Maitreyi Upanishad

maitreyyupaniṣat

śrutyācāryopadeśena munayo yatpadaṃ yayuḥ ।
tatsvānubhūtisaṃsiddhaṃ svamātraṃ brahma bhāvaye ॥

oṃ āpyāyantu mamāṅgāni vākprāṇaścakṣuḥ śrotram ।
atho balamindriyāṇi ca sarvāṇi sarvaṃ brahmopaniṣadaṃ
māhaṃ brahma nirākuryām । mā mā brahma nirākaro-
danirākaraṇamastu । anirākaraṇaṃ me'stu । tadātmani nirate
ya upaniṣatsu dharmāste mayi santu te mayi santu ॥

oṃ śāntiḥ śāntiḥ śāntiḥ ॥

oṃ bṛhadratho vai nāma rājā rājye jyeṣṭhaṃ
putraṃ nidhāpayitvedamaśāśvataṃ manyamānaḥ
śarīraṃ vairāgyamupeto'raṇyaṃ nirjagāma । sa tatra
paramaṃ tapa āsthāyādityamīkṣamāṇa ūrdhvabāhu-
stiṣṭhatyante sahasrasya munirantikamājagāmāgni
rivādhūmakastejasā nirdahannivātmavidbhagavāñchā-
kāyanya uttiṣṭhottiṣṭha varaṃ vṛṇīśveti
rājānamabravītsa tasmai namaskṛtyovāca
bhagavannāhamātmavittvaṃ tattvavicchṛṇumo vayaṃ
sa tvaṃ no brūhītyetadvṛttaṃ purastādaśakyaṃ mā
pṛccha praśnamaikṣvākānyānkāmānvṛṇīśveti
śākāyanyasya caraṇāvabhimṛśyamāno
rājemāṃ gāthāṃ jagāda ॥ 1॥

atha kimaetairmānyanāṃ śoṣaṇaṃ mahārṇavānāṃ
śikhariṇāṃ prapatanaṃ dhruvasya pracalanaṃ sthānaṃ
vā tarūṇāṃ nimajjanaṃ pṛthivyāḥ sthānādapasaraṇaṃ
surāṇāṃ so'hamityetadvidhe'sminsaṃsāre kiṃ
kāmopabhogairyairevāśritasyāsakṛdupāvartanaṃ
dṛśyata ityuddhartumarhasītyandhodapānastho bheka
ivāhamasminsaṃsāre bhagavaṃstvaṃ no gatiriti ॥ 2॥

bhagavañśarīramidaṃ maithunādevodbhūtaṃ saṃvidapetaṃ
niraya eva mūtradvāreṇa niṣkrāntamasthibhiścitaṃ
māṃsenānuliptaṃ carmaṇāvabaddhaṃ viṇmūtravātapitta-
kaphamajjāmedovasābhiranyaiśca malairbahubhiḥ
paripūrṇametādṛśe śarīre vartamānasya bhagavaṃstvaṃ
no gatiriti ॥ 3॥

atha bhagavāñchakāyanyaḥ suprīto'bravīdrājānaṃ
mahārāja bṛhadrathekṣvākurvaṃśadhvajaśīrṣātmajñaḥ
kṛtakṛtyastvaṃ marunnāmno viśruto'sītyayaṃ
khalvātmā te katamo bhagavānvarṇya iti taṃ hovāca ॥

śabdasparśamayā ye'rthā anarthā iva te sthitāḥ ।
yeṣāṃ saktastu bhūtātmā na smarecca paraṃ padam ॥ 1॥

tapasā prāpyate sattvaṃ sattvātsamprāpyate manaḥ ।
manasā prāpyate hyātmā hyātmāpattyā nivartate ॥ 2॥

yathā nirindhano vahniḥ svayonāvupaśāmyati ।
tathā vṛttikṣayaccittaṃ svayonāvupaśāmyati ॥ 3॥

svayonāvupaśāntasya manasaḥ satyagāminaḥ ।
indriyārthavimūḍhasyānṛtāḥ karmavaśānugāḥ ॥ 4॥

cittameva hi saṃsārastatprayatnena śodhayet ।
yaccittastanmayo bhavati guhyametatsanātanam ॥ 5॥

cittasya hi prasādena hanti karma śubhāśubham ।
prasannātmātmani sthitvā sukhamakṣayamaśnute ॥ 6॥

samāsaktaṃ yadā cittaṃ jantorviṣayagocaram ।
yadyevaṃ brahmaṇi syāttatko na mucyeta bandhanāt ॥ 7॥

hṛtpuṇḍarīkamadhye tu bhāvayetparameśvaram ।
sākṣiṇaṃ buddhivṛttasya paramapremagocaram ॥ 8॥

agocaraṃ manovācāmavadhūtādisamplavam ।
sattāmātraprakāśaikaprakāśaṃ bhāvanātigam ॥ 9॥

aheyamanupādeyamasāmānyaviśeṣaṇam ।
dhruvaṃ stimitagambhīraṃ na tejo na tamastatam ।
nirvikalpaṃ nirābhāsaṃ nirvāṇamayasaṃvidam ॥ 10॥

nityaḥ śuddho buddhamuktasvabhāvaḥ
satyaḥ sūkṣmaḥ saṃvibhuścādvitīyaḥ ।
ānandābdhiryaḥ paraḥ so'ha-
masmi pratyagdhāturnātra saṃśītirasti ॥ 11॥

ānandamantarnijamāśrayaṃ ta-
māśāpiśācīmavamanayantam ।
ālokayantaṃ jagadindrajāla-
māpatkathaṃ māṃ praviśedasaṅgam ॥ 12॥

varṇāśramācārayutā vimūḍhāḥ
karmānusāreṇa phalaṃ labhante ।
varṇādidharmaṃ hi parityajantaḥ
svānandatṛptāḥ puruṣā bhavanti ॥ 13॥

varṇāśramaṃ sāvayavaṃ svarūpa-
mādyantayuktaṃ hyatikṛcchramātram ।
putrādideheṣvabhimānaśūnyaṃ
bhūtvā vasetsaukhyatame hyananta iti ॥ 14॥ 4॥

iti prathamo'dhyāyaḥ ॥ 1॥

atha bhagavānmaitreyaḥ kailāsaṃ jagāma taṃ gatvovāca
bho bhagavanparamatattvarahasyamanubrūhīti ॥

sa hovāca mahādevaḥ ॥

deho devālayaḥ proktaḥ sa jīvaḥ kevalaḥ śivaḥ ।
tyajedajñānanirmālyaṃ so'hambhāvena pūjayet ॥ 1॥

abhedadarśanaṃ jñānaṃ dhyānaṃ nirviṣayaṃ manaḥ।
snānaṃ manomalatyāgaḥ śaucamindriyanigrahaḥ ॥ 2॥

brahmāmṛtaṃ pibedbhaikṣamācareddeharakṣaṇe ।
vasedekāntiko bhūtvā caikānte dvaitavarjite ।
ityevamācareddhīmānsa evaṃ muktimāpnuyāt ॥ 3॥

jātaṃ mṛtamidaṃ dehaṃ mātāpitṛmalātmakam ।
sukhaduḥkhālayāmedhyaṃ spṛṣṭvā snānaṃ vidhīyate ॥ 4॥

dhātubaddhaṃ mahārogaṃ pāpamandiramadhruvam ।
vikārākāravistīrṇaṃ spṛṣṭvā snānaṃ vidhīyate ॥ 5॥

navadvāramalasrāvaṃ sadā kāle svabhāvajam ।
durgandhaṃ durmalopetaṃ spṛṣṭvā snānaṃ vidhīyate ॥ 6॥

mātṛsūtakasambandhaṃ sūtake saha jāyate ।
mṛtasūtakajaṃ dehaṃ spṛṣṭvā snānaṃ vidhīyate ॥ 7॥

ahammameti viṇmūtralepagandhādimocanam ।
śuddhaśaucamiti proktaṃ mṛjjalābhyāṃ tu laukikam ॥ 8॥

cittaśuddhikaraṃ śaucaṃ vāsanātrayanāśanam ।
jñānavairāgyamṛttoyaiḥ kṣālanācchaucamucyate ॥ 9॥

advaitabhāvanābhaikṣamabhakṣyaṃ dvaitabhāvanam ।
guruśāstroktabhāvena bhikṣorbhaikṣaṃ vidhīyate ॥ 10॥

vidvānsvadeśamutsṛjya saṃnyāsānantaraṃ svataḥ ।
kārāgāravinirmuktacoravaddūrato vaset ॥ 11॥

ahaṅkārasutaṃ vittabhrātaraṃ mohamandiram ।
āśāpatnī tyajedyāvattāvanmukto na saṃśayaḥ ॥ 12॥

mṛtā mohamayī mātā jāto bodhamayaḥ sutaḥ ।
sūtakadvayasamprāptau kathaṃ sandhyāmupāsmahe ॥ 13॥

hṛdākāśe cidādityaḥ sadā bhāsati bhāsati ।
nāstameti na codeti kathaṃ sandhyāmupāsmahe ॥ 14॥

ekamevādvitīyaṃ yadgurorvākyena niścitam ।
etadekāntamityuktaṃ na maṭho na vanāntaram ॥ 15॥

asaṃśayavatāṃ muktiḥ saṃśayāviṣṭacetasām ।
na muktirjanmajanmānte tasmādviśvāsamāpnuyāt ॥ 16॥

karmatyāgānna saṃnyāso na preṣoccāraṇena tu ।
sandhau jīvātmanoraikyaṃ saṃnyāsaḥ parikīrtitaḥ ॥ 17॥

vamanāhāravadyasya bhāti sarveṣaṇādiṣu ।
tasyādhikāraḥ saṃnyāse tyaktadehābhimāninaḥ ॥ 18॥

yadā manasi vairāgyaṃ jātaṃ sarveṣu vastuṣu ।
tadaiva saṃnyasedvidvānanyathā patito bhavet ॥ 19॥

dravyārthamannavastrārthaṃ yaḥ pratiṣṭhārthameva vā ।
saṃnyaseddubhayabhraṣṭaḥ sa muktiṃ nāptumarhati ॥ 20॥

uttamā tattvacintaiva madhyamaṃ śāstracintanam ।
adhamā mantracintā ca tīrthabhrāntyadhamādhamā ॥ 21॥

anubhūtiṃ vinā mūḍho vṛthā brahmaṇi modate ।
pratibimbitaśākhāgraphalāsvādanamodavat ॥ 22॥

na tyajeccedyatirmukto yo mādhukaramātaram ।
vairāgyajanakaṃ śraddhākalatraṃ jñānanandanam ॥ 23॥

dhanavṛddhā vayovṛddhā vidyāvṛddhāstathaiva ca ।
te sarve jñānavṛddhasya kiṃkarāḥ śiṣyakiṃkarāḥ ॥ 24॥

yanmāyayā mohitacetaso mā-
mātmānamāpūrṇamalabdhavantaḥ ।
paraṃ vidagdodharapūraṇāya
bhramanti kākā iva sūrayo'pi ॥ 25॥

pāṣāṇalohamaṇimṛṇmayavigraheṣu
pūjā punarjananabhogakarī mumukṣoḥ ।
tasmādyatiḥ svahṛdayārcanameva kuryā-
dbāhyārcanaṃ pariharedapunarbhavāya ॥ 26॥

antaḥpūrṇo bahiḥpūrṇaḥ pūrṇakumbha ivārṇave ।
antaḥśūnyo bahiḥśūnyaḥ śūnyakumbha ivāmbare ॥27॥

mā bhava grāhyabhāvātmā grāhakātmā ca mā bhava ।
bhāvanāmakhilaṃ tyaktvā yacchiṣṭaṃ tanmayo bhava ॥ 28॥

draṣṭṛdarśanadṛśyāni tyaktvā vāsanayā saha ।
darśanaprathamābhāsamātmānaṃ kevalaṃ bhaja ॥ 29॥

saṃśāntasarvasaṃkalpā yā śilāvadavasthitiḥ ।
jāgrannidrāvinirmuktā sā svarūpasthitiḥ parā ॥ 30॥

iti dvitīyo'dhyāyaḥ ॥ 2॥

ahamasmi paraścāsmi brahmāsmi prabhavo'smyaham ।
sarvalokaguruścāmi sarvaloke'smi so'smyaham ॥ 1॥

ahamevāsmi siddho'smi śuddho'smi paramo'smyaham ।
ahamasmi somo'smi nityo'smi vimalo'smyaham ॥ 2॥

vijñāno'smi viśeṣo'smi somo'smi sakalo'smyaham ।
śubho'smi śokahīno'smi caitanyo'smi samo'smyaham ॥ 3॥

mānāvamānahīno'smi nirguṇo'smi śivo'smyaham ।
dvaitādvaitavihīno'smi dvandvahīno'smi so'smyaham ॥ 4॥

bhāvābhāvavihīno'smi bhāsāhīno'smi bhāsmyaham ।
śūnyāśūnyaprabhāvo'smi śobhanāśobhano'smyaham ॥ 5॥

tulyātulyavihīno'smi nityaḥ śuddhaḥ sadāśivaḥ ।
sarvāsarvavihīno'smi sāttviko'smi sadāsmyaham ॥ 6॥

ekasaṅkhyāvihīno'smi dvisaṅkhyāvāhanaṃ na ca ।
sadasadbhedahīno'smi saṅkalpsrahitosmyaham ॥ 7॥

nānātmabhedahīno'smi hyakhaṇḍānandavigrahaḥ ।
nāhamasmi na cānyo'smi dehādirahito'smyaham ॥ 8॥

āśrayāśrayahīno'smi ādhārarahito'smyaham ।
bandhamokṣādihīno'smi śuddhabrahmāsmi so'smyaham ॥ 9॥

cittādisarvahīno'smi paramo'smi parātparaḥ ।
sadā vicārarūpo'smi nirvicāro'smi so'smyaham ॥ 10॥

akārokārarūpo'smi makaro'smi sanātanaḥ ।
dhātṛdhyānavihīno'smi dhyeyahīno'smi so'smyaham ॥ 11॥

sarvapūrṇasvarūpo'smi saccidānandalakṣaṇaḥ ।
sarvatīrthasvarūpo'smi paramātmāsmyahaṃ śivaḥ ॥ 12॥

lakṣyālakṣyavihīno'smi layahīnaraso'smyaham ।
mātṛmānavihīno'smi meyahīnaḥ śivo'smyaham ॥ 13॥

na jagatsarvadraṣṭāsmi netrādirahitosmyaham ।
pravṛddho'smi prabuddho'smi prasanno'smi paro'smyaham ॥ 14॥

sarvendriyavihīno'smi sarvakarmakṛdapyaham ।
sarvavedāntatṛpto'smi sarvadā sulabho'smyaham ॥ 15॥

muditāmuditākhyo'smi sarvamaunaphalo'smyaham ।
nityacinmātrarūpo'smi sadā saccinmayo'smyaham ॥ 16॥

yatkiñcidapi hīno'smi svalpamapyati nāsmyaham ।
hṛdayagranthihīno'smi hṛdayāmbhojamadhyagaḥ ॥ 17॥

ṣaḍvikāravihīno'smi ṣaṭkoṣarahito'smyaham ।
ariṣaḍvargamukto'smi antarādantaro'smyaham ॥ 18॥

deśakālavimukto'smi digambarasukho'smyaham ।
nāsti nāsti vimukto'smi nakārahito'smyaham ॥ 19॥

akhaṇḍākāśarūpo'smi hyakhaṇḍākāramasmyaham ।
prapañcamuktacitto'smi prapañcarahito'smyaham ॥ 20॥

sarvaprakāśarūpo'smi cinmātrajyotirasmyaham ।
kālatrayavimukto'smi kāmādirahito'smyaham ॥ 21॥

kāyikādivimukto'smi nirguṇaḥ kevalo'smyaham ।
muktihīno'smi mukto'smi mokṣahīno'smyaham sadā ॥ 22॥

satyāsatyādihīno'smi sanmātrānnāsmyahaṃ sadā ।
gantavyadeśahīno'smi gamanādivivarjitaḥ ॥ 23॥

sarvadā samarūpo'smi śānto'smi puruṣottamaḥ ।
evaṃ svānubhavo yasya so'hamasmi na saṃśayaḥ ॥ 24॥

yaḥ śṛṇoti sakṛdvāpi brahmaiva bhavati svayamityupaniṣat ॥

iti tṛtīyo'dhyāyaḥ ॥ 3॥

oṃ āpyāntu māmāṅgāni vākprāṇaścakṣuḥ śrotra-
matho balamindriyāṇi ca । sarvāṇi sarvaṃ brahmopaniṣadaṃ
māhaṃ brahma nirākuryāṃ mā mā brahma nirākaro-
danirākaraṇamastvanirākaraṇaṃ mestu tadātmani nirate ya
upaniṣatsu dharmāste mayi santu te mayi santu ॥

oṃ śāntiḥ śāntiḥ śāntiḥ ॥

iti maitreyyupaniṣatsamāptā ॥