Kundika Upanishad

kuṇḍikopaniṣat

kuṇḍikopaniṣatkhyātaparivrājakasaṃtatiḥ ।
yatra viśrāntimagamattadrāmapadamāśraye ॥

oṃ āpyāyantu mamāṅgāni vākprāṇaścakṣuḥ
śrotramatho balamindriyāṇi ca ॥ sarvāṇi sarvaṃ
brahmopaniṣadaṃ māhaṃ brahma nirākuryāṃ
mā mā brahma nirākarodanirākaraṇamastvanirākaraṇaṃ
mestu tadātmani nirate ya upaniṣatsu dharmāste mayi
santu te mayi santu ॥ oṃ śāntiḥ śāntiḥ śāntiḥ ॥

hariḥ oṃ
brahmacaryāśrame kṣīṇe guruśuśrūṣaṇe rataḥ ।
vedānadhītyānujñāta ucyate guruṇāśramī ॥ 1॥

dāramāhṛtya sadṛśamagnimādhāya śaktitaḥ ।
brāhmīmiṣṭiṃ yajettāsāmahorātreṇa nirvapet ॥ 2॥

saṃvibhajya sutānarthe grāmyakāmānvisṛjya ca ।
saṃcaranvanamārgeṇa śucau deśe paribhraman ॥ 3॥

vāyubhakṣo'mbubhakṣo vā vihitaiḥ kandamūlakaiḥ ।
svaśarīre samāpyātha pṛthivyāṃ nāśru pātayet ॥ 4॥

saha tenaiva puruṣaḥ kathaṃ saṃnyasta ucyate ।
sanāmadheyo yasmiṃstu kathaṃ saṃnyasta ucyate ॥ 5॥

tasmātphalaviśuddhāṅgī saṃnyāsaṃ saṃhitātmanām ।
agnivarṇaṃ viniṣkramya vānaprasthaṃ prapadyate ॥ 6॥

lokavadbhāryayāsakto vanaṃ gacchati saṃyataḥ ।
saṃtyaktvā saṃsṛtisukhamanutiṣṭhati kiṃ mudhā ॥ 7॥

kiṃvā duḥkhamanusmṛtya bhogāṃstyajati cocchritān ।
garbhavāsabhayādbhītaḥ śītoṣṇābhyāṃ tathaiva ca ॥ 8॥

guhyaṃ praveṣṭumicchāmi paraṃ padamanāmayamiti ।
saṃnyasyāgnimapunarāvartanaṃ yanmṛtyurjāyamāvahamiti ॥
athādhyātmamantrāñjapet । dīkṣāmupeyātkāṣāyavāsāḥ ।
kakṣopasthalomāni varjayet । ūrdhvabāhurvimuktamārgo bhavati ।
aniketaścarebhikṣāśī । nididhyāsanaṃ dadhyāt । pavitraṃ
dhārayejjantusaṃrakṣaṇārtham । tadapi ślokā bhavanti ।
kuṇḍikāṃ camakaṃ śikyaṃ triviṣṭapamupānahau ।
śītopaghātinīṃ kanthāṃ kaupīnācchādanaṃ tathā ॥ 9॥

pavitraṃ snānaśāṭīṃ ca uttarāsaṅgameva ca ।
ato'tiriktaṃ yatkiṃcitsarvaṃ tadvarjayedyatiḥ ॥ 10॥

nadīpulinaśāyī syāddevāgāreṣu bāhyataḥ ।
nātyarthaṃ sukhaduḥkhābhyāṃ śarīramupatāpayet ॥ 11॥

snānaṃ pānaṃ tathā śaucamadbhiḥ pūtābhirāciret ।
stūyamāno na tuṣyeta nindito na śapetparān ॥ 12॥

bhikṣādivaidalaṃ pātraṃ snānadravyamavāritam ।
evaṃ vṛttimupāsīno yatendriyo japetsadā ॥ 13॥

viśvāyamanusaṃyogaṃ manasā bhāvayetsudhīḥ ।
ākāśādvāyurvāyorjyotirjyotiṣa āpo'dbhyaḥ pṛthivī ।
eṣāṃ bhūtānāṃ brahma prapadye । ajaramamaramakṣaramavyayaṃ prapadye ।
mayyakhaṇḍasukhāṃbhodhau bahudhā viśvavīcayaḥ ।
utpadyante vilīyante māyāmārutavibhramāt ॥ 14॥

na me dehena saṃbandho megheneva vihāyasaḥ ।
ataḥ kuto me taddharmā jāgratsvapnasuṣuptiṣu ॥ 15॥

ākāśavatkalpavidūragoha-
mādityavadbhāsyavilakṣaṇo'ham ।
ahāryavannityaviniścalo'ha-
mambhodhivatpāravivarjito'ham ॥ 16॥

nārāyaṇo'haṃ narakāntako'haṃ
purāntako'haṃ puruṣo'hamīśaḥ ।
akhaṇḍabodho'hamaśeṣasākṣī
nirīśvaro'haṃ nirahaṃ ca nirmamaḥ ॥ 17॥

tadabhyāsena prāṇāpānau saṃyamya tatra ślokā bhavanti ॥
vṛṣaṇāpānayormadhye pāṇī āsthāya saṃśrayet ।
saṃdaśya śanakairjihvāṃ yavamātre vinirgatām ॥ 18॥

māṣamātrāṃ tathā dṛṣṭiṃ śrotre sthāpya tathā bhuvi ।
śravaṇe nāsike gandhā yataḥ svaṃ na ca saṃśrayet ॥ 19॥

atha śaivapadaṃ yatra tadbrahma brahma tatparam ।
tadabhyāsena labhyeta pūrvajanmārjitātmanām ॥ 20॥

saṃbhūtairvāyusaṃśrāvairhṛdayaṃ tapa ucyate ।
ūrdhvaṃ prapadyate dehādbhittvā mūrdhānamavyayam ॥ 21॥

svadehasya tu mūrdhānaṃ ye prāpya paramāṃ gatim ।
bhūyaste na nivartante parāvaravido janāḥ ॥ 22॥

na sākṣiṇaṃ sākṣyadharmāḥ saṃspṛśanti vilakṣaṇam ।
avikāramudāsīnaṃ gṛhadharmāḥ pradīpavat ॥ 23॥

jale vāpi sthale vāpi luṭhatveṣa jaḍātmakaḥ ।
nāhaṃ vilipye taddharmairghaṭadharmairnabho yathā ॥ 24॥

niṣkriyo'smyavikāro'smi niṣkalo'smi nirākṛtiḥ ।
nirvikalpo'smi nityo'smi nirālambo'smi nirdvayaḥ ॥ 25॥

sarvātmako'haṃ sarvo'haṃ sarvātīto'hamadvayaḥ ।
kevalākhaṇḍabodho'haṃ svānando'haṃ nirantaraḥ ॥ 26॥

svameva sarvataḥ paśyanmanyamānaḥ svamadvayam ।
svānandamanubhuñjāno nirvikalpo bhavāmyaham ॥ 27॥

gacchaṃstiṣṭhannupaviśañchayāno vānyathāpi vā ।
yathecchayā vasedvidvānātmārāmaḥ sadā muniḥ ॥ 28॥

ityupaniṣat ॥
oṃ āpyāyantu mamāṅgāni vākprāṇaścakṣuḥ
śrotramatho balamindriyāṇi ca ॥ sarvāṇi sarvaṃ
brahmopaniṣadaṃ māhaṃ brahma nirākuryāṃ
mā mā brahma nirākarodanirākaraṇamastvanirākaraṇaṃ
mestu tadātmani nirate ya upaniṣatsu dharmāste mayi
santu te mayi santu ॥ oṃ śāntiḥ śāntiḥ śāntiḥ ॥

hariḥ oṃ tatsat ॥

iti kuṇḍikopaniṣatsamāptā ॥