Shuka-Rahasya Upanishad

॥ śukarahasyopaniṣat ॥

prajñānādimahāvākyarahasyādikalevaram ।
vikalevarakaivalyaṃ tripādrāmamahaṃ bhaje ॥

oṃ saha nāvavatu ॥ saha nau bhunaktu ॥ saha vīryaṃ karavāvahai ॥

tejasvināvadhītamastu mā vidviṣāvahai ॥

oṃ śāntiḥ śāntiḥ śāntiḥ ॥

athāto rahasyopaniṣadaṃ vyākhyāsyāmo devarṣayo
brahmāṇaṃ sampūjya praṇipatya papracchurbhagavannasmākaṃ
rahasyopaniṣadaṃ brūhīti । so'bravīt ।
purā vyāso mahātejāḥ sarvavedataponidhiḥ ।
praṇipatya śivaṃ sāmbaṃ kṛtāñjaliruvāca ha ॥ 1॥

śrīvedavyāsa uvāca ।
devadeva mahāprājña pāśacchedadṛḍhavrata ।
śukasya mama putrasya vedasaṃskārakarmaṇi ॥ 2॥

brahmopadeśakālo'yamidānīṃ samupasthitaḥ ।
brahmopadeśaḥ kartavyo bhavatādya jagadguro ॥ 3॥

īśvara uvāca ।
mayopadiṣṭe kaivalye sākṣādbrahmaṇi śāśvate ।
vihāya putro nirvedātprakāśaṃ yāsyati svayam ॥ 4॥

śrīvedavyāsa uvāca ।
yathā tathā vā bhavatu hyupanāyanakarmaṇi ।
upadiṣṭe mama sute brahmaṇi tvatprasādataḥ ॥ 5॥

sarvajño bhavatu kṣipraṃ mama putro maheśvara ।
tava prasādasampanno labhenmuktiṃ caturvidhām ॥ 6॥

tacchṛtvā vyāsavacanaṃ sarvadevarṣisaṃsadi ।
upadeṣṭuṃ sthitaḥ śambhuḥ sāmbo divyāsane mudā ॥ 7॥

kṛtakṛtyaḥ śukastatra samāgatya subhaktimān ।
tasmātsa praṇavaṃ labdhvā punarityabravīcchivam ॥ 8॥

śrīśuka uvāca ।
devādideva sarvajña saccidānanda lakṣaṇa ।
umāramaṇa bhūteśa prasīda karuṇānidhe ॥ 9॥

upadiṣṭaṃ parabrahma praṇavāntargataṃ param ।
tattvamasyādivākyānāṃ prajñādīnāṃ viśeṣataḥ ॥ 10॥

śrotumicchāmi tattvena ṣaḍaṅgāni yathākramam ।
vaktavyāni rahasyāni kṛpayādya sadāśiva ॥ 11॥

śrīsadāśiva uvāca ।
sādhu sādhu mahāprājña śuka jñānanidhe mune ।
praṣṭavyaṃ tu tvayā pṛṣṭaṃ rahasyaṃ vedagarbhitam ॥ 12॥

rahasyopaniṣannāmnā saṣaḍaṅgamihocyate ।
yasya vijñānamātreṇa mokṣaḥ sākṣānna saṃśayaḥ ॥ 13॥

aṅgahīnāni vākyāni gururnopadiśetpunaḥ ।
saṣaḍaṅgānyupadiśenmahāvākyāni kṛtsnaśaḥ ॥ 14॥

caturṇāmapi vedānāṃ yathopaniṣadaḥ śiraḥ ।
iyaṃ rahasyopaniṣattathopaniṣadāṃ śiraḥ ॥ 15॥

rahasyopaniṣadbrahma dhyātaṃ yena vipaścitā ।
tīrthairmantraiḥ śrutairjapyaistasya kiṃ puṇyahetubhiḥ ॥ 16॥

vākyārthasya vicāreṇa yadāpnoti śaracchatam ।
ekavārajapenaiva ṛṣyādidhyānataśca yat ॥ 17॥

oṃ asya śrīmahāvākyamahāmantrasya haṃsa ṛṣiḥ ।
avyaktagāyatrī chandaḥ । paramahaṃso devatā ।
haṃ bījam । saḥ śaktiḥ । so'haṃ kīlakam ।
mama paramahaṃsaprītyarthe mahāvākyajape viniyogaḥ ।
satyaṃ jñānamanantaṃ brahma aṅguṣṭhābhyāṃ namaḥ ।
nityānando brahma tarjanībhyāṃ svāhā ।
nityānandamayaṃ brahma madhyamābhyāṃ vaṣaṭ ।
yo vai bhūmā anāmikābhyāṃ hum ।
yo vai bhūmādipatiḥ kaniṣṭhikābhyāṃ vauṣaṭ ।
ekamevādvitīyaṃ brahma karatalakarapṛṣṭhābhyāṃ phaṭ ॥

satyaṃ jñānamanantaṃ brahma hṛdayāya namaḥ ।
nityānando brahma śirase svāhā ।
nityānandamayaṃ brahma śikhāyai vaṣaṭ ।
yo vai bhūmā kavacāya hum ।
yo vai bhūmādhipatiḥ netratrayāya vauṣaṭ ।
ekamevādvitīyaṃ brahma astrāya phaṭ ।
bhūrbhuvaḥsuvaromiti digbandhaḥ ।
dhyānam ।
nityānandaṃ paramasukhadaṃ kevalaṃ jñānamūrtiṃ
viśvātītaṃ gaganasadṛśaṃ tattvamasyādilakṣyam ॥

ekaṃ nityaṃ vimalamacalaṃ sarvadhīsākṣibhūtaṃ
bhāvātītaṃ triguṇarahitaṃ sadguruṃ taṃ namāmi ॥ 1॥

atha mahāvākyāni catvāri । yathā ।
oṃ prajñānaṃ brahma ॥ 1॥

oṃ ahaṃ brahmāsmi ॥ 2॥

oṃ tattvamasi ॥ 3॥

oṃ ayamātmā brahma ॥ 4॥

tattvamasītyabhedavācakamidaṃ ye japanti
te śivassāyujyamuktibhājo bhavanti ॥

tatpadamahāmantrasya । paramahaṃsaḥ ṛṣiḥ ।
avyaktagāyatrī chandaḥ । paramahaṃso devatā ।
haṃ bījam । saḥ śaktiḥ । so'haṃ kīlakam ।
mama sāyujyamuktyarthe jape viniyogaḥ ।
tatpuruṣāya aṅguṣṭhābhyāṃ namaḥ ।
īśānāya tarjanībhyāṃ svāhā ।
aghorāya madhyamābhyāṃ vaṣaṭ
sadyojātāya anāmikābhyāṃ hum ।
vāmadevāya kaniṣṭhikābhyāṃ vauṣaṭ ।
tatpuruṣeśānāghorasadyojātavāmadevebhyo
namaḥ karatalakarapṛṣṭhābhyāṃ phaṭ ।
evaṃ hṛdayādinyāsaḥ ।
bhūrbhuvaḥsuvaromiti digbandhaḥ ॥

dhyānam ।
jñānaṃ jñeyaṃ jñānagamyāditītaṃ
śuddhaṃ buddhaṃ muktamapyavyayaṃ ca ।
satyaṃ jñānaṃ saccidānandarūpaṃ
dhyāyedevaṃ tanmahobhrājamānam ॥

tvaṃpada mahāmantrasya viṣṇurṛṣiḥ ।
gāyatrī chandaḥ । paramātmā devatā ।
aiṃ bījam । klīṃ śaktiḥ । sauḥ kīlakam ।
mama muktyarthe jape viniyogaḥ ।
vāsudevāya aṅguṣṭhābhyāṃ namaḥ ।
saṅkarṣaṇāya tarjanībhyāṃ svāhā ।
pradyumnāya madhyamābhyāṃ vaṣaṭ ।
aniruddhāya anāmikābhyāṃ hum ।
vāsudevāya kaniṣṭhikābhyāṃ vauṣaṭ ।
vāsudevasaṅkarṣaṇapradyumnāniruddhebhyaḥ
karatalakarapṛṣṭhābhyāṃ phaṭ ।
evaṃ hṛdayādinyāsaḥ ।
bhūrbhuvaḥsuvaromiti digbandhaḥ ॥

dhyānam ॥

jīvatvaṃ sarvabhūtānāṃ sarvatrākhaṇḍavigraham ।
cittāhaṅkārayantāraṃ jīvākhyaṃ tvaṃpadaṃ bhaje ।
asipadamahāmantrasya mana ṛṣiḥ ।
gāyatrī chandaḥ । ardhanārīśvaro devatā ।
avyaktādirbījam । nṛsiṃhaḥ śaktiḥ ।
paramātmā kīlakam । jīvabrahmaikyārthe jape viniyogaḥ ।
pṛthvīdvyaṇukāya aṅguṣṭhābhyāṃ namaḥ ।
abdvyaṇukāya tarjanībhyāṃ svāhā ।
tejodvyaṇukāya madhyamābhyāṃ vaṣaṭ ।
vāyudvyaṇukāya anāmikābhyaṃ hum ।
ākāśadvyaṇukāya kaniṣṭhikābhyāṃ vauṣaṭ ।
pṛthivyaptejovāyvākāśadvyaṇukebhyaḥ
karatalakarapṛṣṭhābhyāṃ phaṭ ।
bhūrbhuvaḥsuvaromiti digbandhaḥ ॥

dhyānam ॥

jīvo brahmeti vākyārthaṃ yāvadasti manaḥsthitiḥ ।
aikyaṃ tattvaṃ laye kurvandhyāyedasipadaṃ sadā ॥

evaṃ mahāvākyaṣaḍaṅgānyuktāni ॥

atha rahasyopaniṣadvibhāgaśo vākyārthaślokāḥ procyante ॥

yenekṣate śṛṇotīdaṃ jighrati vyākaroti ca ।
svādvasvādu vijānāti tatprajñānamudīritam ॥ 1॥

caturmukhendradeveṣu manuṣyāśvagavādiṣu ।
caitanyamekaṃ brahmātaḥ prajñānaṃ brahma mayyapi ॥ 2॥

paripūrṇaḥ parātmāsmindehe vidyādhikāriṇi ।
buddheḥ sākṣitayā sthitvā sphurannahamitīryate ॥ 3॥

svataḥ pūrṇaḥ parātmātra brahmaśabdena varṇitaḥ ।
asmītyaikyaparāmarśastena brahma bhavāmyaham ॥ 4॥

ekamevādvitīyaṃ sannāmarūpavivarjitam ।
sṛṣṭeḥ purādhunāpyasya tādṛktvaṃ taditīryate ॥ 5॥

śroturdehendriyātītaṃ vastvatra tvaṃpaderitam ।
ekatā grāhyate'sīti tadaikyamanubhūyatām ॥ 6॥

svaprakāśāparokṣatvamayamityuktito matam ।
ahaṅkārādidehāntaṃ pratyagātmeti gīyate ॥ 7॥

dṛśyamānasya sarvasya jagatastattvamīryate ।
brahmaśabdena tadbrahma svaprakāśātmarūpakam ॥ 8॥

anātmadṛṣṭeravivekanidrā-
mahaṃ mama svapnagatiṃ gato'ham ।
svarūpasūrye'bhyudite sphuṭokte-
rgurormahāvākyapadaiḥ prabuddhaḥ ॥ 9॥

vācyaṃ lakṣyamiti dvidhārthasaraṇīvācyasya hi tvaṃpade
vācyaṃ bhautikamindriyādirapi yallakṣyaṃ tvamarthaśca saḥ ।
vācyaṃ tatpadamīśatākṛtamatirlakṣyaṃ tu saccitsukhā-
nandabrahmatadartha eṣa ca tayoraikyaṃ tvasīdaṃ padam ॥ 10॥

tvamiti taditi kārye kāraṇe satyupādhau
dvitayamitarathaikaṃ saccidānandarūpam ।
ubhayavacanahetu deśakālau ca hitvā
jagati bhavati soyaṃ devadatto yathaikaḥ ॥ 11॥

kāryopādhirayaṃ jīvaḥ kāraṇopādhirīśvaraḥ ।
kāryakāraṇatāṃ hitvā pūrṇabodho'vaśiṣyate ॥ 12॥

śravaṇaṃ tu guroḥ pūrvaṃ mananaṃ tadanantaram ।
nididhyāsanamityetatpūrṇabodhasya kāraṇam ॥ 13॥

anyavidyāparijñānamavaśyaṃ naśvaraṃ bhavet ।
brahmavidyāparijñānaṃ brahmaprāptikaraṃ sthitam ॥ 14॥

mahāvākyānyupadiśetsaṣaḍaṅgāni deśikaḥ ।
kevalaṃ na hi vākyāni brahmaṇo vacanaṃ yathā ,, 15॥

īśvara uvāca ।
evamuktvā muniśreṣṭha rahasyopaniṣacchuka ।
mayā pitrānunītena vyāsena brahmavādinā ॥ 16॥

tato brahmopadiṣṭaṃ vai saccidānandalakṣaṇam ।
jīvanmuktaḥ sadā dhyāyannityastvaṃ vihariṣyasi ॥ 17॥

yo vedādau svaraḥ prokto vedānte ca pratiṣṭhitaḥ ।
tasya prakṛtilīnasya yaḥ paraḥ sa maheśvaraḥ ॥ 18॥

upadiṣṭaḥ śiveneti jagattanmayatāṃ gataḥ ।
utthāya praṇipatyeśaṃ tyaktāśeṣarigrahaḥ ॥ 19॥

parabrahmapayorāśau plavanniva yayau tadā ।
pravrajantaṃ tamālokya kṛṣṇadvaipāyano muniḥ ॥ 20॥

anuvrajannājuhāva putraviśleṣakātaraḥ ।
pratinedustadā sarve jagatsthāvarajaṅgamāḥ ॥ 21॥

tacchṛtvā sakalākāraṃ vyāsaḥ satyavatīsutaḥ ।
putreṇa sahitaḥ prītyā parānandamupeyivān ॥ 22॥

yo rahasyopaniṣadamadhīte gurvanugrahāt ।
sarvapāpavinirmuktaḥ sākṣātkaivalyamaśnute
sākṣātkaivalyamaśnuta ityupaniṣat ॥

oṃ saha nāvavatu ॥ saha nau bhunaktu ॥ saha vīryaṃ karavāvahai ॥

tejasvinādhītamastu mā vidviṣāvahai ॥

oṃ śāntiḥ śāntiḥ śāntiḥ ॥

॥ iti śukarahasyopaniṣatsamāptā ॥