Atmabodha Upanishad

॥ ātmabodhopaniṣat ॥

śrīmannārāyaṇākāramaṣṭākṣaramahāśayam ।
svamātrānubhavātsiddhamātmabodhaṃ hariṃ bhaje ॥

oṃ vāṅme manasīti śāntiḥ ॥

oṃ pratyagānandaṃ brahmapuruṣaṃ praṇavasvarūpaṃ akāra ukāra
makāra iti tryakṣaraṃ praṇavaṃ tadetadomiti । yamuktvā mucyate
yogī janmasaṃsārabandhanāt । oṃ namo nārāyaṇāya
śaṅkhacakragadādharāya tasmāt oṃ namo nārāyaṇāyeti
mantropāsako vaikuṇṭhabhavanaṃ gamiṣyati । atha yadidaṃ
brahmapuraṃ puṇḍarīkaṃ tasmāttaḍitābhamātraṃ
dīpavatprakāśam ॥

brahmaṇyo devakīputro brahmaṇyo madhusūdanaḥ ।
brahmaṇyaḥ puṇḍarīkākṣo brahmaṇyo viṣṇuracyutaḥ ॥

sarvabhūtasthamekaṃ nārāyaṇaṃ kāraṇapuruṣamakāraṇaṃ paraṃ
brahmom । śokamohavinirmukto viṣṇuṃ dhyāyanna sīdati ।
dvaitādvaitamabhayaṃ bhavati । mṛtyoḥ sa mṛtyumāpnoti ya iha
nāneva paśyati । hṛtpadmamadhye sarvaṃ yattatprajñāne
pratiṣṭhitam । prajñānetro lokaḥ prajñā pratiṣṭhā
prajñānaṃ brahma । sa etena
prajñenātmanāsmāllokādutkramyāmuṣminsvarge loke
sarvānkāmānāptvā'mṛtaḥ samabhavadamṛtaḥ samabhavat ।
yatra jyotirajasraṃ yasmiṃlloke'bhyarhitam । tasminmāṃ dehi
svamānamṛte loke akṣate acyute loke akṣate amṛtatvaṃ ca
gacchatyoṃ namaḥ ॥ 1॥

pragalitanijamāyo'haṃ nistuladṛśirūpavastumātro'ham ।
astamitāhanto'haṃ pragalitajagadīśajīvabhedo'ham ॥ 1॥

pratyagabhinnaparo'haṃ vidhvastāśeṣavidhiniṣedho'ham ।
samudastāśramito'haṃ pravitatasukhapūrṇasaṃvidevāham ॥ 2॥

sākṣyahamanapekṣo'haṃ nijamahimni saṃsthito'hamacalo'ham ।
ajaro'hamavyayo'haṃ pakṣavipakṣādibhedavidhuro'ham ॥ 3॥

avabodhaikaraso'haṃ mokṣānandaikasindhurevāham ।
sūkṣmo'hamakṣaro'haṃ vigalitaguṇajālakevalātmā'ham ॥ 4॥

nistraiguṇyapado'haṃ kukṣisthānekalokakalano'ham ।
kūṭasthacetano'haṃ niṣkriyadhāmāhamapratarkyo'ham ॥ 5॥

eko'hamavikalo'haṃ nirmalanirvāṇamūrtirevāham ।
niravayo'hamajo'haṃ kevalasanmātrasārabhūto'ham ॥ 6॥

niravadhinijabodho'haṃ śubhatarabhāvo'hamaprabhedyo'ham ।
vibhurahamanavadyo'haṃ niravadhiniḥsīmatattvamātro'ham ॥ 7॥

vedyo'hamagamāstairārādhyo'haṃ sakalabhuvanahṛdyo'ham ।
paramānandaghano'ham paramānandaikabhūmarūpo'ham ॥ 8॥

śuddho'hamadvayo'haṃ santatabhāvo'hamādiśūnyo'ham ।
śamitāntatritayo'haṃ baddho mukto'hamadbhutātmāham ॥ 9॥

śuddho'hamāntaro'haṃ śāśvatavijñānasamarasātmāham ।
śodhitaparatattvo'haṃ bodhānandaikamūrtirevāham ॥ 10॥

vivekayuktibuddhyāhaṃ jānāmyātmānamadvayam ।
tathāpi bandhamokṣādivyavahāraḥ pratīyate ॥ 11॥

nivṛtto'pi prapañco me satyavadbhāti sarvadā ।
sarpādau rajjusatteva brahmasattaiva kevalam ।
prapañcādhārarūpeṇa vartate'to jaganna hi ॥ 12॥

yathekṣurasasaṃvyāptā śarkarā vartate tathā ।
advayabrahmarūpeṇa vyāpto'haṃ vai jagattrayam ॥ 13॥

brahmādikīṭaparyantāḥ prāṇino mayi kalpitāḥ ।
budbudādivikārāntastaraṅgaḥ sāgare yathā ॥ 14॥

taraṅgasthaṃ dravaṃ sindhurna vāñchati yathā tathā ।
viṣayānandavāñchā me mā bhūdānandarūpataḥ ॥ 15॥

dāridryāśā yathā nāsti sampannasya tathā mama ।
brahmānande nimagnasya viṣayāśā na tadbhavet ॥ 16॥

viṣaṃ dṛṣṭvā'mṛtaṃ dṛṣṭvā viṣaṃ tyajati buddhimān ।
ātmānamapi dṛṣṭvāhamanātmānaṃ tyajāmyaham ॥ 17॥

ghaṭāvabhāsako bhānurghaṭanāśe na naśyati ।
dehāvabhāsakaḥ sākṣī dehanāśe na naśyati ॥ 18॥

na me bandho na me muktirna me śāstraṃ na me guruḥ ।
māyāmātravikāsatvānmāyātīto'hamadvayaḥ ॥ 19॥

prāṇāścalantu taddharmaiḥ kāmairvā hanyatāṃ manaḥ ।
ānandabuddhipūrṇasya mama duḥkhaṃ kathaṃ bhavet ॥ 20॥

ātmānamañjasā vedmi kvāpyajñānaṃ palāyitam ।
kartṛtvamadya me naṣṭaṃ kartavyaṃ vāpi na kvacit ॥ 21॥

brāhmaṇyaṃ kulagotre ca nāmasaundaryajātayaḥ ।
sthūladehagatā ete sthūlādbhinnasya me nahi ॥ 22॥

kṣutpipāsāndhyabādhiryakāmakrodhādayo'khilāḥ ।
liṅgadehagatā ete hyaliṅgasya na santi hi ॥ 23॥

jaḍatvapriyamodatvadharmāḥ kāraṇadehagāḥ ।
na santi mama nityasya nirvikārasvarūpiṇaḥ ॥ 24॥

ulūkasya yathā bhānurandhakāraḥ pratīyate ।
svaprakāśe parānande tamo mūḍhasya jāyate ॥ 25॥

cakṣurdṛṣṭinirodhe'bhraiḥ sūryo nāstīti manyate ।
tathā'jñānāvṛto dehī brahma nāstīti manyate ॥ 26॥

yathāmṛtaṃ viṣādbhinnaṃ viṣadoṣairna lipyate ।
na spṛśāmi jaḍādbhinno jaḍadoṣānprakāśataḥ ॥ 27॥

svalpāpi dīpakaṇikā bahulaṃ nāśayettamaḥ ।
svalpo'pi bodho nibiḍe bahulaṃ nāśayettamaḥ ॥ 28॥

kālatraye yathā sarpo rajjau nāsti tathā mayi ।
ahaṅkārādidehāntaṃ jagannāstyahamadvayaḥ ॥ 29॥

cidrūpatvānna me jāḍyaṃ satyatvānnānṛtaṃ mama ।
ānandatvānna me duḥkhamajñānādbhāti satyavat ॥ 30॥

ātmaprabodhopaniṣadaṃ muhūrtamupāsitvā na sa punarāvartate na
sa punarāvartata ityupaniṣat ॥

oṃ vāṅme manasīti śāntiḥ ॥

iti ātmabodhopaniṣatsamāptā ॥