| Library / Tipiṭaka / තිපිටක • Tipiṭaka / ථෙරීගාථාපාළි • Therīgāthāpāḷi |
8. අට්‌ඨකනිපාතො
8. Aṭṭhakanipāto
1. සීසූපචාලාථෙරීගාථා
1. Sīsūpacālātherīgāthā
196.
196.
‘‘භික්‌ඛුනී සීලසම්‌පන්‌නා, ඉන්‌ද්‍රියෙසු සුසංවුතා;
‘‘Bhikkhunī sīlasampannā, indriyesu susaṃvutā;
අධිගච්‌ඡෙ පදං සන්‌තං, අසෙචනකමොජවං’’.
Adhigacche padaṃ santaṃ, asecanakamojavaṃ’’.
197.
197.
‘‘තාවතිංසා ච යාමා ච, තුසිතා චාපි දෙවතා;
‘‘Tāvatiṃsā ca yāmā ca, tusitā cāpi devatā;
නිම්‌මානරතිනො දෙවා, යෙ දෙවා වසවත්‌තිනො;
Nimmānaratino devā, ye devā vasavattino;
තත්‌ථ චිත්‌තං පණීධෙහි, යත්‌ථ තෙ වුසිතං පුරෙ’’.
Tattha cittaṃ paṇīdhehi, yattha te vusitaṃ pure’’.
198.
198.
‘‘තාවතිංසා ච යාමා ච, තුසිතා චාපි දෙවතා;
‘‘Tāvatiṃsā ca yāmā ca, tusitā cāpi devatā;
නිම්‌මානරතිනො දෙවා, යෙ දෙවා වසවත්‌තිනො.
Nimmānaratino devā, ye devā vasavattino.
199.
199.
‘‘කාලං කාලං භවාභවං, සක්‌කායස්‌මිං පුරක්‌ඛතා;
‘‘Kālaṃ kālaṃ bhavābhavaṃ, sakkāyasmiṃ purakkhatā;
අවීතිවත්‌තා සක්‌කායං, ජාතිමරණසාරිනො.
Avītivattā sakkāyaṃ, jātimaraṇasārino.
200.
200.
‘‘සබ්‌බො ආදීපිතො ලොකො, සබ්‌බො ලොකො පදීපිතො;
‘‘Sabbo ādīpito loko, sabbo loko padīpito;
සබ්‌බො පජ්‌ජලිතො ලොකො, සබ්‌බො ලොකො පකම්‌පිතො.
Sabbo pajjalito loko, sabbo loko pakampito.
201.
201.
‘‘අකම්‌පියං අතුලියං, අපුථුජ්‌ජනසෙවිතං;
‘‘Akampiyaṃ atuliyaṃ, aputhujjanasevitaṃ;
බුද්‌ධො ධම්‌මමදෙසෙසි, තත්‌ථ මෙ නිරතො මනො.
Buddho dhammamadesesi, tattha me nirato mano.
202.
202.
‘‘තස්‌සාහං වචනං සුත්‌වා, විහරිං සාසනෙ රතා;
‘‘Tassāhaṃ vacanaṃ sutvā, vihariṃ sāsane ratā;
තිස්‌සො විජ්‌ජා අනුප්‌පත්‌තා, කතං බුද්‌ධස්‌ස සාසනං.
Tisso vijjā anuppattā, kataṃ buddhassa sāsanaṃ.
203.
203.
‘‘සබ්‌බත්‌ථ විහතා නන්‌දී, තමොඛන්‌ධො පදාලිතො;
‘‘Sabbattha vihatā nandī, tamokhandho padālito;
එවං ජානාහි පාපිම, නිහතො ත්‌වමසි අන්‌තක’’.
Evaṃ jānāhi pāpima, nihato tvamasi antaka’’.
… සීසූපචාලා ථෙරී….
… Sīsūpacālā therī….
අට්‌ඨකනිපාතො නිට්‌ඨිතො.
Aṭṭhakanipāto niṭṭhito.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ථෙරීගාථා-අට්‌ඨකථා • Therīgāthā-aṭṭhakathā / 1. සීසූපචාලාථෙරීගාථාවණ්‌ණනා • 1. Sīsūpacālātherīgāthāvaṇṇanā
