| Library / Philosophy and Religion |
Kalisantarana Upanishad
Sanskrit Devanagari with Roman transliteration (IAST)
कलिसन्तरणोपनिषत्
kalisantaraṇopaniṣat
(कृष्णयजुर्वेदीया)
(kṛṣṇayajurvedīyā)
ॐ सह नाववतु । सह नौ भुनक्तु ।
सह वीर्यङ्करवावहै ।
तेजस्विनावधीतमस्तु मा विद्विषावहै ।
ॐ शान्तिः शान्तिः शान्तिः ।
oṃ saha nāvavatu । saha nau bhunaktu ।
saha vīryaṅkaravāvahai ।
tejasvināvadhītamastu mā vidviṣāvahai ।
oṃ śāntiḥ śāntiḥ śāntiḥ ।
(भगवन्नामस्मरणमात्रेण कलिसन्तरणम्)
(bhagavannāmasmaraṇamātreṇa kalisantaraṇam)
हरिः ॐ । द्वापरान्ते नारदो ब्रह्माणं जगाम कथं भगवन् गां
पर्यटन् कलिं सन्तरेयमिति ।
स होवाच ब्रह्मा साधु पृष्टोऽस्मि सर्वश्रुतिरहस्यं गोप्यं
तच्छृणु येन कलिसंसारं तरिष्यसि ।
भगवत आदिपुरुषस्य नारायनस्य नामोच्चारणमात्रेण
निर्धृतकलिर्भवतीति ॥ १॥
hariḥ oṃ । dvāparānte nārado brahmāṇaṃ jagāma kathaṃ bhagavan gāṃ
paryaṭan kaliṃ santareyamiti ।
sa hovāca brahmā sādhu pṛṣṭo'smi sarvaśrutirahasyaṃ gopyaṃ
tacchṛṇu yena kalisaṃsāraṃ tariṣyasi ।
bhagavata ādipuruṣasya nārāyanasya nāmoccāraṇamātreṇa
nirdhṛtakalirbhavatīti ॥ 1॥
(परब्रह्मावरणविनाशकषोडशनामानि)
(parabrahmāvaraṇavināśakaṣoḍaśanāmāni)
नारदः पुनः पप्रच्छ तन्नाम किमिति । स होवाच हिरण्यगर्भः ।
nāradaḥ punaḥ papraccha tannāma kimiti । sa hovāca hiraṇyagarbhaḥ ।
हरे राम हरे राम राम राम हरे हरे ।
hare rāma hare rāma rāma rāma hare hare ।
हरे कृष्ण हरे कृष्ण कृष्ण कृष्ण हरे हरे ॥
hare kṛṣṇa hare kṛṣṇa kṛṣṇa kṛṣṇa hare hare ॥
इति षोडशकं नाम्नां कलिकल्मषनाशनम् ।
iti ṣoḍaśakaṃ nāmnāṃ kalikalmaṣanāśanam ।
नातः परतरोपायः सर्ववेदेषु दृश्यते ॥
nātaḥ parataropāyaḥ sarvavedeṣu dṛśyate ॥
षोडशकलावृतस्य जीवस्यावरणविनाशनम् ।
ततः प्रकाशते परं ब्रह्म मेघापाये रविरश्मिमण्डलीवेति ॥ २॥
ṣoḍaśakalāvṛtasya jīvasyāvaraṇavināśanam ।
tataḥ prakāśate paraṃ brahma meghāpāye raviraśmimaṇḍalīveti ॥ 2॥
(नामजपमहिमा)
(nāmajapamahimā)
पुनर्नारदः पप्रच्छ भगवन् कोऽस्य विधिरिति ।
तं होवाच नास्य विधिरिति ।
सर्वदा शुचिरशुचिर्वा पठन् ब्राह्मणः सलोकतां समीपतां
सरूपतां सायुज्यमेति ।
यदास्य षोडशकस्य सार्धत्रिकोटीर्जपति तदा ब्रह्महत्यां तरति ।
तरति वीरहत्याम् ।
स्वर्णस्तेयात् पूतो भवति ।
वृषलीगमनात् पूतो भवति ।
पितृदेवमनुष्याणामपकारात् पूतो भवति ।
सर्वधर्मपरित्यागपापात् सद्यः शुचितामाप्नुयात् ।
सद्यो मुच्यते सद्यो मुच्यते इत्युपनिषत् ॥ ३॥
punarnāradaḥ papraccha bhagavan ko'sya vidhiriti ।
taṃ hovāca nāsya vidhiriti ।
sarvadā śuciraśucirvā paṭhan brāhmaṇaḥ salokatāṃ samīpatāṃ
sarūpatāṃ sāyujyameti ।
yadāsya ṣoḍaśakasya sārdhatrikoṭīrjapati tadā brahmahatyāṃ tarati ।
tarati vīrahatyām ।
svarṇasteyāt pūto bhavati ।
vṛṣalīgamanāt pūto bhavati ।
pitṛdevamanuṣyāṇāmapakārāt pūto bhavati ।
sarvadharmaparityāgapāpāt sadyaḥ śucitāmāpnuyāt ।
sadyo mucyate sadyo mucyate ityupaniṣat ॥ 3॥
ॐ सह नाववतु । सह नौ भुनक्तु ।
सह वीर्यङ्करवावहै ।
तेजस्विनावधीतमस्तु मा विद्विषावहै ।
ॐ शान्तिः शान्तिः शान्तिः ।
oṃ saha nāvavatu । saha nau bhunaktu ।
saha vīryaṅkaravāvahai ।
tejasvināvadhītamastu mā vidviṣāvahai ।
oṃ śāntiḥ śāntiḥ śāntiḥ ।
Subscribe now to get unrestricted access to all resources, in all languages, throughout this web site!
Subscription Form
THIS ARTICLE IN OTHER LANGUAGES:
YOU MAY ALSO LIKE
Subscribe now to get unrestricted access to all resources, in all languages, throughout this web site!
Subscription Form
