| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၈. နန္ဒသုတ္တံ
8. Nandasuttaṃ
၂၄၂. သာဝတ္ထိယံ ဝိဟရတိ။ အထ ခော အာယသ္မာ နန္ဒော ဘဂဝတော မာတုစ္ဆာပုတ္တော အာကောဋိတပစ္စာကောဋိတာနိ စီဝရာနိ ပာရုပိတ္ဝာ အက္ခီနိ အဉ္ဇေတ္ဝာ အစ္ဆံ ပတ္တံ ဂဟေတ္ဝာ ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နံ ခော အာယသ္မန္တံ နန္ဒံ ဘဂဝာ ဧတဒဝောစ – ‘‘န ခော တေ တံ, နန္ဒ, ပတိရူပံ ကုလပုတ္တသ္သ သဒ္ဓာ အဂာရသ္မာ အနဂာရိယံ ပဗ္ဗဇိတသ္သ, ယံ တ္ဝံ အာကောဋိတပစ္စာကောဋိတာနိ စီဝရာနိ ပာရုပေယ္ယာသိ, အက္ခီနိ စ အဉ္ဇေယ္ယာသိ, အစ္ဆဉ္စ ပတ္တံ ဓာရေယ္ယာသိ။ ဧတံ ခော တေ, နန္ဒ, ပတိရူပံ ကုလပုတ္တသ္သ သဒ္ဓာ အဂာရသ္မာ အနဂာရိယံ ပဗ္ဗဇိတသ္သ, ယံ တ္ဝံ အာရညိကော စ အသ္သသိ, ပိဏ္ဍပာတိကော စ ပံသုကုလိကော စ ကာမေသု စ အနပေက္ခော ဝိဟရေယ္ယာသီ’’တိ။ ဣဒမဝောစ ဘဂဝာ။ပေ.။ သတ္ထာ –
242. Sāvatthiyaṃ viharati. Atha kho āyasmā nando bhagavato mātucchāputto ākoṭitapaccākoṭitāni cīvarāni pārupitvā akkhīni añjetvā acchaṃ pattaṃ gahetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ nandaṃ bhagavā etadavoca – ‘‘na kho te taṃ, nanda, patirūpaṃ kulaputtassa saddhā agārasmā anagāriyaṃ pabbajitassa, yaṃ tvaṃ ākoṭitapaccākoṭitāni cīvarāni pārupeyyāsi, akkhīni ca añjeyyāsi, acchañca pattaṃ dhāreyyāsi. Etaṃ kho te, nanda, patirūpaṃ kulaputtassa saddhā agārasmā anagāriyaṃ pabbajitassa, yaṃ tvaṃ āraññiko ca assasi, piṇḍapātiko ca paṃsukuliko ca kāmesu ca anapekkho vihareyyāsī’’ti. Idamavoca bhagavā…pe… satthā –
‘‘ကဒာဟံ နန္ဒံ ပသ္သေယ္ယံ၊ အာရညံ ပံသုကူလိကံ။
‘‘Kadāhaṃ nandaṃ passeyyaṃ, āraññaṃ paṃsukūlikaṃ;
အညာတုဉ္ဆေန ယာပေန္တံ၊ ကာမေသု အနပေက္ခိန’’န္တိ။
Aññātuñchena yāpentaṃ, kāmesu anapekkhina’’nti.
အထ ခော အာယသ္မာ နန္ဒော အပရေန သမယေန အာရညိကော စ ပိဏ္ဍပာတိကော စ ပံသုကူလိကော စ ကာမေသု စ အနပေက္ခော ဝိဟာသီတိ။ အဋ္ဌမံ။
Atha kho āyasmā nando aparena samayena āraññiko ca piṇḍapātiko ca paṃsukūliko ca kāmesu ca anapekkho vihāsīti. Aṭṭhamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၈. နန္ဒသုတ္တဝဏ္ဏနာ • 8. Nandasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၈. နန္ဒသုတ္တဝဏ္ဏ္ဏနာ • 8. Nandasuttavaṇṇṇanā
