Mantrika Upanishad

॥ mantrikopaniṣat ॥

svāvidyādvayatatkāryāpahnavajñānabhāsuram ।
mantrikopaniṣadvedyaṃ rāmacandramahaṃ bhaje ॥

oṃ pūrṇamadaḥ pūrṇamidaṃ pūrṇātpūrṇamudacyate ।
pūrṇasya pūrṇamādāya pūrṇamevāvaśiṣyate ॥

oṃ śāntiḥ śāntiḥ śāntiḥ ॥

oṃ aṣṭapādaṃ śuciṃ haṃsaṃ trisūtramaṇumavyayam ।
trivartmānaṃ tejasohaṃ sarvataḥpaśyanna paśyati ॥ 1॥

bhūtasaṃmohane kāle bhinne tamasi vaikhare ।
antaḥ paśyanti sattvasthā nirguṇaṃ guṇagahvare ॥ 2॥

aśakyaḥ so'nyathā draṣṭuṃ dhyāyamānaḥ kumārakaiḥ ।
vikārajananīmajñāmaṣṭarūpāmajāṃ dhruvām ॥ 3॥

dhyāyate'dhyāsitā tena tanyate preryate punaḥ ।
sūyate puruṣārthaṃ ca tenaivādhiṣṭhitaṃ jagat ॥ 4॥

gauranādyantavatī sā janitrī bhūtabhāvinī ।
sitāsitā ca raktā ca sarvakāmadudhā vibhoḥ ॥ 5॥

pibantyenāmaviṣayāmavijñātāṃ kumārakāḥ ।
ekastu pibate devaḥ svacchando'tra vaśānugaḥ ॥ 6॥

dhyānakriyābhyāṃ bhagavānbhuṅkte'sau prasahadvibhuḥ ।
sarvasādhāraṇīṃ dogdhrīṃ pīyamānāṃ tu yajvamiḥ ॥ 7॥

paśyantyasyāṃ mahātmānaḥ suvarṇaṃ pippalāśanam ।
udāsīnaṃ dhruvaṃ haṃsaṃ snātakādhvaryavo jaguḥ ॥ 8॥

śaṃsantamanuśaṃsanti bahvṛcāḥ śāstrakovidāḥ ।
rathantaraṃ bṛhatsāma saptavaidhaistu gīyate ॥ 9॥

mantropaniṣadaṃ brahma padakramasamanvitam ।
paṭhanti bhārgavā hyete hyatharvāṇo bhṛgūttamāḥ ॥ 10॥

sabrahmacārivṛttiśca stambho'tha phalitastathā ।
anaḍvānrohitocchiṣṭaḥ paśyanto bahuvistaram ॥ 11॥

kālaḥ prāṇaśca bhagavānmṛtyuḥ śarvo maheśvaraḥ ।
ugro bhavaśca rudraśca sasuraḥ sāsurastathā ॥ 12॥

prajāpatirvirāṭ caiva puruṣaḥ salilameva ca ।
stūyate mantrasaṃstutyairatharvaviditairvibhuḥ ॥ 13॥

taṃ ṣaḍviṃśaka ityete saptaviṃśaṃ tathāpare ।
puruṣaṃ nirguṇaṃ sāṅkhyamatharvaśiraso viduḥ ॥ 14॥

caturviṃśatisaṃkhyātaṃ vyaktamavyaktameva ca ।
advaitaṃ dvaitamityāhustridhā taṃ pañcadhā tathā ॥ 15॥

brahmādyaṃ sthāvarāntaṃ ca paśyanti jñānacakṣuṣaḥ ।
tamekameva paśyanti pariśubhraṃ vibhuṃ dvijāḥ ॥ 16॥

yasminsarvamidaṃ protaṃ brahma sthāvarajaṅgamam ।
tasminneva layaṃ yānti sravantyaḥ sāgare yathā ॥ 17॥

yasminbhāvāḥ pralīyante līnāścāvyaktatāṃ yayuḥ ।
paśyanti vyaktatāṃ bhūyo jāyante budbudā iva ॥ 18॥

kṣetrajñādhiṣṭhitaṃ caiva kāraṇairvidyate punaḥ ।
evaṃ sa bhagavāndevaṃ paśyantyanye punaḥ punaḥ ॥ 19॥

brahma brahmetyathāyānti ye vidurbrāhmaṇāstathā ।
atraiva te layaṃ yānti līnāścāvyaktaśālinaḥ ॥

līnāścāvyaktaśālina ityupaniṣat ॥

oṃ pūrṇamadaḥ pūrṇamidaṃ pūrṇātpūrṇamudacyate ।
pūrṇasya pūrṇamādāya pūrṇamevāvaśiṣyate ॥

oṃ śāntiḥ śāntiḥ śāntiḥ ॥

iti mantrikopaniṣatsamāptā ॥