌බානං නිබ්‌බානතො අභිජානාති; නිබ්‌බානං නිබ්‌බානතො අභිඤ්‌ඤාය නිබ්‌බානං න මඤ්‌ඤති, නිබ්‌බානස්‌මිං න මඤ්‌ඤති, නිබ්‌බානතො න මඤ්‌ඤති, නිබ්‌බානං මෙති න මඤ්‌ඤති, නිබ්‌බානං නාභිනන්‌දති. තං කිස්‌ස හෙතු? ‘නන්‌දී දුක්‌ඛස්‌ස මූල’න්‌ති – ඉති විදිත්‌වා ‘භවා ජාති භූතස්‌ස ජරාමරණ’න්‌ති. තස්‌මාතිහ, භික්‌ඛවෙ, ‘තථාගතො සබ්‌බසො තණ්‌හානං ඛයා විරාගා නිරොධා චාගා පටිනිස්‌සග්‌ගා අනුත්‌තරං සම්‌මාසම්‌බොධිං අභිසම්‌බුද්‌ධො’ති වදාමී’’ති.
‘‘Āpaṃ …pe… tejaṃ… vāyaṃ… bhūte… deve… pajāpatiṃ… brahmaṃ… ābhassare… subhakiṇhe… vehapphale… abhibhuṃ… ākāsānañcāyatanaṃ… viññāṇañcāyatanaṃ… ākiñcaññāyatanaṃ… nevasaññānāsaññāyatanaṃ… diṭṭhaṃ… sutaṃ… mutaṃ… viññātaṃ… ekattaṃ… nānattaṃ… sabbaṃ… nibbānaṃ nibbānato abhijānāti; nibbānaṃ nibbānato abhiññāya nibbānaṃ na maññati, nibbānasmiṃ na maññati, nibbānato na maññati, nibbānaṃ meti na maññati, nibbānaṃ nābhinandati. Taṃ kissa hetu? ‘Nandī dukkhassa mūla’nti – iti viditvā ‘bhavā jāti bhūtassa jarāmaraṇa’nti. Tasmātiha, bhikkhave, ‘tathāgato sabbaso taṇhānaṃ khayā virāgā nirodhā cāgā paṭinissaggā anuttaraṃ sammāsambodhiṃ abhisambuddho’ti vadāmī’’ti.
තථාගතවසෙන අට්‌ඨමනයභූමිපරිච්‌ඡෙදො නිට්‌ඨිතො.
Tathāgatavasena aṭṭhamanayabhūmiparicchedo niṭṭhito.
ඉදමවොච භගවා. න තෙ භික්‌ඛූ 15 භගවතො භාසිතං අභිනන්‌දුන්‌ති.
Idamavoca bhagavā. Na te bhikkhū 16 bhagavato bhāsitaṃ abhinandunti.
මූලපරියායසුත්‌තං නිට්‌ඨිතං පඨමං.
Mūlapariyāyasuttaṃ niṭṭhitaṃ paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / මජ්‌ඣිමනිකාය (අට්‌ඨකථා) • Majjhimanikāya (aṭṭhakathā) / 1. මූලපරියායසුත්‌තවණ්‌ණනා • 1. Mūlapariyāyasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / මජ්‌ඣිමනිකාය (ටීකා) • Majjhimanikāya (ṭīkā) / 1. මූලපරියායසුත්‌තවණ්‌ණනා • 1. Mūlapariyāyasuttavaṇṇanā
